Pene 4
Te oraraa ma te oaoa i roto i te mau taime ahoaho
« Te oaoa i ô nei e i teie nei, o te farii-rahi-raa ïa ma te here e te oaoa, i te hinaaro o te Atua no tatou—e te raveraa i te reira na roto i te mau rave‘a atoa e te mau ohipa atoa, tei rahi e tei iti ».
No roto mai i te oraraa o Ezra Taft Benson
Te hoê o te mau faaueraa ohipa a te peresideni Ezra Taft Benson ei aposetolo maori râ te tautururaa i te Feia Mo‘a i Europa i muri a‘e i te Tama‘i II o te ao nei. A ratere ai oia i te fenua Helemani, ua farerei oia i te mau taata faaroo o tei nehenehe e ti‘a i ni‘a a‘e i te mau haamouraa ati a‘e ia ratou. Ua papa‘i oia i roto i to’na buka aamu :
« I teie mahana ua ite au i te haamouraa ino roa a‘e aita â vau i ite a‘enei … A tere ai au na ni‘a i te mau purumu [no Berlin] e a hahaere ai au na roto i te tahi mau aroa eita te pereoo e tae, ua… ite au i te mau vahine pohe po‘ia e aufau ra i te moni rahi no te mau paa umara putete … Ua ite au i te mau tane e te mau vahine ruau e ta ratou mau to‘i na‘ina‘i te ô ra i piha‘i iho i te mau tumu raau e te mau aa pohe no te imi i te mori arahu, e i muri iho, faauta atu ai i te reira i ni‘a iho i te hoê mea e nehenehe e tere—mai te huira pereoo tamarii e tae roa’tu i te mau pereoo na‘ina‘i—ei mau animala faauta tauihaa.
« I muri a‘e, ua ite atu vau i roto i te hoê piha rahi, i te toru o te tahua o te hoê aroa tupitahia, e 480 Feia Mo‘a i te Mau Mahana Hopea Nei i roto i te hoê amuiraa, ua to‘eto‘e e ua pohe i te poia. Ua riro mau te reira ei faaûruraa ia ite i te maramarama o te faaroo … Aore e ahoaho e aore râ, e riri, ua itehia râ te mana‘o maitai o te faaroo i roto i te evanelia ».1
« Aore hoê melo i faaʻite i te mana‘o amuamu no ni‘a i to ratou huru oraraa noa’tu e, ua pohe roa te tahi pae i te poia i mua noa i to matou mata.
« … Ua î roa to tatou Feia Mo‘a… i te mana‘o ti‘aturi, te itoito e te faaroo, te hi‘o ra ratou i mua ma te oaoa e ma te mata o te faaroo rahi i te evanelia e i to ratou ti‘araa melo i roto i te Ekalesia. Ua riro taua ohipa ra ei faaʻiteraa rahi a‘e, aita â matou i ite a‘enei, no te hotu o te evanelia i roto i te oraraa o te tane e te vahine ».2
Ua ite atoa te peresideni Benson i te mau hi‘oraa no te ti‘aturiraa e te mana‘o maitai e ere i te mea atea roa i to’na fare, a faaea oaoa noa ai e rave rahi o to’na mau hoa faaapu, noa’tu te mau ati rarahi i farereihia e ratou. Ua parau oia e :
« Te haamana‘o nei au i to’u taeraa i te hoê pureraa tapiri i Bancroft, i Idaho … Mea maitai roa ta matou pureraa, e i te faaotiraa, ua aroha vau i te tahi o te mau taata faaapu maitai roa tei tae mai, e i rotopu ia ratou te vai ra hoê taata o te taea‘e Yost to’na i‘oa, e na ô atura vau e, « E te taea‘e Yost, eaha te huru te faaapu ? » Na ô mai nei te taea‘e Yost e, ‘A, e mea maitai, e te taea‘e Benson, tera râ, ua pau vau e 20 tauatini tara marite ia faaauhia a toru mahana i ma‘iri a‘enei’. Na ô atura vau e, ‘Eaha te fifi—te tahi faahou to‘eto‘e ?’ Na ô mai nei oia e, ‘E, ua topa mai te reira i ni‘a i te sitona toheʻa, e ua ite oe e, eaha to’na auraa’. Na ô maira oia e, ‘E haamata matou i te mau matini no te tatatara i te reira ananahi po‘ipo‘i, ua oti ihoa ïa, aita e fifi. Te vai rii noa ra ta matou sitona i roto i te vairaa, e te vai atoa ra te tahi tuhaa tei faahereherehia no te matahiti. Eita matou e pohe i te po‘ia, e te vai faahou ra te tahi tanuraa’. I to maua faaru‘eraa’tu ia’na, na ô atura vau i ta’u vahine e, ‘Aue te nehenehe o teie varua’.
