Pene 15
Te mau piiraa mo‘a o te mau metua tane e te mau metua vahine
« E mata na tatou i te haapa‘o maitai i teie titauraa rahi no te ti‘araa metua, teie titauraa mo‘a ».
No roto mai i te oraraa o Ezra Taft Benson
Na roto i te parau e te hi‘oraa, i te fare e ati a‘e te ao nei, i roto i te Ekalesia e i mua i te taata, ua haapii te peresideni Ezra Taft Benson i te faufaa o te riroraa ei mau metua maitai. « A faaamu i ta outou mau tamarii i te here e i te mau a‘oraa a te Fatu », te na reira ra oia.1 « Ua horo‘a te Atua i te mau metua i te hopoi‘a ia tiaau i te faaamuraa i to ratou utuafare. O te hoê ïa hopoi‘a mo‘a roa ».2
Ua rave apiti maitai te peresideni Benson e ta’na vahine o Flora i te ohipa no te rave faaoti i ta raua mau hopoi‘a mo‘a ei metua. Ua « rave raua i te ohipa faaamuraa i to raua utuafare ma te itoito e te oaoa ».3 Pinepine raua i te aparaparau no ni‘a i ta raua mau tamarii e te tahi atu mau ohipa. « Ua ite au e, e vahine ite i te mau mea pae varua to piha‘i iho ia’u », te parau ïa a te peresideni Benson.4
Ua rave amui raua i te ohipa no te faatupu i te hoê utuafare i reira ta raua mau tamarii e tupu ai i te paari e e haapii ai—e i reira hoʻi ta raua mau tamarii e hinaaro ai e parahi. « E mea au a‘e na’u i te fare i te tahi atu vahi », te parau ïa a ta raua tamaiti o Mark. « Ua riro ïa ei haapuraa i mua i te vero. Ua riro o Mama ei paruru, e tei reira o papa e to’na puai ».5
Ua rave te peresideni e te tuahine Benson i ta raua mau hopoi‘a metua na roto i te pure. Ua parau o Mark e : « E faaroo to mama tei hau atu i to te tahi atu vahine ta’u i ite … Aita roa vau i ite a‘enei i te pure rahi mai teie i roto i to’u oraraa. Oi‘oi roa oia i te tuu i to’na turi i raro no te pure no te mau tamarii, no te hoê anei hi‘opo‘araa e aore râ, hoê aroraa i ni‘a i te mau tahua o te fare haapiiraa, aita e fifi i te reira. E faaroo ohie to’na e to papa ».6
Pinepine te peresideni Benson i te faaru‘e mai i te fare no ta’na ohipa e no te mau hopoi‘a o te Ekalesia, no reira, na Flora ana‘e iho ïa e haapa‘o i te rahiraa o te hopoi‘a no te faaamuraa e te haapiiraa i ta raua na tamarii e ono. E mea au roa na’na to’na ti‘araa metua vahine e ta’na mau hopoiʻa. « Ua riro te utuafare ei pû no to tatou mau taamuraa tahuti nei », ta’na ïa parau.7 Ua haamana‘o o Mark e, « E here rahi to mama i te utuafare. E ua here oia ia matou—eiaha no te mea e ohipa na’na, no te mea râ e, o te reira to’na oraraa ».8 No te faaʻite i to’na mau mana‘o no ni‘a i te faufaa o te riroraa ei metua vahine, ua papa‘i o Flora : « Mai te mea e hinaaro outou ia ite i te hanahana, eiaha e hi‘o i ni‘a i te terono, a hi‘o râ i ni‘a i te roʻi pêpe. Te vai ra hoê puai rahi i roto i te hoê metua vahine. Na’na e atuatu i te mafatu, te oraraa, e e hamani i te huru o te taata ».9
