Enos Binaaltsoos

1 Áko shooh, baa hoolzhiizh shí, Enos, shił bééhózingo shizhéʼé éí diné yáʼátʼéehii átʼéii ńtʼę́ę́ʼ—Háálá bizaad yee nashineeztą́ą́ʼ, dóó Diyin Bóhólníihiikʼehgo yáʼátʼéehgo iiná yee nashineeztą́ą́ʼ—dóó éí bąą shiDiyin God bízhiʼ baa hashniih—

2 Áádóó nihił hodeeshnih shibąąhági ádaatʼéii Diyin God tʼahdóo shandeeʼaahyę́ędą́ą́ʼ, éí bidááhdóó tʼáá íiyisíí shichʼįʼ nahwiisnááʼ.

3 Áko shooh, naaldlooshii daʼałchinígíí hadeeshzhah biniyé tsiiyiʼgo dah díyá; dóó shizhéʼé tʼáá ahąąh hoolʼáágóó iiná yee shichʼįʼ hanázihyę́ę, dóó Diyin yá naazíinii bił dahózhǫ́, tʼáá íiyisíí yéego shijéí yidiisnááʼ.

4 Áádóó shiiʼ sizíinii diyinkʼehgo oodaał tʼáá íiyisíí yídįsilį́į́ʼ; dóó Áshiilaaígíí bidááhdóó ntsidinígoʼ yéigo bichʼįʼ sodeeszin, dóó shiiʼsizʼíinii bá ádaanáʼiisiskan; dóó bichʼįʼ yishchahgo sodiszingo shee iʼííʼą́; aooʼ, dóó azhą́ʼ tłʼééʼ hazlį́į́ʼ ndi tʼahdii yáʼąąshgódei shinééʼ diitsʼaʼ.

5 Áádóó łaʼ shichʼįʼ haʼjoodzííʼ, kóníigo: Enos, nibąąhági ádaatʼéii baanisiníyáhą́ą́ naanídinishʼaah, dóó nikʼihojidoodliił.

6 Áádóó shí, Enos, Diyin God doo biyoochʼíídgóó shił bééhózin; ákohgo, baa yínííł nisinée nahjįʼ kólyaa.

7 Áádóó kódííniid: Diyin Bóhólníihii, dííshąʼ éí haitʼáo bóhónéézą́?

8 Áádóó kóshidííniid: Christ yínídlánígíí biniinaa, éí tʼahdóo biinééʼ dinitsʼį́į́h da dóó tʼahdóo yiniłtsééh da. Dóó ląʼí nínáádoohaidi índa bitsʼíís yee íishjąní íʼdidoolnííł; ákohgo, náásgóó yínááł, neʼoodląʼ hadaałtʼéégóó ánániidlaa.

9 Kʼad, bikʼihoolzhiizh éí saad sidétsʼą́ą́ʼgo, shikʼéí danilíinii Nephi dineʼé beʼiinaʼ baa tsídékéézgo bá hojoobaʼ niizį́į́ʼ; ákohgo, tʼáá átʼé bee aníshtʼéhígíí bee Diyin God bichʼįʼ bá náʼiisékan.

10 Áádóó iiʼ sizíiniikʼehjí shichʼįʼ nahwiiʼnáago, áko shooh, Diyin Bóhólníihii biinééʼ shíniʼ nááhásdlį́į́ʼ, kóníigo: Nikʼéí danilíinii shibee hazʼáanii yikʼeh dahółʼinígíí baa deeshááł. Díí kéyah baa diníʼą́, dóó éí hodiyingo hazʼą́; doo éí haitʼáo da hoyééʼgo bikʼijįʼ hadeesdzih da tʼáá hazhóʼó bąąhági ádaatʼį́į́go tʼéiyá; ákohgo, bee haasdzíʼę́ę bikʼehgo nikʼéí baa deeshááł; dóó ndaʼiisííhgo yínííł hwiindzin bikʼijįʼ kódeeshłííł.

11 Áádóó shí, Enos, díí saad sídítsʼą́ą́ʼgo, Diyin Bóhólníihii yinishdląnígíí bee shidziil sélį́į́ʼ; dóó chʼééh sodiszingo nízaadgóó ahoolzhiizh, shikʼéí Laman dineʼé bá.

