Pene 22
Te afaʻiraa te evanelia i to te ao
« E mea oaoa na tatou te fafauraa ia tatou iho ei apiti na te Metua i te Ao ra i roto i te ohipa rahi no te faaoraraa e te faateiteiraa i ta’na mau tamarii ».
No roto mai i te oraraa o Ezra Taft Benson
No te peresideni Ezra Taft Benson, ua riro te ohipa misionare ei peu tumu no to’na utuafare. Ua parau mai oia e « Ahuru ma hoê tamarii i roto i te utuafare o to’u metua tane »,. « Pauroa matou, na ahuru ma hoê, tei haere i te misioni. Ua haere atoa ta’u vahine i ta’na misioni, e ua fana‘o oia i te tavini e to’na metua vahine ivi no na avaʻe hopea e ono [o ta’na misioni]. I te haereraa to’u iho metua tane i ta’na misioni, o vau te tamaiti matahiapo, te haamana‘o nei au i te mau rata ta’na i papa‘i mai i roto i ta’na misioni i te mau tuhaa ropu o te fenua marite. Ua tae mai i roto i teie fare te hoê varua no te ohipa misionare tei ore i morohi, o ta’u hoʻi e mauruuru nei ma te haehaa ».1
Ua tavini te peresideni Benson ei misionare rave tamau i roto i te misioni Peretane mai te matahiti 1921 e tae atu i te 1923, e ua tamau noa teie « varua no te ohipa misionare » i roto ia’na i muri roa mai i tera ra tau o taua na matahiti e piti e te afa ra. Ei hi‘oraa, ei faatere hau no te ohipa faaapu no te mau Hau Amui no Marite mai te matahiti 1953 e tae atu i te matahiti 1961, ua ohipa oia i pihaʻi iho i te mau taata e rave rahi no te tahi atu mau haapaʻoraa. I roto i te amuiraa rahi no eperera 1961, ua parau oia i te Feia Mo‘a : « E 9 000 tiʻahapa i‘oa teie ia’u nei, ta’u i paraparau tino atu a ti‘a ai au i ni‘a i tera ti‘araa na te hau. E mea maitai e, e tae ia’u i te horo‘a’tu i te tahi mau tareta poro‘i i te mau misionare. Ua hinaaro vau ia faaroo mai ratou pauroa i te evanelia. To’u hinaaro, oia hoʻi, ia oaoa te mau tamarii atoa a te Metua i te mau haamaitairaa e tae mai na roto i te fariiraa e te oraraa i te evanelia a Iesu Mesia ».2
Ua tamau noa te anaanatae o te peresideni Benson no te ohipa misionare e rave rahi matahiti i muri iho, e ua hinaaro roa oia i te mau melo atoa o te Ekalesia ia apo atoa i te reira anaanatae. Ua paraparau afaro oia i te feia apî tamaroa no ni‘a i te faaineineraa ia ratou no te taviniraa ei misionare rave tamau. « E faaineine i teie nei », ta’na ïa parau. « E faaineine ia outou i te pae tino, i te pae feruriraa, i te pae sotiare e i te pae varua ».3 Ua aʻo oia i te mau metua ia arata‘i i ta ratou mau tamaiti i roto i teie faaineineraa. Ua aʻo atoa oia i te mau tuahine apî e te mau melo paari o te Ekalesia ia feruri maite ia haere e tavini ei misionare rave tamau. E ua aʻo oia i te mau melo atoa o te Ekalesia ia faa‘ite i te evanelia i to ratou mau taata tupu.
