Pene 7

Iosepha Semita, hoê mauhaa i roto i te rima o te Fatu

« Ua riro Iosepha Semita, te peropheta no te mau mahana hopea nei, ei mauhaa i roto i te rima o te Fatu no te iriti i te hoê tau tuuraa evanelia apî, te hopea e tei rahi a‘e i te mau tau tuuraa evanelia atoa ».

No roto mai i te oraraa o Ezra Taft Benson

A tavini ai Elder Ezra Taft Benson ei misionare rave tamau i Peretane i te omuaraa no te mau matahiti 1920, ua farii oia e to’na hoa misionare i te mea ta’na i parau ra « te patoʻiraa u‘ana i te Ekalesia ». I muri a‘e, te faati‘a ra oia :

« Te mau ve‘a papa‘i, te mau buka, e tae noa’tu i te mau hoho‘a pato‘i Momoni, ua itehia ïa te reira i roto ia Peretane taatoa ». No te rahi o te pato‘iraa, ua faaorehia te tahi mau huru raveraa i te ohipa misionare, mai te faatupuraa i te mau putuputuraa i te pae purumu e te opereraa i te mau buka iti. Te parau ra oia e, « Tera râ, i te pae apatoerau o te fenua Peretane i reira hoʻi maua e ohipa ai, te vai ra hoê pŭpŭ taata no te amaa no South Shields, e mau taata haapa‘o maitai e te pûpû ia ratou e te auraro maitai roa, e ua titau mai ratou ia maua to’u hoa ia haere i rotopu ia ratou e ia paraparau i roto i ta ratou pureraa oro‘a. Teie ta ratou i parau mai, ‘E rave rahi te mau taata i to matou vahi aita ratou e ti‘aturi nei i te mau haavare i nene‘ihia. Mai te mea e, e haere mai orua, e faaî matou i te fare pureraa na‘ina‘i’.

« No reira, ua farii maua i teie aniraa e ua haamata maua i te faaineine, e ua haamata vau i te tuatapapa i te parau no te taivaraa. Te hoê teie tumu parau au-roa-hia e au, e ua feruri au e, e mea maitai no ratou ; e ua rohi au, e ua tuatapapa, e ua feruri au e, e nehenehe ta’u e paraparau ahuru ma pae minuti i ni‘a i te reira tumu parau.

« Ua haere atu maua i taua fare pureraa ra e ua î roa i te taata. Ua oaoa te mau taata atoa. E i muri a‘e i te mau tuhaa ohipa no te omuaraa ua paraparau to’u hoa, e i muri iho, ua paraparau vau i roto i te hoê huru otiatia ore aita â vau i ite a‘enei i te reira i roto i to’u oraraa. E i to’u parahiraa mai i raro e i te hi‘oraa i ta’u uati, ua paraparau vau e piti ahuru ma pae minuti te maoro, e aita vau i faahiti i te parau no te taivaraa, aita noa a‘e au i feruri i te parau no te taivaraa. Ua paraparau vau no ni‘a ia Iosepha Semita, e ua faaʻite au i te iteraa e, ua riro oia ei peropheta na te Atua e ua ite au i te reira. Ua paraparau vau no ni‘a i te taeraa mai te Buka a Moromona ei ite apî no te Mesia, e ua faaʻite au i to’u iteraa papû. I to’u iteraa i te ohipa tei tupu, aita ta’u e nehenehe e tape‘a i to’u roimata.