I te mau taime aita te peresideni Benson i te fare, ua imi tamau noa oia i te mau rave‘a no te haapa‘o e no te haapuai i to’na utuafare. Ua tape‘a tamau oia i te paraparauraa e o ratou na roto i te niuniu e te mau rata. Ia tae mai oia i te fare, e horo‘a oia i te taime e ti‘a ia’na ia horo‘a. Pinepine oia i te faati‘a i te aamu o « te hoê metua tane ohipa roa o tei faaʻite mai e, no te aha oia i haʻuti ai i te popo e rave rahi hora e ta’na tamaiti, i te na ôraa e, ‘E mea au a‘e na’u te mauiui tua i teie nei, i te mauiui upoo a muri a‘e’ ».10
Ezra Taft Benson e ta’na na tamaiti o Reed e o Mark
Ua horo‘a atoa oia i te taime rahi i piha‘i iho i te mau tamarii tata‘itahi. Te haamana‘o nei o Mark i to to’na metua tane afaʻiraa ia’na i Roto Miti, Utaha, no te hi‘o i te hoê taote taa ê : « E mea arearea roa ia haere na muri iho ia papa, o’na ana‘e e o vau ! Ua paraparau maua no ni‘a i te mau mea atoa ta’u i hinaaro e paraparau. Noa’tu to’u tamariiraa, ua ite au e, ua here o papa ia’u, no te mea, tei piha‘i iho oia ia’u no te tauturu ia’u ia maitai a‘e ».11
Mai te mea e, e nehenehe, e afa‘i atoa te peresideni Benson i ta’na mau tamarii na muri iho ia’na i roto i to’na mau tere. I te ava‘e mati 1948 ua rave oia i ta’na tamahine o Bonnie, e hitu matahiti i taua taime ra, no te haere i te hoê apooraa no te ohipa faaapu i Nebraska. « Ua maere roa te mau ve‘a i te iteraa i te măta‘u ore o teie tamahine iti, e te raveraa taa ê a te hoê metua tane i te afa‘iraa i te hoê tamarii rii i roto i te hoê tere atea no te parahi i roto i te hoê putuputuraa faufaa rahi, e no reira, ua pia ratou i te hoho‘a o Bonnie i ni‘a i te api matamua o te [ve‘a] i te po‘ipo‘i a‘e. Tera râ, no Elder Benson e ere te reira i te ohipa taa ê. E mea pinepine oia i te rave i te mau tamarii na muri iho ia’na no te haere e orihaere, ei rave‘a no te haapaari i te mau autaatiraa maitai e no te haapii atoa ia ratou ».12
Te mau haapiiraa a Ezra Taft Benson
1
E mea mure ore te ti‘araa metua tane.
E te mau metua tane, e piiraa mure ore to outou o te ore roa hoʻi i iriti-ê-hia ia outou. Te mau piiraa i roto i te Ekalesia, noa’tu to ratou faufaa, ia au i to ratou huru, e mau piiraa ïa no te hoê noa pu‘e tau. Areʻa te piiraa o te metua tane, e piiraa mure ore ïa, e hou atu to’na faufaa i roto i te mau tau. E piiraa ïa no te tau e no te tau a muri atu.13
To tatou hoho‘a, e aore râ, to tatou hi‘oraa no te ti‘araa metua tane, o to tatou ïa Metua i te Ao ra. Nahea Oia ia rave i te ohipa e Ta’na mau tamarii ? No te ite i te reira, oia ïa, e ti‘a i [te mau metua tane] ia ite i te hoê mea no ni‘a i te evanelia, te faanahoraa rahi a te Fatu.14
No te hoê tane, aita e piiraa teitei atu i te ti‘araa patereareha parau-ti‘a, tei faaipoipohia i roto i te fare o te Fatu, no te faatereraa i ni‘a i Ta’na mau tamarii. Na Elohima iho i titau mai ia tatou ia paraparau Ia’na « Ei to tatou Metua i te Ao ra » (Mataio 6:9 ; 3 Nephi 13:9).15
2
Titauhia i te mau metua tane ia horo‘a i te faatereraa pae varua i roto i to ratou utuafare.
