1 U issa, araw, ħuti, jien kellimtkom, skont kif ġegħilni nagħmel l‑Ispirtu; għalhekk, jiena naf li dan żgur se jiġi fis‑seħħ.

2 U l‑ħwejjeġ li se jinkitbu fil‑ktieb se jkunu ta’ valur kbir għal ulied il‑bnedmin, u speċjalment għan‑nisel tagħna, li hu fdal tad‑dar ta’ Iżrael.

3 Għax jiġri f’dak il‑jum li l‑knejjes li se jinbnew, u mhux għall‑Mulej, meta wieħed jgħid lill‑ieħor: Ara jiena, jien mal‑Mulej; u l‑oħrajn jgħidu: Jiena, jien mal‑Mulej; u hekk se jgħid kull wieħed li jibni l‑knejjes, u mhux għall‑Mulej—

4 U huma jitlewmu bejniethom; u l‑qassisin tagħhom jitlewmu bejniethom, u huma jgħallmu skont tagħlimhom, u jiċħdu l‑Ispirtu s‑Santu, li jagħti s‑setgħa li wieħed jesprimi ruħu.

5 U huma jiċħdu l‑qawwa ta’ Alla, il‑Qaddis ta’ Iżrael; u jgħidu lin‑nies: Isimgħu minna, u agħtu widen għall‑preċett tagħna; għax araw illum m’hawn l‑ebda Alla, għax il‑Mulej u l‑Feddej temm il‑ħidma tiegħu, u hu ta l‑qawwa tiegħu lill‑bnedmin;

6 Araw, isimgħu mill‑preċett tiegħi; jekk jgħidu li seħħ miraklu permezz ta’ id il‑Mulej, temmnuhomx; għax f’dawn iż‑żminijiet hu mhuwiex Alla tal‑mirakli; huwa temm il‑ħidma tiegħu.

7 Tabilħaqq, se jkun hemm ħafna li jgħidu: Kul, ixrob, u xxala, għax għada se mmutu; u kollox se jkun sew għalina.

8 U se jkun hemm ħafna wkoll li jgħidu: Kul, ixrob, u xxala; madankollu, ibża’ minn Alla—hu jiġġustifika xi ftit dnubiet li twettaq; iva, li tigdeb ftit, li tieħu vantaġġ minn xi ħadd minħabba kliemu, li tħaffer ħofra għal għajrek; b’daqshekk m’hemm xejn ħażin li tagħmel dan kollu, għax għada se mmutu; u jekk ninstabu ħatja, Alla jagħtina daqtejn bil‑frosta, u fl‑aħħar mill‑aħħar niġu salvati fis‑saltna ta’ Alla.

9 Iva, u se jkun hemm ħafna li se jgħallmu b’dan il‑mod, duttrini foloz, fiergħa, u assurdi, u se jkunu mkabbrin f’qalbhom, u jfittxu li jaħbu fil‑fond fehmithom mill‑Mulej; u għemilhom se jkun fid‑dlam.

10 U demm il‑qaddisin se jgħajjat mill‑art kontrihom.

11 Iva, ilkoll ħarġu minn triqathom; ilkoll saru korrotti.

12 Minħabba l‑kburija, u minħabba l‑għalliema foloz, u d‑duttrina falza, il‑knejjes tagħhom saru korrotti, u l‑knejjes tagħhom huma merfugħin; minħabba l‑kburija huma minfuħin.

13 Huma jisirqu l‑fqir minħabba s‑santwarji sbieħ tagħhom; jisirqu l‑fqir minħabba l‑ilbies fin tagħhom; u jippersegwitaw lill‑imsejknin u lill‑foqra f’qalbhom, għax fil‑kburija tagħhom minfuħin.

14 Ta’ rashom iebsa u arroganti; iva, u minħabba l‑kburija, u l‑ħażen u l‑ħwejjeġ moqżieża, u ż‑żína, ilkoll spiċċaw intilfu ħlief għal ftit, li huma d‑dixxipli umli ta’ Kristu; madankollu, dawn jitmexxew b’tali mod li ħafna drabi jispiċċaw jiżbaljaw peress li huma mgħallmin skont il‑preċetti tal‑bnedmin.

15 O l‑għorrief, u l‑istudjużi, u l‑għonja, li huma minfuħin fil‑kburija ta’ qalbhom, u dawk kollha li jgħallmu duttrini foloz, u dawk kollha li jaqgħu fiż‑żina, u jgħawwġu t‑triq dritta tal‑Mulej, gwaj għalihom, jgħid il‑Mulej Alla li Jista’ Kollox, għax huma sejrin jinxteħtu ġo qiegħ l‑infern!

