1 Sese, ami, Moroni, mekure ŋwed ete mi, Mormon. Sese, ami nyene ekpri ŋkpɔ ndiwet, mme ŋkpɔ emi edide ke ete mi ɔnɔ mi uyo ete ŋwet.

2 Ndien idahaemi edikem ete ke ini akwa ye ata akamba ekɔŋ ke Cumorah ama okokure, sese, mme Lamanite ema eyom mme Nephite emi ekebɔhɔde efehe eduk ke obio ke usuk usuk, tutu ema ewot ofuri mmɔ.

3 Ndien ete mi ŋko mmɔ ema ewot, ndien ami ndu kpa ikpɔŋ ndiwet mbuk mfuhɔ eke nsobo ikɔt mi. Edi sese, mmɔ enyɔŋ, ndien ami manam mbet ete mi. Ndien mme mmɔ eyewot mi, ami mfiɔkke.

4 Ke ntak oro ami nyewet nyuŋ ndip mme ŋwed emi ke isɔŋ; ndien ebiet emi ami ŋkade idighe akpan.

5 Sese, ete mi amanam ŋwed emi, ndien enye ama ewet ntak esie do. Ndien sese, ami nyewet enye ŋko edieke nyenede ufaŋ ke mme usan oro, edi nyeneke; ndien ukwak ami nyeneke, koro ami ndide ikpɔŋ. Ema ewot ete mi ke ekɔŋ, ye kpukpru nditɔ ete mi, ndien ami nyeneke mme ufan mme ebiet emi anade nte ŋka; ndien adaŋa ini emi Jehovah ediyakde ete ndu uwem ami mfiɔkke.

6 Edi, isua ikie inaŋ ama ebe efep tɔŋɔ edidi eke Jehovah ye Andinyaŋa nnyin.

7 Ndien sese, mme Lamanite ebine ikɔt mi, mme Nephite, enyuŋ ewot ke obio ke obio ye ke ebiet ke ebiet, kpa tutu mmɔ iduhe aba; ndien akwa ke iduɔ mmɔ edi; iŋ, akamba ye utibe edi nsobo ikɔt mi, mme Nephite.

8 Ndien sese, edi ubɔk Jehovah enam enye. Ndien sese ŋko, mme Lamanite edu ke ekɔŋ ye kiet eken; ndien ofuri iso isɔŋ emi edi ekara kiet ke uwot owo ye uduɔk iyip; ndien owo ndomo kiet ifiɔkke utit ekɔŋ emi.

9 Ndien idahaemi, sese, ami ntiŋke aba mbaŋa mmɔ, koro owo iduhe ibɔhɔke mme Lamanite ye mme inɔ emi edude ke iso isɔŋ oro.

10 Ndien owo iduhe emi ɔfiɔkde ata Abasi ibɔhɔke edi mme mbet Jesus, emi ekedude ke isɔŋ oro tutu ibak mme owo ama etim okpon ete Jehovah ikiyakke mmɔ esuhɔ ye mbon oro; ndien mme mmɔ edu ke iso isɔŋ owo ndomo kiet ifiɔkke.

11 Edi sese, ete ami, ye ami imikut mmɔ, ndien mmɔ enam utom enɔ nnyin.

12 Ndien owo ekededi emi ɔbɔde ŋwed emi, ndien idibiomke enye ikpe ke ntak mme ndudue emi edude ke enye, ukem oro edifiɔk mme ŋkpɔ emi ekponde ekan emi. Sese, ami ndi Moroni; ndien ekpedi ama edi se ekeme, ami mkpanam mbufo efiɔk kpukpru ŋkpɔ.

13 Sese, ami metre nditiŋ ŋbaŋa mbon emi. Ami ndi eyen Mormon, ndien ete mi ekedi eke ubon Nephi.

14 Ndien ami ndi ukem oro emi ekedipde ŋwed emi ɔnɔ Jehovah; mme usan oro ke idem mmɔ inyeneke ufɔn, ke ntak ibet Jehovah. Koro enye ama etiŋ ke akpanikɔ ete ke owo ndomo kiet idimenke mmɔ ndida nyene udori; koro ŋwed oro enyene akwa ufɔn; ndien owo ekededi emi edimende enye idi unwana, enye ke Jehovah edidiɔŋ.

15 Koro owo ndomo kiet idinyeneke odudu ndimen enye ndi unwana ibɔhɔke edi Abasi edinɔ enye; koro Abasi aduak ete ke edinam enye ye enyin emi esede ubɔŋ esie ikpɔŋ, mme ke ufɔn eke mbon eset ye mbon ediomi Jehovah emi ekesuande tɔŋɔ ke anyan ini.