Ua parau te peresideni Thomas S. Monson no ni‘a i te hoê taime ua faaûru te here o te peresideni Benson no te ohipa misionare i te hoê taure‘are‘a e tano no te misioni : « I te hoê mahana pae, ua haere raua te tuahine Benson i te hiero mai tei mâtauhia e raua, i te hiero no Jordan River. I reira, ua haafatata te peresideni Benson i te hoê taure‘are‘a tamaroa tei oaoa te aau i te iteraa ia’na e ua faaara atura ia’na e, ua piihia oia ia faaoti i te hoê misioni rave tamau. Ua tape‘a te peresideni Benson i te rima o teie misionare tei pii-apî-hia, e ma te mata ataata, ua parau atura, ‘Afa‘i ia’u na muri iho ia oe ! Afa‘i ia’u na muri iho ia oe !’ Ua parau roa teie misionare e, e nehenehe e parau e, ua afa’i ihoa oia i te peresideni Benson na muri iho ia’na i roto i ta’na misioni, na teie farereiraa i faaʻite mai i te here o te peresideni Benson, to’na fafauraa i te ohipa misionare e to’na hiaai ia itehia oia i roto i te ohipa a te Fatu ».4
O te here no te mau tamarii atoa a te Metua i te Ao te tumu no te itoito o te peresideni Benson no te faa‘iteraa i te evanelia : « Titauhia te evanelia no te mau tamarii a to tatou Metua … Ua ite au e, ua here te Fatu ia ratou, e ei tavini haehaa na’na, e here i roto i to’u aau no te mau milioni taata e aere nei na te ao atoa nei ».5 A feruri ai oia i ni‘a i te mana o te here o te Faaora, ua faa‘ite papû oia e, « E rahi atu â ta tatou mau haamaitairaa ia faa‘ite atu tatou i to’na here i to tatou taata tupu ».6
No to’na raveraa i te ohipa misionare i roto i to’na oraraa taatoa, e to’na faaitoitoraa i to’na mau hoa Feia Mo‘a ia na reira atoa, ua ti‘a roa i te peresideni Benson i te parau e : « Ua tamata vau i te oaoa o te ohipa misionare. Aita e ohipa i roto i teie nei ao e nehenehe e hopoi mai i te popou e te oaoa rahi a‘e ».7
« Ua hinaaro mau tatou ia horo‘a i to tatou taime e ta tatou mau rave‘a ta’na i haamaitai mai ia tatou no te faati‘a i to’na basileia i ni‘a i te fenua nei ».
Te mau haapiiraa a Ezra Taft Benson
1
Ua pohe poʻia to teie nei ao i te faaroo mau, e tei ia tatou nei te reira.
I muri mai i te fâraa hanahana o te Atua te Metua e ta’na Tamaiti o Iesu Mesia ia Iosepha Semita ra, mai te huru ra e, teie te hopoi‘a rahi matamua tei tuuhia i ni‘a i te Ekalesia tei faaho‘i-faahou-hia mai, oia hoʻi te afaʻiraa i te evanelia i to te ao—i te mau tamarii atoa o to tatou Metua.
Ua riro mau ihoa te reira ei ohipa faahitimaʻue hau atu i te faufaa—e ohipa faahitimaʻue no te tusia, no te popou, no te tamatamataraa, no te itoito e hau atu râ, no te here taata. Aita e vahi ê atu i ni‘a i te tino o te fenua nei e ite ai outou i te hoê ohipa faahitimaʻue mai te reira te huru. E oia mau, ua tahe te toto, te hou e te roimata no te amoraa i teie ohipa o te here. E no te aha tatou i rave ai te reira ? No te mea ua faaue te Atua o te raʻi i te reira ; no te mea ua here oia i ta’na mau tamarii e to’na ïa hinaaro, ia roaa te rave‘a i te mau milioni taata e aere nei i ni‘a i te fenua nei, ia faaroo, e na roto i to ratou iho hinaaro, ia farii e ia ora i te mau parau tumu hanahana e te mea faaora e te mea faateitei, te mau parau tumu hoʻi o te evanelia a Iesu Mesia.8
Ua papû ia’u e, titauhia te evanelia a Iesu Mesia no to te ao, e aita e mea ê atu te titauhia no ratou, e ua hinaaro atoa te mau taata o teie nei ao i te mea ta te evanelia e horo‘a nei, aita râ ratou i ite maitai atura. Ua hinaaro ratou i te tutau ta te evanelia e horo‘a nei, o te horo‘a nei ia ratou i te pahonoraa i to ratou mau fifi ; o te hopoi atoa nei i te mana‘o paruru e te mana‘o hau i roto ia ratou. O te evanelia ana‘e te pahonoraa no te mau fifi o te ao, to’u mau taea‘e e tuahine.9
