Ch’ol 7
Eb’ li ralal laj Lehi neke’sutq’i Jerusalen ut neke’xboq laj Ismael ut lix junkab’al re naq te’okenq sa’ lix xikikeb’—Laj Laman naxpo’resi xch’ool, rochb’een junjunq chik—Laj Nefi na’elajink chiruheb’ li ras naq te’xpaab’ li Qaawa’—Neke’xb’ak’ rik’in k’aam ut neke’xk’uub’ xna’leb’ re xsachb’al—Na’ach’ab’aak xb’aan xwankilal li paab’aal—Eb’ li ras neke’xpatz’ xkuyb’al lix maak—Laj Lehi ut eb’ li yookeb’ chirix neke’xq’axtesi li mayej ut li k’atb’il mayej. Wan na 600–592 chihab’ ma nayo’la li Kristo.
1 Ut anajwan nawaj raj naq teenaw, naq chirix naq lin yuwa’, aj Lehi, kixk’e xraqik aaatinak jo’ profeet chirixeb’ li riyajil, kik’ulman naq li Qaawa’ kiraatina wi’chik, ut kixye re naq moko us ta choq’ re a’an, laj Lehi, naq tixk’am lix junkab’al xjuneseb’ sa’ li yamyookil ch’och’; tento b’an naq eb’ li ralal te’xk’ul brab’inb’ej choq’ crixaqileb’, re taaruuq te’xwaklesi riyajileb’ choq’ re li Qaawa’ sa’ ch’och’ li yeechi’inb’il.
2 Ut kik’ulman naq li Qaawa’ akixtaqla re a’an naq laa’in, aj Nefi, ut eb’ li was toosutq’iiq wi’chik sa’ li ch’och’ Jerusalen, ut taqak’ameb’ chaq laj Ismael ut lix junkab’al taq’a sa’ li yamyookil ch’och’.
3 Ut kik’ulman naq laa’in aj Nefi, ajun sut chik wochb’eeneb’ li was, xookoho chiru li yamyookil ch’och’ re tootaqe’q Jerusalen.
4 Ut kik’ulman naq kootaqe’ toj sa’ li rochoch laj Ismael, ut kiqataw usilal sa’ rilob’aal laj Ismael, jo’kan naq kiqaye li raatin li Qaawa’ re.
5 Ut kik’ulman naq li Qaawa’ kixq’unob’resi li raam laj Ismael, jo’ ajwi’ lix junkab’al, jo’kan naq ke’xchap xb’e qochb’een taq’a sa’ li yamyookil ch’och’ toj sa’ xmuheb’aal t’ikr li qayuwa’.
6 Ut naq toj yooko chi b’eek sa’ li yamyookil ch’och’, k’ehomaq reetal, kik’ulman naq laj Laman ut laj Lemuel, ut wiib’ reheb’ lix rab’in laj Ismael, ut li wiib’ chi aralal laj Ismael ut eb’ lix junkab’al, ke’xpo’resi xch’ool qik’in laa’o, relik chi yaal, wik’in laa’in aj Nefi, ut rik’in laj Sam, ut laj Ismael lix yuwa’eb’, ut li rixaqil, ut lix rab’in li oxib’eb’ chik.
7 Ut kik’ulman sa’ li po’ok ch’oolej a’an, ke’raj sutq’iik sa’ li ch’och’ Jerusalen.
8 Ut anajwan laa’in, aj Nefi, ara chaq inch’ool xb’aan xkawileb’ li raam, jo’kan naq ke’waatina, ut kinye, relik chi yaal, re ajwi’ laj Laman ut re laj Lemuel: K’ehomaq reetal, laa’ex li asb’ej chiwu, ut chan put ru naq k’a’jo’ xkawil lee raam, ut k’a’jo’ xmutz’il lee k’a’uxl, ut aajel ru naq laa’in li iitz’inb’ej cheru texwaatina, relik chi yaal, ut tinb’aanu cheru k’a’ru tento raj taa’uxq?
9 Chan put ru naq ink’a’ kex’ab’ink chiru li raatin li Qaawa’?
10 Chan put ru naq asachenaq sa’ eech’ool naq eerilom jun lix anjel li Qaawa’?
11 Relik chi yaal, chan put ru naq sachso sa’ eech’ool chan ru xninqal ru li k’a’aq re ru xb’aanu li Qaawa’ choq’ qe, rik’in aqakolb’al chaq sa’ ruq’ laj Laban, jo’ ajwi’ naq kooru chixtawb’al li tz’iib’anb’il esil?
12 Relik chi yaal, ut chan put ru naq sachenaq sa’ eech’ool naq li Qaawa’ naru chixb’aanunkil achixjunil li k’a’aq re ru jo’ chanru li rajom xch’ool, choq’ reheb’ li ralal xk’ajoleb’ li winq, wi na’ux naq neke’xk’anjela bxpaab’aal chirix a’an? Jo’kan ut, tiikaqo chixpaab’ankil.
