1 Ut kik’ulman sa’ li xjunlaju chihab’ rawa’b’ejileb’ laj raqol aatin sa’ xb’een lix tenamit laj Nefi, sa’ oob’ xb’e li xkab’ po, chirix naq wanjenaq naab’al li tuqtuukilal sa’ li ch’och’ Tzarahemla, ut chiru jarub’aq chihab’ maajun pleet chi moko wech’ok-ib’ wanjenaq, toj reetal sa’ li ro’ kutan sa’ li xkab’ po chiru li xjunlaju chihab’, ki’ab’iman xyaab’ li pleet chiru li ch’och’.

2 Xb’aan naq k’ehomaq reetal, eb’ li teep aj pleet reheb’ laj Lamanita ke’ok chaq sa’ li jun pak’al wan wi’ li yamyookil ch’och’, chiru xnub’aal li ch’och’, toj sa’ li tenamit ^aAmmonihah, ut ke’ok chixkamsinkileb’ li ani wankeb’ aran ut chixsachb’al li tenamit.

3 Ut anajwan kik’ulman, chi maji’aq neke’ru laj Nefita chixch’utub’ankil jun teep aj pleet tz’aqal xnimal re ralinasinkileb’ chaq sa’ li ch’och’, ak ^ake’xsacheb’ li ani wankeb’ sa’ li tenamit Ammonihah, ut jo’kaneb’ ajwi’ junjunq chixk’atq lix nub’aal Noe, ut jalaneb’ chik ke’xk’am chi preexil chiru li yamyookil ch’och’.

4 Anajwan kik’ulman naq eb’ laj Nefita ke’raj xtawb’aleb’ li ani ke’k’ame’ chaq chi preexil chiru li yamyookil ch’och’.

5 Jo’kan ut, li ani xaqab’anb’il chaq choq’ xb’eenil aj taqlanel sa’ xb’eeneb’ li teep aj pleet reheb’ laj Nefita (ut aj Tzoram xk’ab’a’ a’an, ut wiib’eb’ li ralal, aj Lehi ut aj Aha)—anajwan laj Tzoram, ut eb’ li wiib’ chi ralal, rik’in xnawb’al naq laj Alma a’an taqenaqil aj tij sa’ xb’een li iglees, ut rab’ihomeb’ resil naq wan rik’in li musiq’ej re profeetil aatin, jo’kan naq ke’wulak rik’in, ut ke’raj xnawb’al rik’in a’an b’ar taaraj li Qaawa’ naq te’xik chiru li yamyookil ch’och’ re xsik’b’aleb’ li ras riitz’in, li ke’k’ame’ chaq chi preexil xb’aaneb’ laj Lamanita.

6 Ut kik’ulman naq laj Alma ^akixpatz’ re li Qaawa’ chirix li na’leb’ a’an. Ut laj Alma kisutq’i ut kixye reheb’: K’ehomaq reetal, eb’ laj Lamanita te’xq’ax li nima’ Sidon sa’ li yamyookil ch’och’ sa’ xtz’e li saq’e, le’ taqe’q chirix lix nub’aal li ch’och’ Manti. Ut k’ehomaq reetal aran teek’uleb’, chirix li nima’ Sidon sa’ xjayal li releb’ saq’e, ut aran li Qaawa’ tixq’axtesi aawe laa was aawiitz’in li k’amb’ileb’ chi preexil xb’aaneb’ laj Lamanita.

7 Ut kik’ulman naq laj Tzoram ut eb’ li ralal ke’xq’ax li nima’ Sidon, rochb’eeneb’ lix teep aj pleet, ut ke’b’eek aran chirix xnub’aal Manti toj sa’ li yamyookil ch’och’ sa’ xtz’e li saq’e, li wan chirix li nima’ Sidon sa’ xjayal li releb’ saq’e.

8 Ut ke’chal sa’ xb’eeneb’ li teep aj pleet reheb’ laj Lamanita, ut ke’jek’iik laj Lamanita ut ke’alinasiik sa’ li yamyookil ch’och’; ut ke’xk’ameb’ li ras riitz’in li ke’k’ame’ chaq chi preexil xb’aaneb’ laj Lamanita, ut maajun aamej kiwan li kisache’, reheb’ li ke’k’ame’ chi preexil. Ut ke’k’ame’ chaq xb’aaneb’ li ras riitz’in re te’reechani tz’aqal lix ch’och’eb’.

9 Ut chi jo’kan kiraqe’ li xjunlaju xchihab’eb’ laj raqol aatin, chi alinasinb’ileb’ chaq laj Lamanita sa’ li ch’och’, ut eb’ li wankeb’ aran Ammonihah ^ake’sachman; relik chi yaal, li junjunq chi yo’yookil aamej reheb’ laj Ammonihahita ^bke’sache’, ut jo’kan ajwi’ lix nimal ru tenamit, li ke’xye chaq naq li Dios ink’a’ naru chixsachb’al, sa’ xk’ab’a’ xnimal li ru.

10 A’b’an k’ehomaq reetal, chiru ^ajun kutan kikana chi sachso, ut ke’putz’iik li tib’elej xb’aaneb’ li tz’i’ ut li k’iche’ xul re li yamyookil ch’och’.

