1 Ndien idahaemi, ami ntiŋ ŋko mbaŋa mbon emi mibuɔtke idem ke Christ.

2 Sese, ndi mbufo eyebuɔt idem ke usen edidise mbufo—sese, ke ini Jehovah edidide, iŋ, kpa akwa usen oro ke ini emi ediŋwaŋde isɔŋ kiet nte ŋwed, ndien eyo, ofum, edim, eyetara ye ɔkpɔsɔŋ ufiop, iŋ, ke akwa usen oro ke ini edidade mbufo ete edida ke iso Eyeŋ-erɔŋ Abasi—ini oro ke mbufo edidɔhɔ ete ke Abasi iduhe?

3 Ke ini oro ke mbufo edika iso ikaŋ Christ, mme ndi mbufo eyekeme ndise Eyen-erɔŋ Abasi? Ndi mbufo ekere ete ke mbufo eyedu ye enye ye ifiɔk ndudue mbufo? Ndi mbufo ekere ete ke mbufo emekeme ndinem esit ndidu ye edisana Owo oro, ke ini mme ukpɔŋ mbufo ɔyɔhɔde ye mfina ifiɔk ndudue ete ke mbufo akananam ibiatke mme mbet esie?

4 Sese, ami ndɔhɔ mbufo nte ke mbufo eyekut ukut ekan ndidu ye edisana ye edinen Abasi, ke idak ifiɔk ndedehe mbufo ke iso esie, akan nte mbufo ekpedude ye mme ukpɔŋ emi ebiomde ikpe ke hell.

5 Koro sese, ke ini edidade mbufo ete edikut iferi mbufo ke iso Abasi, ŋko ye ubɔŋ Abasi, ye edisana eke Jesus Christ, enye oyodomo edeme ikaŋ emi midinimeke ke idem mbufo.

6 O idaha oro mbufo mbon unana mbuɔtidem, ewɔŋɔde etiene Jehovah; eseme ke ɔkpɔsɔŋ enɔ Ete ke enyiŋ Jesus, ete ke ndusuk ekeme ndikut mbufo nte mme anana ntɔi, edisana, ye afia, emi ekeyetde ke iyip Eyen-erɔŋ, ke akwa ye akpatre usen oro.

7 Ndien mfiak ntiŋ nnɔ mbufo emi ekaŋde mme ediyarade Abasi, ndien edɔhɔ ete ke mmɔ ema etre, ete ke mme ediyarade iduhe, mme, mme prophecy, mme, mme enɔ, mme edikɔk udɔŋɔ, mme editiŋ ye mme edeme, ye mme edikabade mme edeme;

8 Sese ami ndɔhɔ mbufo, enye emi akaŋde mme ŋkpɔ emi ifiɔkke gospel Christ; iŋ, enye ikotke mme ŋwed Abasi; edieke edide ntre, mmɔ iŋwaŋke enye.

9 Koro ndi nnyin ikotke ite ke Abasi edi ukem mkpɔŋ, mfin, ye ke nsinsi, ndien ke enye ukpuhɔde iduhe mme mbukpɔŋ ukpuhɔde?

10 Ndien idahaemi, edieke mbufo ekerede enɔ idem mbufo abasi emi ɔkpuhɔrede, ye ke enye emi mbukpɔŋ ukpuhɔde odude, ke ini oro ke mbufo ekere enɔ idem mbufo abasi emi midighe Abasi mme utibe ŋkpɔ.

11 Edi sese, ami nyowut mbufo Abasi mme utibe ŋkpɔ, kpa Abasi Abraham, ye Abasi Isaac, ye Abasi Jacob; ndien edi kpa Abasi oro okobot mme enyɔŋ ye isɔŋ, ye kpukpru mme ŋkpɔ emi ke mmɔ edude.

12 Sese, enye okobot Adam, ndien oto ke Adam iduɔ owo edi. Ndien ke ntak iduɔ owo, Jesus Christ edi, kpa Ete ye Eyen; ndien ke ntak Jesus Christ edifak owo edi.

13 Ndien ke ntak edifak owo, emi ekedide oto Jesus Christ, eda mmɔ efiak edi iso Jehovah; iŋ, emi edi usuŋ emi anade nte efak kpukpru owo, ke ntak emi mkpa Christ ada ediset ke mkpa edi, emi adade edifak ke idap anana utit edi, idap emi edidemerede kpukpru owo ito odudu Abasi ke ini obukpoŋ edisiorode uyo; ndien mmɔ eyewɔrɔ edi, mkpri ye ikpɔ mbiba, ndien kpukpru eyeda ke ebiet uda ikpe ke esop esie, ke ekefakde eyuŋ etatde ke nsinsi uruk mkpa, mkpa emi edide mkpa emi edibede ifep.