13 Wi ut taa’uxq naq tiiko chixpaab’ankil, taqeechani li ach’och’ li yeechi’inb’il; ut laa’ex teenaw sa’ junaq kutan chalel naq taatz’aqloq ru li raatin li Qaawa’ chirix lix bsachlijik Jerusalen; xb’aan naq chixjunil li k’a’aq re ru ki’aatinak wi’ li Qaawa’ chirix lix sachlijik Jerusalen tento taatz’aqloq ru.
14 Xb’aan naq k’ehomaq reetal, lix Musiq’ li Qaawa’ sa’ junpaat tixkanab’ xyalb’al xq’e rik’ineb’, xb’aan naq k’ehomaq reetal, axe’xtz’eqtaanaheb’ li profeet, ut laj bJeremias ke’xtz’ap sa’ tz’alam. Ut ke’xsik’ risinkil cxyu’am lin yuwa’, toj reetal naq ke’ralinasi chaq sa’ li ch’och’.
15 Anajwan k’ehomaq reetal, ninye eere naq wi texsutq’iiq Jerusalen tex’oso’q ajwi’ rochb’eeneb’. Anajwan ut, wi jo’kan nareek’a lee ch’ool, taqenqex sa’ li ch’och’, ut chijultiko’q eere li aatin ninye eere, naq wi nekexxik tex’oso’q ajwi’; xb’aan naq jo’kan nikinrelaji lix Musiq’ li Qaawa’ naq tin’aatinaq.
16 Ut kik’ulman naq chirix naq laa’in, aj Nefi, kinye li aatin a’in reheb’ li was, ke’chal xjosq’il wik’in. Ut kik’ulman naq ke’xk’e li ruq’ sa’ inb’een, xb’aan naq k’ehomaq reetal, numtajenaqeb’ xjosq’il, ut akine’xb’ak’ chi k’aam, xb’aan naq ke’xsik’ risinkil inyu’am, re tine’xkanab’ raj chiru li yamyookil ch’och’ re naq tink’uxe’q xb’aaneb’ lix xulil k’iche’.
17 A’b’an kik’ulman naq kintijok chiru li Qaawa’, ut kinye: At Qaawa’, jo’ chanru lin paab’aal li wan aawik’in, ma tinaakol taxaq sa’ ruq’eb’ li was; relik chi yaal, k’e taxaq inmetz’ew re atint’up li bak’leb’ a’in li b’ak’b’ilin wi’.
18 Ut kik’ulman naq chirix naq kinye li aatin a’in, k’ehomaq reetal, kik’ulman naq kihite’ chaq li bak’leb’ chiwuq’ ut chiwoq, ut kinxaqli chiruheb’ li was, ut kiwaatinaheb’ wi’chik.
19 Ut kik’ulman naq ke’chal wi’chik xjosq’il wik’in, ut ke’xsik’ xk’eeb’al li ruq’ sa’ inb’een; a’ut k’ehomaq reetal, jun reheb’ lix arab’in laj Ismael, relik chi yaal, ut jo’kan ajwi’ lix na’, ut jun reheb’ li ralal laj Ismael, ke’tz’aaman chiruheb’ li was, jo’kan naq ke’xq’unob’resi li raameb’; ut ke’xkanab’ xyalb’al xq’e chirisinkil inyu’am.
20 Kik’ulman ut naq ke’reek’a xrahileb’ xch’ool, sa’ xk’ab’a’ lix maa’usilaleb’, toj reetal naq ke’xkub’si rib’ chiwu, ut ke’xtz’aama chiwu naq tinkuyeb’ xmaak rik’in li k’a’ru ke’xb’aanu chaq we.
21 Ut kik’ulman naq tikto akinkuyeb’ xmaak rik’in chixjunil li xe’xb’aanu chaq, ut kin’elajin chiruheb’ naq te’tijoq chiru li Qaawa’ lix Dios re xpatz’b’al xkuyb’aleb’ xmaak. Ut kik’ulman naq jo’kan ke’xb’aanu. Ut chirix naq ke’xchoy tijok chiru li Qaawa’, kiqachap wi’chik qab’e re tooxik sa’ xjayal lix muheb’aal t’ikr li qayuwa’.
22 Ut kik’ulman naq koowulak taq’a sa’ lix muheb’aal t’ikr li qayuwa’. Ut chirix naq laa’in ut eb’ li was ut chixjunil lix junkab’al laj Ismael koowulak taq’a sa’ lix muheb’aal t’ikr lin yuwa’, a’aneb’ ake’b’antioxink chiru li Qaawa’ lix Dios; ut ke’xq’axtesi li bmayej ut li k’atb’il mayej chiru.