E ti‘a i te metua tane ia poʻia e ia poiʻha i te imi i te rave‘a no te haamaitai i to’na utuafare, ia haere i te Fatu ra, ia feruri hohonu i te mau parau a te Fatu, e ia ora i piha‘i iho i te Varua no te ite i te varua e i te hinaaro o te Fatu e i te ohipa e ti‘a ia’na ia rave no te arata‘i i to’na utuafare.16
[E te mau metua tane,] e hopoi‘a mo‘a ta outou i te horo‘araa i te faatereraa pae varua i roto i to outou utuafare.
I roto i te hoê buka iti i nene‘ihia tau matahiti ma‘iri a‘enei na te Apooraa no te Tino Ahuru Ma Piti, teie ta matou i parau : « Te ti‘araa metua tane, e ti‘araa faatere ïa, te huru faatereraa faufaa roa a‘e. Mai te reira noa i te mau taime atoa i ma‘iri ra ; mai te reira noa’toa a muri a‘e. E te metua tane, na roto i te tauturu e te a‘o e te faaitoito a to outou hoa mure ore, na outou e peresideni i roto i te utuafare » (Father, Consider Your Ways [buka iti, 1973], 4–5)…
Ma te here i roto i to’u aau no te mau metua tane i Iseraela, te hinaaro nei au e horo‘a’tu 10 rave‘a taa ê e ti‘a i te mau metua tane ia horo‘a i te faatereraa varua i ta ratou mau tamarii :
1. A horo‘a i te mau haamaitairaa metua i ta outou mau tamarii. A bapetizo e a haamau i ta outou mau tamarii. A faatoro‘a i ta outou mau tamaiti i roto i te autahu‘araa. E riro te reira ei mau tapa‘o faaʻite pae varua i roto i te oraraa o ta outou mau tamarii.
2. A faatere outou iho i te mau pure utuafare, te tai‘oraa papa‘iraa mo‘a, e te mau pô utuafare i te mau hepetoma atoa. E riro to outou iho haapa‘oraa i te reira mau mea ei faaʻiteraa i ta outou mau tamarii i te faufaa mau o teie mau ohipa.
3. Mai te mea e, e nehenehe, a haere amui ei utuafare i te mau pureraa a te Ekalesia. E mea faufaa te haamoriraa a te utuafare i raro a‘e i ta outou arata‘iraa no te ora maitai pae varua o ta outou mau tamarii.
4. A haere e orihaere e ta outou mau tamarii i te mau mahana o te papa e te tamahine e te papa e te tamaiti…
5. A haamau i te mau peu tumu no te tau faafaaearaa e te mau ratereraa e te mau haere-ori-haere-raa a te utuafare. E ore teie mau haamana‘oraa e mo‘ehia e ta outou mau tamarii.
6. A faatupu tamau noa i te mau farereiraa tata‘ihoê e ta outou mau tamarii. A vaiiho ia ratou ia paraparau mai i te mau mea ta ratou e hinaaro. A haapii ia ratou i te mau parau tumu o te evanelia. A haapii ia ratou i te mau mea faufaa mau. A parau ia ratou e, ua here outou ia ratou. Ia horo‘a outou i to outou taime i ta outou mau tamarii, na te reira e faaʻite ia ratou e, tei hea te mau ohipa matamua a Papa.
7. A haapii i ta outou mau tamarii ia rave i te ohipa, e a faaʻite ia ratou i te faufaa no te raveraa i te ohipa no te hoê opuaraa maitai.…
8. A faaitoito i te pehe maitai e te rima î e te ihi parau i roto i to outou utuafare. Te utuafare tei roto te varua no te haamaitairaa e no te nehenehe, e haamaitai ïa te reira i te oraraa o ta outou mau tamarii e a muri noa’tu.
9. Mai te mea e, aita e fifi i te atearaa, a haere tamau i te hiero e ta outou vahine. Ei reira ta outou mau tamarii e maramarama maitai a‘e ai i te faufaa o te faaipoiporaa hiero e te mau euheraa o te hiero e te hoêraa mure ore o te utuafare.
10. A faaʻite i ta outou mau tamarii i to outou oaoa e te mauruuru i roto i te taviniraa i te Ekalesia. E nehenehe te reira e riro ei ma‘i pee no ratou, ei reira hoʻi ratou e hinaaro atoa ai e tavini i roto i te Ekalesia e e here hoʻi i te basileia.
