1 Ndien idahaemi ami nkure ŋwed mi kabaŋa nsobo ikɔt mi, mme Nephite. Ndien edikem ete ke nnyin ima isaŋa ika ke iso mme Lamanite.

2 Ndien ami, Mormon, ŋwet ŋwed nnɔ edidem mme Lamnite, nyuŋ nyom nto enye nte yak enye ayak ete nnyin itaŋ ikɔt nnyin ibok ɔtɔ kiet ke isɔŋ Cumorah, ke ŋkaŋ obot emi ekekotde Cumorah, ndien do nnyin imikeme ndinɔ mmɔ ekɔŋ.

3 Ndien edikem ete ke edidem mme Lamanite ama ɔnɔ mi ŋkpɔ emi ami nkoyomde.

4 Ndien edikem ete ke nnyin ima isaŋa ika isɔŋ Cumorah, ndien nnyin ima iwuk mme atayat nnyin ikanade obot Cumorah; ndien ekedi ke isɔŋ uwak mmɔŋ, mme akpa, ye mme idim; ndien do nnyin ima inyene idorenyin ndinyene eti idaha nkan mme Lamanite.

5 Ndien ke ini isua ikieita ye anaŋ ye inaŋ ama ekebe efep, nnyin ima itaŋ kpukpru nsuhɔ ikɔt nnyin ika ke isɔŋ Cumorah.

6 Ndien edikem ete ke ini nnyin ima ikitaŋ kpukpru ikɔt nnyin ibok kiet ke isɔŋ Cumorah, sese ami, Mormon, mma ntɔŋɔ ndisɔŋ; ndien ke nkɔfiɔkde nte ke edi akpatre eŋwan ikɔt mi, ndien ke Jehovah ɔkɔnɔde mi uyo ete yak ŋkuyak mme ŋwed emi mme ete nnyin ekeyakde enɔ, emi ekedide edisana, eduɔ eduk mme ubɔk mme Lamanite, (koro mme Lamanite eyebiat mmɔ) ke ntak oro ami nnam ŋwed emi nsio ke mme usan Nephi, nyuŋ ndip ke obot Cumorah kpukpru mme ŋwed emi emi ekeyakde esin mi ke ubɔk oto ke ubɔk Jehovah, ibɔhɔke ekedi mme usan ifaŋ emi, emi ami ŋkɔnɔde eyen mi Moroni.

7 Ndien edikem ete ke ikɔt mi, ye iban ndɔ mmɔ ye nditɔ mmɔ, idahaemi ema ekut mme mbon ekɔŋ mme Lamanite nte esaŋade ebine mmɔ; ye idiɔk ndik mkpa oro emi ɔyɔhɔde mme esit kpukpru owo ibak, ke mmɔ ekebet ndisobo ye mmɔ.

8 Ndien edikem ete ke mmɔ ema ediŋwana ekɔŋ ye nnyin, ndien kpukpru ukpɔŋ ɔkɔyɔhɔ ye nyomonsia ke ntak ata akwa ibat mmɔ.

9 Ndien edikem ete ke mmɔ ema eŋwana ye ikɔt mi ye akaŋkaŋ, ŋko ye idaŋ, ŋko ye utigha, ŋko ye ekuri, ŋko ye kpukpru mme utɔ ŋkpɔ ekɔŋ.

10 Ndien edikem ete ke ema ewot ikɔt mi, iŋ, kpa tɔsin duop mi emi ekedude ye ami, ndien ami mma nduɔ ye unan ke otu mmɔ; ndien mmɔ ema ebe mi ete ke mmɔ ikitreke uwem mi.

