Pene 23
« Haamau etaeta i to mau tĭtĭ »
« E hohoʻa te mau tĭtĭ e te mau mataeinaa o Ziona no te mau vahi moʻa ta te Fatu i faahiti i reira To’na Feia Moʻa e haaputuputu ai i te mau mahana hopea nei ei haapûraa no te vero ra ».
No roto mai i te oraraa o Ezra Taft Benson
I te 13 no tenuare 1935, ua paturu te mau melo no te tĭtĭ no Boise Idaho ia Ezra Taft Benson, 35 matahiti, ei tauturu matamua i roto i ta ratou peresideniraa tĭtĭ. I raro a‘e i te faatereraa a te peresideni Scott S. Brown, ua farii te peresideni Benson e rave rahi rave‘a no te tavini, no te arata‘i e no te haapii. Ei hi‘oraa, ua riro oia ei mauihaa no te faahoʻi mai i te hoê taea‘e ua mau i te Autahu‘araa a Melehizedeka i roto i te Ekalesia,1 e ua tauturu atoa oia i roto i te arataʻiraa i te mau tautooraa no te faatere i te faanahoraa no te ohipa totauturu a te Ekalesia.2
I te matahiti 1938, ua tupu maitai te tĭtĭ e ua hau i te 8 000 melo, e no reira ua faaue te Peresideniraa Matamua ia vahihia te reira ei toru tĭtĭ. Ua parau te peresideni Benson e, ua « hitimahuta » oia, i te 27 no novema 1938, i te piiraahia oia ia peresideni i ni‘a i te hoê o na tĭtĭ. Ua parau ta’na vahine, o Flora, i ta raua mau tamarii e, ua riro te reira ei haamaitairaa no to ratou metua tane, te fariiraa i teie piiraa.3
Ua riro te taviniraa a te peresideni Benson, ei peresideni tĭtĭ, ei haamaitairaa no te tĭtĭ taatoa. Ua tamau noa oia i te haapii i te mau parau tumu no te ohipa totauturu, e ua haapa‘o taa ê oia i te feia apî. I te haamataraa o te hoê tuhaa pureraa no te amuiraa tĭtĭ, ua ite oia i te hoê pŭpŭ feia apî tamaroa te horo marû ra i rapae au i te fare pure. « Ua haere marû noa ratou e tae roa’tu i te uputa no muri mai, e to ratou mata tei ni‘a i te vahi tomoraa no mua, no te haapapû e, aita to ratou hororaa e hiʻohia ra. I tera iho taime, te matara mai nei oia mai roto mai to’na piha toro‘a, ua hi‘o i teie ohipa, e faaaano aʻera i to’na na rima, e haru mai nei teie mau tamaiti. ‘Ua oaoa roa vau i te iteraa ia outou’, ta’na ïa parau. ‘E haere amui ana‘e tatou i te amuiraa’. Ua arata‘i oia ia ratou i ni‘a i te parahiraa matamua, e i muri iho, ua pii mai ia ratou ia faa‘ite mai i to ratou iteraa papû ». 4
Aita i piti avaʻe to te peresideni Benson taviniraa ei peresideni tĭtĭ, teie faahou mai nei te tahi faahitimahutaraa. Ua horo‘ahia mai ia’na te toroʻa papa‘i parau rahi no te tomite rahi o te mau taatiraa no te ohipa faaapu, te National Council of Farmer Cooperatives, e titauhia ia’na ia haere roa i Washington, D.C no te ohipa. Ua pato‘i na mua oia i te ohipa, e ua paraparau râ Flora ia’na e na reira atoa te Peresideniraa Matamua, e farii atura oia i te reira.5 I te haamauruururaahia oia ei peresideni tĭtĭ i te 26 no mati 1939, ua papa‘i oia e, ua riro te reira « ei mahana pe‘ape‘a roa a‘e ta’na i ite … I roto i ta’u mau parau [i te mau melo o te tĭtĭ] ua haamaitai-rahi-hia vau e te Fatu, ua tafifi rahi râ vau e to’u mau mana‘o. Aita e pŭpŭ taata maitai a‘e i roto i te ao [e] ua here au ia ratou pauroa ».6