Na te evanelia ana‘e e faaora i te ao mai te mau ati haamou ta’na iho e tuu i ni‘a ia’na. Na te evanelia ana‘e e faatahoê i te mau taata i roto i te hau noa’tu te nunaa e noa’tu te fenua. Na te evanelia ana‘e e hopoi mai i te popou, te oaoa e te faaoraraa i te utuafare taata nei.10
Ua pohe poʻia to teie nei ao i te faaroo mau, e tei ia tatou nei te reira.11
Teie te poroʻi hanahana ta tatou e hinaaro ia faa‘ite atu i to te ao, oia hoʻi, na roto i te Atua te Metua e Ta’na Tamaiti Iesu Mesia, ua faaho‘i-faahou-hia mai te basileia o te Atua. Te reira te poroʻi rahi roa a‘e i muri mai i te ti‘a-faahou-raa o Iesu Mesia.12
Te farii nei tatou ma te haehaa e ma te mauruuru i teie hopoi‘a rahi matamua tei tuuhia i ni‘a i te Ekalesia. E mea oaoa na tatou te fafauraa ia tatou iho ei apiti na te Metua i te Ao ra i roto i te ohipa rahi no te faaoraraa e te faateiteiraa i ta’na mau tamarii. Ua hinaaro mau tatou ia horo‘a i to tatou taime e ta tatou mau rave‘a ta’na i haamaitai mai ia tatou no te faati‘a i to’na basileia i ni‘a i te fenua nei. Ua ite tatou e, te reira ta tatou hopoi‘a matamua e ta tatou rave‘a rahi. Teie te varua tei itehia i roto i te ohipa misionare a te Ekalesia a Iesu Mesia i te mau tau atoa. Ua riro na te reira ei tapa‘o rahi no te iritiraa o te tau tuuraa evanelia no te îraa o te mau tau—to tatou ïa tau. I te mau vahi atoa e itehia mai te Feia Mo‘a haapa‘o maitai no te Mau Mahana Hopea Nei, te vai atoa nei te varua no te faatusiaraa pipiri ore i te ohipa rahi roa a‘e i ni‘a i te fenua nei.13
E misioni rahi ta tatou. Ia faaineine tatou e ti‘a’i, te feia apî e te feia paari. E ti‘a ia tatou ia riro mai te hopue i rotopu i te mau nunaa, ma te vai taamu noa i te mau parau tumu no te parau-ti‘a.14
2
Tatou pauroa te nehenehe e riro ei misionare, noa’tu te huru o to tatou oraraa e aore râ to tatou ti‘araa.
Ei melo no te Ekalesia a te Fatu, e ti‘a ia tatou ia rave papû i te ohipa misionare. Mai te peu te haa ra outou, e ua here outou i teie ohipa, e tauturuhia outou ia faaora i te varua o te mau tamarii a te taata nei.15
Aita te faa‘iteraa i te evanelia i riro ei hopoi‘a anaʻe na te autahu‘araa, e ti‘a atoa râ ia tatou paatoa ia titau i te reira ma te popou rahi e te ieie. Te fâ mau i roto i te faa‘iteraa i te evanelia, o te arataʻiraa ïa i te mau varua i te Mesia ra, te haapiiraa e te bapetizoraa i te mau tamarii a to tatou Metua i te Ao ra, ia popou atu tatou e ratou (hi‘o PH&PF 18:15) i roto i te basileia o to tatou Metua.16
Tei ia tatou paatoa nei teie hopoi‘a rahi. Aita e aperaa. Eiaha na te tane e te vahine e mana‘o e, no te vahi e ora nei tatou, e aore râ no to tatou ti‘araa i roto i te sotaiete, e aore râ no ta tatou ohipa e to tatou faito, e ere ïa na tatou teie hopoi‘a.17
Te feia apî tamaroa e te feia apî tamahine
Te tiʻaturi nei matou e, ua faanaho te taure‘are‘a tamaroa atoa ia riro mai ei veʻa na te Fatu.18
Nahea outou i te faatupu i roto i te mau tamaroa te hiaai rahi ia tavini ? Eiaha outou e tia‘i… no te tauturu ia ratou ia rave i te faaotiraa ia tavini i te hoê misioni. E tauturu outou ia ratou ia rave i te faaotiraa ia haere i te ivaraa ihoa o to ratou matahiti, e aore râ i te ahururaa e aore râ ite ahuru-ma-hoê-raa ! O te fare te vahi ueueraa huero no te faaineineraa i te feia apî tamaroa. E ia faaineinehia te taure‘are‘a tamaroa atoa i to’na fare no te taviniraa.