11 Ndien ke ini mmɔ ema ekesaŋa ebe enyuŋ ewot ofuri ikɔt mi ibɔhɔke ekedi edip ye inaŋ nnyin, (ke otu oro emi ekedide eyen mi Moroni) ndien ke ini nnyin ima ikibɔhɔ ke mkpa ikɔt nnyin, ima ikut mkpɔŋ, ke ini mme Lamanite ema ekefiak enyɔŋ mme nna-ekɔŋ mmɔ, ewɔrɔ ke enyɔŋ obot eke obot Cumurah, tɔin duop ikɔt mi oro, emi ekewotde, emi ami nkadade iso.

12 Ndien nnyin ŋko ima ikut tɔsin duop ikɔt mi emi eyen mi Moroni akadade usuŋ.

13 Ndien sese, tɔsin duop eke Gidgiddonah ema ekpa, ndien enye ŋko ke otu.

14 Ndien Lamah ama akpa ye tɔsin duop esie; ndien Gilgal ama akpa ye tɔsin duop esie; ndien Limhah ama akpa ye tɔsin duop esie; ndien Jeneum ama akpa ye tɔsin duop esie; ndien Cumenihah, ye Moronihah, ye Antionum, ye Shiblom, ye Shem, ye Josh, ema ekpa ye tɔsin duop mmɔ kiet kiet.

15 Ndien edikem ete ke duop efen ema edu emi ekekpade ke akaŋkaŋ, ye tɔsin duop mmɔ kiet kiet; iŋ, kpa ofuri ikɔt mi, ibɔhɔke ekedi edip ye inaŋ oro emi ekedude ye ami, ŋko ye ekpri ibat emi ekebɔhɔde eduk mme obio ke usuk usuk, ye ekpri ibat emi ekewɔrɔde eduk etiene mme Lamanite, ema ekpa; ndien` obukidem, ye mme ɔkpɔ, ye iyip mmɔ ena ke enyɔŋ isɔŋ, ke ekedide ke mme ubɔk mbon emi ekewotde mmɔ eyak enim ete ebu ke isɔŋ, ndien eburɔde enyuŋ efiak enyɔŋ eka ntan isɔŋ.

16 Ndien ukpɔŋ mi ama ɔyɔhɔ ye ndutuhɔ, ke ntak ediwot ikɔt mi, ndien ami nseme nte:

17 O mbufo mme ndiye owo, didie ke mbufo ekewɔrɔ ekpɔŋ mme usuŋ Jehovah! O mbufo mme ndiye owo, didie ke mbufo ekesin Jesus oro, emi akadade ye ntatubɔk ndibɔ mbufo!

18 Sese, edieke mbufo mikpikinamke emi, mbufo ikpiduɔhɔ. Edi sese, mbufo emeduɔ, ndien ami mɔfuhɔ mkpa mbufo.

19 O mbufo mme ndiye nditɔ iden ye iban, mbufo mme ete ye mme eka, mbufo mme ebe ye mme iban ndɔ, mbufo ndiye owo, didie ke edi ke mbufo eduɔ!

20 Edi sese, mbufo emenyɔŋ, ndien mme ukut mi ikemeke ndida mbufo mfiak nyɔŋ ndi.

21 Ndien usen oro ke awara edi emi idem eke mkpa mbufo anade esine uwem emi mkpa miduhe, ndien mme idem emi, emi idahaemi ebude ke mbiara ana esɔp ekabade edi mme idem emi mikemeke ndibiara; ndien ke idaha oro ana nte mbufo eda ke itie ikpe Christ, man ebiere ikpe nte asaŋade ye mme utom mbufo; ndien edieke anade nte edi ke mbufo edi nnen nnen, idaha oro ke ediɔŋ mbufo ye mme ete mbufo emi ekekpade mbem iso mbufo.

22 O ete ke mbufo ema ekabade esit mbemiso akwa nsobo emi edisim mbufo. Edi sese, mbufo emekpa, ndien Ete, iŋ, Nsinsi Ete eke heaven, ɔfiɔk idaha mbufo; ndien enye anam ye mbufo nte asaŋade ye edinen ye mbɔm esie.