« I te faaotiraa te pureraa, e rave rahi Feia Mo‘a tei haere mai i mua e ua faaʻite mai i to ratou mauruuru i te mea e, ua parauhia te tahi mau parau no ni‘a ia Iosepha Semita. Na ô maira ratou e, ‘E rave rahi o to matou mau hoa tei parau mai e, « E nehenehe ta matou e farii i te mau parau atoa no ni‘a i te Ekalesia eiaha râ no ni‘a ia Iosepha Semita’ ». E ua haere mai te tahi o te reira mau hoa e ua parau mai e, ‘Ua ineine matou i teie nei. Ua ineine matou i teie pô. Ua farii matou i te faaʻiteraa e, e peropheta o Iosepha Semita na te Atua’ ».¹

Ua tamau noa te peresideni Benson i te imi i te mau rave‘a i roto i to’na oraraa no te faaʻite i to’na iteraa no ni‘a i te piiraa o Iosepha Semita. Ei hi‘oraa, a tavini ai oia ei faaterehau no te ohipa faaapu no te mau Hau Amui no Marite, ua titau mai te hoê fare ratio ia’na ia ma‘iti i te hoê irava au-roa-hia e ia tai‘o i te reira i roto i te ratio, e ua ma‘iti oia i te hoê tuhaa o te Aamu o—Iosepha Semita i roto i te Buka Poe Tao‘a Rahi.²

Na ni’a i te mau mea atoa, ua tamau noa oia i te faaʻite i te hoê iteraa papû paari e te puai i mua i to’na mau hoa Feia Mo‘a. Ua parau oia e, « Ua riro o Iosepha Semita ei peropheta no te Atua ora, te hoê o te mau peropheta rahi roa a‘e tei ora i ni‘a i te fenua nei. Ua riro oia ei mauhaa i roto i te rima o te Atua no te iriti i te hoê tau tuuraa evanelia rahi, tei hau i te rahi, e te hopea o te mau tau tuuraa atoa, no te faaineine i te ho‘i-piti-raa mai o te Fatu ».³

Ua faataahia te parau poro‘i o te Orama Matamua « no te mau tamarii atoa a to tatou Metua e ora nei i ni‘a i te tino o te fenua nei ».

Te mau haapiiraa a Ezra Taft Benson

Ua riro te orama matamua a Iosepha Semita ei ohipa hau roa a‘e i te rahi i roto i teie ao mai te tau mai o te Tiʻa-faahou-raa o Iesu Mesia.

E taata imi Iosepha Semita i te parau mau i to’na apîraa. No te anoʻinoʻi rahi tei itehia i roto i te mau ekalesia, ua ani oia i te Atua tei hea te ekalesia mau. Ei pahonoraa i taua pure ra, ua faaʻite papû oia e, ua tae mai te hoê pou maramarama. Teie ta’na mau parau :

« I te ma‘iriraa taua maramarama ra i ni‘a iho ia’u, ua ite atu ra vau e piti taata, to raua teatea e te hanahana a ti‘a noa’i raua i ni‘a a‘e ia’u i roto i te reva ra, e ore roa ïa e ti‘a ia faaauhia i te hoê noa’tu mea. Ua parau maira te hoê o raua ia’u, ma te faatoro atu i to’na rima i ni‘a i te tahi, e ma te faahiti i to’u i‘oa, i te na-ô-raa mai e—O Ta’u Tamaiti Here Teie. A Faaroo Ia’na ! » (Iosepha Semita—Aamu 1:17).

Ua ui atura Iosepha i te piti o te taata, oia hoʻi o Iesu Mesia, tei hea te haapa‘oraa mau i rotopu i te mau haapaʻoraa keresetiano. Ua parauhia maira ia’na e, eiaha oia e amui atu i te hoê o te reira mau haapa‘oraa, aore hoê o ratou i tano.⁴

I te haereraa mai te Atua te Metua e ta’na Tamaiti o Iesu Mesia i ni‘a i te fenua nei, mai ta raua i na reira i te matahiti 1820 a fâ mai ai raua i te peropheta apî ra, o Iosepha Semita, e ere ïa no te tahi rii noa pupu taata. O te hoê ra parau poro‘i e te hoê heheuraa i faataahia no te mau tamarii atoa a to tatou Metua e ora nei i ni‘a i te tino o te fenua nei. O te ohipa rahi a‘e ïa tei tupu i roto i teie nei ao mai te tau mai o te Tiʻa-faahou-raa o te Fatu. I te tahi taime te feruri nei au e, no te fatata tatou i teie ohipa, aita’tura tatou e taa hope roa i to’na auraa e to’na faufaa e to’na nehenehe.⁵