14 Ndien ke ini oro ke ubiere ikpe Edisana Owo edisim mmɔ; ndien ke ini oro ke enye emi edide ndedehe edika iso idi ndedehe; ndien enye emi edide edinen edika iso idi edinen; enye emi enemde esit eyeka iso enemesit; ndien enye emi minemke esit eyeka iso, inemke esit.

15 Ndien idahaemi, O kpukpru mbufo emi ekerede enɔ idem mbufo abasi emi mikemeke ndinam mme utibe ŋkpɔ, ami nyebup mbufo, ndi kpukpru mme ŋkpɔ emi ebe, emi ami ntiŋde? Ndi utit edi kaŋa? Sese, ami ndɔhɔ mbufo, Iŋ iŋ, ndien Abasi itreke ndidi Abasi mme utibe ŋkpɔ.

16 Sese, ndi mme ŋkpɔ emi Abasi anamde idighe utibe ke enyin nnyin? Iŋ, ndien anie owo ekeme ndifiɔk mme utibe ŋkpɔ Abasi.

17 Anie owo edidɔhɔ ete ke ikidighe utibe ŋkpɔ ete ke ikɔ esie enyɔŋ ye isɔŋ ana nte edu; ndien ke odudu ikɔ esie ema obot owo ke ntɔŋ isɔŋ; ndien ke odudu ikɔ esie ke enam mme utibe ŋkpɔ?

18 Ndien anie owo edidɔhɔ ete ke Jesus Christ ikinamke ediwak ikpɔ utibe ŋkpɔ? Ndien ema enam ediwak ikpɔ utibe ŋkpɔ ke mme ubɔk mme apostle.

19 Ndien edieke ekenamde mme utibe ŋkpɔ ini oro, ntak emi Abasi etrede ndidi Abasi mme utibe ŋkpɔ ndien edi Owo emi mikpuhɔkede? Ndien sese, ami ndɔhɔ mbufo enye ikpuhɔkede; edieke edide ntre enye eyetre ndidi Abasi; ndien enye itreke ndidi Abasi, ndien edi Abasi mme utibe ŋkpɔ.

20 Ndien ntak emi enye etrede ndinam mme utibe ŋkpɔ ke otu nditɔ owo edi ke ntak ete ke mmɔ etaha ke unana mbuɔtidem, enyuŋ ewɔrɔ ekpɔŋ nnen nnen usuŋ, inyuŋ ifiɔkke Abasi emi anade nte mmɔ ebuɔtidem.

21 Sese, ami ndɔhɔ mbufo nte ke owo ekededi emi ɔbuɔtde idem ye Christ, iyigheke ŋkpɔ ndomo kiet, ŋkpɔ ekededi emi enye edibeŋede Ete ke enyiŋ Christ eyenɔ enye; ndien eŋwɔŋɔ emi edi ɔnɔ kpukpru owo, tutu ke mme utit ererimbot.

22 Koro sese, ntem ke Jesus Christ, Eyen Abasi ɔdɔhɔ, ɔnɔ mme mbet esie emi edisuhɔde, iŋ, ŋko ye kpukpru mme mbet esie, emi udim owo ekopde: Mbufo eka ke ofuri ererimbot, enyuŋ ekwɔrɔ gospel enɔ kpukpru se ebotde;

23 Ndien enye emi ɔbuɔtde idem ndien ɔduɔk mmɔŋ eyeyaŋa, edi enye emi mibuɔtke idem eyebiom ikpe.

24 Ndien mme idiɔŋɔ emi eyetiene mmɔ emi ebuɔtde idem—ke enyiŋ mi ke mmɔ edibin mme andidiɔk isio; mmɔ eyetiŋ ikɔ ye mme obufa edeme; mmɔ eyemen mme udukikɔt; ndien edieke mmɔ eŋwɔŋde ŋkpɔ ndomo kiet emi ekemede ndiwot owo, idifiomoke mmɔ; mmɔ eyedori mbon udɔŋɔ ubɔk ke ibuot ndien idem ɔyɔsɔŋ mmɔ;

25 Ndien owo ekededi emi edibuɔtde idem ke enyiŋ mi, iyigheke ŋkpɔ ndomo kiet, enye ke ami ndisɔŋɔ kpukpru mme ikɔ mi nnɔ, tutu esim mme utit ererimbot.