16 Ndien ɔyɔfɔfɔn ɔnɔ enye emi edimende ŋkpɔ emi idi unwana; koro eyesio enye ke ekim edi unwana, nte asaŋade ye ikɔ Abasi; iŋ, eyesio enye ke isɔŋ, ndien enye eyeyama ɔwɔrɔ ke ekim, ndien edi ɔnɔ ifiɔk mme owo; ndien edinam emi ke odudu Abasi.

17 Ndien edieke mme ndudue edude mmɔ edi mme ndudue owo. Edi sese, nnyin ifiɔkke ndudue ndomo kiet; edi Abasi ɔfiɔk kpukpru ŋkpɔ; ke ntak oro, enye emi etipde ikpe, yak enye ekpeme mbak enye ididu ke afanikɔŋ eke ikaŋ hell.

18 Ndien enye emi ɔdɔhɔde ete: Wut nnyin, midighe eyemia fi—yak enye ekpeme mbak enye idinɔ enye emi Jehovah akpande uyo.

19 Koro sese, ukem emi ebierede ikpe ke ibumede eyefiak ebiere ikpe ke ibumede enɔ enye; koro nte mme utom esie asaŋade ke mme okuk utom esie edi; ke ntak oro, enye emi amiade eyefiak emia enye, ke Jehovah.

20 Sese se ŋwed Abasi ɔdɔhɔde—owo ukumia, ŋko enye ukubiere ikpe; koro ami nyene ubiere ikpe, Jehovah ɔdɔhɔ, usiene edi okim ŋko, ndien ami nyafiak mkpe.

21 Ndien enye emi editiŋde ikɔ iyaresit ye mme eŋwan ibaŋa utom Jehovah, inyuŋ ibaŋa mbon ediomi Jehovah emi edide ufɔk Israel, ndien enyuŋ edɔhɔ ete: Nnyin iyibiat utom Jehovah, ndien Jehovah iditihi ediomi esie emi enye akanamde ɔnɔ ufɔk Israel—ukem oro odu ke afanikɔŋ ndikpi nyuŋ mmen nsin ke ikaŋ;

22 Koro mme nsinsi ntak Jehovah eyeka iso, tutu kpukpru mme eŋwɔŋɔ esie esu.

23 Eduŋɔde mme prophecy Isaiah. Sese, ami nkemeke ndiwet mmɔ. Iŋ, esese ami ndɔhɔ mbufo, mme ndisana owo oro emi ekedude mbemiso ami, emi enyenede isɔŋ emi, eyeseme, iŋ, tutu kpa ke ntɔŋ ke mmɔ ediseme inɔ Jehovah; ndien adaŋa nte Jehovah odude uwem enye eyeti ediomi emi enye akanamde ye mmɔ.

24 Ndien enye ɔfiɔk mme akam mmɔ, ete ke mmɔ ekedi ke ufɔn nditɔ eka mmɔ. Ndien enye ɔfiɔk mbuɔtidem mmɔ, koro ke enyiŋ esie ke mmɔ ekesio mme obot; ndien ke enyiŋ esie ke mmɔ ekenam ererimbot enyek; ndien ke odudu ikɔ esie ke mmɔ ekenam mme ufɔk ŋkpɔkɔbi eduɔ ke isɔŋ; iŋ, kpa ufiop akwa ikaŋ ikikemeke ita mmɔ, ŋko ye mme unam ikɔt, mme mme idiɔk urukikɔt, ke ntak odudu ikɔ esie.

25 Ndien sese, mme akam mmɔ ŋko ekedi ke ntak esie man Jehovah ayak mme ŋkpɔ emi ewɔrɔ edi.

26 Ndien owo ndomo kiet ikemeke ndidɔhɔ ke mmɔ ididihe, koro ke akpanikɔ mmɔ eyedi, koro Jehovah etiŋ ntre; koro ke isɔŋ ke mmɔ edito iwɔrɔ idi, oto ke ubɔk Jehovah, ndien owo ndomo kiet ikemeke nditre enye; ndien enye eyedi ke usen emi edidɔhɔde ete ke ekure mme utibe ŋkpɔ; ndien enye eyedi kpa nte owo etiŋ ikɔ oto ke mkpa.

27 Ndien eyedi ke usen kiet ke ini emi iyip mme ndisana owo edisemede inɔ Jehovah, ke ntak mme ebuana ŋkari ye mme utom ekim.

28 Iŋ, eyedi ke usen oro, ke ini edikaŋde odudu Abasi, ndien ekabade esabade mme ufɔk Abasi enyuŋ emenede ke ntaŋidem mme esit mmɔ; iŋ, kpa ke usen emi mme ada usuŋ ke mme ufɔk Abasi ye mme andikpep edimenede ke ntaŋidem mme esit mmɔ, tutu ke ndiyene ufup nnɔ mbon emi edude ke mme ufɔk Abasi mmɔ.

