1 Ndien edikem ete ke kpa ke isua oro ekɔŋ ama ɔtɔŋɔ ke ufɔt mme Nephite ye mme Lamanite. Ndien ke misehe ke nkedi ekpri eyen, mma mkpon ke idaha; ke ntak oro ikɔt Nephi ema emek mi ete yak ami ndi adausuŋ mmɔ, mme andida mbon ekɔŋ mmɔ usuŋ.

2 Ke ntak oro edikem ete ke ami mma nda ke ibuot mbon ekɔŋ mme Nephite ke ɔyɔhɔ isua efutekiet mi, ŋwana ye mme Lamanite; ke ntak oro, isua ikieita ye edip ye itiokiet ama ebe efep.

3 Ndien edikem ete ke ɔyɔhɔ isua ikieita ye edip ye itiaba ke mme Lamanite ema edi eŋwan ye nnyin ye ata akwa odudu, tutu ete ke mmɔ ema enam idem enyek mbon ekɔŋ mi; ke ntak oro mmɔ ikimaha ndiŋwana eŋwan, ndien mmɔ etɔŋɔ ndifiak edem nnyɔŋ mme obio ke edem edere.

4 Ndien edikem ete ke nnyin ima idisim obio Angola, ndien nnyin ima ida obio oro inyene, inyuŋ ibeŋeidem ndikpeme idem nnyin mbaŋa mme Lamanite. Ndien edikem ete ke nnyin ima isɔŋɔ obio oro ke ukeme nnyin; edi ke misehe kpukpru mme edisɔŋɔ nnyin mme Lamanite ema ediŋwana ye nnyin enyuŋ ebin nnyin esio ke obio oro.

5 Ndien mmɔ ŋko ema ebin nnyin esio ke obio David.

6 Ndien nnyin ima isaŋa idisim isɔŋ Joshua, emi ekedide mme adaŋa ke edem usop utin ke mben inyaŋ.

7 Ndien edikem ete ke nnyin ima isɔp idem ibok ikɔt nnyin, man nnyin inam mmɔ esobo ɔtɔ kiet nte eboho kiet.

8 Edi sese, isɔŋ oro ama ɔyɔhɔ ye mme inɔ ye mme Lamanite; ndien ke misehe akwa nsobo emi ɔkɔkɔŋɔde ikɔt mi ke iso, mmɔ ikikabakede esit ke mme idiɔk ŋkpɔ mmɔ; ke ntak oro uduɔk iyip ye nsobo ama atara ke ofuri iso isɔŋ, ke ŋkaŋ mme Nephite ye ke ŋkaŋ mme Lamanite mbiba; ndien ekedi eŋwan nsɔŋ-ibuot ke ofuri iso isɔŋ oro.

9 Ndien idahaemi, mme Lamanite ema enyene edidem, ndien enyiŋ esie ekedi Aaron; ndien enye ama edi eŋwan ye nnyin ye mbon ekɔŋ tɔsin aba ye inaŋ. Ndien sese, ami mma ŋwana ye enye ye tɔsin aba ye iba. Ndien edikem ete ke ami mma nkan enye ye mbon ekɔŋ mi tutu enye ama efehe. Ndien sese, ekenam kpukpru emi, ndien isua ikieita ye edip ye duop ama ebe efep.

10 Ndien edikem ete ke mme Nephite ema etɔŋɔ ndikabade esit ke ukwaŋ-ŋkpɔ mmɔ, enyuŋ eseme kpa nte prophet Samuel eketiŋde nte prophet; koro sese owo ndomo kiet ikikemeke inim se idide esie, ke ntak mme inɔ, ye mbon ŋwo, ye mme owot-owo, ye ŋkpɔ-mkpaidem, ye ifɔt emi ekedude ke isɔŋ oro.

11 Ke ntem mfuhɔ ye eseme ema etɔŋɔ ndidu ke ofuri isɔŋ oro ke ntak mme ŋkpɔ emi, akpan akpan ke ufɔt ikɔt Nephi.

12 Ndien edikem ete ke ini ami, Mormon, nkokutde eseme ye mfuhɔ mmɔ ye ukut mmɔ ke iso Jehovah, esit ama ɔtɔŋɔ ndinem mi, koro mfiɔkde mme mbɔm ye anyan ime Jehovah, ke ntak oro ke nkerede ke enye eyenyene mbɔm abaŋa mmɔ man mmɔ efiak ekabade edi ndinen owo.

13 Edi sese idaresit mi ekedi ikpikpu, koro mfuhɔ mmɔ ikidihge inɔ edikabade esit, ke ntak ima Abasi; edi ekedi mfuhɔ mbon ubiom ikpe, koro Abasi idiyake mmɔ enyene inemesit ke idiɔk ŋkpɔ.

14 Ndien mmɔ ikidighe itiene Jesus ke nbuŋɔ esit ye spirit emi anuakhade, edi mmɔ ema esuŋi Abasi, enyuŋ eyom ndikpa. Edi mmɔ eyeŋwana ye akaŋkaŋ ebaŋa uwem mmɔ.