Teie te huru o te faaineineraa i te apîraa, oia hoʻi, e haapii i te hoê tamaroa apî nahea i te pure, e tai‘o ia’na i te mau aamu i roto i te Buka a Moromona e te tahi atoa mau papa‘iraa mo‘a, e faatupu i te mau pureraa pô utuafare ma te horo‘a ia’na i te hoê tuhaa o te haapiiraa [na’na e haapii], e haapii ia’na i te mau parau tumu no te peu mâ i te pae morare, e haamata i te haaputu i te moni no ta’na misioni, e haapii ia’na i te ohipa e e horo‘a ia’na i te rave‘a no te tavini ia vetahi ê.19
Ua hinaaro matou i te feia apî tamaroa e tomo nei i roto i te aua misioni, te nehenehe e tomo « ma te horo haere », te vai nei to ratou faaroo e, na roto i to ratou parau-ti‘a e to ratou oraraa mâ, e riro ta ratou misioni i te hoê mea rahi e te faahotu.20
Ua hinaaro te Fatu i te feia apî atoa ia tavini i te hoê misioni rave tamau … E aita’tu e ohipa faufaa a‘e i te reira. E nehenehe te haapiiraa e tia‘i. E nehenehe e faataimehia te haapiiraa teitei. E nehenehe e faataimehia te toroʻa ohipa. Oia mau, e ti‘a atoa ia faataimehia te faaipoiporaa hiero e tae roa i te taime ua tavini te taure‘are‘a tamaroa i te hoê misioni rave tamau, te hoê misioni hanahana i mua te Fatu.
… No te feia apî tamahine… e horo‘a-atoa-hia ia ratou te rave‘a no te tavini i te hoê misioni rave tamau. Ua mauruuru roa vau no to’u hoa mure ore tei tavini i te hoê misioni i Hawaii na mua maua a faaipoipo ai i roto i te hiero no Roto Miti, e ua oaoa vau no te mea e toru ta’u mootua tamahine tei tavini i te hoê misioni rave tamau. Te tahi o ta tatou mau misionare maitai roa a‘e, e mau tuahine ïa.21
Te mau misionare matahiti paari
Titauhia ia maraa te numera o te mau misionare matahiti paari i roto i te ohipa misionare.22
E rave rahi feia faaipoipo paari te nehenehe e tavini i te hoê misioni. E na roto i te reira, e ite ratou e, e haamaitai atoa te misioni i ta ratou mau tamarii, mau mootua e mau hina, e aita e rave‘a ê no teie mau huru haamaitairaa. E riro te reira i te faa‘ite i te hi‘oraa rahi no to ratou huaai.23
E rave rahi taata faaipoipo te nehenehe e parau mai e, ua riro ta raua tau taviniraa misionare ei tau oaoa roa a‘e maoti to raua pûpûraa hope ia raua i roto i te hoê fâ—te ohipa misionare.24
Te mau melo misionare
E ti‘a ia tatou ia turaʻi i te parau no te ohipa amui a te misionare e te melo, ia uʻana atu â te reira. Ua itehia mai e, o teie te huru ohipa misionare faahotu roa a‘e. O te ohipa amui a te misionare e te melo te hoê o te mau taviri rahi roa a‘e no te tupuraa te melo iho. Te mana‘o papû nei au e, e riro te ohipa amui a te misionare e te melo, i te haamaraaraa i te maitai pae varua o te mau paroisa atoa e faa‘ohipa nei i te reira.25
« Te tia‘i nei te Fatu ia tatou ia riro ei misionare ».
