1 Ndien idahaemi, sese, ami nyetiŋ ekpri nnɔ nsuhɔ mbon emi, emi esuhɔde, edieke edide ete ke Abasi ɔyɔnɔ mmɔ mme ikɔ mi, man mmɔ efiɔk mme ŋkpɔ mme ete mmɔ; iŋ, ami ntiŋ nnɔ mbufo, mbufo nsuhɔ ufɔk Israel; ndien emi edi mme ikɔ emi ami ntiŋde:

2 Mbufo efiɔk ete ke mbufo edi eke ufɔk Israel.

3 Mbufo efiɔk ete ke ana mbufo edi enɔ edikabade esit, midighe Christ idinyaŋake mbufo.

4 Mbufo efiɔk ete ke ana nte mbufo eyak mme ŋkpɔ ekɔŋ mbufo enim, ndien idatke esit aba ke ndiduɔk iyip, ndien ifiakke imen mmɔ, ibɔhɔke edi ete ke Abasi ɔyɔnɔ mbufo uyo.

5 Mbufo efiɔk ete ke ana nte mbufo edi ke ifiɔk mme ete mbufo, ndien ekabade esit ke kpukpru mme idiɔk ŋkpɔ ye ukwaŋ ŋkpɔ mbufo, enyuŋ ebuɔtidem ke Jesus Christ, ete ke enye edi Eyen Abasi, ndien ete ke mme Jew ema ewot enye, ndien ke odudu Ete, enye afiak eset, ke emi enye enyene edikan udi; ndien ŋko ke enye ke emen ifɔt mkpa.

6 Ndien enye ada ediset ke mkpa eke mkpa edi, ke emi ana nte edemede owo edida ke iso itie ikpe esie.

7 Ndien enye ada edifak ererimbot edi, emi edide ete ke enye emi ekutde ete ke iduehe ke iso esie ke usen ikpe ke edinɔ enye ete odu ke iso Abasi ke obio ubɔŋ esie, ndikwɔ mme anana utit itoro ye mme mbon ikwɔ ke enyɔŋ, nnɔ Ete, nyuŋ nnɔ Eyen, nyuŋ nnɔ Edisana Spirit, emi edide Abasi kiet, ke idaha inemesit emi minyeneke utit.

8 Ke ntak oro ekabade esit, enyuŋ eduɔk mmɔŋ ke enyiŋ Jesus, ndien enyime gospel Christ, emi edinimde ke iso mbufo, idighe ke ŋwed emi ikpɔŋ edi ŋko ke ŋwed emi edidide itiene mme Gentile ito mme Jew, ŋwed emi editode mme Gentile isim mbufo.

9 Koro sese, ewet emi ye ntak ete ke mbufo emekeme ndibuɔtidem ke enye; ndien edieke mbufo ebuɔtde idem ke enye mbufo eyebuɔtidem ke emi ŋko; ndien edieke mbufo ebuɔtde idem ke emi mbufo eyefiɔk ebaŋa mme ete mbufo, ŋko ye mme utibe utom emi ekenamde ke odudu Abasi ke otu mmɔ.

10 Ndien mbufo ŋko eyefiɔk ete ke mbufo edi nsuhɔ ubon Jacob; ke ntak oro ebat mbufo esin ke otu mme owo eke akpa ediomi; ndien edieke edide ete ke mbufo emebuɔt idem ke Christ, enyuŋ eduɔk mmɔŋ, akpa ye mmɔŋ, ndien ye ikaŋ ye Edisana Spirit, etienede uwut-ŋkpɔ Andinyaŋa nnyin, nte asaŋade ye se enye ɔnɔde nnyin uyo, ɔyɔfɔn ɔnɔ mbufo ke usen ikpe. Amen.