Ua riro te orama matamua a te peropheta Iosepha Semita ei papa no te haapiiraa a te Ekalesia.⁶

Te parau mau papû tei matara mai na roto mai i te iteraa o te peropheta i te matahiti 1820 ra, o te vai-mau-raa ïa te Atua e te parau e, ua tiʻafaahou mau o Iesu Mesia. Ua ite oia ia raua ei na taata taa ê maitai te tahi i te tahi, ei na taata faahanahanahia tei paraparau mai ia’na mai te hoê taata e paraparau i te tahi atu taata.⁷

Te haamauururu haehaa nei au no te iteraa e, ua ho‘i faahou mai te Atua te Metua e ta’na Tamaiti, o Iesu Mesia, ei na taata faahanahanahia, i ni‘a i teie fenua i to tatou nei anotau, i roto i teie tau tuuraa ; no te iteraa e, ua fâ mau raua i te tamaiti peropheta … Ua riro teie ei faaʻiteraa hanahana roa aʻe no te Atua te Metua e no te Tamaiti, e tei vai nei ta tatou papa‘iraa no te reira.⁸

Mai te au i te tohuraa i roto i te Faufaa Apî, ua farii Iosepha Semita i te hoê heheuraa apî e te mau farereiraa e te mau melahi.

Ua matarohia e, tei ni‘a te faaroo o te mau melo o Te Ekalesia a Iesu Mesia i te Feia Mo‘a i te Mau Mahana Hopea Nei i te parauraa e, e peropheta o Iosepha Semita na te Atua, e ua parau atoa oia i te taeraa mai o te Buka a Moromona i muri a‘e i te mau farereiraa o te mau melahi ia’na i ropu i te matahiti 1823 e 1827.

I te iteraa te tahi mau taata i teie parau, ua faahapa a‘era ratou ma te parau e, e parau maamaa te parau e, e fâ mai te mau melahi i roto i teie tau.

Te vai nei i roto i te Bibilia te faaʻiteraa papû e, ua arata‘i te Atua i te mau ohipa no Ta’na ekalesia i ni‘a i te fenua nei hau atu i te maha tauatini matahiti na roto i te heheuraa, e, mai te mea e, e titauhia, na roto i te utuuturaa no te ra‘i mai.

I roto i ta’na tatararaa i te huru o te mau mahana hopea no ni‘a i te tae-piti-raa mai o Iesu Mesia, ua tohu o Ioane i roto i te Faufaa Apî e, hou te ho‘iraa mai o te Faaora, e farii te ao nei i te hoê faaararaa e, te fatata mai nei te hora no te haavâraa a te Atua. E tae mai te reira faaararaa na roto mai i te hoê melahi no te ra‘i mai i te faaʻiteraa i te hoê « evanelia mure ore ». A faaroo mai i ta’na mau parau :

« Hi‘o atura vau i te hoê melahi i te maueraa na ropu i te rêva nei ; ma te evanelia e ti‘a i te vairaa ra ei pororaa’tu i te feia e parahi i te ao nei ra, i te mau fenua atoa, e te mau opu atoa, e te mau reo atoa, e te mau nunaa atoa,

« I te pii-hua-raa te reo e, a măta‘u i te Atua, e faahanahana’tu ia’na ; ua tae hoʻi i te hora faautuaraa na’na ra : e haamori outou ia’na, i tei hamani i te ra‘i, e te fenua, e te tai, e te mau pape pihaa ra ». (Apokalupo 14:6–7).

Mai te mea e, e farii te hoê taata i te faaʻiteraa papû a Ioane te Heheu Parau, e ti‘a ïa ia tiaʻihia te fâraa mai o te hoê ve‘a no te ra‘i mai.

