1 Ndien idahaemi edikem ete ke ɔyɔhɔ isua ikieita ye ata ye ita ke mme Nephite ema edɔk eka ye mbon ekɔŋ mmɔ ndinwana ekɔŋ ye mme Lamanite, nsio ke isɔŋ Desolation.

2 Ndien edikem ete ke ema efiak ebin mbon ekɔŋ mme Nephite esin ke isɔŋ Desolation. Ndien ke ini idem okosuk ememde mmɔ, mbufa mbon ekɔŋ mme Lamanite ema edisobo ye mmɔ; ndien mmɔ ema eŋwana ata ekɔŋ, tutu ete ke mme Lamanite ema eda obio Desolation enyene, enyuŋ ewot ediwak mme Nephite, ndien ema eda ediwak nte mbon ŋkpɔkɔbi.

3 Ndien mbon ekesuhɔde ema efehe enyuŋ ekediana ye mme andiduŋ ke obio Teancum. Idahaemi obio Teancum akana ke mme adaŋa ke mben inyaŋ; ndien enye ŋko ama ekpere obio Desolation.

4 Ndien ekedi ke ntak emi mbon ekɔŋ mme Nephite ekedɔkde etiene mme Lamanite ke eketɔŋɔ ndimia mmɔ; koro ekpedi ikidighe ke ntak oro, mme Lamanite ikpikinyeneke odudu ke idem mmɔ.

5 Edi, sese, mme ubiere ikpe Abasi eyesim mbon ibak; ndien edi ke mbon ibak ke edimia mbon ibak ufen; koro edi mbon ibak edemede mme esit nditɔ owo ɔnɔ uduɔk iyip.

6 Ndien edikem ete ke mme Lamanite ema enam mme mbeŋeidem ndiŋwana ye obio Teancum.

7 Ndien edikem ke ɔyɔhɔ isua ikieita ye ata ye inaŋ mme Lamanite ema edi eŋwan ke obio Teancum, man mmɔ eda obio Teancum enyene ŋko.

8 Ndien edikem ete ke mme Nephite ema enuk enyuŋ ebin mmɔ efiak edem. Ndien ke ini mme Nephite ekekutde ete ke mmɔ ema ebin mme Lamanite mmɔ ema efiak enam inua ke odudu mmɔ; ndien mmɔ eka iso ke ukeme mmɔ, ndien efiak eda obio Desolation enyene.

9 Ndien idahaemi ema enam kpukpru mme ŋkpɔ emi, ndien ema edu mme tɔsin emi ekewotde ke ŋkaŋ mbiba, mme Nephite ye mme Lamanite mbiba.

10 Ndien edikem ete ke isua ikieita ye ata ye itiokiet ama ebe efep, ndien mme Lamanite efiak edi etiene mme Nephite ndinwana ekɔŋ; ndien edi ke mme Nephite ikikabakede esit ke idiɔk ŋkpɔ emi mmɔ ekenamde, edi ekɔbɔ ke ibak mmɔ ofuri ofuri ini.

11 Ndien edeme ikemeke nditiŋ, mme owo ndiwet ofuri ofuri mbaŋa enyene ndik ndise iyip ye uwot ediwak owo emi ekedude ke otu mme owo, eke mme Nephite ye mme Lamanite mbiba; ndien kpukpru esit ema esɔŋ, ke ntre mmɔ edaresit ke uduɔk iyip ofuri ofuri ini.

12 Ndien akananam utɔ akwa ibak oro iduhe ke otu ofuri nditɔ Lehi, mme kpa ke otu ofuri ufɔk Israel, nte asaŋade ye mme ikɔ Jehovah, nte okodude ke otu mbon emi.

13 Ndien edikem ete ke mme Lamanite ema eda obio Desolation enyene, ndien emi ke ntak emi ibat mmɔ akawakde akan ibat mme Nephite.

14 Ndien mmɔ ŋko ema esaŋa eka iso ekeŋwana ye obio Teancum, ndien ema ebin mme andiduŋ do esio ke enye, ndien ema eda ediwak mbon ŋkpɔkɔbi iban ye nditɔ mbiba, ndien ema ewot mmɔ nte mme uwa enɔ mme abasi ndem mmɔ.

15 Ndien edikem ete ke ɔyɔhɔ isua ikieita ye ata ye itiaba, mme Nephite ke eyatde esit ke ntak emi mme Lamanite ekewade iban mmɔ ye nditɔ mmɔ, ete ke mmɔ ema eka eŋwan ye mme Lamanite ye ata akwa iyaresit, tutu ete ke mmɔ ema efiak emia mme Lamanite, enyuŋ ebin mmɔ esio ke mme isɔŋ mmɔ.

16 Ndien mme Lamanite ikidihe ekɔŋ aba ye mme Nephite tutu ɔyɔhɔ isua ikieita ye ata ye efut.

17 Ndien ke isua emi mmɔ ema esuhɔde edi eŋwan ye mme Nephite ye ofuri odudu mmɔ; ndien owo ikibatke mmɔ ke ntak akwa ibat mmɔ.

18 Ndien tɔŋɔde ke ini emi ka iso, kemme Nephite mikinyeneke odudu ke idem mme Lamanite, edi mmɔ etɔŋɔ ndikwɔk mmɔ nsio kpa nte mbara ke iso utin.

19 Ndien edikem ete ke mme Lamanite ema esuhɔde edi eŋwan ye obio Desolation; ndien ema eŋwana ata ɔkpɔsɔŋ ekɔŋ ke isɔŋ Desolation, emi mmɔ ekemiade mme Nephite.

20 Ndien mmɔ ema efehe ke iso mmɔ, ndien ema edisim obio Boaz; ndien do mmɔ ema eda eŋwana ye mme Lamanite ye akwa uko, tutu ete ke mme Lamanite ikimiaha mmɔ tutu mmɔ efiak edi ɔyɔhɔ ikaba.

21 Ndien ke ini mmɔ ekefiakde edi ɔyɔhɔ ikaba, ema ebin mme Nephite enyuŋ ewot mmɔ ye ata akwa uwotowo; iban mmɔ ye nditɔ mmɔ ke ekefiak ewa enɔ mme ndem.

22 Ndien edikem ete ke mme Nephite ema efiak efehe ke iso mmɔ, eda kpukpru mme andiduŋ ye mmɔ, ke mme ikpɔ obio ye mme mkpri obio mbiba.

23 Ndien idahaemi ami, Mormon, ke ŋkutde nte ke mme Lamanite ema ebeŋeidem ndikan isɔŋ oro, ke ntak oro ami mma ŋka obot Shim, ndien mma ntaŋ kpukpru mme ŋwed emi Ammaron ekedipde ɔnɔ Jehovah.