Eaha te taime hopea outou i te ani-manihini-raa i te hoê hoa ia haere mai i te pureraa oro‘a e aore râ i te hoê amuiraa tĭtĭ, ia haere mai i to outou fare no te hoê pô utuafare ? Eaha te taime hopea outou i te paraparauraa no ni‘a i te evanelia ? E mau ohipa faahiahia roa teie.26
E paturu te Fatu i te mau melo i roto i ta ratou hopoi‘a misionare mai te mea e navaʻi to ratou faaroo no te tamata noa a‘e.27
Taime teie ia hi‘o to tatou mata i ni‘a, ia ite atu tatou i te aano o teie ohipa hanahana. Te tia‘i nei te Fatu ia tatou ia rave i te reira. Aita e navaʻi te riro-noa-raa ei melo i roto i te Ekalesia e te haereraa i te pureraa oro‘a, te aufauraa i ta tatou tuhaa ahuru, te tururaa i te faanahoraa no te ohipa totauturu. E mea maitai te reira mau mea atoa—aita râ i navaʻi. Te tia‘i nei te Fatu ia tatou ia riro ei misionare, ia ora i te evanelia—e, i te taatoaraa, e ia tauturu ia patu i To’na basileia.28
3
Te Buka a Moromona te rave‘a rahi e faa‘ohipa i roto i ta tatou ohipa misionare.
Te Buka a Moromona, na te melo ïa e te melo ore. Apitihia i te Varua o te Fatu, ua riro te Buka a Moromona i te mauihaa rahi roa a‘e ta te Atua i horo‘a mai no te faafariu i to te ao. Mai te peu te haere ra tatou no te ooti i te mau varua, e ti‘a ia faa‘ohipahia te mauihaa ta te Atua i faataa no te reira ohipa—te Buka a Moromona.
E na te tai‘oraa i te Buka a Moromona e faaitoito rahi roa a‘e ia tatou ia haere i te misioni. Titauhia e rave rahi atu â mau misionare. Titau-atoa-hia râ te mau misionare ineine a‘e mai roto mai i te mau paroisa e te mau amaa e te mau fare, i reira ratou e haamâtau ai e e here ai i te Buka a Moromona. Titauhia te mau misionare e iteraa papû ura to ratou no ni‘a i to te reira hanahana, e o te nehenehe, na roto i te Varua, e tuu i te opuaraa i mua i ta ratou mau taata imi ia tai‘o e ia feruri maite no ni‘a i to te reira mau api, ma te ite hope e, e faa‘ite mai te Fatu i te parau mau no te reira ia ratou na roto i te mana o te Varua Maitai. Titauhia te mau misionare e tuʻati i ta tatou poroʻi.29
Te Buka a Moromona te rave‘a rahi e faa‘ohipa i roto i ta tatou ohipa misionare. Te faa‘ite nei te reira, e peropheta mau Iosepha Semita. Tei roto te mau parau a te Mesia, e te misioni rahi a te Buka a Moromona, o te arataʻiraa ïa i te taata i te Mesia ra. Te tahi atu mau mea, no muri mai ïa. Te uiraa auro a te Buka a Moromona, oia hoʻi, « Ua hinaaro anei outou ia haapii rahi a‘e no ni‘a i te Mesia ? » O te Buka a Moromona te mauihaa rahi no te imi i te taata auro e haapii atu. Aita to roto te mau mea e « haamauruuru i to te ao nei », e no reira, eita te taata o to ao nei e haapa‘o i te reira. E titiʻa rahi te reira. (Hi‘o 1 Nephi 6:5).
Te vai ra te hoê taa-ê-raa i rotopu i te hoê taata faafariu tei patuhia i ni‘a i te papa o te Mesia na roto i te Buka a Moromona e o tei mau maite i taua tapu auri ra, e te hoê taata tei ore i na reira.30
Eiaha roa tatou e haamoʻe e, na te Fatu Iho i horo‘a mai i te Buka a Moromona ei ite matamua No’na. O te Buka a Moromona noa ta tatou mauihaa misionare mana rahi roa a‘e. E faa‘ohipa ana‘e i te reira.31
4
No te manuïa i roto i te ohipa misionare, e mea ti‘a ia tatou ia farii i te Varua, ia titau i te haehaa, te here i te taata e ia ohipa ma te itoito.