« Ua tere atu maua i Logan [hoê oire i Utaha, fatata e 80 maire, e aore râ, 130 kirometera i te atea ia Bancroft]. Ua haere atoa mai ta maua mau tamarii na muri iho ia maua, e ua tape‘a matou i ni‘a i te aroa rahi no te haere i te fare toa no te hoo mai i te tahi mau faraoa monamona na te mau tamarii. E o vai ta’u e farerei nei i te pae purumu, te taea‘e Yost. Na ô atura vau e, ‘Te aha nei oe i ô nei i teie atearaa ?’ Na ô mai nei oia e, ‘E te taea‘e Benson, teie ta matou mahana no te haere i te hiero’. Na ô atura vau e, ‘Aita te mau fifi e haaparuparu i to outou varua, e ere anei ?’ I reira, ua haapii maira oia ia’u i te hoê haapiiraa. Na ô maira oia e, ‘E te taea‘e Benson, ia tupu mai te fifi, e rahi atu to tatou hinaaro i te hiero’ ».3
Ua riro te pahonoraa a te peresideni Benson i te ati ei faaitoitoraa i te feia tei mâtau ia’na, mai ta te hi‘oraa o te tahi atu Feia Mo‘a i haapuai ia’na. Te faaʻite ra o Elder Neal A. Maxwell no te Pŭpŭ no te Tino Ahuru Ma Piti Aposetolo i te parau e, ua riro te peresideni Benson ei « taata tiaʻi maitai no te mau ohipa e tupu, e taata anaanatae e te oaoa e tano tatou ia hi‘o atu. Te parau ra o Elder Maxwell e, teie huru anaanatae, « eita ïa e tupu mai na roto i te hi‘o-ore-raa i te mau ohipa e tupu ra, e hi‘o maite râ i te reira, ma te hi‘o atoa râ i ô mai i te reira, te mau parau fafau no ni‘a i te huru e upooti‘a te basileia i te hopea ».4
Ua faaʻite te peresideni Ezra Taft Benson i te hoê hi‘oraa no te oraraa oaoa.
Te mau haapiiraa a Ezra Taft Benson
1
Na roto i te faaroo i to tatou Metua i te Ao ra, e roaa ia tatou te ti‘aturi i te ananahi, e te mana‘o maitai i roto i ta tatou ohipa i teie mahana, e te hau roto.
E roohia tatou paatoa i te mana‘o pe‘ape‘a e te paruparu—e tuhaa te reira no te oraraa. Mai te mea râ e, e faaroo to tatou, e taime poto noa ïa to to tatou manuïa ore, e i reira te manuïa e mahuti mai ai na roto mai i to tatou manuïa ore. E nehenehe to tatou Metua i te Ao ra e faatupu i te semeio na roto ia tatou tata‘itahi mai te mea e, e tuu tatou i to tatou ti‘aturiraa i ni‘a Ia’na.5
E haamaitairaa rahi te fariiraa i te hau roto, te fariiraa i te mana‘o hau, te fariiraa i te varua hau e te mărû i roto i te mau taime aroraa e te tautooraa, i roto i te mau taime oto e te ati. E mea oaoa no te varua ia ite e, o te Atua te arata‘i, e te ite mai nei Oia i Ta’na mau tamarii, e e nehenehe ta tatou e tuu i to tatou ti‘aturiraa hope i ni‘a Ia’na.6
E nehenehe te pure—te pure tuutuu ore—e faatuʻati ia tatou i te Atua, te tumu rahi a‘e o to tatou tamahanahana e te a‘oraa. « A pure noa i te mau taime atoa, ia upooti‘a oe ». (PH&PF 10:5). « Areʻa râ, ua faaitoito noa vau na roto i to’u puai atoa ia ti‘aoro atu i te Atua ia faaora ia’u » tera ïa te tatararaa a Iosepha Semita i te rave‘a ta’na i faaohipa i roto i te uru raau mo‘a no te paruru ia’na i te enemi e haamou ra ia’na. (Iosepha Semita—Aamu 1:16).7
Ia ore te faaroo i to tatou Metua i te Ao ra, e ore tatou e upooti‘a. Na te faaroo e horo‘a mai ia tatou i te iteraa i te mau mea e tupu mai, i te ti‘aturiraa i te ananahi, e i te mana‘o papû i roto i ta tatou mau ohipa i teie mahana. Te vahi tei reira te faaroo, eita tatou e tapitapi i te parau no te upooti‘araa hopea o te ohipa.8
I rotopu i te mau taata atoa, e ti‘a ia tatou te Feia Mo‘a i te Mau Mahana Hopea Nei ia riro ei feia anaanatae roa a‘e e te iti roa te mana‘o paruparu. Ua ite hoʻi tatou e, « e rave-ê-hia’tu… te hau no ni‘a mai i te ao nei, ei reira te diabolo e mana ai i ni‘a iho i to’na iho basileia », ua ite atoa râ tatou e, « e mana atoa te Fatu i ni‘a i to’na iho feia mo‘a, e e faatere arii mai oia i rotopu ia ratou ». (PH&PF 1:35–36).