E te mau tane e te mau metua tane no Iseraela, e ohipa rahi ta outou e nehenehe e rave no te faaoraraa e te faateiteiraa o to outou utuafare ! E mau hopoi‘a faufaa rahi roa ta outou.17
« A faatupu tamau noa i te mau farereiraa tata‘ihoê e ta outou mau tamarii ».
Te faaroo nei matou i te tahi taime i te mau aamu no te tahi mau tane, i roto atoa i te Ekalesia, o te feruri nei e, te ti‘a ra ratou i te upoo o te utuafare, e faaʻiteraa te reira e, e ohipa teitei a‘e ta ratou, mana‘o atura ïa ratou e, e nehenehe ta ratou e faatere faahepo i to ratou utuafare.
Ua faataa mai te aposetolo Paulo e, « O te tane hoʻi to te vahine ra upoo, mai te Mesia atoa ra ei upoo ïa no te ekalesia » (Ephesia 5:23 ; ua apitihia’tu te papa‘i faaopa). Tera te hi‘oraa ta tatou e pee i roto i ta tatou ohipa faatereraa i roto i te utuafare. Eita tatou e ite i te Faaora ia arata‘i i te Ekalesia ma te rima etaeta e aore râ, te rima ino. Eita tatou e ite i te Faaora ia faatere i Ta’na Ekalesia ma te faatura ore e aore râ, te tau‘a ore. Eita tatou e ite i te Faaora ia faaohipa i te puai e aore râ, i te faahepo no te faatupu i Ta’na mau opuaraa. Eita tatou e ite i te Faaora i te hoê noa’tu vahi ia rave i te hoê mea taa ê maori râ, te haamaitairaa, te faateiteiraa, te tamahanahanaraa, e te faateiteiraa i te Ekalesia. E te mau taea‘e, te parau atu nei au ia outou ma te faatura, Oia te hoho‘a ta tatou e pee a rave ai tatou i te faatereraa varua i roto i to tatou utuafare.18
Ei patereareha i roto i to outou utuafare, e hopoi‘a rahi ta outou no te faatereraa i roto i te ohiparaa e ta outou mau tamarii. A tauturu i te faatupuraa i te hoê utuafare i reira hoʻi te Varua o te Fatu e nehenehe ai e parahi.…
E ti‘a i to outou utuafare ia riro ei ra‘i, ei hau e ei oaoaraa no to outou utuafare. Eiaha roa’tu te hoê tamarii ia măta‘u i to’na iho metua tane—te hoê ihoa râ metua tane tei mau i te autahu‘araa. Te hoê ohipa a te metua tane o te faariroraa ïa i to’na utuafare ei vahi no te oaoa e te popou … Te puai rahi o te mau metua parau-ti‘a i roto i te haamauraa i te hoê huru hi‘oraa, te faatîtîʻaifaroraa e te haapiipiiraa, te faaamuraa e te hereraa, e mea faufaa rahi ïa no te oraraa maitai pae varua o ta [ratou] mau tamarii.19
3
Na te Atua i faataa i te ohipa a te metua vahine.
O [Te mau metua vahine] te mafatu e te varua no te utuafare, e aore râ, e ti‘a ia ratou ia riro. Aita e parau e vai nei i roto i te mau papa‘iraa o te ao nei e aore râ, te mau papa‘iraa mo‘a, tei hau atu i te mo‘a i te parau ra metua vahine. Aita e ohipa hau atu i te hanahana i te ohipa a te hoê metua vahine maitai e te măta‘u i te Atua.
I roto i te utuafare mure ore, ua haamau te Atua e, na te mau metua tane e peresideni i roto i te utuafare. Na te mau metua tane e horo‘a, e here, e haapii e e arata‘i. Na te Atua atoa i faataa i te ohipa a te metua vahine. Na te metua vahine e tô, e fanau, e faaamu, e here e e haapiipii. Te na reira nei te mau heheuraa.20
Te ite nei matou e, eita e nehenehe i te tahi mau vahine e fanau i te tamarii, e e ere i te hape no ratou. No teie mau tuahine maitai roa, ua fafau mai te mau peropheta atoa a te Atua e, e haamaitaihia ratou i te mau tamarii i roto i te mau ao a muri atu, e eita hoʻi ratou e ere i te huaai.