Te faaʻite nei tatou ma te hanahana e, ua fâ mai teie ve‘a melahi i te peropheta Iosepha Semita i te omuaraa o te tenetere ahuru ma iva. Teie faaararaa e, ua fâ mai te hoê melahi no ô mai i te Atua ra i te hoê peropheta i to tatou nei anotau, ua riro ïa ei faaararaa tei tuʻati maite i ni‘a i te mau tohuraa o te Faufaa Apî, e no reira, e ti‘a ia haapopouhia te anaanatae o te feia ma‘imi i te parau mau.⁹

I te pô no te 21 no setepa 1823, ua fâ maira te hoê melahi i te peropheta Iosepha Semita. O Moroni te i‘oa o te melahi. Oia te hopea o te ho’e ana‘iraa roa o te mau peropheta tahito no na nunaa rahi e piti tei ora… i ni‘a i te fenua Amerika e rave rahi tenetere i ma‘iri.¹⁰

Ua haere mai Moroni ia Iosepha Semita ra no te faati‘araa i te parau tohu.

Ua riro te Buka a Moromona ei faaʻiteraa papû no te piiraa o Iosepha Semita ei peropheta.

Te faaʻiteraa papû roa a‘e no ni‘a i te patururaa i te parau e, e auvaha parau o Iosepha Semita no te Atua Manahope, o te nene‘iraahia ïa te hoê papa‘iraa mo‘a, te Buka a Moromona.

Te Buka a Moromona o te hoê ïa papaa parau no ni‘a i te mau taata i tahito ra i te fenua Amerika, e te papa‘i atoa ra i te fâraa mai e te utuuturaa a Iesu Mesia i te mau taata no taua fenua ra i muri a‘e i To’na pa’umaraa i te ra‘i i Ierusalema. Te tumu rahi o te reira papaa parau, no te haapapû ïa i te u‘i i muri mai e, o Iesu te Mesia, te Tamaiti a te Atua. No reira, ua riro te Buka a Moromona i te tahi faahou ite, apitihia i te Bibilia, no ni‘a i te ti‘araa hanahana o Iesu Mesia.

Ua farii o Iosepha Semita i teie papaa parau tahito na roto mai i te hoê ve‘a no te ra‘i mai, mai ta Ioane i tohu ra. Ua fâ mai teie melahi ia’na e ua faaʻite mai i te vairaa o te mau papaa parau tahito i nana‘ohia i ni‘a i te mau api auri e tei hunahia i roto i te hoê apoo ofa‘i. I te taime i faataahia ra, ua horo‘ahia te mau api i te peropheta apî ra e tae noa’tu i te mauhaa no te huri i te reira. I muri iho, ua nene‘ihia te buka no to te ao nei ei mau papa‘iraa mo‘a.

Ei faati‘a-atoa-raa i te faaʻiteraa a Ioane, tei roto i te reira buka te « evanelia mure ore ». I teie nei te porohia nei te reira na to tatou mau misionare i to te ao nei.

Te ani manihini nei matou ia outou ia tamata i te ti‘araa mau o ta matou faaʻiteraa no ni‘a i te tumu i roaa mai ai te Buka a Moromona. E nehenehe outou e rave i te reira na roto i te tai‘oraa i te reira buka e i te aniraa i to tatou Metua i te Ao ra e parau mau anei teie mau mea. Te fafau atu nei matou e, mai te mea e, e aau tae mau to outou, e farii ïa outou i te haapapûraa no te parau mau na roto i te Varua Maitai. E rave rahi mirioni, tei faaʻite papû ma te ohie e te aau tae mau e, ua ite ratou e, no ô mai te reira i te Atua ra.¹¹

Mai te mea e, e parau mau te Buka a Moromona, o Iesu mau ïa te Mesia, ua riro mau o Iosepha Semita ei peropheta Na’na, e Ekalesia mau Te Ekalesia a Iesu Mesia i te Feia Mo‘a i te Mau Mahana Hopea Nei, e te faaterehia nei te reira i teie mahana na te hoê peropheta o te farii nei i te heheuraa.¹²

Ua faati‘a faahou te Atua i To’na basileia i ni‘a i te fenua nei na roto i te peropheta Iosepha Semita.