Ua taui te utuafare Benson i te faaearaa i Bethesda, Maryland, tapiri mai ia Washington, D.C. Hoê noa matahiti i muri iho, ua tere te peresideni Rudger Clawson, te peresideni no te Pŭpŭ no te Tino Ahuru Ma Piti Aposetolo, e Elder Albert E. Bowen, no te Pŭpŭ no te Tino Ahuru Ma Piti Aposetolo atoa, na te reira vahi no te faanaho i te hoê tĭtĭ apî. Ua farerei te peresideni Clawson ia Ezra Taft Benson ma te parau e, « E te taea‘e Benson, ua hinaaro te Fatu ia riro mai oe ei peresideni no teie tĭtĭ. Eaha to oe mana‘o i te reira ? » Faahou â, ua hitimahuta te peresideni Benson. Ua parau oia, « Aita vau i mâtau i teie mau taata. Aita i matahiti to’u oraraa i ô nei ».7 Noa’tu râ, ua farii oia ma te haehaa i teie piiraa e ua peresideni oia i ni‘a e 2 000 tiʻahapa melo i roto i teie tĭtĭ area aano. Ua parau Flora no ni‘a i ta’na taviniraa ei peresideni tĭtĭ : « Ua au roa oia i te reira. E ere te ti‘araa te mea faufaa na’na, o te popou râ no te tautururaa i te rahiraa taata atoa ia ite mai i te parau mau o te evanelia ».8
I muri iho, ei aposetolo, ua tere te peresideni Benson e farerei i te mau tĭtĭ na te ao taatoa. Ua parau oia : « I parau na vau, i te tahi mau taime, i ta’u vahine ia hoʻi mai au mai te mau tere i roto i te mau tĭtĭ e, aita vau i ite papû eaha râ te huru o te raʻi, tera râ, aita ta’u aniraa rahi a‘e no ô maori râ te au e te popou ia apiti i te huru taata e te huru vahine ta’u e farerei nei i rotopu i te feia faatere o te mau tĭtĭ e te mau paroisa e te mau misioni i ni‘a i te fenua nei. E parau mau ihoa, ua haamaitai-rahi-hia tatou ».9
Te hoê fa o te tĭtĭ, « o te tahoêraa ïa e te haamaitai-roa-raa i te mau melo… na roto i te faataeraa ia ratou te mau faanahoraa a te Ekalesia, te mau oro‘a e te mau haapiiraa o te evanelia ».
Te mau haapiiraa a Ezra Taft Benson
1
Ei melo no te Ekalesia, te haaputuputu nei tatou i roto i te mau tĭtĭ no Ziona.
I te tahi mau taime, e ani te mau melo ore, « Eaha te tĭtĭ ? » Na reira atoa te mau melo, te ui atoa nei ratou e, « Eaha te auraa no te tĭtĭ ? Eaha te auraa no tatou te mau melo ? »
No te mau melo ore, e piri rii te hoê tĭtĭ i te hoê epikoporaa i roto i te tahi atu mau ekalesia. E tuhaa fenua aano te tĭtĭ, tei roto te reira te tahi mau paroisa (te mau amuiraa naʻinaʻi) e ua peresidenihia te reira e te hoê peresideniraa.
No te mau melo, ua riro te taʻo tĭtĭ ei taipe. A feruri na i roto i to outou feruriraa i te hoê tiʻahapa rahi, tei hutihia te mau taura i ni‘a i te mau tĭtĭ tei patiʻa-papû-hia i roto i te repo. Ua faaau te mau peropheta ia Ziona i te mau mahana hopea nei mai te hoê tiʻahapa rahi e tapoʻi nei i te fenua taatoa [hi‘o Isaia 54:2; 3 Nephi 22:2]. E mea faaetaetahia teie tiʻahapa e te tahi taura o tei taamuhia i ni‘a i te mau tĭtĭ. E teie mau tĭtĭ, e mau faanahoraa rau ïa i tera e tera vahi na te ao atoa nei. I teie taime, te haaputuputuhia nei Iseraela i roto i te reira mau tĭtĭ no Ziona e rave rahi.10
E maha a‘e fâ no te tĭtĭ :
1. I roto i te tĭtĭ tata‘itahi, e toru tahuʻa rahi te peresideni i ni‘a i te reira, tauturuhia e ahuru ma piti taea‘e tei parauhia te apooraa rahi, e no reira, ua riro te reira ei ekalesia naʻinaʻi no te Feia Mo‘a i te hoê vahi taa ê o te fenua. Te fâ, o te tahoêraa ïa e te haamaitai-roa-raa i te mau melo e ora nei i roto i te reira mau otiʻa, na roto i te faataeraa ia ratou i te mau faanahoraa a te Ekalesia, te mau oro‘a e te mau haapiiraa o te evanelia.