Na roto i te faaroo mâ, te mau pure taparu, te haapaeraa maa e te mau haamaitairaa taa ê, e rave rahi o teie mau tuahine nehenehe roa, e to ratou mau hoa hanahana i piha‘i iho ia ratou, ua farii i te mau semeio i roto i to ratou oraraa e ua haamaitaihia i te tamarii. Ua faaoti te tahi pae na roto i te pure ia faaamu i te tamarii. Te faatae atu nei matou i te tapa‘o aroha i teie mau taata faaipoipohia no te mau tusia e te here ta outou i horo‘a i taua mau tamarii ra ta outou i faaoti e topa i to outou i‘oa.21
Ia haamaitai mai te Atua i to tatou mau metua vahine faahiahia. Te pure nei matou no outou. Te paturu nei matou ia outou. Te faatura nei matou ia outou i te mea e, na outou e amo, e faaamu, e faaineine, e haapii e e here e a muri noa’tu. Te parau fafau atu nei au ia outou i te mau haamaitairaa o te ra‘i e « i te mau mea atoa na te Metua ra » (a hi‘o PH&PF 84:38) mai te mea e, e faarahi outou i to outou piiraa hanahana a‘e i te mau piiraa atoa—e metua vahine i Ziona.22
4
E ti‘a i te mau metua vahine ia here, ia haapii e ia horo‘a i te taime maitai i piha‘i iho i ta ratou mau tamarii.
Te mau metua vahine i Ziona, e mea faufaa rahi ta outou ohipa tei horo‘ahia mai e te Atua no to outou iho faateiteiraa e no te faaoraraa e te faateiteiraa o to outou utuafare. E hinaaro te hoê tamarii i te hoê metua vahine hau atu i te mau mea atoa ta te moni e nehenehe e hoo mai. Te raveraa i te taime i piha‘iho i ta outou mau tamarii o te hoê ïa o te mau horo‘a rahi roa a‘e o te mau horo‘a atoa.23
Ma te here i roto i to’u aau no te mau metua vahine atoa i Ziona, te hinaaro nei au i teie nei ia horo‘a’tu 10 rave‘a taa ê e nehenehe ai i to tatou mau metua vahine ia horo‘a i te taime maitai i piha‘i iho i ta ratou mau tamarii.
[A tahi] mai te mea e, e nehenehe, a imi i te rave‘a ia ti‘a outou i te maaraa purumu i te taime a haere mai ai e aore râ, a haere ê atu ai ta outou mau tamarii—i te taime a reva ai e a ho‘i mai ai na te haapiiraa, a haere ai ratou e a ho‘i mai ai na to ratou orihaereraa, i te taime a arata‘i mai ai ratou i te mau hoa i te utuafare. A ti‘a i te maaraa purumu noa’tu e, e 6 e aore râ, e 16 matahiti to ta outou mau tamarii…
A piti, e te mau metua vahine, a rave i te taime no te faariro ia outou ei hoa mau no ta outou mau tamarii. A faaroo i ta outou mau tamarii, a faaroo mau. A paraparau ia ratou, a ataata e a parau i te parau hoʻata e o ratou, a himene e o ratou, a ha’uti e o ratou, a ta‘i e o ratou, a apa ia ratou, a haapopou ia ratou ma te aau tae. Oia ïa, a faataa tamau i te hoê taime no te tamarii tata‘itahi. A faariro ia outou ei hoa mau no ta outou mau tamarii.
A toru, a rave i te taime no te tai‘o i te buka i ta outou mau tamarii Mai to ratou aruaruraa, a tai‘o i te buka i ta outou mau tamaiti e mau tamahine … E tanu outou i te hoê here i te buka maitai e i te here mau i te mau papa‘iraa mo‘a mai te mea e, e tai‘o tamau outou i te buka i ta outou mau tamarii.
