1 Ndien edikem ete ke ami mma ŋka ke otu mme Nephite, ndien mma ŋkabade esit ke uŋwɔŋɔ emi ŋkanamde nte ke ndinwamke mmɔ aba; ndien mmɔ ema efiak enɔ mi etubom mbon ekɔŋ mmɔ, koro mmɔ ekesede mi nte ami mekeme ndisio mmɔ ke mme ukut mmɔ.

2 Edi sese, ami ŋkenyeneke idorenyin, koro ami mma mfiɔk mme ubiere ikpe Jehovah emi edisimde mmɔ; koro mmɔ ikikabakede esit ke mme ukwaŋ-ŋkpɔ mmɔ, edieŋwana eyom uwem mmɔ ikot ke Enye emi okobotde mmɔ.

3 Ndien edikem ete ke mme Lamanite ema edi eŋwan ye nnyin nte nnyin ikifehede ika obio Jordan; edi sese, ema ebin mmɔ efiak edem man mmɔ ekuda obio oro ke ini oro.

4 Ndien edikem ete ke mmɔ ema efiak edi eŋwan ye nnyin, ndien nnyin ima nim obio oro. Ndien mme obio efen ema edu emi mme Nephite ekenimde, mme mkpɔsɔŋ obio emi ekesibede mmɔ esio man mmɔ ekukeme ndiduk obio emi akanade nnyin ke iso, ndisobo mme andiduŋ ke isɔŋ nnyin.

5 Edi edikem ete ke mme isɔŋ ekededi emi nnyin ikibede, ndien mme Nephite ikitaŋke mme andiduŋ do isin, mme Lamanite ema esobo, ndien mme ikpɔ obio, mme esit obio, ye mme mkpri obio mmɔ ema efɔp ye ikaŋ; ndien ke ntem isua ikieita ye ata ye duop ye usukkiet ama ebe efep.

6 Ndien edikem ete ke ɔyɔhɔ isua ikieita ye anaŋ mme Lamanite ema efiak edi ndiŋwana ekɔŋ ye nnyin, ndien nnyin ima iŋwana ye mmɔ uko uko; edi kpukpru ekedi ikpikpu, koro ata akamba ke ibat mmɔ ekedi ete ke mmɔ ema edighi mbon Nephite ke idak ikpat mmɔ.

7 Ndien edikem ete ke nnyin ima ifiak imen itɔk, ndien mbon emi itɔk mmɔ ɔkɔsɔpde akan mme Lamanite ema ebɔhɔ, ndien mbon emi itɔk mmɔ mikisɔpke ikan mme Lamanite ema ekwɔk enim ke isɔŋ enyuŋ ewot.

8 Ndien idahaemi sese, ami Mormon, nyomke ndinuak mme ukpɔŋ owo ke ndinim ke iso mmɔ utɔ idiɔk ndise iyip ye uwot ediwak owo nte ekenimde ke iso mi; edi ami, ke mfiɔkde nte ke akpanikɔ ke ana nte enam efiɔk mme ŋkpɔ emi, ndien ete ke kpukpru mme ŋkpɔ emi edipde ke ana nte eyarade ke enyɔŋ ufɔk—

9 Ndien ŋko ete ke ifiɔk mme ŋkpɔ emi ana nte edisim nsuhɔ mme mbon emi, ŋko ye mme Gentile, emi Jehovah ɔkɔdɔhɔde ete ke ana esuan mbon emi, ndien ke ana nte ebat mbon emi nte ukpɔk ke otu mmɔ—ke ntak oro ami ŋwet ekpri ibibio, ndomoke ndinɔ ofuri mbuk mme ŋkpɔ emi ami ŋkutde, ke ntak ibet emi ami mbɔde, ndien ŋko man mbufo idiyene ukut emi okponde akaha ke ntak ibak mbon emi.

10 Ndien idahaemi sese, emi ke ami ntiŋ nnɔ ubon mmɔ, ndien ŋko mme Gentile emi enyenede ukpeme enɔ ufɔk Israel, emi ekutde enyuŋ efiɔkde ebiet emi mme edidiɔŋ mmɔ etode.

11 Koro ami mɔfiɔk ke utɔ oro eyekut ukut enɔ unɔmɔ ufɔk Israel; iŋ, mmɔ eyekut ukut enɔ nsobo mbon emi; mmɔ eyekut ukut ete ke mbon emi ikikabakede esit man edi ke ema ebɔ mmɔ ke mme ubɔk Jesus.

