1 Ut anajwan kik’ulman naq, sa’ junpaat chirix naq laj Amalikiah kixtaw li awa’b’ejihom, ki’ok chixk’eeb’aleb’ xch’ool laj Lamanita re xik’ te’ril lix tenamit laj Nefi; relik chi yaal, kixxaqab’eb’ li winq re te’raatinaheb’ laj Lamanita sa’ xb’een chaq lix najt xteramil kab’leb’, re xik’ te’rileb’ laj Nefita.

2 Ut chi jo’kan kixk’eheb’ xch’ool re xik’ te’rileb’ laj Nefita, jo’kan naq sa’ nach’ok chaq xraqik li xb’elelaju chihab’ rawa’b’ejileb’ laj raqol aatin, chirix xtawb’al lix k’oxlahom toj sa’ li kutan a’an, relik chi yaal, chirix k’ehe’k choq’ rey sa’ xb’eeneb’ laj Lamanita, kixsik’ awa’b’ejink sa’ xb’een chixjunil li ch’och’, relik chi yaal, ut chixjunileb’ li ani wankeb’ sa’ li ch’och’, eb’ laj Nefita jo’eb’ ajwi’ laj Lamanita.

3 Jo’kan naq ak kixtaw lix k’oxlahom, xb’aan naq kixkawob’resi li raameb’ laj Lamanita ut kixmutz’ob’resi lix k’a’uxleb’, ut kireek’asiheb’ chi josq’o’k, jo’kan naq kixch’utub’ jun teep nim rajlankil re te’xik chixpleetinkileb’ laj Nefita.

4 Xb’aan naq a’an, sa’ xk’ab’a’ xnimal rajlankileb’ lix tenamit, k’eek’o xch’ool chi numtaak sa’ xb’eeneb’ laj Nefita ut chixk’amb’aleb’ chi moosil.

5 Ut chi jo’kan kixxaqab’ xkomoneb’ laj Tzoramita choq’ ^axb’eenil aj taqlanel, rik’in naq eb’ a’an q’axal wi’chik neke’xnaw ru lix kawileb’ xmetz’ew laj Nefita, ut li na’ajej neke’xkol wi’ rib’, ut li jar raqal q’un ru re lix tenamiteb’; jo’kan naq kixxaqab’eb’ chi wank choq’ xb’eenileb’ aj taqlanel sa’ xb’eeneb’ lix teep aj pleet.

6 Ut kik’ulman naq ke’xk’am lix teep, ut xkoheb’ chi uub’ej sa’ xjayal li ch’och’ Tzarahemla sa’ li yamyookil ch’och’.

7 Anajwan kik’ulman, naq yoo chaq laj Amalikiah chixtawb’al chi jo’kan li wankilal rik’in b’alaq’ ut tik’ti’, naq laj Moroni chi junpak’al chik, kiwan ^achixkawresinkil xk’a’uxleb’ li tenamit re naq tiikaqeb’ chixpaab’ankil li Qaawa’ lix Dios.

8 Relik chi yaal, kiwan chaq chixk’eeb’al xkawilaleb’ li teep aj pleet reheb’ laj Nefita, ut chixkab’lankil li kok’ kawil na’ajej, malaj li na’ajej te’xkol wi’ rib’; chixtuub’ankil li uul ch’och’ chi sutsu chirix re te’wanq lix teep aj pleet sa’ xyanqeb’, ut chixyiib’ankil ajwi’ li xaqxookil tz’ak rik’in pek re xsutinkileb’ rix, chi sutsu chirixeb’ lix tenamit ut lix nub’aal lix ch’och’eb’, relik chi yaal, chi sutsu tz’aqal chirix li ch’och’.

9 Ut sa’eb’ li kawresinb’il na’ajej li q’axal q’uneb’ ru kixk’e xk’ihal rajlankileb’ li winq; ut chi jo’kan kixk’e xkawilal ut kixnima xmetz’ew li ch’och’ li eechaninb’il xb’aaneb’ laj Nefita.