A maha, a rave i te taime no te pure i piha‘i iho i ta outou mau tamarii. E faaterehia te mau pureraa utuafare i te po‘ipo‘i e te pô i raro a‘e i te arata‘iraa a te metua tane. A tauturu i ta outou mau tamarii ia ite i to outou faaroo na roto i te ti‘aororaa outou i te mau haamaitairaa o te ra‘i i ni‘a ia ratou … A ani i ta outou mau tamarii ia amui mai i roto i te mau pure utuafare e ia rave atoa i ta ratou iho, e a faaʻite i to outou oaoa i ta ratou mau parau nehenehe i to ratou Metua i te Ao ra.
Te pae, a rave i te taime no te faatupu i te pô utuafare maitai roa i te mau hepetoma atoa. A ani i ta outou mau tamarii ia faaô papû i roto i te reira. A haapii ia ratou i te mau parau tumu afaro. A faariro te reira ei hoê o te mau peu tumu no te utuafare…
A ono, a rave i te taime no te amui pinepine i te taime tamaaraa. E ohipa fifi roa teie ia haamata te mau tamarii i te paari e ua rahi ta ratou ohipa. Tera râ, te tupu nei te mau aparauraa oaoa, te faaʻiteraa i te mau faanahoraa e te mau ohiparaa no te hoê mahana, e te mau taime haapiiraa taa ê, i te taime tamaaraa i te mea e, na te mau metua e te mau tamarii e faaineinei i te reira.
Te hitu, a rave i te taime i te mau mahana atoa no te tai‘o amui te utuafare i te mau papa‘iraa mo‘a … Te tai‘o-amui-raa te utuafare i te Buka a Moromona, na te reira e horo‘a mai i te huru varua rahi a‘e i roto i te utuafare, e e horo‘a hoʻi te reira i te mau metua e i te mau tamarii i te puai no te patoʻi i te faahemaraa, e ia farii i te Varua Maitai ei hoa tamau no ratou. Te fafau atu nei au ia outou e, e taui te Buka a Moromona i te oraraa o to outou utuafare.
Te va’u, a rave i te taime no te rave i te ohipa ei utuafare. A faariro i te mau orihaereraa utuafare, te mau faaoaoaraa e te mau faahanahanaraa i te mahana fanauraa e te mau ratereraa, ei mau taime taa ê e ei haaputuraa i te haamana‘oraa. Mai te mea e, e nehenehe, a haere te utuafare i te mau ohiparaa a te hoê melo o te utuafare, mai te haʻutiraa a te fare haapiiraa, te taoraraa popo i roto i te ete, te hoê a‘oraa, te hoê himeneraa. A haere amui i te mau pureraa a te Ekalesia, e a parahi amui ei utuafare mai te mea e, e nehenehe. Te mau metua vahine e tauturu i te mau utuafare ia pure e ia haʻuti amui, e tauturu ïa ratou ia vai amui noa ratou e e haamaitai ratou i te oraraa o te mau tamarii e a muri noa’tu.
Te iva, e te mau metua vahine, a rave i te taime no te haapii i ta outou mau tamarii. A rave i te mau taime haapiiraa i te taime tamaaraa, i te vahi au maitai, e aore râ, i roto i te mau taime parahirahi-amui-raa taa ê, i te pae avae o te ro‘i i te hopea o te mahana, e aore râ, i roto i te hoê haereraa amui i te po‘ipo‘i roa…
Te here e te mana‘ona‘oraa i roto i te pure o te hoê metua vahine no ta’na mau tamarii, o te mau rave‘a faufaa roa a‘e ïa no te haapiiraa i to oe utuafare. Haapii i te mau tamarii i te mau parau tumu o te evanelia. A haapii ia ratou e, e faufaa to te riroraa ei taata maitai. A haapii ia ratou e, aore e hau to roto i te hara. A haapii ia ratou i te here i te evanelia a Iesu Mesia e i te iteraa papû no te hanahana o te reira.