E ui paha te tahi mau misionare e, « Nahea vau i te manuïa ? Nahea te hoê taata e aravihi ai i roto i te ohipa misionare ? » Teie e maha taviri tei manuïa maitai no te ohipa misionare, na te misionare anei e aore râ na te melo.
A tahi, e tutava ia farii i te Varua.
No te manuïa, e mea ti‘a ia parahi mai te Varua o te Fatu. Ua haapiihia mai tatou e, eita te Varua e parahi i roto i te sekene viivii. No reira, hoê o ta tatou ohipa matamua roa a‘e, o te haapapûraa ïa e, ua afaro maitai to tatou iho oraraa. Ua parau te Fatu, « Ia mâ roa outou o te hopoi i te mau farii a te Fatu ra ». (Te Parau Haapiiraa e te Mau Parau Fafau 38:42).
Ua horo‘a mai te Faaora i Ta’na ture no te haapiiraa i Ta’na evanelia : « E horo‘ahia’tu te Varua ia outou na roto i te pure faaroo ; e mai te mea e ore roa outou e farii i te Varua ra e ore hoʻi outou e haapii atu ». (Te Parau Haapiiraa e te Mau Parau Fafau 42:14).32
Mai te mea e poroʻi ta’u i faahiti noa na i to’u mau taea‘e no te Tino Ahuru Ma Piti, o teie ïa, o te Varua te mea faufaa. O te Varua te mea faufaa. Aita vau i ite e, eaha te pinepineraa to’u parauraa i te reira, aita râ vau i fiu ia parau i te reira—o te Varua te mea faufaa a‘e.33
A piti, titau i te haehaa.
Ua parau te Fatu e, aita e taata e nehenehe e tauturu i roto i teie ohipa maori râ tei haehaa e tei î i te here. (Hi‘o Te Parau Haapiiraa e te Mau Parau Fafau 12:8). E ere râ te haehaa i te paruparu. E ere i te mamahu ; e ere i te riʻariʻa. E nehenehe [ta tatou ia vai] haehaa ma te riʻariʻa ore. E nehenehe [ta tatou ia vai] haehaa ma te itoito. Ua riro te haehaa mai te faʻiraa e, tei raro a‘e tatou i te hoê mana teitei a‘e, te hinaaro tamau i te tauturu a te Fatu i roto i Ta’na ohipa.34
Eita ta tatou e nehenehe e rave i teie ohipa o tatou ana‘e iho. Na’na teie ohipa. Na’na teie evanelia. E mea titauhia ia tatou ia farii i To’na tauturu. A tiaoro no te reira, a ora no te reira, a manii i to outou varua i te Fatu ra no te farii i te reira.35
A toru, e here i te taata.
E mea titauhia ia tatou ia faatupu i te here i te taata. E mea titauhia ia tatou ia haafatata’tu i te mau taata ma te aroha mau o te evanelia, ma te hiaai ia faateitei ia ratou, ia patu ia ratou, ia faafariu ia ratou i te faito teitei a‘e, i te oraraa au a‘e, e i te hopea, i te faateiteiraa i roto i te basileia tiretiera o te Atua. Te turuʻi nei tatou i ni‘a i te mau tuhaa hiro‘a au o teie mau taata ta tatou e apiti nei, ma te here ia ratou ei tamarii na te Atua, o ta te Fatu hoʻi e here atoa nei…
Eita e roaa i to tatou aravihi e tae noa’tu i te taime e haapii mai ai tatou ia au i te mau tamarii atoa a to tatou Metua—e tae noa’tu i te taime e haapii ai tatou ia here ia ratou. E ite ihoa te taata ia faa‘itehia’tu te here ia ratou ra. E rave rahi te hiaai noa ra i te reira. Ia farii ana‘e tatou i te manaʻo o to ratou aau, e fariu mai ratou ia tatou ma te mana‘o maitai. Ua roaa ïa to tatou hoa i reira.36
E… titauraa rahi ta tatou ia here i to tatou taata tupu. O te piti te reira o te mau faaueraa rahi roa a‘e. E rave rahi o to tatou mau taata tupu, e ere i te melo no te Ekalesia. E mea titauhia ia tatou ia riro ei mau taata tupu maitai. E mea titauhia ia tatou ia here i te mau tamarii atoa a to tatou Metua, e ia apiti atu ia ratou.
