1 Ut k’ehomaq reetal, kik’ulman anajwan naq eb’ laj Lamanita a’an q’axal wi’chik ke’chal xjosq’il xb’aan naq ke’xkamsiheb’ chaq li ras riitz’ineb’, jo’kan naq ke’xxaqab’ aatin naq te’reeqaju sa’ xb’eeneb’ laj Nefita; ut ink’a’ chik ke’xsik’ xkamsinkil li tenamit aj ^aAnti-Nefi-Lehi sa’ li kutan a’an.

2 Ke’xk’am b’an lix teepeb’ aj pleet ut xkoheb’ sa’eb’ lix nub’aal li ch’och’ Tzarahemla, ut ke’t’ane’ sa’ xb’eeneb’ li tenamit li wankeb’ sa’ li ch’och’ Ammonihah ut ^ake’xsacheb’.

3 Ut chirix a’an ke’wan sa’ k’iila pleet rik’ineb’ laj Nefita, sa’ li ke’alinasiik wi’ ut ke’kamsiik.

4 Ut sa’ xyanqeb’ laj Lamanita li kamsinb’ileb’ wankeb’ ka’ch’in chik ma chixjunileb’ li ^ariyajil laj Amulon ut eb’ lix komon, a’aneb’ chaq laj tij re laj Noe, ut ke’kamsiik xb’aan ruq’eb’ laj Nefita;

5 Ut li rela’eb’, chirix naq ke’eelelik sa’ li yamyookil ch’och’ sa’ releb’ saq’e, ut chirix xmaq’b’al wankilal ut awa’b’ejil sa’ xb’eeneb’ laj Lamanita, chirix xk’eeb’al chi ^aoso’k rik’in xam naab’al reheb’ laj Lamanita xb’aan xpaab’ahomeb’—

6 Xb’aan naq naab’al ^areheb’, chirix xnumsinkil naab’al li sachk ut k’iila ch’a’ajkilal, ke’ok chi eek’asiik xch’ool sa’ xjultikankil reheb’ li ^baatin li ke’xjultika chaq laj Aaron ut eb’ lix komon sa’ xch’och’eb’; jo’kan naq ke’ok chixkanab’ankil xpaab’ankil li ^cna’leb’ kanab’anb’il chaq reheb’ xb’aaneb’ lix yuwa’, ut ke’ok chixpaab’ankil li Qaawa’, ut naq a’an kixk’e nimla wankilal reheb’ laj Nefita; ut chi jo’kan wankeb’ naab’al reheb’ li ke’jale’ xch’ool sa’ li yamyookil ch’och’.

7 Ut kik’ulman naq eb’ laj taqlanel a’an li rela’eb’ ralal xk’ajol laj ^aAmulon ke’xk’eheb’ chi ^bkamsiik, relik chi yaal, chixjunileb’ li ke’paab’an re li k’a’aq re ru a’in.

8 Anajwan xb’aan li kamsink a’in naab’al reheb’ li ras riitz’in ke’eek’asiik chi josq’o’k; ut ki’ok chi wank wech’ok-ib’ sa’ li yamyookil ch’och’; ut eb’ laj Lamanita ke’ok ^achixyoob’aleb’ li riyajil laj Amulon ut eb’ lix komon ut ke’ok chixkamsinkileb’; ut eb’ a’an ke’eelelik chiru li yamyookil ch’och’ sa’ releb’ saq’e.

9 Ut k’ehomaq reetal, neke’yohe’ toj sa’ li kutan a’in xb’aaneb’ laj Lamanita. Chi jo’kan kik’ehe’ chi uxmank li raatin laj Abinadi, li kixye chirix riyajileb’ laj tij li ke’xk’e chixnumsinkil li kamk rik’in xam.