15 Ndien edikem ete ke ukut mi ama afiak edi etiene mi, ndien ami mma nkut nte ke ini mfɔn ama ebe abaha mmɔ, ke obukidem ye ke spirit mbiba; koro ami mma nkut nte ewotde mme tɔsin mmɔ ke aŋwa-aŋwa nsɔŋ ibuot ye Abasi mmɔ, enyuŋ eduɔŋɔde nte mbio ke iso isɔŋ. Ndien ke ntem isua ikieita ye aba ye inaŋ ama ebe efep.

16 Ndien edikem ete ke ɔyɔhɔ isua ikieita ye aba ye ition ke mme Nephite ema etɔŋɔ ndifehe ke iso mme Lamanite; ndien ema ebine mmɔ tutu mmɔ edisim kpa ke isɔŋ Jashon, mbemiso ekeme etre mmɔ ke itɔk mmɔ.

17 Ndien idahaemi, isɔŋ Jashon ama ekpere isɔŋ emi Ammaron ekedipde mme ŋwed ɔnɔ Jehovah, man mmɔ ekubiara. Ndien sese ami mma nnam nte ikɔ Ammaron ekedide, nyuŋ ntaŋ mme usan ŋwed emi Nephi ekewetde, nyuŋ ŋwet ŋwed nte mme ikɔ Ammaron ekedide.

18 Ndien ke mme usan ŋwed emi Nephi ekewetde ke ami ŋwed ɔyɔhɔ ɔyɔhɔ mbuk eke kpukpru ibak ye mme mbubiam ido; edi ke mme usan emi ke ami ntre ndiwet ɔyɔhɔ ɔyɔhɔ mbuk ibak ye mme mbubiam ido mmɔ, koro sese, ibak ye mme mbubiam ido edu mi ke iso tɔŋɔ ke ini emi nkokponde nkem ndifiɔk nte mme owo enamde ŋkpɔ.

19 Ndien ɔyɔdɔdiɔk ɔnɔ mi ke ntak ibak mmɔ; koro esit mi ɔyɔhɔde ye mfuhɔ ke ntak ibak mmɔ, ke ofuri eyo mi; edi, ami mɔfiɔk ke eyemenede mi ke akpatre usen.

20 Ndien edikem ete ke isua emi ke ema efiak eyrie enyuŋ ebine mme ikɔt Nephi. Ndien edikem ete ke ema ebin nnyin tutu nnyin ima idisim ŋkan edem edere edere ke isɔŋ oro emi ekekotde Shem.

21 Ndien edikem ete ke nnyin ima isɔŋɔ obio Shem, ndien nnyin ima ibok ikɔt nnyin kpa nte nnyin ikikemede, mme nnyin iyinyaŋa mmɔ isio ke nsobo.

22 Ndien edikem ete ke ɔyɔhɔ isua ikieita ye aba ye itiokiet ke mmɔ ema etɔŋɔ ndifiak ndi eŋwan ye nnyin.

23 Ndien edikem ete ke ami mma ntiŋ ikɔ ye ikɔt mi, nyuŋ ndɔhɔ mmɔ ke ɔkpɔsɔŋ, nte yak mmɔ esɔŋɔ eda ke iso mme Lamanite enyuŋ eŋwana enɔ iban mmɔ, ye nditɔ mmɔ, ye ebiet-iduŋ mmɔ, ye ufɔk mmɔ.

24 Ndien mme ikɔ mi ema enɔ mmɔ odudu, tutu ete ke mmɔ ikifeheke mme Lamanite, edi ema esɔŋɔ eda eŋwana ye mmɔ.

25 Ndien edikem ete ke nnyin ima ida mbon ekɔŋ tɔsin edip ye duop iŋwana ye mbon ekɔŋ tɔsin aba ye duop. Ndien edikem ete ke nnyin ima iŋwana ye ɔkpɔsɔŋ odudu tutu mmɔ ema efehe ke iso nnyin.

26 Ndien edikem ete ke ini mmɔ ekefehede nnyin ima ibine mmɔ ye mbon ekɔŋ nnyin, inyuŋ ifiak isobo ye mmɔ, inyuŋ iŋwana ye mmɔ; edi odudu Jehovah ikiduhe ye nnyin; iŋ, ema esana nnyin eyak, man Spirit Jehovah okudu ye nnyin; ke ntak oro idem ama emem nnyin ukem nte nditɔ eka nnyin.

27 Ndien esit mi ama ɔfuhɔ ke ntak akwa iduɔ ikɔt mi emi, ke ntak ibak mmɔ ye mme mbubiam ido mmɔ. Edi sese, nnyin ima iŋwana ye mme Lamanite ye mme inɔ Gadianton oro, tutu nnyin ifiak ida mme isɔŋ inyene nnyin oro inyene.

28 Ndien ɔyɔhɔ isua ikieita ye aba ye usukkiet ama ebe efep. Ndien ke ɔyɔhɔ isua ikieita ye aba ye duop nnyin ima inam ediomi ye mme Lamanite ye mme inɔ Gadianton oro, ke emi ke nnyin ikibahade mme isɔŋ inyene nnyin.

29 Ndien mme Lamanite ema enɔ nnyin isɔŋ ke edem edere edere, iŋ, tutu ke mfafaha usuŋ emi akadade oduk isɔŋ ke usuk usuk. Ndien nnyin ima inɔ mme Lamanite kpukpru isɔŋ ke usuk usuk.