Ua pure te mau faaroo keresetiano na te ao atoa nei i te roaraa e rave rahi tenetere ia tae mai te basileia o te Atua [a hi‘o Mataio 6:10]. Te parau papû nei matou i mua i te mau taata atoa e : tei ô nei taua mahana ra i teie nei !¹³

Na te pure a te hoê tamaiti ahuru ma maha matahiti, i roto i te Uru raau Mo‘a, i iriti i te hoê tau tuuraa evanelia apî.¹⁴

Ua faati‘a faahou te Atua i to’na basileia i ni‘a i te fenua nei ei faati‘araa i te parau tohu.…

Na te Atua i pii ia Iosepha Semita ia faati‘a faahou i taua basileia ra—Te Ekalesia a Iesu Mesia i te Feia Mo‘a i te Mau Mahana Hopea Nei. Te faaʻite papû nei au e, ua rave oia i teie ohipa, ua haamau oia i te mau niu e ua horo‘a oia i te Ekalesia i te mau taviri e te mau mana no te rave tamau noa i te ohipa rahi o te mau mahana hopea nei, ta’na i haamata i raro a‘e i te arata‘iraa a te Atua Manahope.¹⁵

Ua fâ mai te tahi atu mau tino ia Iosepha Semita, mai ia Ioane Bapetizo e o Petero, Iakobo, e o Ioane, tei faatoro‘a ia’na i te mana no te rave i te ohipa i te i‘oa o te Atua (a hi‘o Iosepha Semita—Aamu 1:68–72 ; PH&PF 27:5–13). Ua faaho‘ihia mai te ekalesia e te basileia o te Atua i teie mau mahana hopea nei, oia Te Ekalesia a Iesu Mesia i te Feia Mo‘a i te Mau Mahana Hopea Nei, e tae noa’tu i te mau horo‘a atoa, te mau ti‘araa, te mau mana, te mau haapiiraa tumu, te feia faatere, e te mau haamaitairaa o te Ekalesia i tahito ra. (A hi‘o PH&PF 65 ; 115:3–4).¹⁶

Ua faauehia i te peropheta Iosepha ia haere i mua ei mauhaa i roto i te rima o te Atua e ia faanahonaho i te Ekalesia, ia faaʻite i to te ao nei i te tahi faahou ite no te ti‘araa hanahana o Iesu Mesia, oia te Buka a Moromona tei iritihia na roto mai i te mau papaa parau mo‘a…

Teie faaho‘i-faahou-raa mai o te evanelia, te faaho‘i-faahou-raa mai o te maramarama e te parau mau, ua opuahia ïa te reira ei maitai e ei haamaitairaa no te mau tamarii paatoa a te Atua. E no reira, ma te haehaa e te mauruuru, te haere nei ta tatou mau misionare i roto i te ao nei no te poro e, ua tupu na te taivaraa o te parau mau, tera râ, na roto i te maitai o te Atua ua vetea faahou te mau ra‘i e ua heheuhia mai te evanelia i te taata nei na roto ia Iosepha Semita, te Peropheta.¹⁷

Ua vai auraro maitai e ua vai parau-ti‘a Iosepha Semita e tae roa’tu i te poheraa.

