1 O kɛtseankyɛ meyɛ ɔbɔfo, na metum enya m’akoma n’apɛdze, na metum ekyin dze Nyame ne totorobɛnto akasa, medze ndze awosow asaase atsẽa mu akã nnuho ho nsɛm akyerɛ nyimpa biara!

2 Nyew, nkyɛ medze ndze a ɔbobɔ mu dɛ sinaman akã nnuho nye ɔpon nhyehyɛɛ ho nsɛm akyerɛ ɔkra biara ama woeenu hɔnho na ^awɔaba hɛn Nyankopɔn nkyɛn, amma awerɛhow ammba asaase nyina enyi do bio.

3 Na mbom hwɛ, meyɛ nyimpa, na menam me pɛ kwan do yɛ bɔn; na ɔsɛ dɛ m’enyi sɔ ndzɛmba a Ewuradze dze ama me no ho.

4 Ɔnnsɛ dɛ mehaw moho wɔ mara m’apɛdze, dza ɔyɛ Nyankopɔn a odzi pɛrpɛr no ne ɔmom a osi pi no, na minyim dɛ ɔdze ma adasa dɛ mbrɛ hɔn ^aapɛdze tse, dɛ ɔyɛ owu anaa nkwa; nyew, minyim dɛ ɔahyɛ ɔmom a ɔnnsesã dze ama adasa dɛ mbrɛ hɔn ^bpɛ tse, dɛ ɔyɛ nkwagye anaa ɔsɛɛ.

5 Nyew, na minyim dɛ papa na bɔn gu adasa nyina enyim; nyia onnyim soronko a ɔda papa na bɔn ntamu no nndzi fɔ; na mbom nyia ^aonyim papa na bɔn no, ɔno na wɔama no ho kwan dɛ ɔmfa dza ɔpɛ, dɛ ɔpɛ papa anaa bɔn, nkwa anaa owu, enyigye anaa dza ne ^btsibowa bɛhaw no.

6 Afei, ber a mehu na minyim dɛm ndzɛmba yinom yi, ebɛnadze na morohwehwɛ bio kã dza ɔwɔ dɛ meyɛ ho dɛ mebɛyɛ edwuma a wɔafrɛ me dɛ menyɛ no?

7 Ebɛnadze ntsi na mepɛ dɛ meyɛ dɛ ɔbɔfo ama meetum makasa akyerɛ obiara wɔ asaase n’ano n’ano nyina mu?

8 Na hwɛ, Ewuradze ama ^aaman nyina kwan dɛ wɔmfa hɔnankasa hɔn man mu ^bkasa nkã n’asɛm no nkyerɛ, nyew, ɔnam ne nyansaa do dze dza ^cohu dɛ ɔsɛ dɛ wonya biara ama hɔn; dɛm ntsi yehu dɛ Ewuradze kyerɛkyerɛ wɔ ne nyansaa mu wɔ dza ɔtsen na ɔyɛ nokwar mu.

9 Minyim dza Ewuradze ahyɛ me dɛ menyɛ, na mehyɛ moho enyimnyam wɔ mu. Mennhyɛ moho ^aenyimnyam wɔ dza mara meyɛ ho, mbom mehyɛ moho enyimnyam wɔ dza Ewuradze ahyɛ me dɛ menyɛ no ho, nyew, na iyi na nye m’enyimnyam, dɛ annhwɛ a mebɛyɛ wo edwindadze wɔ Nyankopɔn ne nsamu dze atwe akra aba nnuho mu, na iyi na ɔma m’enyigye.

10 Na hwɛ, sɛ muhu m’enuanom pii a woenu hɔnho nokwar mu na wɔaba Ewuradze hɔn Nyankopɔn hɔ a, nna dɛw ahyɛ me kra mã; afei ɔma mekaa ^adza Ewuradze ayɛ ama me, nyew, dɛ oetsie me mpaabɔ mpo; nyew, ɔma mekaa n’ehumbɔbɔr abasa a ɔtsenee wɔ mo do no.

11 Nyew, na mekaa m’egyanom so hɔn ndɔmmum no; na minyim dɛ ɔyɛ nokwar dɛ ^aEwuradze yii hɔn fii nkowaasom mu, na ɔnam iyi do dze kyekyeer n’asɔr; nyew, Ewuradze Nyankopɔn no, Abraham ne Nyankopɔn, Isaac ne Nyankopɔn nye Jacob ne Nyankopɔn no na oyii hɔn fii nkowaasom mu.

12 Nyew, mekaa m’egyanom hɔn ndɔmmumfa aber nyinara; na dɛm Nyankopɔn kor noara a ^aɔgyee hɔn fii Egyptfo hɔn nsamu no nna oyii hɔn fii nkowaasom mu.

13 Nyew, na dɛm Nyankopɔn kor noara so na ɔkyekyer n’asɔr wɔ hɔn mu; nyew, dɛm Nyankopɔn kor noara so na ɔfrɛɛ me ɔfrɛ krɔnkrɔn, dɛ menkã asɛm no nkyerɛ dɔm yi, na ɔama me konyimdzi kɛsenara, na ɔno mu na ɔma me ^adɛw hyɛ mã.

14 Na mbom menndzi dɛw wɔ mo nko mo ^akonyimdzi ho, mbom me dɛw hyɛ mã osian m’enuanom no so a wɔkɔr Nephi asaase do no hɔn konyimdzi ntsi.

15 Hwɛ, wɔayɛ edwuma mbordo, na wɔdze ndɔbaa pii eduaba; na mbrɛ hɔn akatua dua dɔɔ sõ a!

16 Afei, sɛ modwen m’enuanom yinom hɔn konyimdzi ho a nna me kra eguan araa ma ɔatsew noho koraa mpo efi me nyimpadua ho, na dɛ mbrɛ ɔyɛ no, dɛmara so na m’enyigye ne kɛse tse.

17 Na afei Nyankopɔn mma m’enuanom yinom ntsena Nyankopɔn n’ahenman no mu; nyew, na hɔn so a wɔyɛ hɔn edwuma mu ndɔbaa nyina so ntsena hɔ a worimmfi edzi bio, na mbom dɛ wobeyi no ayɛw afebɔɔ. Na Nyankopɔn mma ɔnyɛ hɔ dɛ mbrɛ me nsɛm tse, na dɛ mbrɛ makã no so mpo. Amen.