11 A’b’anan chirix k’iila kutan ke’tuub’aman lix tib’eleb’ chiru lix b’een li ch’och’, ut ke’muqe’ chi moko cham ta lix muqb’aleb’. Ut anajwan k’a’jo’ nim lix chuhil a’an, jo’kan naq eb’ li tenamit ink’a’ ke’ok chireechaninkil li ch’och’ Ammonihah chiru k’iila chihab’. Ut a’an lix Sachenaqileb’ laj Nehoril kiyeeman re; xb’aan naq a’eb’ li ke’k’amok re lix na’leb’ laj ^aNehor li ke’kamsiik, ut ke’kana chi sachenaq lix ch’och’eb’.

12 Ut eb’ laj Lamanita moko ke’chal ta wi’chik chixpleetinkileb’ laj Nefita toj sa’ li xkaalaju chihab’ rawa’b’ejileb’ laj raqol aatin sa’ xb’een lix tenamit laj Nefi. Ut chi jo’kan chiru oxib’ chihab’ lix tenamit laj Nefi ke’wan rajlal sa’ tuqtuukilal sa’ chixjunil li ch’och’.

13 Ut laj Alma ut laj Amulek xkoheb’ ut ke’xjultika li jalb’a-k’a’uxlej reheb’ li tenamit sa’eb’ lix ^asantil ochocheb’, ut sa’eb’ lix santil muheb’aaleb’, ut jo’kan ajwi’ sa’eb’ lix ^bch’utleb’aaleb’, li yiib’anb’ileb’ jo’ chanru neke’xb’aanu laj Judio.

14 Ut jo’ k’ihaleb’ li ke’ajok re rab’inkil li raatineb’, reheb’ a’an ke’xk’e li raatin li Dios, chi moko ^atiib’il ta ru anihaq, chi rajlal.

15 Ut chi jo’kan xkoheb’ laj Alma ut laj Amulek, ut jo’kaneb’ ajwi’ naab’al chik li ke’sik’e’ chaq ru choq’ re li k’anjel, re xjultikankil li aatin chiru chixjunil li ch’och’. Ut kipukan xxaqab’ankil li iglees chiru chixjunil li ch’och’, sa’ chixjunil li na’ajej chixsutam, sa’ xyanqeb’ chixjunil lix tenamiteb’ laj Nefita.

16 Ut moko kiwan ta ^aani terq’usinb’il xwankil sa’ xb’een ani chik sa’ xyanqeb’; li Qaawa’ kixhoy lix musiq’ sa’ chixjunil lix b’een li ch’och’ re xkawresinkil xk’a’uxleb’ li ralal xk’ajoleb’ li winq, malaj re xkawresinkil ^bxch’ooleb’ re xk’ulb’al li aatin li taak’utmanq sa’ xyanqeb’ sa’ xq’ehil lix k’ulunik—

17 Re naq moko te’kawuq ta chirix li aatin, re naq moko te’wanq ta chi maak’a’eb’ xpaab’aal ut te’xik sa’ li sache’k; re b’an te’ruuq chirab’inkil li aatin rik’in sahil ch’oolejil, ut jo’ jun ^aruq’ che’ te’jutz’ub’aaq sa’ li tz’aqal ^btoon che’, re naq te’ruuq chi ok sa’ ^cxhilob’aal li Qaawa’ lix Dios.

18 Anajwan eb’ ^alaj tij a’an li xkoheb’ sa’ xyanqeb’ li tenamit ke’xjultika naq mi’ux chixjunil li tik’ti’ik, ut li ^bb’alaq’ik, ut li ^ckaqalink, ut li wech’ij-ib’, ut li xik’ ilok, ut li hob’ok, ut li elq’ak, li maq’ok, li poqlenk, li kamsink, li muxuk sumsu, ut li k’iila paay chi yib’ ru k’a’uxlej, ut ke’xjultika naq ink’a’ raj tento taawanq li k’a’aq re ru a’in—

19 Ut ke’xch’olob’ resil li k’a’aq re ru tento taachalq sa’ junpaat, relik chi yaal, ke’xch’olob’ resil lix ^ak’ulunik li Ralal li Dios, li rahilal tixk’ul ut lix kamik, ut jo’kan ajwi’ lix waklijikeb’ li kamenaq chi yo’yo.

20 Ut naab’al reheb’ li tenamit ke’patz’ok chirix li na’ajej taachalq wi’ li Ralal li Dios, ut kik’ute’ chiruheb’ naq a’an ^atixk’ut rib’ chiruheb’ ^bchirix lix waklijik chi yo’yo; ut a’in ke’rab’i li tenamit rik’in nimla sahil ch’oolejil ut xsahileb’ li raam.

21 Ut anajwan chirix naq kixaqab’aman li iglees chiru chixjunil li ch’och’—chirix naq ^akinumta sa’ xb’een laj tza, ut chirix naq li raatin li Dios kijultikaman chi saq saq ru sa’ chixjunil li ch’och’, ut naq li Qaawa’ kixhoy li rosob’tesihom sa’ xb’eeneb’ li tenamit—chi jo’kan kiraqe’ li xkaalaju chihab’ rawa’b’ejileb’ laj raqol aatin sa’ xb’een lix tenamit laj Nefi.