10 Xb’aan naq a’an kixye reheb’: Li k’a’ru ^ateeb’aanu we taawanq choq’ reetalil li k’a’aq re ru toj taachalq.

11 Anajwan ut laj Abinadi a’an li xb’een li kik’uluk re li ^akamk rik’in xam xb’aan xpaab’ankil li Dios; anajwan a’in xyaalalil li kixye, naq naab’al te’xk’ul li kamk rik’in xam, jo’ chanru li kixk’ul a’an.

12 Ut kixye reheb’ laj tij re laj Noe naq eb’ li riyajil te’xk’eheb’ naab’al chi kamsiik, jo’ chanru ajwi’ li ki’ux re a’an, ut naq eb’ a’an te’jek’iiq chi najt ut te’kamsiiq, jo’ chanru jun li karneer li maak’a’ aj ilol re, na’alinasiik ut nakamsiik xb’aaneb’ li k’iche’ xul; anajwan ut k’ehomaq reetal, xk’ute’ naq yaal li aatin a’in, xb’aan naq ke’alinasiik xb’aaneb’ laj Lamanita, ut ke’yohe’, ut ke’sak’e’.

13 Ut kik’ulman naq chirix naq ke’ril laj Lamanita naq ink’a’ ke’ru chi numtaak sa’ xb’eeneb’ laj Nefita ke’sutq’i sa’ xch’och’eb’ a’an; ut naab’al reheb’ ke’q’axonk chi wank sa’ li ch’och’ Ismael ut li ch’och’ Nefi, ut ke’xjunaji rib’ rik’in lix tenamit li Dios, a’aneb’ li tenamit aj ^aAnti-Nefi-Lehi.

14 Ut eb’ a’an ^ake’xmuq ajwi’ lix k’anjeleb’aal re pleet, jo’ chanru ke’xb’aanu chaq li ras riitz’ineb’, ut ke’ok choq’ jun tenamit tiik xch’ool; ut ke’b’eek sa’ xb’e li Qaawa’, ut k’eek’ookeb’ xch’ool chixpaab’ankil lix taqlahom ut lix k’uub’anb’il aatin.

15 Relik chi yaal, ut ke’xpaab’ lix chaq’rab’ laj Moises; xb’aan naq ki’ajman ru naq toj te’xpaab’ lix chaq’rab’ laj Moises, xb’aan naq toj maji’ natz’aqlok ru chixjunil. A’b’anan, us ta wan lix ^achaq’rab’ laj Moises, ke’ril chi uub’ej lix k’ulunik li Kristo, ut ke’xk’oxla naq lix chaq’rab’ laj Moises a’an jun ^breetalil lix k’ulunik, ut ke’xpaab’ naq tento te’xpaab’ li ^ck’utb’il b’aanuhom a’an toj tixtaw xq’ehil naq a’an taak’utb’esiiq chiruheb’.

16 Anajwan moko ke’xk’oxla ta naq li ^akolb’a-ib’ nachal xb’aan ^bxchaq’rab’ laj Moises; a’b’an lix chaq’rab’ laj Moises kik’anjelak re xkawob’resinkil lix paab’aaleb’ chirix li Kristo; ut chi jo’kan ke’xk’uula jun ^cxyo’onihomeb’ rik’in li paab’aal, choq’ re li kolb’a-ib’ re junelik, rik’in xkanab’ankil rib’ chiru li musiq’ej re profeetil aatin, li na’aatinak chirix li k’a’aq re ru a’an li toj taachalq.

17 Ut anajwan k’ehomaq reetal, laj Ammon, ut laj Aaron, ut laj Omner, ut laj Himni, ut eb’ lix komon ke’saho’ sa’ xch’ool chi numtajenaq, xb’aan li usaak li ke’xk’ul chaq sa’ xyanqeb’ laj Lamanita, rik’in rilb’al naq li Qaawa’ kixk’e chaq reheb’ jo’ chanru lix ^atijeb’, ut naq kixtz’aqob’resi ru li raatin chiruheb’ sa’ li junq raqal.