Ŋwed Mormon
Ibuot 1
Ammaron ɔnɔ Mormon item kabaŋa ndisana ŋwed—Ekɔŋ ɔtɔŋɔ ke ufɔt mme Nephite ye mme Lamanite—Eda mme Nephite ita oro esio—Ibak, unana mbuɔtidem, mme mbre idiɔŋ, ye ifɔt eyɔhɔ isɔŋ. Ŋkpɔ nte K.C. 321–326.
1 Ndien idahaemi ami, Mormon, ŋwet mme ŋkpɔ emi ami nkutde nyuŋ nkopde, nyuŋ nkot enye Ŋwed Mormon.
2 Ndien ke ukem ini emi Ammaron ekedipde mme ŋwed ke Jehovah emi, enye ama edi etiene mi, (ke ami nkedide ŋkpɔ nte isua duop ke emana, ndien ami mma ntɔŋɔ ndibɔ mkpri ukpep ŋkpɔ mbaŋa ikɔt mi, ndien Ammaron ama ɔdɔhɔ mi ete: Ami mokut nte ke afo edi eyen emi enyenede eti ibuot, ndien ke ɔmɔsɔp ndifiɔk ŋkpɔ;
3 Ke ntak oro, ke ini afo edidide ŋkpɔ nte isua edip ye inaŋ ami nyoyom nte yak afo eti mme ŋkpɔ emi afo okutde abaŋa mbon emi; ndien ke ini afo edide isua oro ka isɔŋ Antum, ke obot emi edikotde Shim; ndien do ke ami nnim nnɔ Jehovah kpukpru ndisana ŋkpɔ emi ekapde ebaŋa mbon emi.
4 Ndien sese, afo eyemen mme usan emi Nephi ekewetde enɔ idem fo, ndien nyɔhɔ nsuhɔ ke afo ediyak ke ebiet emi mmɔ enade; ndien afo eyekap ke mme usan emi Nephi ekewetde kpukpru mme ŋkpɔ emi afo okutde kabaŋa mbon emi.
5 Ndien ami, Mormon, ke ntode ubon Nephi, (ndien enyiŋ ete mi ekedi Mormon) ami mma nti mme ŋkpɔ emi Ammaron ɔkɔnɔde mi uyo.
6 Ndien edikem ete ke ami, ke nkedide isua duopekiet, ete mi ama emen mi aka isɔŋ ke usuk-usuk, kpa ke isɔŋ Zarahemla.
7 Ofuri iso isɔŋ ama ɔyɔhɔ ye mme ufɔk, ndien mme owo ema ewak ekpri ayak, eketie nte ntan mben inyaŋ.
8 Ndien edikem ke isua emi ekɔŋ ama ɔtɔŋɔ ndidu ke ufɔt mme Nephite, emi ekedide mme Nephite ye mme Jacobite ye mme Josephite ye mme Zoramite; ndien ekɔŋ emi ekedi ke ufɔt mme Nephite, ye mme Lamanite ye mme Lemuelite ye mme Ishmaelite.
9 Idahaemi ekekot mme Lamanite ye mme Lemuelite ye mme Ishmaelite mme Lamanite, ndien mme nkaŋ iba emi ekedi mme Nephite ye mme Lamanite.
10 Ndien edikem ete ke ekɔŋ ama ɔtɔŋɔ ke ufɔt mmɔ ke mme adaŋa Zarahemla, ke mme mben mmɔŋ Sidon.
11 Ndien edikem ete ke mme Nephite ema osobo ata ediwak irenowo ɔtɔ kiet, emi ekawakde ekan tɔsin edip ye duop. Ndien edikem ete ke mmɔ ema eŋwana ediwak ekɔŋ kpa ke isua emi, emi mme Nephite ekekande mme Lamanite enyuŋ ewotde ediwak mmɔ.
12 Ndien edikem ete ke mme Lamanite ema ekpɔŋ uduak mmɔ, ndien ema enam emem ke isɔŋ oro; ndien emem ama odu ke ufaŋ isua inaŋ, ndien udɔk-iyip ikiduhe.
13 Edi ibak ama odu ke ofuri iso isɔŋ, tutu ete ke Jehovah ama ataŋ ndima mbet esie osio, ndien mme utom utibe ŋkpɔ ye ukɔk-udɔŋɔ ema etre ke ntak ukwaŋ-ŋkpɔ mme owo.
14 Ndien mme enɔ etode Jehovah ikiduhe, ndien Edisana Spirit ikidoroke owo ndomo kiet ke idem, ke ntak ibak ye unana mbuɔtidem mmɔ.
15 Ndien ami, ke ndide isua efut ye eyen eti ibuot, ke ntak oro Jehovah ama edise mi, ndien mma ntabi nyuŋ mfiɔk eti ido Jesus.
16 Ndien ami mma ndomo ndikwɔrɔ ikɔ nnɔ mbon emi, edi ema ekubi mi inua, enyuŋ ekpan mi ete ami ŋkukwɔrɔ ikɔ nnɔ mmɔ; koro sese mmɔ ema ekokoi esɔŋ-ibuot ye Abasi mmɔ; ndien ema etaŋ ndima mbet esio ke isɔŋ oro, ke ntak ukwaŋ-ŋkpɔ mmɔ.
17 Edi ami mma ndu ke ufɔt mmɔ, edi ema ekpan mi ndikwɔrɔ ikɔ nnɔ mmɔ, ke ntak nsɔŋesit mmɔ; ndien ke ntak nsɔŋesit mmɔ ema esuŋi isɔŋ ke ntak mmɔ.
18 Ndien mme inɔ Gadianton emi, emi ekedude ke ufɔt mme Lamanite, ema eyɔhɔ isɔŋ, tutu ete ke mme andiduŋ do ema etɔŋɔ ndidip mme inyene mmɔ ke esit isɔŋ; ndien mmɔ ema edɔrɔ, koro Jehovah okosuŋide isɔŋ, man mmɔ ekunyene mmɔ, mme mfiak nnim mmɔ.
19 Ndien edikem ete ke mme mbre idiɔŋ, ye mme ifɔt, ye mme ŋkpɔ mkpaidem ema edu; ndien odudu idiɔk owo ama odu ke ofuri iso isɔŋ, tutu kpukpru mme ikɔ Abinadi ema esu, ŋkɔ ye eke Samuel owo Lamanite.