2. E ti‘a i te mau melo o te mau tĭtĭ ia riro ei hi‘oraa e aore râ ei faito tano no te parau-ti‘a.
3. E ti‘a i te mau tĭtĭ ia riro ei parururaa. E na reira te mau melo ia tahoê ana‘e ratou i raro a‘e i te mau ti‘a faatere o te autahu‘araa, i to ratou iho fenua, ma te fafau ia ratou i ta ratou hopoi‘a e ma te haapa‘o i ta ratou mau fafauraa. E riro te reira mau fafauraa, mai te mea e, e haapa‘ohia, ei paruru i mua i te hape, te ino e te ati.
Te patu nei tatou i te mau hiero i te mau vahi ana‘e tei reira te mau tĭtĭ. Te faaineine nei te mau haamaitairaa e te mau oro‘a o te hiero i te taata no te faateiteiraa. Parau mau, aita e nehenehe e faati‘a i te hoê hiero no te tĭtĭ tata‘itahi, atira noa’tu, te ite nei tatou i te tahi tupuraa faahiahia, oia mau, e semeio, i roto i te paturaa i te mau hiero i tera vahi e tera vahi o teie nei ao. Na te reira noa faanahoraa e faafana‘o i te mau melo o te Ekalesia ia farii i te mau haamaitairaa hope a te Fatu.
4. E haapûraa te mau tĭtĭ no te vero e maniihia i ni‘a i te fenua nei.11
2
Ua faanahohia te mau tĭtĭ no te tauturu i te mau metua ia haapii i te evanelia e ia arata‘i i ta ratou mau tamarii i te mau oro‘a no te faaoraraa.
I roto i Te Parau Haapiiraa e te Mau Parau Fafau, te tai‘o nei tatou :
« E teie faahou â, mai te mea e tamarii ta te mau metua i Ziona, e aore râ i roto i te hoe o to’na ra mau tĭtĭ i haamauhia ra, o te ore ho‘i e haapii atu ia ratou ra ia ite papû roa i te parau no te tatarahapa, te faaroo i te Mesia te Tamaiti no te Atua Ora, e no te bapetizoraa no te horo‘a no te Varua Maitai na roto i te tuuraa rima, ia tae i te vau o te matahiti ra, tei ni‘a iho ïa te hara i te upoo o te mau metua » E e riro teie ei ture no to Ziona ra, e aore râ i roto i to’na mau tĭtĭ o tei haamauhia. » (68:25–26; papa‘iraa faahipa tei tuuhia).
I ô nei outou e ite ai i te mau fâ rahi o te mau tĭtĭ. Ua faanahohia te reira no te tauturu i te mau metua « e tamarii ta [ratou] i Ziona » no te haapii ia ratou i te evanelia a Iesu Mesia e no te faatere i te mau oro‘a no te faaoraraa. Ua faatiʻahia te mau tĭtĭ no te haamaitai-roa-raa i te Feia Mo‘a, e te reira haamaitairaa, e haamata ïa i roto i te fare na roto i te haapiiraa aravihi i te evanelia.12
3
A faa‘ite ai te mau melo o te tĭtĭ i te hi‘oraa a te Fatu no te huru moʻa, e riro mai te tĭtĭ mai te hoê taipe nehenehe i mua i te mata o te ao taatoa.
Ua parau te Fatu : « No te mea ia tupu noa Ziona i te unaunaraa e i te moʻaraa e ti‘a’i ; ia faarahihia to’na ra mau otiʻa e ti‘a’i ; ia faaetaetahia to’na ra mau tĭtĭ e ti‘a’i ; oia, oia mau ta’u e parau atu nei ia outou na, ia ti‘a mai Ziona i ni‘a e ia oomo hoʻi i to’na ra mau ahu nehenehe roa e ti‘a’i ». (Te Parau Haapiiraa e te Mau Parau Fafau 82:14).
I ô nei te faa‘ite nei te Fatu i te tahi faahou fâ rahi o te tĭtĭ : ia riro mai te hoê taipe nehenehe i mua i te mata o te ao taatoa. Te parau e, « oomo hoʻi i to’na ra mau ahu nehenehe roa », te parau nei ïa no te moʻaraa o roto e ti‘a ia raʻehia e te mau melo atoa o te parau nei ia ratou ei Feia Mo‘a. O teie hoʻi Ziona, « tei ma te aau ». (Te Parau Haapiiraa e te Mau Parau Fafau* 97:21).
E haapuaihia te mau tĭtĭ e e faaaanohia te mau otiʻa o Ziona ia faa‘ite atu te mau melo i te hi‘oraa o te huru moʻa ta te Fatu e tia‘i nei i To’na mau taata ma‘iti ia faa‘ite atu.13
4
Ua riro te mau tĭtĭ tata‘itahi ei parururaa e ei vahi haapûraa i mua i te mau enemi, te mea itehia e te mea ite-ore-hia.
