1 Ut kik’ulman naq kiqach’utub’ li k’iila paay chi iyaj li jar raqal wan, li jar paay chi iyaj nak’uxman, jo’ ajwi’ riyajil li jar paay chi ru che’ wan.

2 Ut naq toj kikana lin yuwa’ sa’ li yamyookil ch’och’, kik’ulman naq kooraatina, ut kixye: K’ehomaq reetal, ^axinmatk’i jun li matk’, malaj sa’ jalan chik aatin, xwil jun li ^bmatk’ li xk’utb’esiman chiwu.

3 Ut k’ehomaq reetal, rik’in li k’a’ru xwil, wan rajb’al naq taasaho’q inch’ool rik’in li Qaawa’ xb’aan laj ^aNefi ut jo’kan ajwi’ xb’aan laj Sam; xb’aan naq wan rajb’al naq tink’oxla naq eb’ a’an, jo’ ajwi’ naab’al li riyajileb’, te’kole’q.

4 A’b’an k’ehomaq reetal at ^aLaman ut at Lemuel, ninxuwak chi numtajenaq eeb’aan laa’ex; xb’aan naq k’ehomaq reetal, anchal naq kiwil sa’ lin matk’ jun li yamyookil ch’och’ q’ojyin ru ut ra.

5 Ut kik’ulman naq kiwil jun winq, tiqto sa’ jun saqi ^ab’aatal; ut a’an kichal ut kixaqli chiwu.

6 Ut kik’ulman naq kinraatina, ut kixye we naq tintaaqe.

7 Ut naq yookin chixtaaqenkil kik’ulman naq kiwil wib’ naq wankin sa’ jun li chaqi na’ajej q’ojyin ru ut ra.

8 Ut chirix naq kinb’eek chiru xnumik k’iila hoonal sa’ q’ojyin, kin’ok chi tijok chiru li Qaawa’ re naq ^ataaruxtaana wu, jo’ chanru xk’ihal lix q’unil uxtaan.

9 Ut kik’ulman naq chirix naq kintijok chiru li Qaawa’ kiwil jun nimla helhookil ^ach’och’.

10 Ut kik’ulman naq kiwil jun ^atoon li che’, atawal wi’ li ^bru choq’ re xsahob’resinkil xch’ool junaq.

11 Ut kik’ulman naq kink’amok b’e ut kinyal li ^aruuchinihom, ut kink’e reetal naq q’axal ki’, chiru chixjunil li ak inyalom chaq. Relik chi yaal, ut kink’e reetal naq saq li ruuchinihom, naxq’ax chixjunil li ^bsaqilal li wilom chaq.

12 Ut naq kinyal li ruuchinihom, kixnujob’resi li waam rik’in ^asahil ch’oolejil q’axal nim; jo’kan naq kin’ok ^bchirajb’al naq lin junkab’al te’okenq ajwi’ chixyalb’al; xb’aan naq kinnaw naq q’axal ^catawal wi’chik chiru chixjunil chik li ru che’.

13 Ut naq kinb’eresi li wilob’aal chinsutam, re naq maare tintaw ajwi’ lin junkab’al, kiwil xha’il jun ^anima’, ut yoo chi nume’k, ut nach’ wan rik’in li che’ li yookin wi’ chixyalb’al li ru.

14 Ut kin’ilok re xk’eeb’al reetal b’ar nachal chaq; ut moko najt ta kiwil lix yo’leb’aal; ut sa’ lix yo’leb’aal kiwil li xSariah lee na’, ut laj Sam, ut laj Nefi; ut xaqxookeb’ jo’ chanchan naq ink’a’ neke’xnaw b’ar te’xik.

15 Ut kik’ulman naq kinb’oqeb’ chi wuq’; ut kinye ajwi’ reheb’ chi kaw xyaab’ inkux naq te’chalq wik’in, ut te’xyal ru li che’, li q’axal atawal wi’chik chiru chixjunil chik li ru che’.

16 Ut kik’ulman naq ke’chal wik’in ut ke’xyal ajwi’ li ru che’.

17 Ut kik’ulman naq laa’in kiwaj naq laj Laman ut laj Lemuel te’chalq ut te’xk’ux raj ajwi’ ru li che’; jo’kan ut, kinb’eresi li wilob’aal b’ar wan wi’ xyo’leb’aal li nima’, re naq maare te’wil.

18 Ut kik’ulman naq kiwileb’, a’b’an ^aink’a’ ke’raj chalk wik’in, ut xyalb’al li ru li che’.

19 Ut kiwil jun li ^ab’arb’ookil ch’iich’, ut jiljo chire xmaril li nima’, ut nawulak sa’ xtoon li che’ li xaqxookin wi’ chaq.

20 Ut kiwil ajwi’ jun li ^alaatz’ ut ka’ch’in ruhil b’e, li nanume’ chixk’atq li b’arb’ookil ch’iich’, toj nawulak ajwi’ sa’ xtoonal li che’ li xaqxookin wi’ chaq; ut nanume’ ajwi’ chixk’atq lix tiklajik li yo’leb’aal ha’, toj nawulak sa’ jun li nimla ^bhelhookil ch’och’, jo’ chanchan tana’ jun ruchich’och’.

21 Ut ke’wil k’iila ch’uut chi tenamit maak’a’ rajlankileb’, naab’aleb’ li yookeb’ wi’ chixtiikisinkil rib’ chi uub’ej, re te’xtaw li ^ab’e li nawulak sa’ xtoon li che’ li xaqxookin wi’ chaq.