A haapii i ta outou mau tamaiti e ta outou mau tamahine i te haehaa, e a haapii ia ratou i te auraro i te tane e i te vahine. A haapii i ta outou mau tamarii i te viivii ore, i te mau ture ti‘a o te arapaeraa, i te faaipoiporaa hiero, i te ohipa misionare, e i te faufaa o te fariiraa e te faarahiraa i te mau piiraa o te Ekalesia.
A haapii ia ratou ia here i te ohipa e i te faufaa o te hoê haapiiraa maitai.
A haapii ia ratou i te faufaa o te faaoaoaraa maitai, mai te mau hoho‘a teata tano, te mau videos, te pehe, te buka e te mau ve‘a. A paraparau i te mau ino o te hoho‘a faufau e te raau taero, e a haapii ia ratou i te faufaa o te oraraa i te oraraa mâ.
Oia mau e te mau metua vahine, a haapii i ta outou mau tamarii i te evanelia i roto i to outou iho utuafare, i roto i ta outou iho putuputuraa pae auahi. Teie te haapiiraa maitai roa a‘e e ti‘a i ta outou mau tamarii ia farii…
Te ahuru e te hopea, e te mau metua vahine, a rave i te taime no te here mau i ta outou mau tamarii rii. Te here faito ore o te hoê metua vahine ua fatata ïa i te here o te Mesia.
E titau atoa ta outou mau tamarii apî i taua here ra e taua haapa‘oraa ra. Mai te mea ra e, e mea ohie a‘e no te mau metua vahine e no te mau metua tane e rave rahi, ia faaʻite i to ratou here i ta ratou mau tamarii, i te taime te vai apî noa ra â ratou, e e mea huru fifi a‘e i te taime e mea paari a‘e ratou. A faaitoito i te rave i te reira na roto i te pure. Aita e titauhia te taa-ê-raa i roto i te u‘i. E te taviri, o te here ïa. E hinaaro to tatou feia apî i te here e te haapa‘o, eiaha te faanavenaveraa. E hinaaro ratou i te maitai e i te haroʻaroʻa, eiaha te tau‘a ore o te metua vahine e te metua tane. Te hinaaro nei ratou i te taime o te mau metua. E nehenehe te haapiiraa mărû a te hoê metua vahine e to’na here e to’na ti‘aturi i te hoê tamaiti e aore râ, i te hoê tamahine na’na, e faaora ia’na i te hoê ao ino.24
« A rave i te taime no te tai‘o i te buka i ta outou mau tamarii ».
Ua ite anei outou i te hoê tumu ua here roa nei te mau metua vahine parau-ti‘a i ta ratou mau tamarii ? No te mea te faatusia rahi nei ratou no te reira mau tamarii. Te mea ua here tatou, o te mea ïa e faatusia’tu tatou e te mea e faatusia’tu tatou, o te mea ïa ua here tatou.25
5
E ti‘a i te mau metua ia haa amui i te ohipa i roto i te tahoê e te here i te faaamuraa i ta ratou mau tamarii.