10 Ut chi jo’kan kiwan chixkawresinkil rib’ re ^axxaqab’ankil li ach’ab’aak wankeb’ wi’, lix ch’och’eb’, li rixaqileb’, ut lix kok’aleb’, ut lix tuqtuukilaleb’, ut re naq te’wanq xyu’am choq’ re li Qaawa’ lix Dios, ut re te’xk’uula xwankil lix na’lebeb’ laj Kristiano jo’ li yeeb’il re xb’aaneb’ li xik’ neke’ilok reheb’.

11 Ut laj Moroni a’an jun winq kaw rib’ ut nim xmetz’ew; a’an jun winq tz’aqal re ru ^axnawom; relik chi yaal, jun winq li moko nasaho’ ta xch’ool rik’in hoyok kik’; jun winq li nasaho’ li raam rik’in li xyaalalil ut li ach’ab’aak wan wi’ lix ch’och’, ut eb’ li ras riitz’in, chiru li moosil ut li loq’b’il preexil;

12 Relik chi yaal, jun winq li naniman xch’ool rik’in b’antioxink chiru lix Dios, xb’aan li k’iila usilal ut osob’tesink li naxq’axtesi sa’ xb’een lix tenamit; jun winq li nak’anjelak chi numtajenaq choq’ re ^axchaab’ilal ut xkolb’aleb’ rix lix tenamit.

13 Relik chi yaal, a’an ut jun winq li xaqxo chi kaw sa’ xpaab’ankil li Kristo, ut ^akixye chaq rik’in xaqab’anb’il aatin naq tixkol rix lix tenamit, ut li k’a’ru xk’ulub’, ut lix ch’och’, ut li napaab’an wi’, toj reetal ajwi’ xsachik xkik’el a’an.

14 Anajwan eb’ laj Nefita tzolb’ileb’ naq te’xkol rib’ chiruheb’ li xik’ neke’ilok reheb’, toj reetal ajwi’ xhoyb’al li kik’ wi jo’kan taa’ajmanq ru; relik chi yaal, ut tzolb’ileb’ naq ^amaajo’q’e te’xb’aanu li rahob’tesink, relik chi yaal, ut maajo’q’e te’xtaqsi li yok’leb’ ch’iich’, ka’ajwi’ chiru jun li xik’ na’ilok reheb’, ka’ajwi’ re naq te’xkol xyu’ameb’.

15 Ut a’in lix paab’aaleb’, naq rik’in xb’aanunkil chi jo’kan li Dios tixk’eheb’ chi usaak sa’ li ch’och’, malaj sa’ jalan chik aatin, wi tiikeb’ xch’ool chixpaab’ankil lix taqlahom li Dios naq a’an tixk’eheb’ chi usaak sa’ li ch’och’; relik chi yaal, tixye reheb’ naq te’eeleliq, malaj naq te’xkawresi rib’ choq’ re li pleet, jo’ chanru li xuwajel ru li te’wanq wi’;

16 Ut jo’kan ajwi’, naq li Dios tixk’e chixnaweb’ b’ar te’xik re xkolb’al rib’eb’ chiruheb’ li xik’ neke’ilok reheb’, ut sa’ xb’aanunkil chi jo’kan, li Qaawa’ tixkoleb’ chaq; a’in ut lix paab’aal laj Moroni, ut lix ch’ool kixnima xloq’al rik’in; ^amoko rik’in ta li hoyok kik’, rik’in b’an xb’aanunkil li chaab’il, ut xkolb’al rix lix tenamit, relik chi yaal, rik’in xpaab’ankil lix taqlahom li Dios, relik chi yaal, rik’in xxaqab’ankil rib’ chiru li maa’usilal.