29 Iŋ, eyedi ke usen oro, ke ini edikopde ibaŋa mme ikaŋ, ye mme oyobio, ye mme uye nsuŋikaŋ ke mme esen idut;

30 Ndien eyekop ebaŋa ŋko mme ekɔŋ, ye mme etop emi owo mitimke inim ibaŋa mme ekɔŋ, ye mme unyekisɔŋ ke mme nsio nsio ebiet.

31 Iŋ, eyedi ke usen oro, ke ini mme akwa ndedehe edidude ke iso isɔŋ; mme uwot owo, ye mme inɔ, ye nsu, ye mme abiaŋa, ye mme usaŋa akpara, ye kpukpru ofuri utɔ mme mbubiam ido ; ke ini ediwak edidude emi edidɔhɔde ete, Nam emi, mme nam oko, ndien idighe akpan, koro Jehovah ayada ye utɔ oro ke akpatre usen. Edi ɔyɔdiɔk ɔnɔ utɔ oro, koro mmɔ edu ke ata ndondot ye ke mme uruk ukwaŋ-ŋkpɔ.

32 Iŋ, eyedi ke usen oro, ke ini edidude mme ufɔk Abasi emi ebɔpde man mmɔ edɔhɔ ete: Edi etiene mi, ndien ke ntak okuk mbufo eyefen mme idiɔk-ŋkpɔ mbufo.

33 O mbufo mbon ibak ye ukwaŋ ido ye nsɔŋ-ibuot, ntak emi mbufo ebɔpde mme ufɔk Abasi enɔ idem mbufo man enyene udori? Ntak emi mbufo ekpuhɔrede edisana ikɔ Abasi, man mbufo eda ubiom ikpe enɔ mme ukpɔŋ mbufo? Esese, mbufo ese mme ediyarade Abasi; koro esese, ini ke edi ke usen oro ke, ini emi kpukpru mme ŋkpɔ emi anade nte edisu.

34 Sese, Jehovah owut mi akamba ye mme utibe ŋkpɔ kabaŋade se inade nte edi ke esisit ini, ke usen oro ke ini mme ŋkpɔ emi edidide ke otu mbufo.

35 Sese, ami ntiŋ ikɔ nnɔ mbufo nte mbufo ekedu do, ndien edi mbufo iduhe. Edi sese, Jesus Christ owut mi mbufo, ndien ami mɔfiɔk edinam mbufo.

36 Ndien ami mɔfiɔk nte ke mbufo esaŋa ke ntaŋidem esit mbufo; ndien ndomo kiet iduhe ibɔhɔke ekpri ifaŋ emi mimenekede ke enyɔŋ ke ntaŋidem mme esit mmɔ, inɔ ndisine ata ediye ɔfɔŋ, inɔ ufup, ye mme eŋwan, ye ubi, ye mme ukɔbɔ, ye kpukpru utɔ mme ukwaŋ-ŋkpɔ; ndien mme ufɔk Abasi mbufo, iŋ, kpa ofuri mmɔ, ekabade edehe ke ntak ntaŋidem mme esit mmɔ.

37 Koro sese, mbufo emema okuk, ye inyene mbufo, ye ndiye ɔfɔŋ mbufo, ye ndibana mme ufɔk Abasi mbufo, ekan nte mbufo emade mme ubuene ye mbon unana, mbon udɔŋɔ ye mbon ŋkpɔ-nnam.

38 O mbufo mme ndedehe, mbufo mbon esit ibak, mbufo mme andikpep, emi eyamde idem mbufo enɔ se idibiarade, ntak emi mbufo edehede edisana ufɔk Abasi? Ntak emi but anamde mbufo ndimen enyiŋ Christ nnɔ idem mbufo? Ntak emi mbufo mikereke ite ke ata akamba edi ufɔn anana utit idaresit akan ukut emi midikpaha—ke ntak itoro ererimbot?

39 Ntak emi mbufo ebanade idem mbufo ye enye emi minyeneke uwem, ndien esuk eyak mbon ɔbiɔŋ, ye mbon unana, ye mbon iferi, ye mbon udɔŋɔ ye mbon ŋkpɔ-nnam ebe mbufo, ndien ikwe mmɔ?

40 Iŋ, ntak emi mbufo ebɔpde mme ebuana ŋkari man enyene udori, ndien enam ete mme ebe-akpa etua ke iso Jehovah, ŋko ye mme anana ete ye eka etua ke iso Jehovah, ŋko ye iyip mme ete mmɔ ye mme ebe mmɔ etua enɔ Jehovah eto isɔŋ, eyom usiene ke ibuot mbufo?

41 Sese, akaŋkaŋ usiene ɔkɔŋɔ mbufo ke idem; ndien ini kɔsɔp edi emi enye edisiode usiene iyip mme ndisana owo ke idem mbufo, koro enye idiyakke mme eyet mmɔ aba.