E ti‘a i te tane e te vahine, ei na taata hamani toopiti, ma te hiaai e na roto i te pure, ia ani ia tae mai te mau tamarii i roto i to raua utuafare … E ao to te tane e te vahine e utuafare tamarii to raua. Te mau oaoa e te mau haamaitairaa rahi a‘e i roto i te oraraa, tei ni‘a ïa i te utuafare, te ti‘araa metua e te faatusiaraa. E faufaahia te tusia no te farii i taua mau varua nehenehe ra ia tomo mai i roto i te utuafare.26
Ia faaoti ana‘e te mau metua i ta ratou hopoi‘a i horo‘ahia mai e to te ra‘i, i roto i te auhoa te here e te tahoê, e tupu mai te oaoa rahi.27
E tauturu mai te Atua ia tatou ia paturu te tahi i te tahi. A haamata i te reira i roto i te utuafare na roto i te patururaa i to tatou utuafare. Ia vai te varua haapa‘o maitai, te hoê, te here e te auraro te tahi i te tahi. E mata na te mau tane i te auraro maitai i ta ratou vahine, te parau-ti‘a i mua ia ratou, te here ia ratou, te tamata i te haamâmâ i ta ratou mau hopoi‘a, e te amoraa i te hopoi‘a o te aupururaa, te faaineineraa, e te faaamuraa i te mau tamarii. E ti‘a anei i te mau metua vahine e i te mau vahine ia faaʻite i te hoê varua tauturu i ta ratou mau tane, ia faaitoito e ia paturu ia ratou i roto i ta ratou mau ohipa no te autahu‘araa, e ia vai auraro maitai noa e te parau-ti‘a i te mau piiraa e tae mai i ni‘a iho ia ratou na roto mai i te autahu‘araa a te Atua.28
E mata na tatou i te haapa‘o maitai i teie titauraa rahi o te ti‘araa metua, teie titauraa mo‘a, ia ti‘a hoʻi ia tatou ia patu i to tatou utuafare ma te paari i ni‘a iho i te mau parau tumu mure ore, ia ore hoʻi tatou e tatarahapa. E mata na tatou eiaha roa’tu tatou ia fariu ê atu i te ti‘aturiraa rahi tei tuuhia mai i ni‘a iho ia tatou. E mata na tatou i te haamana‘o noa e, teie mau varua tei tomo mai i roto i to tatou utuafare, e mau varua ma‘itihia ïa.29
Te mau mana‘o tauturu no te tuatapaparaa e te haapiiraa
Uiraa
-
Ua parau te peresideni Benson e, « To tatou hoho‘a, e aore râ, to tatou hi‘oraa no te ti‘araa metua tane, o to tatou ïa Metua i te Ao ra » (tuhaa 1). Nahea te mau metua tane tahuti nei e nehenehe ai e pee i te hoho‘a ta te Metua i te Ao ra i haamau ?
-
A feruri i te tapura a te peresideni Benson no na « 10 rave‘a taa ê e ti‘a i te mau metua tane ia horo‘a i te faatereraa varua i ta ratou mau tamarii » (tuhaa 2). I to outou mana‘oraa, nahea teie mau arata‘iraa i te faaûru i te mau tamarii ?
-
Ua parau te peresideni Benson e, « Aita e ohipa hau atu i te hanahana i te ohipa a te hoê metua vahine maitai e te măta‘u i te Atua » (tuhaa 3). Eaha te mau hi‘oraa ta outou i ite no ni‘a i te ti‘araa metua vahine hanahana ? Na roto i te tauiraa te peu o te ao no ni‘a i te ti‘araa metua vahine, eaha te ti‘a ia tatou ia rave no te turu i te mau hopoi‘a hanahana e te mo‘a a te mau metua vahine ?
-
Eaha te tahi mau fana‘oraa e noaa mai, ia faataa te mau metua e te mau tamarii i te tahi taime e amui ai ratou ? (No te tahi mau hi‘oraa, a hi‘o i te tuhaa 4).
-
Eaha te tahi mau haamaitairaa e roaa i te utuafare mai te mea e, ua hoê te mau metua i roto i ta ratou mau hopoi‘a ? (A hi‘o i te tuhaa 5). Eaha te ti‘a i te mau metua tane e te mau metua vahine ia rave ia rahi atu â hoʻi to raua hoêraa ? Nahea e nehenehe ai te mau metua otahi ia farii i te puai i titauhia ia ratou no te rave faaoti i teie mau hopoi‘a ?
Te mau papa‘iraa mo‘a
Maseli 22:6 ; Ephesia 6:4 ; Mosia 4:14–15 ; Alama 56:45–48 ; 3 Nephi 22:13 ; hi‘o atoa « Te Utuafare : E Poro‘i i to te Ao nei », Ensign, Novema 2010, 129
Tauturu haapiiraa
« faaineine ai outou ia outou iho i te pae Varua ma te faʻi i te Fatu i roto i ta outou haapiiraa, e riro outou ei mauihaa i roto i To’na rima.. E na te Varua Maitai e faahanahana i ta outou mau parau ma te puai. » (Te haapiiraa : Aita e piiraa teitei a‘e [1999], 41).