17 Relik chi yaal, ninye chi tz’aqal yaal eere, wi ta chixjunileb’ li winq wanjenaqeb’, ut ke’wan, ut junelik te’wanq, jo’ chanchan laj Moroni, k’ehomaq reetal, kichiq’man raj chi junajwa tz’aqal lix wankilal xb’alb’a; relik chi yaal, ^alaj tza maajo’q’e raj taawanq xwankil sa’ xb’een xch’ooleb’ li ralal xk’ajoleb’ li winq.

18 K’ehomaq reetal, a’an jun winq chanchan laj Ammon, ralal laj Mosiah, relik chi yaal, ut jo’eb’ ajwi’ li jun ch’ol chik ralal laj Mosiah, relik chi yaal, ut jo’kan ajwi’ laj Alma ut eb’ li ralal, xb’aan naq a’aneb’ chixjunileb’ winq re li Dios.

19 Anajwan k’ehomaq reetal, laj Helaman ut eb’ lix komon moko ke’ka’ch’ino’ ta chiru laj Moroni sa’ xtenq’ankil li tenamit; xb’aan naq eb’ a’an ke’xjultika li raatin li Dios, ut ke’xkub’si xha’ choq’ re li jalb’a-k’a’uxlej chixjunileb’ li winq li ani ke’ajok re ab’ink chiru raatineb’.

20 Ut chi jo’kan neke’xik, ut eb’ li tenamit ^ake’xtuulanob’resi rib’ xb’aan li raatineb’, jo’kan naq k’a’jo’ ^bke’usilaak xb’aan li Qaawa’, ut chi jo’kan moko ke’wan ta li pleet ut li wech’ok-ib’ sa’ xyanqeb’ a’an, relik chi yaal, chiru ajwi’ xnumik kaahib’ chihab’.

21 A’b’anan, jo’ ak kinye, naq yoo chi nach’ok xraqik li xb’elelaju chihab’, relik chi yaal, us ta ke’wan sa’ tuqtuukilal chirib’ileb’ rib’, ke’mine’ ru chi ink’a’ neke’raj, chixpleetinkileb’ li ras riitz’in, a’eb’ laj Lamanita.

22 Relik chi yaal ut, moko kiraqe’ ta xpleeteb’ chiru xnumik k’iila chihab’ rik’ineb’ laj Lamanita, us ta k’a’jo’ naq ink’a’ ke’raj.

23 Anajwan, ^araheb’ xch’ool chixchapb’al li k’anjeleb’aal re pleet chiruheb’ laj Lamanita, xb’aan naq ink’a’ neke’saho’ xch’ooleb’ rik’in xhoyb’al li kik’; relik chi yaal, ut moko ka’aj ta wi’ a’in—raheb’ xch’ool naq xb’aaneb’ a’an q’axal k’iheb’ li ras riitz’in te’isiiq chaq sa’ li ruchich’och’ a’in toj sa’ jun li ruchich’och’ re junelik, chi moko kawresinb’ileb’ ta chixk’ulb’al lix Dios.

24 A’b’anan, ink’a’ kiru ke’xkanab’ chi isiik lix yu’ameb’, re te’kamsiiq ^arixaqileb’ ut ralal xk’ajoleb’ xb’aan xyib’al ru lix kaqaleb’ xch’ool li ani ke’wan chaq junxil choq’ ras riitz’ineb’, relik chi yaal, ut li ^bke’risi chaq rib’ sa’ lix igleeseb’, ut ke’el chaq rik’ineb’ ut xkoheb’ chaq chixsachb’aleb’, rik’in xjunajinkil rib’ rik’ineb’ laj Lamanita.

25 Relik chi yaal, ink’a’ ke’ru chixkuyb’al naq eb’ li ras riitz’ineb’ te’saho’q xch’ool xb’aan xhoyb’al xkik’eleb’ laj Nefita, naq toj wan ani taapaab’anq re lix taqlahom li Dios, xb’aan naq lix yeechi’ihom li Qaawa’ a’an naq wi te’xpaab’ lix taqlahom te’usaaq sa’ li ch’och’.