Atira ïa, teie faahou â te hoê heheuraa no ô mai i te Fatu ra, te horo‘a mai nei i teie tatararaa no te fâ o te mau tĭtĭ : « Oia mau te parau atu nei au ia outou paatoa : A ti‘a mai na i ni‘a e ia anaana mai na, ia riro to outou maramarama ei hi‘oraa no te mau nunaa ; e ia riro te putuputuraa i ni‘a iho i te fenua no Ziona, e i ni‘a iho i to’na mau tĭtĭ, ei parururaa, e ei vahi haapûraa no te vero, e i te riri ia niniihia’tu te reira ma te anoi ore i ni‘a i te ao paatoa nei ». (Te Parau Haapiiraa e te Mau Parau Fafau 115:5–6).
I roto i teie heheuraa, te vai nei te hoê faaue ia anaana roa to tatou maramarama ei hi‘oraa no te mau nunaa. Teie hi‘oraa, e ture faito ïa i ni‘a i te reira te taata e hi‘o ai no te faaoti i te parau no to’na tanoraa e aore râ te maitai-roa-raa. Ia riro te Feia Mo‘a ei hi‘oraa no te huru moʻa i mua i te mata o teie nei ao. O te reira te unaunaraa o Ziona.
Ei reira, ua heheu mai te Fatu ia riro te mau tĭtĭ no Ziona ei « parururaa, e ei vahi haapûraa no te vero, e i te riri ia niniihia’tu te reira ma te ano‘i ore i ni‘a i te ao paatoa nei ». Ua riro te mau tĭtĭ ei parururaa no te Feia Mo‘a i mua i te mau enemi, te mea itehia e te mea ite-ore-hia. Te parururaa, o te faatereraa ïa e tae mai na roto i te mau reni o te autahu‘araa o te haapuai nei i te iteraa papû e o te faaitoito nei i te autautururaa utuafare e te parau-ti‘a o te taata tata‘itahi.
I roto i Ta’na opuaraa no Ta’na mau heheuraa i roto i Te Parau Haapiiraa e te Mau Parau Fafau, ua faaara te Fatu : « Te oioi mai nei te taeraa mai o te reira mahana ; aita â i tae i te hora, ua fatata mai râ te reira, e rave-ê-hia’tu ai te hau no ni‘a mai i te ao nei, ei reira te diabolo e mana’i i ni‘a iho i to’na iho basileia » [Te Parau Haapiiraa e te Mau Parau Fafau 1:35].
I teie mahana… te ite nei tatou i te tupuraa o teie tohuraa, i reira Satane, na roto i te riri uʻana rahi, e faa‘ite ai i to’na mana i ni‘a i « to’na iho basileia »—te fenua nei. Aita to’na puai i rahi a‘enei mai te reira, e o ratou ana‘e tei rave i te Varua Moʻa ei arata‘i no ratou—e tei pee i te parau aʻo a te feia faatere o te autahu‘araa—ratou ana‘e te faahereherehia i te haamouraa o to’na puai ino rahi.
Te parau atoa nei te Fatu i roto i te reira heheuraa omua e, e mana Oia i ni‘a i To’na mau Feia Mo‘a, « e e faatere arii oia i rotopu ia ratou » [Te Parau Haapiiraa e te Mau Parau Fafau 1:36]. Te na reira nei Oia a ohipa ai Oia na roto i Ta’na mau tavini ma‘itihia e te mau feia mana a te tĭtĭ e a te paroisa.14
Ia amui tatou i te Feia Mo‘a, e ite tatou e, e nehenehe i te hoê tĭtĭ ia riro « ei parururaa, e ei vahi haapûraa no te vero » (PH&PF 115:6).