22 Ut kik’ulman naq ke’k’amok chaq b’e, ut ke’tikla sa’ li b’e li naxik sa’ xtoonal li che’.

23 Ut kik’ulman naq kitaqe’ chaq jun q’ojyinal ^achoql; relik chi yaal, jun li q’ojyinal choql li q’axal nim, jo’kan naq eb’ li ke’xtikib’ chaq li b’e ke’xkanab’ lix b’eheb’, jo’kan naq ke’xjalb’ehi rib’, ut ke’sach.

24 Ut kik’ulman naq kink’e reetal jalaneb’ chik li yookeb’ chixtiikisinkil rib’ chi uub’ej, ut kole’xchap ru’uj li b’arb’ookil ch’iich’; ut ke’xtiikisi rib’ chi uub’ej chiru li q’ojyinal choql, chi chapchookeb’ chiru li b’arb’ookil ch’iich’, toj reetal ke’k’ulun ut ke’xyal li ^aru li che’.

25 Ut chirix naq ke’xyal li ru li che’, ke’xb’eresi li rilob’aal chixsutameb’ jo’ chanchan naq ^ate’xutaanaq.

26 Ut laa’in ajwi’ kinb’eresi li wilob’aal chinsutam, ut kink’e reetal, chixjunpak’alil lix ha’il li nima’, jun ^akab’l li nim ut paapo xsa’, ut xaqxo jo’ raj sa’ iq’, chi taqenaq sa’ xb’een li ch’och’.

27 Ut nujenaq rik’in poyanam, li tiix jo’ ajwi’ li saaj, li winq jo’ ajwi’ li ixq; ut lix tiqb’aleb’ q’axal chaq’al ru; ut ^ayookeb’ chireetz’unkil ut chixk’utb’aleb’ chi ru’uj ruq’ li ani ke’k’ulun b’ar wan wi’ li ru che’ ut yookeb’ chixyalb’al.

28 Ut chirix naq ^ake’xyal li ru che’ ^bke’xutaanak, sa’ xk’ab’a’eb’ li yookeb’ chi eetz’unk reheb’; ut ^cke’xjalb’ehi rib’ sa’eb’ li b’e ink’a’ us xk’amb’al, ut ke’sach.

29 Ut anajwan laa’in, aj Nefi, ink’a’ ninye ^achixjunil li raatin lin yuwa’.

30 A’b’anan re xk’osb’al ru li nintz’iib’a, k’ehomaq reetal, a’an kirileb’ chik li k’iila tenamit yookeb’ chixtiikisinkil rib’ chi uub’ej, ut kole’xchap ru’uj li ^ab’arb’ookil ch’iich’, ut ke’xtiikisi rib’ chi uub’ej sa’ b’e, junelik chapchookeb’ chi kaw chiru li b’arb’ookil ch’iich’, toj reetal naq kole’xkut rib’ chi ch’och’ ut ke’xyal li ru li che’.

31 Ut kiril ajwi’ chik li ^ak’iila tenamit yookeb’ chaq chi k’achlenk re te’wulaq sa’ li kab’l a’an li nim ut paapo xsa’.

32 Ut kik’ulman naq naab’al ke’ok chi ha’ sa’ xchamal li ^ayo’leb’aal ha’; ut naab’al ke’sach chiru a’an, yookeb’ chi b’eek chiru li jalanil b’e.

33 Ut nim xk’ihaleb’ li tenamit li ke’ok sa’ li jalanil kab’l a’an. Ut chirix naq ke’ok sa’ li kab’l a’an, kine’xk’ut chi ru’uj ruq’ re ^aweetz’unkil laa’in ut eb’ li yookeb’ ajwi’ chixyalb’al li ru che’; a’b’anan ink’a’ kiqak’eheb’ reetal.

34 A’an a’in li raatin lin yuwa’: Xb’aan naq li jo’ k’ihal ^ake’xk’eheb’ reetal, ke’xjalb’ehi rib’.

35 Ut laj ^aLaman ut laj Lemuel ink’a’ ke’xyal li ru che’, chan lin yuwa’.

36 Ut kik’ulman, chirix naq lin yuwa’ kixye chixjunil li aatin re lix matk’, malaj li k’a’ru xk’utb’esiik chiru, li q’axal naab’al, kixye qe, sa’ xk’ab’a’ li na’leb’ a’in li kiril sa’ li k’utb’esinb’il matk’, q’axal kixuwak xb’aaneb’ laj Laman ut laj Lemuel; relik chi yaal, kixuwak maare anchal te’tz’eqe’q chaq chiru li Qaawa’.

37 Ut kixtz’aama chiruheb’ rik’in x’anchalil xch’ool jun li chaab’il ^ayuwa’b’ej, naq te’rab’i li raatin, re naq maare li Qaawa’ taaruxtaanaheb’ ru, ut ink’a’ tixtz’eqeb’; relik chi yaal, lin yuwa’ kijultikank chiruheb’.

38 Ut chirix naq kijultikank chiruheb’, ut kiraatinaheb’ ajwi’ jo’ profeet chirix k’iila k’a’aq re ru, kixye reheb’ naq che’xpaab’ lix taqlahom li Qaawa’, ut kixkanab’ raatinankileb’.