1 Ndien edikem ete ke mme Lamanite ikidighe ekɔŋ aba tutu isua duop ama ekebe efep. Ndien sese, ami mma nda ikɔt mi, mme Nephite, ke utom ke mbeŋeidem eke mme isɔŋ mmɔ ye mbon ekɔŋ mmɔ inɔ ini ekɔŋ.

2 Ndien edikem ete ke Jehovah ama ɔdɔhɔ mi ete: Seme nnɔ mbon emi—Mbufo ekabade esit, enyuŋ edi etiene mi, enyuŋ eduɔk mmɔŋ, enyuŋ efiak ebɔp ufɔk Abasi mi, ndien eyenyaŋa mbufo.

3 Ndien ami mma nseme nnɔ mbon emi, edi, ekedi ke ikpikpu; ndien mmɔ ikifiɔke ite ke ekedi Jehovah akanyaŋa mmɔ, onyuŋ ɔnɔ mmɔ ufaŋ ndikabade esit. Ndien sese mmɔ ema esɔŋ esit mmɔ ye Jehovah Abasi mmɔ.

4 Ndien edikem ete ke isua duop emi ama ekebe efep, anam, ke kpukpru, isua ikieita ye ata tɔŋɔ ke edidi Christ, edidem mme Lamanite ama ɔnɔ ŋwed esɔk mi, emi akanamde mi mfiɔk ete ke mmɔ ke ebeŋe idem ndidi ekɔŋ ye nnyin.

5 Ndien edikem ete ke ami mma nnam ikɔt mi nte mmɔ esobo idem mmɔ ɔtɔ kiet ke isɔŋ Desolation, ke obio emi okodude ke mme adaŋa, ke mfafaha usuŋ emi akadade aka isɔŋ ke usuk usuk.

6 Ndien do ke nnyin ikinim mbon ekɔŋ nnyin, man nnyin itre mbon ekɔŋ mme Lamanite, man mmɔ ekuda isɔŋ nnyin ndomo kiet enyene; ke ntak oro nnyin ima isɔŋɔ ibaŋa mmɔ ye ofuri odudu nnyin.

7 Ndien edikem ete ke ɔyɔhɔ isua ikieita ye ata ye kiet ke mme Lamanite ema esuhɔde edi obio Desolation ndiŋwana ekɔŋ ye nnyin; ndien edikem ete ke isua oro ke nnyin ima ikan mmɔ, tutu ete ke mmɔ ema efiak enyɔŋ mme isɔŋ mmɔ.

8 Ndien ke ɔyɔhɔ isua ikieita ye ata ye iba mmɔ ema efiak esuhɔde edi ekɔŋ. Ndien nnyin ima ifiak ikan mmɔ, inyuŋ iwot ata ediwak mmɔ, inyuŋ idɔŋ mme okpo mmɔ ke inyaŋ.

9 Ndien idahaemi, ke ntak akwa ŋkpɔ emi ikɔt mi, mme Nephite, ekenamde, mmɔ etɔŋɔ ndinam inua ke odudu mmɔ, enyuŋ etɔŋɔ nditomo ke mme heaven ete ke mmɔ eyesio usiene iyip nditɔ eka mmɔ emi mme asua mmɔ ekewotde.

10 Ndien mmɔ ema etomo ke mme heaven, ŋko ye ke itie ubɔŋ Abasi, ete ke mmɔ eyedɔk eka ekɔŋ ye mme asua mmɔ, enyuŋ esibe mmɔ esio ke iso isɔŋ.

11 Ndien edikem ete ke ami, Mormon, mma nsin ofuri ofuri tɔŋɔ ke ini emi ka iso ndidi akwa etubom ekɔŋ ye ada usuŋ mbon emi, ke ntak ibak ye mbubiam ido mmɔ.

12 Sese, ami mma nda mmɔ usuŋ, ke menkesehe ibak mmɔ, ami mma nda mmɔ nka ekɔŋ ediwak ini, nyuŋ mma mmɔ, nte ima Abasi edide emi okodude ke ami, ye ofuri esit mi; ndien ami mma ŋwaŋa esit mi ke akam nnɔ Abasi mi ke ofuri usen nnɔ mmɔ; edi mbuɔtidem ikiduhe, ke ntak isɔŋesit mmɔ.

13 Ndien ikata ke ami nyaŋa mmɔ nsio ke ubɔk mme asua mmɔ, ndien mmɔ ikabakede esit ke mme idiɔk ŋkpɔ mmɔ.

14 Ndien ke ini mmɔ ema eketomo ke kpukpru se Jehovah ye Andinyaŋa nnyin Jesus akakpande mmɔ, ete ke mmɔ eyedɔk eka ekɔŋ ye mme asua mmɔ, enyuŋ esio usiene iyip nditɔ eka mmɔ, sese uyo Jehovah ama edisim mi, ete:

15 Usiene enyene mi, ndien ami nyosio usiene; ndien ke ntak emi mbon emi mikabakede esit ke ini ami mma nkanam mmɔ ebɔhɔ, sese, eyesibe mmɔ esio ke iso isɔŋ.

16 Ndien edikem ete ke ami mma nsin ofuri ofuri ndidɔk nka ekɔŋ ye mme asua mi; ndien ami mma nnam kpa nte Jehovah ɔkɔnɔde mi uyo; ndien ami mma ŋwaŋ ubɔk nda nte ntiense man nyarade nnɔ ererimbot mme ŋkpɔ emi nkokutde nyuŋ nkopde, nte mme ediyarade Spirit edide emi eketiede ntiense ebaŋa mme ŋkpɔ emi edidide.

17 Ke ntak oro ami ŋwed nnɔ mbufo, mme Gentile, ŋko ye mbufo, ufɔk Israel, ke ini utom editɔŋde, man mbufo ebeŋe idem ndinyɔŋ nka isɔŋ inyene mbufo;

18 Iŋ, ami ŋwed nnɔ kpukpru utit ererimbot; iŋ, nnɔ mbufo, ubon Israel duopeba, duopeba emi Jesus emekde ete edi mbet esie ke isɔŋ Jerusalem emi edikpede ikpe inɔ mbufo nte mme utom mbufo edide.

19 Ndien ami ŋwed ŋko nnɔ nsuhɔ mbon emi, emi duopeba emi Jesus ekemekde ŋko edibiere ikpe inɔ ke isɔŋ emi; ndien duopeba efen emi Jesus ekemekde ke isɔŋ Jerusalem eyebiere ikpe enɔ mmɔ.

20 Ndien mme ŋkpɔ emi ke Spirit akayarade ɔnɔ mi; ke ntak oro ami ŋwed nnɔ kpukpru mbufo. Ndien ke ntak emi ke ami ŋwed nnɔ mbufo, man mbufo efiɔk ete ke ana nte mbufo eda ke itie ikpe Christ, iŋ, kpukpru ukpɔŋ emi edude ke ofuri ubon ufɔk emana Adam; ndien ana nte mbufo eda man ebiere ikpe ebaŋa mme utom mbufo, mme mmɔ edi nti mme edi idiɔk.

21 Ndien ŋko man mbufo ebuɔtidem ke gospel Jesus Christ, emi mbufo edinyenede ke ufɔt mbufo; ndien ŋko ete ke mme Jew, mbio ediomi Jehovah, eyenyene ntiense efen edian enye emi mmɔ ekekutde enyuŋ ekekopde, ete ke Jesus, emi mmɔ ekewotde, ekedi ata Christ ye ata Abasi.

22 Ndien ami moyom ndinam kpukpru utit ererimbot ekabade esit enyuŋ ebeŋe idem ndida ke itie ikpe Christ.