A tupu noa ai te Ekalesia, e mea faufaa roa ia patu tatou ma te pautuutu maitai, e ia hi‘o tatou e, i roto i te mau tĭtĭ e opuahia ra te vai ra te mau anoʻi matamua titauhia no te haamanuïaraa, e i roto i te mau tĭtĭ e vai ra, te vai nei te ohipa tuutuu ore no te tae’tu i te ti‘araa hope o te hoê tĭtĭ i roto i te manuïaraa pae varua. Ia riro teie mau tĭtĭ ei mau vahi haaputuputuraa no Ziona i teie anotau ; e titauhia ia riro te mau tĭtĭ ei mau vahi moʻa no te varua e ia faaravaʻi te mau tĭtĭ ia ratou iho, i te mau rave‘a atoa.15
E hohoʻa te mau tĭtĭ e te mau mataeinaa o Ziona no te mau vahi moʻa ta te Fatu i faahiti, i reira To’na Feia Moʻa e haaputu ai i te mau mahana hopea nei ei haapûraa no te vero ra. Outou e ta outou mau tamarii, e haaputu outou i ô nei no te haamori, no te faatupu i te mau oro‘a mo‘a, no te paraparau i te taata, no te haapii, no te rave i te tahi ohipa i roto i te himene, te ori, te teata ora, te tuʻaro e na reira e noaa ai te haamaitairaa ia tatou iho e ia vetahi ê. Te hi‘o-pinepine-hia nei ta tatou mau fare pure e ta tatou mau muaraa e te tira i ni‘a roa e toro nei i te raʻi mai te tapa‘o no to tatou oraraa, te huru te reira e ti‘a ia paʻuma e tae atu i te Atua ra.16
Ua ite te peropheta no te Buka a Moromona, o Nephi, i te mahana e purara ai te Feia Mo‘a i roto i te mau tĭtĭ na te ao atoa nei. Ua ite oia i te anotau e faatoro ai te Fatu i Ta’na parururaa i ni‘a ia ratou i te taime e haafifi ai te mau vero o te haamou i to ratou ora. Ua tohu Nephi : « E ua hiʻo hoʻi au, o Nephi, i te mana o te Arenio a te Atua i te pouraa mai i ni‘a iho i te feia mo‘a o te ekalesia a te Arenio ra, e i ni‘a iho hoʻi i te feia i ma‘itihia e te Fatu ra, o tei purara i te mau fenua o te ao atoa nei ; o te parau-ti‘a e te mana o te Atua i te hanahana rahi ra, o ta ratou ïa mauhaa ». (Buka a Moromona, 1 Nephi 14:14).
Na roto i te heheuraa, ua ite tatou e, e tupu mai te mau ohipa ataata, te mau ati e te mau hamani-ino-raa i te mau mahana hopea nei, na roto râ i te parau-ti‘a te Feia Mo‘a e faahereherehia ai. E mea papû te parau fafau a te Fatu i roto i te Buka a Moromona : « E faaora… oia i te feia parau-ti‘a i to’na ra mana ». (1 Nephi 22:17).17
Te mau mana‘o tauturu no te tuatapaparaa e te haapiiraa
Uiraa
-
Ia oti te taiʻraa i te tuhaa 1, nahea outou i te pahono i te hoê taata o te ani mai e, no te aha te mau melo o te Ekalesia i faanahohia ai ei tĭtĭ ?
-
Ua faahaamanaʻo mai te peresideni Benson e, te tauturu nei te mau tĭtĭ i te mau metua ia haapii i te evanelia i ta ratou mau tamarii ma te horo‘a i te mau oro‘a o te autahu‘araa no ratou (hi‘o i te tuhaa 2). Nahea to outou tĭtĭ i te haapuairaa i ta outou mau tautooraa i te fare?
-
I nafea outou i te iteraa i te mau melo o te hoê tĭtĭ i te amuiraa no te faa‘ite i te hoê hi‘oraa maitai « i mua i te mata o te ao taatoa »? (A hi‘o i te tuhaa 3). Nahea outou i te fana‘oraa i teie mau ohiparaa ?
-
Nahea te hoê tĭtĭ e nehenehe ai e horo‘a i te parururaa « i mua i te mau enemi, te mea itehia e te mea ite-ore-hia » ? (A hi‘o i te tuhaa 4). Eaha ta tatou mau rave‘a no te amui atu i roto i te ohipa a to tatou tĭtĭ ? Eaha te tahi o te mau haamaitairaa e noaa mai ia tatou mai te peu e na reira tatou ?
Te mau papa‘iraa mo‘a
Isaïa 25:3–5; Mataio 5:14–16; Moroni 10:31–33; PH&PF 101:17–21; 133:7–9
Tauturu haapiiraa
« Te hoê orometua maramarama eita oia e feruri e, ‘Eaha ta’u e rave i roto i te piha haapiiraa i teie mahana ?’ E ui râ oia e, ‘Eaha ta ta‘u mau piahi e rave i roto i te piha i teie mahana ? : e ere, ‘Eaha ta‘u e haapii atu i teie mahana ?’ e parau râ e, ‘Nahea vau e tauturu ai i ta‘u mau piahi ia ite i te mea faufaa no ratou ia apo?’” (Virginia H. Pearce, « The Ordinary Classroom—a Powerful Place for Steady and Continued Growth », Ensign, Novema 1996, 12 ; faahitiraa no roto mai Teaching the Gospel : A Handbook for CES Teachers and Leaders [1994], 13).