A tupu noa ai te Ekalesia i te rahi ua tupu atoa te varua pato‘ito‘i e te hamani ino. I te mau vahi atoa e tanuhia « te huero sinapi » na‘ina‘i ra, ua tupu atoa te mau faataupupuraa i to’na tupuraa.¹⁸

Ua ti‘a papû te tamaiti ahuru ma maha matahiti i mua i to te ao nei. Ua ite te Atua i ta’na tamaiti a ma‘itihia ai oia. Ua ite Oia e, e vai auraro maitai e e vai parau-ti‘a oia e tae roa’tu i te pohe.¹⁹

Ua faahapa u‘ana te tahi mau taata i te faaʻiteraa papû a [Iosepha Semita] e ua haamata i te faati‘a i te mau aamu haavare e te hamani-ino-raa ia’na. Aita te peropheta apî, mai te aposetolo Paulo i tahito ra, i huna i to’na iteraa papû, ua tape‘a râ oia i ta’na parau i te na oraa e :

« No te mea, ua ite mau vau i te orama. Ua papû te reira ia’u, e ua papû atoa ia’u e, ua ite te Atua i te reira, e aita e nehenehe ia’u ia huna i te reira. Ua papû ia’u e, na roto i to’u hunaraa i te reira, e faariri au i te Atua e e faahapahia vau e ana ». (Iosepha Semita—Aamu 1:25).²⁰

Ua haere Iosepha Semita te Peropheta i to’na ra pohe na roto i to’na iho hinaaro. Ua titiro oia i to’na iteraa papû i to’na ora—to’na iho toto. I taua mahana ri‘ari‘a ra i Navu, Illinois, a hi‘o ai oia i muri i ni‘a i to’na oire e to’na mau taata ta’na i here, a haere ai oia i te fare tape‘araa no Carthage e i to’na pohe maratiri, na ô a‘era oia : « Teie te vahi au roa a‘e e te mau taata maitai roa a‘e i raro a‘e i te ra‘i ; e mea iti roa to ratou ite i te mau tamataraa e tiaʻi maira ia ratou » [History of the Church, 6:554].

I muri a‘era, ua parau te Peropheta ma te hau e te itoito hoʻi, noa’tu te pe‘ape‘a « Te haere nei au mai te arenio i te vahi tupa‘iraa, te hau nei râ vau mai te hoê po‘ipo‘i o te tau mahanahana. Te vai hau nei to’u mana‘o ma te ore i faaino atu i te Atua e i te taata atoa nei. Mai te mea e, e taparahi pohe ratou ia’u, e pohe ïa vau ma te hara ore, e e pii mai to’u toto mai raro mai i te repo no te tahoo, e e parauhia ïa no’u nei e, ‘ua taparahi-opua-ino-mau-hia oia’ » [History of the Church, 6:555].²¹

Ua na reira te peropheta Iosepha Semita i te hopea o to’na oraraa tahuti nei, ma te faatupu i te tuhaa tahuti nei o Ta’na misioni hanahana. Ua faaʻite papû oia e, teie misioni tahuti ta’na, eita ïa e hope hou to’na oti-roa-raa. Mai te misioni a te Faaora, « e arenio i taparahihia hou te haamauraahia teie nei ao » [a hi‘o Apokalupo 13:8], ua ma‘iti- ê-hia na o Iosepha no ta’na misioni rahi. ²²

Te ti‘a nei Iosepha Semita i teie mahana ei upoo no teie tau tuuraa evanelia hopea, o tei hau i te rahi i te mau tau tuuraa atoa.

Ua ite au e, te ora noa nei â Iosepha Semita, noa’tu e, ua taparahi-pohe-hia oia no te parau mau, e i roto i to’na ti‘araa ei upoo faatere no teie tau tuuraa—tei hau i te rahi i te mau tau tuuraa evanelia atoa—e ti‘a tamau noa oia e tae noa’tu i te mau tau mure ore e tae mai.²³

Te poro‘i a Iosepha Semita—te poro‘i a Te Ekalesia a Iesu Mesia i te Feia Mo‘a i te Mau Mahana Hopea Nei, te poro‘i a te Momoni—o te poro‘i faufaa roa a‘e ïa i roto i teie nei ao. E te tamau noa nei â Iosepha Semita te Peropheta, o te ora nei i teie mahana, i te rave i te hoê tuhaa faufaa i roto i te arata‘iraa o te Ekalesia i ô nei i ni‘a i te fenua nei.²⁴