16 Ħażin għalihom li jwarrbu lill‑ġusti għal ħaġa ta’ xejn u jżebilħu dak li hu tajjeb, u jgħidu li ma jiswa għal xejn! Għax għad jasal il‑jum li l‑Mulej Alla jżur minnufih lil min jgħammar fl‑art; u f’dak il‑jum li fih ikunu misjurin waħda sew fil‑ħażen huma sejrin jinqerdu.

17 Iżda araw, jekk min jgħammar fid‑dinja jindem mill‑ħażen u l‑ħwejjeġ moqżieża tiegħu huwa ma jinqeridx, jgħid il‑Mulej tal‑Eżerċti.

18 Iżda araw, dik il‑knisja kbira u moqżieża, il‑prostituta tad‑dinja kollha, għad taqa’ mal‑art, u kbira se tkun il‑waqgħa tagħha.

19 Għax is‑saltna tax‑xitan għad titriegħed, u dawk li jagħmlu parti minnha jeħtieġ jiġu mħeġġa ħalli jindmu, jew ix‑xitan jispiċċa jaħtafhom bil‑ktajjen eterni tiegħu, u jqanqalhom ħalli jimtlew bl‑għadab, u jinqerdu;

20 Għax araw, f’dak il‑jum huwa jgħaddab qlub ulied il‑bnedmin, u jqanqalhom sabiex jimtlew bil‑korla kontra dak li hu tajjeb.

21 U lil oħrajn huwa jikkalma, u jingannahom b’sens falz ta’ sigurtà karnali, li huma jgħidu: Kollox sew f’Sijon; iva, Sijon miexja ’l quddiem, kollox sew—u b’dal‑mod ix‑xitan iqarraq b’ruħhom, u bir‑reqqa kollha jmexxihom sa qiegħ l‑infern.

22 U araw, lil oħrajn bil‑ħlewwa jqarraq bihom, u jgħidilhom li m’hemmx infern; u lilhom jgħid: Jiena mhux xitan, għax ma jeżistix—u b’dal‑mod ifesfsilhom f’widnejhom, sakemm jaħtafhom bil‑ktajjen terribbli tiegħu, li minnhom m’hemmx ħelsien.

23 Iva, huma jinħatfu mill‑mewt, u l‑infern; u l‑mewt, u l‑infern, u x‑xitan, u dawk kollha li ġew maħkumin minnhom għad jieqfu quddiem it‑tron ta’ Alla, u jsir ħaqq minnhom skont għemilhom, u minn hemm imorru fil‑post li ġie mħejji għalihom, sewwasew ġo belliegħa ta’ nar u kubrit, li hi turment bla tmiem.

24 Għalhekk, ħażin ikun għalih dak li għandu moħħu mistrieħ f’Sijon!

25 Ħażin ikun għalih dak li jgħajjat: Kollox sew!

26 Iva, ħażin ikun għalih dak li jagħti widen għall‑preċetti tal‑bnedmin, u jiċħad il‑qawwa ta’ Alla, u d‑don tal‑Ispirtu s‑Santu!

27 Iva, ħażin ikun għalih dak li jgħid: Aħna rċevejna, u m’għandniex bżonn aktar!

28 U finalment, ħażin għalihom dawk kollha li jitriegħdu, u mimlijin korla minħabba l‑verità ta’ Alla! Għax araw, min hu mibni fuq il‑blat bil‑ferħ jirċievi; u min hu mibni fuq pedament tar‑ramel jirtogħod għax jibża’ li se jaqa’.

29 Ħażin ikun għalih dak li jgħid: Aħna rċevejna l‑kelma ta’ Alla, u m’għandniex bżonn aktar kelma ta’ Alla, għax għandna biżżejjed!

30 Għax araw, dan jgħid il‑Mulej Alla: Jiena nagħti lil ulied il‑bnedmin linja wara linja, preċett wara preċett, ftit minn hawn u ftit minn hemm; u mberkin huma dawk li jagħtu widen għall‑preċetti tiegħi, u jiftħu widnejhom għall‑parir tiegħi, għaliex huma jitgħallmu l‑għerf; għax lil dak li jirċievi jiena nagħti aktar; u mingħand dawk li jgħidu, Għandna biżżejjed, mingħandhom jittieħed saħansitra dak illi għandhom.

31 Misħut min jittama fil‑bniedem, jew ifittex il‑qawwa tiegħu fil‑ġisem, jew jagħti widen għall‑preċetti tal‑bnedmin, sakemm il‑preċetti tagħhom ma jingħatawx bil‑qawwa tal‑Ispirtu s‑Santu.

32 Ħażin għalihom il‑Ġentili, jgħid il‑Mulej Alla tal‑Eżerċti! Għax minkejja li minn jum għal jum jien se ntawwal driegħi lejhom, huma se jiċħduni; madankollu, jien se nkun ħanin magħhom, jgħid il‑Mulej Alla, jekk huma jindmu u jiġu għandi; għax driegħi jinsab mtawwal il‑jum kollu, jgħid il‑Mulej Alla tal‑Eżerċti.