12 Áádóó baa hoolzhiizh sodeeszin dóó bikʼijįʼ yéego tʼáá ałtsojįʼ biká áátʼįįd, Diyin Bóhólníihii kóshidííniid: Háálá iinídlánígíí biniinaa, laanaa nínízinígíí nichʼįʼ kódeeshłííł.

13 Áádóó kʼad áko shooh, laanaa bitsʼą́ą́dę́ę́ʼ nisinée—ákó shidineʼé, Nephi dineʼé, niʼiilzííh yiih yikaidą́ą́ʼ, tʼáá haʼátʼííshį́į́ bee ahwiʼdiʼdooldį́į́ł, dóó Laman dineʼé chʼeekaigo, áko Bóhólníihii Diyin God shidineʼé, Nephi dineʼé baahaneʼ ndaháásdzohígíí tʼáá náás yiitʼaał doo; bibee adziilii bee, áko náásdi beiniłką́ągo Laman dineʼé bił ííshją́ą́ ídoolniił, áko yee dah yisdándookah—

14 Háálá hojoobaʼ adeitʼíigo naʼnitin tʼáá aaníinii nináádeididoodłééł ílǫ́ǫ chʼééh ádeilʼįįd. Dóó bá dahachįʼgo adadííniid, bighaahdą́ą́ʼ, nihizaad ńdaháádzohyę́ę dóó tʼáá nihí adanihidiildįįł, dóó nihizází adaʼoołʼį́į́łyę́ę éí dóʼ tʼáá áłtso.

15 Ákohgo, Bóhólníihii Diyin God nihizaad ńdaháádzohígíí doo dadoochxǫǫłgóó nihá yaa áhályą́ągo shił bééhózin, tʼáá áłahjįʼ bichʼįʼ naʼooshkąąh, háálá kóshidííniid: Tʼáá biniyé hojoobaʼ nínízinígíí neʼoodląʼ bee yínkeedgo, íínídlą́ągo Christ bízhiʼ binahjįʼ biniyé sodilzinígíí nichʼįʼ kódoolnííł.

16 Áádóó sheʼoodląʼ bee, Diyin God néísiskąąd nihaahaneʼ ńdaháásdzooígíí baa áhólyą́ą doo bidííniid; áko Diyin God shił ahaʼdeetʼą́ táa bí ííniizį́į́ʼgo Laman dineʼé yee didooʼááł.

17 Áádóó shí, Enos, ahaʼdeetʼánée bikʼehgo áhodooníłígíí shił bééhoozin; ákohgo shiiʼ sizíinii áhoʼdiilzeeʼ.

18 Áádóó Diyin Bóhólníihii áshidííniid: Nihizásíyę́ę ałdóʼ díí shídayíkeed; áko beʼoodląʼ bikʼeh ádáhodoonííł; háálá tʼáá nigi átʼáo beʼdaʼoodląʼ ńtʼę́ę́ʼ.

19 Áádóó kʼad baa hoolzhiizh shí, Enos éí, Nephi dineʼé bitaasíyá, Diyin bikʼeh áhodooníłígíí bee nanitʼą́ą́ʼ, dóó éí sidetsʼą́ʼígíí dóó yiiłtsánígíí tʼáá aaníigo bee hahaasdzííʼ.

20 Áádóó kʼad baa haasdziih Laman dineʼé tʼáá aaníí Diyin God dedoodląąłgo Nephi bidineʼé tʼáá awołibee yiká ádáátʼįįd. Ákondi chʼééh ádeiitʼįįd; tʼáá íiyisíí daʼoołchʼį́į́d daazlį́į́ʼ, dóó doo yáʼáshóonii ndabilóozgo daʼałchin daazlį́į́ʼ, dóó tʼóóʼ bádahádzid, dóó diné ndaʼałtseedii daazlį́į́ʼ, tʼóó bedaʼelyaaii adeʼadayiilyaa dóó tʼóó baaʼihii ałtso yiih yíkai lá; naaldlooshii daʼałchinígíí deildeeł; níbaal yiiʼ dabighan, dóó doo kééhojitʼį́įdi ndaaldeeh bitsiiʼ daashzhééʼ dóó naaldlooshii bikágí boozhnííʼ gónaa tʼéiyá bikʼidaastiʼgo; dóó ałtį́į́ʼ índa béésh hał názhahí dóó tsénił doo bił nidanitłʼahgo yee atʼídaʼałʼį́. Dóó lą́ʼí yiiltʼéego éí atsįʼ tʼáá daalchíiʼgo tʼáá bizhání deilghał; dóó ndanihidoołtsxiłgo tʼáá áłahjįʼnihíkáʼádaatʼį́.