Aita e pure rahi atu â ta’u maori râ ia faaîhia outou i te here no te Atua e no to outou taata tupu !37
A maha, a ohipa ma te itoito.
Mai te peu e hinaaro tatou ia parahi noa mai te Varua, e mea titauhia ia tatou ia ohipa. Aita e ohipa au roa a‘e e aore râ mana‘o au roa a‘e i te iteraa e, i muri mai i te hoê mahana rahi i te ohipa, ua rave tatou i te maitai roa a‘e tei noaa ia tatou.
Te hoê o te mau parau huna rahi roa a‘e o te ohipa misionare, maori râ te ohipa. Mai te mea e ohipa te hoê misionare, e roaa ia’na te Varua ; mai te mea e roaa ia’na te Varua, e haapii atu oia na roto i te Varua ; mai te mea e haapii oia na roto i te Varua, e haaputapû oia i te aau o te taata, e e oaoa oia … Te ohipa, te ohipa, te ohipa—aita to te reira e mono au, i roto ihoa râ i te ohipa misionare.38
Ua ite au e, te ora nei te Atua. Na’na teie ohipa. Ua paraparau faahou mai Oia mai ni‘a mai i te raʻi na roto i te hoê poroʻi i to te ao taatoa ; e ere no te hoê noa pŭpŭ iti Feia Mo‘a i te Mau Mahana Hopea Nei, no to tatou râ mau taea‘e e mau tuahine atoa, i roto e i rapae au i te Ekalesia. Ia horo‘a mai te Atua ia outou i te puai no te afaʻi i ta’na poroʻi i to te ao, ia ora i te evanelia, ia tape‘a noa i te mau ture tumu o te Ekalesia, ia faati‘ahia mai na tatou te mau haamaitairaa tei fafauhia.39
Te mau mana‘o tauturu no te tuatapaparaa e te haapiiraa
Uiraa
-
No te aha e mea titauhia te evanelia na to te ao « e aita e mea ê atu te titauhia no ratou » ? (No te tahi mau hi‘oraa, a hi‘o i te tuhaa 1). Eaha te tahi o te mau parau mau tei faaho‘i-faahou-hia mai ta outou e tiʻaturi nei e, « ua pohe poʻia to teie nei ao i te reira » ?
-
A tuatapapa ai outou i te tuhaa 2, a feruri i te parau aʻo e tano no outou e no to outou utufaare. Eaha te mau rave‘a na tatou, noa’tu â te huru o to tatou oraraa, no te faa‘ite i te evanelia ? Eaha ta tatou e nehenehe e rave no te faaineine ia tatou no te taviniraa ei misionare rave tamau ? Eaha ta tatou e nehenehe e rave no te tauturu ia vetahi ê ia faaineine no te taviniraa ei misionare rave tamau ?
-
Ua parau te peresideni Benson e, ua riro te Buka a Moromona i te « mauihaa rahi roa a‘e ta te Atua i horo‘a mai no te faafariu i to te ao » (tuhaa 3). Eaha te taime i ite ai outou i te hoê taata i te faafariuraahia na roto i te tuatapaparaa i te Buka a Moromona ? Eaha ta tatou mau rave‘a no te haamaitai atu â i ta tatou mau tautooraa no te opere i te Buka a Moromona ?
-
Ua faa‘ite mai te peresideni Benson « e maha taviri tei manuïa maitai no te ohipa misionare » (tuhaa 4). I to outou mana‘o, no te aha na teie mau taviri e haamanuïa ia tatou i roto i te ohipa misionare ? O vai te mau taata ta outou i ite i te peeraa i teie mau parau tumu ?
Te mau papa‘iraa mo‘a
Mareko 16:15; 1 Timoteo 4:12; Alama 17:2–3; 26:1–16; PH&PF 4; 12:7–9; 15:4–6; 88:81; 123:12–17
Tauturu no te tuatapaparaa
« A faa‘ite i te mea o ta outou i haapii na. A rave ai outou i te reira, e maramarama mai to outou mau feruriraa e e rahi atu to outou puai no te tape‘araa mai » (Te haapiiraa : Aita e piiraa teitei a‘e [1999], 17).