26 Ndien idahaemi, sese, anie owo ekeme, mididaha ye mme utom Jehovah? Anie owo ekeme ndikaŋ mme ikɔ esie? Anie owo edidaha ida, emi mididaha ye akwa odudu Jehovah? Anie owo ekeme ndisari mme utom Jehovah? Anie owo ekeme ndisari nditɔ Christ? Sese, kpukpru mbufo esaride mme ikɔ Jehovah, mbufo eyekpaidem enyuŋ etak.

27 O ndien ekusari, ekunyuŋ ekpaidem, edi ekop mme ikɔ Jehovah, ndien ebeŋe Ete ke enyiŋ Jesus ŋkpɔ ekededi emi mbufo eyomde. Ekuyighe, edi ebuɔtidem, enyuŋ etɔŋɔ nte ke mme ini eset, ndien edi etiene Jehovah ye ofuri esit mbufo, ndien enam edinyaŋa mbufo ɔwɔrɔ usuŋ ye ndik ye nyekidem ke iso esie.

28 Efiɔk ŋkpɔ ke mme usen udomo mbufo; esio kpukpru se idehede ke idem mbufo; ekubeŋe, man mbufo ududia enye ke mme idiɔkitɔŋ mbufo, edi ebeŋe ye nsɔŋɔda emi misikke, man mbufo ididuɔ iduk ke idomo, edi man mbufo enam ŋkpɔ enɔ akpanikɔ ye odu uwem Abasi.

29 Ekut ete ke mbufo iduɔkke mmɔŋ ke imidotke; ekut ete ke mbufo idiaha udia-Ɔbɔŋ Christ ke imidotke; edi ekut ete ke enam kpukpru ŋkpɔ nte odotde, ndien enam enye ke enyiŋ Jesus Christ, Eyen odu-uwem Abasi; ndien edieke mbufo enamde emi, enyuŋ eyɔde tutu esim utit, idikemeke ndibin mbufo nsio.

30 Sese, ami ntiŋ ikɔ nnɔ mbufo nte ntiŋ nto mkpa; koro mɔfiɔk nte ke mbufo eyenyene mme ikɔ mi.

31 Ekubiom mi ikpe ke ntak ndudue mi, mme, ete mi, ke ntak ndudue esie, mme, mbon emi ewetde mbemiso enye; edi kam nnɔ Abasi ekɔm ete ke enye anam mbufo efiɔk mme ndudue nnyin, man mbufo ekpep nte efiɔkde ŋkpɔ ekan nte nnyin ikidide.

32 Ndien idahaemi, sese, nnyin imiwet ŋwed emi nte asaŋade ye ifiɔk nnyin, ke ubɔk ŋwet emi ekotde ke otu nnyin usem Egypt emi ekpuhɔrede, ke ekeyakde enɔ, enyuŋ ekpuhɔde eto nnyin, nte asaŋade ye usuŋ utiŋ ikɔ nnyin.

33 Ndien edieke mme usan nnyin ekpeke okponde ekem, akpakana nnyin iwet ke Hebrew; edi nnyin ima ikpuhɔde Hebrew ŋko; ndien edieke nnyin ikpikikemede iwet ke Hebrew, sese, mbufo ikpinyeneke ndudue ke ŋwed nnyin.

34 Edi Jehovah ɔfiɔk mme ŋkpɔ emi nnyin iwetde, ndien ŋko ete ke mme owo ndomo kiet efen ifiɔkke usem nnyin; ndien ke ntak emi mme owo ndomo kiet efen mifiɔkke usem nnyin, ke ntak oro enye anam usuŋ ɔnɔ ndikabade enye.

35 Ndien kpukpru mme ŋkpɔ emi ewet man nnyin isio ke garment nnyin iyip nditɔ eka nnyin, emi etahade ke unana mbuɔtidem.

36 Ndien sese, mme ŋkpɔ emi emi nnyin iyomde kabaŋa nditɔ eka nnyin, iŋ, kpa ndifiak nda mmɔ ŋka ifiɔk Christ, edi nte asaŋade ye mme akam eke kpukpru mme ndisana owo emi edude ke isɔŋ oro.

37 Ndien yak Jehovah Jesus Christ ayak ete ebɔrɔ mme akam mmɔ nte asaŋade ye mbuɔtidem mmɔ; ndien yak Abasi Ete eti ediomi emi enye akanamde ye ufɔk Israel; ndien yak enye ɔdiɔŋ mmɔ ke nsinsi, oto ke mbuɔtidem ke enyiŋ Jesus Christ. Amen.