No te farii i te hoê iteraa o te aano o te misioni a te Peropheta i te fenua nei, e ti‘a ia tatou ia hi‘o i te reira i roto i te maramarama o te tau mure ore. Tei rotopu oia i « tei hau i te maitai e tei maramarama » mai ta Aberahama i faaʻite mai i muri nei :

« Inaha, ua faaʻite mai te Fatu ia’u, o Aberahama, te mau ite tei faanahonahohia hou te ao nei i hamanihia ai ; e i rotopu ia ratou atoa ra, e rave rahi to reira tei hau i te maitai e tei maramarama ;

« E ua ite atura te Atua i taua mau varua e e mea maitai ratou, e ti‘a ihora oia i rotopu ia ratou, na ô atura : o teie ïa ta’u e faariro ei mau taata faatere na’u ; te ti‘a ra hoʻi oia i rotopu i te mau varua, e ua ite oia e, e mea maitai ratou ; e ua parau maira oia ia’u : E Aberahama, o oe te hoê o ratou ; ua ma‘itihia oe hou oe i fanauhia ai ». (Aberahama 3:22–23).

Mai te reira atoa no Iosepha Semita. Tei reira atoa oia. Ua parahi atoa oia i roto i te apooraa i piha‘i iho i tei hau i te maitai e tei maramarama. Ua ti‘a oia i te hoê ti‘araa hanahana e te faahiahia, no reira, e mea papû maitai e, ua tauturu oia i te faanahonahoraa e i te faatupuraa i te ohipa rahi a te Fatu « ia faatupu i te tahuti ore e te ora mure ore o te taata nei », te faaoraraa o te mau tamarii paatoa a to tatou Metua [a hi‘o Mose 1:39]. Ua faatupu ta’na misioni i te hoê ohipa rahi i ni‘a i te mau taata atoa tei haere mai i ni‘a i te fenua nei, i te feia e ora nei i ni‘a i te fenua nei, e i te rahiraa mirioni e fanau mai.

Ua haapapû maitai te peropheta Iosepha Semita i teie ohipa mure ore i te na oraa e : « Te mau taata atoa e piiraa to ratou no te utuutu i te mau taata o te ao nei, ua faatoro‘ahia ïa ratou no taua opuaraa ra i roto i te apooraa rahi i te ra‘i ra na mua roa te hamaniraahia teie ao. Te feruri nei au e, ua faatoroʻahia vau i roto i teie ti‘araa i roto i taua apooraa rahi ra. Te iteraa papû ïa ta’u e hinaaro nei oia hoʻi, e tavini au na te Atua, e No’na teie mau taata » [a hi‘o History of the Church, 6:364]…

Te ohipa rahi a‘e i roto i teie ao e aore râ, i roto i te ao a muri a‘e, ua taamuhia ïa i ni‘a i te ohipa e te misioni a Iosepha Semita—e taata tei faataahia te parau, e peropheta no te Atua. Taua ohipa ra, o te faaoraraa ïa e te ora mure ore o te taata. No taua opuaraa rahi ra i hamanihia ai teie nei fenua, i piihia ai te mau peropheta o te Atua, i tonohia mai ai te mau ve‘a no te ra‘i mai, e i te tahi mau taime mo‘a e te faufaa, o te Atua iho, te Metua no tatou paatoa, te faahaehaa Ia’na iho no te haere mai i te fenua nei e no te faaʻite mai i Ta’na Tamaiti here.