21 Áádóó baa hoolzhiizh Nephi bidineʼé kʼidiʼdoolyeełgo hashtʼeʼdahóola, dóó tłʼoh naadą́ą́ʼ ałʼąą átʼéego deineestʼą́, dóó tsin bineestʼąʼ, dóó ndanilkaadígíí, béégashii ałʼąą ádaatʼéii, dóó tłʼízí, dóó tłʼízí daʼałchinígíí, dóó łį́į́ʼ ląʼígo.

22 Áádóó tʼóó ahayóí Diyin yá yádaałtiʼii nihitah dahólǫ́ǫ́ ńtʼę́ę́ʼ. Áádóó Diné éí bikʼos dááłdził, áko doo bikʼizhdootą́ąʼ ádaatʼée da.

23 Áádóó tsʼídá yéego bikʼeʼeschʼíiʼgo, naʼnitin dóó Diyin bikʼeh áhodoonííłgo anaaʼ dahodooleełígíí bee bił dahóoneʼ, dóó ałkʼijįʼ ídlį́, dóó dahodoochxǫǫł, dóó anoonééł áłahjįʼ bee béédabijííłnííh, dóó ahoolʼáágóó áhoonííł, dóó Diyin God bibee ánihwiitʼaah dóó bibee adziilii, díí tʼáá ałtso—áłahjįʼ Diyin Bóhólníihii bádahódínósin biʼdiʼní. Díí tʼáadoo biʼohó bee yáshtiʼ, dóó tsʼídá bééhózínígo bee haadzííʼ, áko doo tsxįįgo áhoʼdidooldįįł da. Dóó kótʼáo haah hashneʼgo nááházoh.

24 Áádóó Nephi dineʼé dóó Laman dineʼé daʼahigą́ągo yishʼíigo shiiníłką́.

25 Áádóó baa hoolzhiizh są́ biihíyá, áádóó neeznádiin dóó tsostsʼidiin dóó baʼaan náhástʼéí nááhai yáádą́ą́ʼ nihizhéʼé Lehi Jerusalemdę́ę́ʼ dah diiná.

26 Áádóó nááshidiʼdoolyééł bichʼįʼ hoolzhishgo baa ákoniizį́į́ʼ, Diyin God bibeeʼadziil shidiisnáʼígíí bee díí dineʼé ndínéeshtįįł dóó Diyin bikʼeh áhodooníłígíí bee bichʼįʼ hadeesdih, dóó Christ bizaad tʼáá aaníi átʼéego bee bichʼįʼ hadeesdzih. Áádóó díí baa hashneʼgo tʼáá níléídééʼ shiiníłką́, dóó nahasdzáán biláahdi átʼéego baa hózhǫǫd.

27 Áádóó tʼáá hodíínaʼí hanáshyį́įhdi deeshááł, sháNináʼnídláii bił hazʼą́ądi; háálá éí bí binahjįʼ háádeeshyįhgo shił bééhózin. Áádóó shitsʼíís hoolʼáágóó hiná násdlį́įʼgo éí tʼáá íiyisíí baa shił hózhǫ́, dóó bidááhdę́ę́ʼ yideesįįł; áko shił hózhǫ́ǫgo biniiʼ yideestsééł, áádóó kóshididooniił: Wóshdę́ę́ʼ shaa nínááh, nikʼihojisdlííʼii, shiTaaʼ nilíinii bighandi náhashtʼehoolyaa. Amen.