12 Idahaemi ewet mme ŋkpɔ emi enɔ nsuhɔ ufɔk Jacob; ndien ewet mmɔ ke utɔ usuŋ emi, koro Abasi ɔfiɔk ete ke ibak ididaha mmɔ isɔk mmɔ; ndien ke ana nte edip mmɔ enɔ Jehovah man mmɔ ewɔrɔ edi ke ekemini esie.

13 Ndien emi edi ibet emi ami mbɔde; ndien sese, mmɔ eyesu nte asaŋade ye ibet Jehovah, ke ini enye edikutde ete ke ɔfɔn, ke ifiɔk esie.

14 Ndien sese, mmɔ eyeka etiene mme anana mbuɔtidem ke otu mme Jew; ndien ke ntak emi ke mmɔ edika—man ekpek mmɔ ete ke Jesus edi Christ, Eyen odu uwem Abasi; man Ete anam editibe, oto ke Enye emi enye Amade akan, akwa ye nsinsi uduak esie, ke ndifiak mmen mme Jew ndi, mme ofuri ufɔk Israel, ŋka isɔŋ inyene mmɔ, emi Jehovah Abasi mmɔ ɔnɔde mmɔ, ke ndinam ediomi esie edisu;

15 Ndien ŋko man ubon mbon emi etim ebuɔtidem ɔyɔhɔ ɔyɔhɔ ke gospel esie, emi edikade itiene mmɔ ito mme Gentile; koro eyesuan mbon emi, ndien eyekabade edi obubit, ndedehe, ye mbon emi esuade, ekan nte ekpetiŋde ebaŋa se akananam iduhe ke otu nnyin, iŋ, kpa se ikidude ke otu mme Lamanite, ndien emi ke ntak unana mbuɔtidem ye ukpono ndem.

16 Koro sese, Spirit Jehovah ama etre ndinam ndutim ye mme ete mmɔ; ndien mmɔ edu, inyeneke Christ ye Abasi ke ererimbot; ndien ebin mmɔ nte mbio ke iso ofum.

17 Mmɔ ke ini kiet ekedi mbon idaresit, ndien mmɔ ema enyene Christ nte ekpeme erɔŋ mmɔ; iŋ, edi kpa Abasi Ete mmɔ akada mmɔ usuŋ.

18 Edi idahaemi, sese, edi Satan ada mmɔ usuŋ, kpa nte ebinde mbio ke iso ofum, mme nte awawa emende ubom, emi minyeneke afara mme ibaŋ-ubom, mme emi minyeneke ŋkpɔ ndomo kiet ndiwat enye; ndien kpa nte enye edide, ntre ke mmɔ edi.

19 Ndien sese, Jehovah omum mme edidiɔŋ mmɔ akama, emi mmɔ ekpebɔde ke isɔŋ oro, ɔnɔ mme Gentile emi edinyenede isɔŋ oro.

20 Edi sese, eyedikem ete ke mme Gentile eyebin enyuŋ esuan mmɔ; ndien ke ini mme Gentile ema ekebin enyuŋ esuan mmɔ, sese, ke ini oro ke Jehovah editi ediomi emi enye akanamde ɔnɔ Abraham ye ofuri ufɔk Israel.

21 Ndien ŋko Jehovah eyeti mme akam ndinen owo, emi ebɔŋde enɔ enye ɔnɔ mmɔ.

22 Ndien idaha oro, O mbufo mme Gentile, didie ke mbufo ekeme ndida ke iso odudu Abasi, ibɔhɔke mbufo eyekabade esit enyuŋ eŋwɔŋde ekpɔŋ mme idiɔk usuŋ mbufo?

23 Nte mbufo ifiɔkke ite ke mbufo edu ke mme ubɔk Abasi? Nte mbufo ifiɔkke ite ke enye enyene ofuri odudu, ndien ke akwa uyo esie ayawaŋ ererimbot kiet nte ikpa ŋwed?

24 Ke ntak oro, mbufo ekabade esit, enyuŋ esuhɔde idem mbufo ke iso esie, mbak enye edidi ke unen ikpe ibaŋa mbufo—mbak ke nsuhɔ ubon Jacob idika ke otu mbufo nte ekpe, inyuŋ iwai mbufo mbiombio, ndien ndomo kiet ididuhe ndinam ebɔhɔ.