Aita te peropheta Iosepha Semita i riro noa ei taata « tei hau i te maitai e tei maramarama », ua haapa‘o râ oia, e te tamau noa nei â i te haapa‘o i te mau mea faufaa i ni‘a i te fenua nei e tae roa mai i teie mahana, mai ni‘a mai i te mau ao i ni‘a ra. No te mea i mua i te mata o te Fatu, te Atua o teie nei ao i raro mai i te Metua, o te hoê noa ïa te reira faanahoraa rahi mure ore, e tei roto te peropheta Iosepha i te raveraa i te hoê tuhaa ohipa faufaa rahi, na roto i te autahu‘araa mure ore e te haamanaraa a te Atua.²⁵

Te faaʻite papû nei au e, ua riro o Iosepha Semita ei peropheta na te Atua, hoê o te mau peropheta rahi mau o te mau tau atoa, e taata tei faataahia te parau, e taata paari, e taata itoito, e taata tei î i te varua, e peropheta mai te Atua na te Fatu, tei hau mau i te maitai e te rahi i te mau tau atoa.²⁶

Oia mau, ua riro Iosepha Semita, te peropheta no te mau mahana hopea nei, ei mauhaa i roto i te rima o te Fatu no te iriti i te hoê tau tuuraa evanelia apî, te hopea e tei rahi a‘e i te mau tau tuuraa evanelia atoa.²⁷

Te mau mana‘o tauturu no te tuatapaparaa e te haapiiraa

Uiraa

I to outou mana‘o, no te aha te orama matamua a Iosepha Semita i riro ai ei « ohipa rahi a‘e… mai te tau mai o te tiʻa-faahou-raa o te Fatu » ? (A hi‘o i te tuhaa 1). Eaha ta teie ohipa i faatupu i roto i to outou oraraa ?
Nahea te reira e tauturu ia outou ia ite e, ua tohu o Ioane te Heheu parau i te fâraa mai o Moroni ia Iosepha Semita ? (A hi‘o i te tuhaa 2).
Ua parau te peresideni Benson e, ua riro te Buka a Moromona ei « faaʻiteraa papû roa a‘e » e, e peropheta o Iosepha Semita (a hi‘o i te tuhaa 3). E mea nahea to outou tuatapaparaa i te Buka a Moromona i te faatupuraa i te hoê mea i ni‘a i to outou iteraa no ni‘a i te misioni a Iosepha Semita ?
A feruri maite i te mau parau o te iteraa papû o te peresideni Benson i roto i te tuhaa 4. Eaha te tahi mau haamaitairaa tei noaa ia outou e i to outou utuafare na roto i te Faaho‘i-faahou-raa mai o te evanelia ?
Eaha ta outou i haapii mai i roto i te tuhaa 5 no ni‘a i te aroraa i te hamani-ino-raa ? Eaha ta tatou e nehenehe e apo mai i roto i te hi‘oraa a Iosepha Semita, o te tauturu ia tatou mai te mea e, e tahitohito mai te taata i to tatou iteraa papû ?
No te faahitiraa i te parau no te faatoroʻaraa mai mutaa iho mai, ua parau te peresideni Benson, « Ua faatupu ta’na misioni i te hoê ohipa rahi i ni‘a i te mau taata atoa tei haere mai i ni‘a i te fenua nei, i te feia e ora nei i ni‘a i te fenua nei, e i te rahiraa mirioni e fanau mai » (tuhaa 6). Eaha ta te misioni a Iosepha Semita i faatupu i ni‘a i te mau taata atoa tei ora i ni‘a i te fenua nei ? Eaha ta te reira i faatupu i ni‘a ia outou iho ?

Te mau papa‘iraa mo‘a

Isaïa 29:13–14 ; 2 Nephi 3:3–15 ; 3 Nephi 21:9–11 ; PH&PF 5:9–10 ; 135 ; Iosepha Semita—Aamu

Tauturu haapiiraa

« A ani i te mau piahi ia faaʻite mai e, eaha ta ratou i haapii mai na roto mai i ta ratou iho tuatapaparaa i te pene. E mea maitai roa ia farerei i te tahi mau piahi i roto i te hepetoma e ia ani ia ratou ia haere mai ma te faaineine ia ratou no te faaʻite mai i te mea ta ratou i haapii mai » (api vii i roto i teie buka).