Macaafa Mormoon

Kanaafuu, kun galmee saba Nefii, akkasumas immoo seenaa gabaabduu Laamaanotaati—Haftee mana Israa’el kan ta’aniif, warra Laamanootaaf; akkasumas immoo Yihuudotaa fi Ormootaaf kan barreeffameedha—karaa abboommiitiin, akkasumas hafuura raajii fi mul’ataatiin kan barreeffame—Akka isaan hin badneefis jedhamee, barreeffamanii akkasumas mallattoodhaan cufamamanii, Gooftaadhaan kan dhokfaman—Kennaa fi humna Waaqayyootiin gara hiika isaa isa turetti akka as ba’aniif—Yeroo ofii isaatii isa sirriitti karaa Ormootaatiin akka as ba’aniif, Harka Morooniin kan cufame—Hiikni isaas kennaa Waaqayyootiini.

Seenaa gabaabaan Macaafa Eeterii irraas immoo fudhatameera, kan seenaa saba Yaareed of keessaa kan qabu, warra yammuu Gooftaan afaan namootaa waliin make faffaca’anii turan, yeroo isaan bantii Waaqaa bira ga’uuf masaraa ijaaraa turan—Kunis Gooftaan haftee mana Israa’eliif abboota isaaniitiif waantoota gurguddaa hammamii akka inni hojjete argisiisuufiidha; akkasumas isaan kakuuwwan Gooftichaa akka beekaniif, isaan bara baraan akka hin gatamne akka beekaniifiidha—Akkasumas immoo Yesus Kiristosiin akka ta’e, Waaqa Bara Baraas akka ta’e, Yihuudotaa fi Ormoota hamma amansiisutti, ofii isaa biyyoota hundumaatti akka mul’ise—Akkasumas amma, as keessa dogoggorri yoo jiraate isaan dogoggora namootaati; kanaafuu, teessoo firdii Kiristositti mudaa malee akka argamtaniif, waantoota Waaqayyoo hin balaaleffatiinaa.