E mea papû e, e vai maitai noa te Ekalesia ma te arata‘ihia e te Atua i roto i te mau tau ahoaho i muri nei, e no reira, tei ia tatou ïa te hopoi‘a ia ara ia vai haapa‘o maitai noa tatou tata‘itahi i roto i te Ekalesia e i ta’na mau haapiiraa. « Areʻa o te mau papû e aore i vî ra, e faaorahia ïa ». (Iosepha Semita—Mataio 1:11).9
2
I te mahana tata‘itahi te oaoa e imihia ai, tera râ, e mau‘araa maitai te tautooraa.
Aita ta tatou e tumu e haape‘ape‘a ai tatou. A ora i te evanelia, a haapa‘o i te mau faaueraa. A faatere i to outou mau pure i te ahiahi e te po‘ipo‘i i roto i to outou fare. A mau maite i te mau faatureraa a te Ekalesia. A tamata e a ora ma te hau e ma te oaoa … I te mahana tata‘itahi te oaoa e imihia ai. Tera râ, e mau‘araa maitai te tautooraa.10
A roohia ai George A. Smith i te ma‘i rahi, ua haere mai to’na taea‘e fetii, te peropheta Iosepha Semita, e farerei ia’na. Teie te parau a teie taata ma‘i : « Ua parau mai oia [te peropheta] ia’u eiaha roa vau e haaparuparu, noa’tu te huru o te ati ta’u e farerei. Mai te mea e, e paremo vau i roto i te apoo pape hohonu roa a‘e no Nova Scotia (Nouvelle Écosse) e e tapoʻihia vau i te mou‘a no Rocky Mountains, eiaha roa vau e haaparuparu te mana‘o, e tape‘a noa râ, e faaohipa i te faaroo, e ia itoito noa, e e matara mai au i ni‘a i te mou‘a »…
Te vai ra te taime e titauhia outou ia tape‘a maite ma te parau-ti‘a e tae roa’tu i te taime e faaru‘e mai to’na varua faaturuma ia outou. Mai ta te Fatu i parau i te peropheta Iosepha Semita : « e vai poto noa mai to oe enemi e to oe mau ati hoʻi ;
« E i reira, mai te mea e faaoroma‘i maite oe i te reira, e faateitei mai te Atua ia oe i te vahi teitei roa ra ». (PH&PF 121:7–8).
Na roto i te rohi-tamau-raa i roto i te mau ohipa hanahana, noa’tu ua haatihia outou i te ino rahi, i te pae hopea, e faateiteihia outou i roto i te anaana o te mahana. Oia atoa to tatou Fatu o Iesu Mesia, a faaruru ai oia i taua tamataraa hopea ra a vaiiho ai te Metua ia’na no te hoê taime poto i ni‘a i te satauro, ua tamau noa oia i te rave i ta’na mau ohipa no te mau tamarii a te taata nei, e aita i maoro i muri iho ua faahanahanahia oia e ua farii i te îraa o te oaoa. A rohi ai outou i roto i to outou mau tamataraa, e nehenehe outou e haamana‘o i to outou mau upooti‘araa i ma‘iri a‘enei, e e tai‘o i te mau haamaitairaa ta outou e fana‘o nei ma te ti‘aturi papû i te mau haamaitairaa rahi a‘e a muri a‘e mai te mea, e haapa‘o maitai noa outou. E e farii outou i te iteraa papû e, i te taime i faataahia, e tamaro te Atua i te mau roimata atoa e i te mau mea « aore i hi‘ohia e te mata ra, aore i faaroohia e te tari‘a ra, aore hoʻi i ô i roto i te aau o te taata ra, o ta te Atua ïa i vaiiho no te feia i hinaaro ia’na ra ». (1 Korinetia 2:9).11
Ia oaoa noa outou i roto i te mau mea atoa ta outou e rave. A ora ma te oaoa. A ora ma te popou. A ora ma te anaanatae, ma te ite e, e ore te Atua e parahi i roto i te oto e te mana‘ona‘o, i roto râ i te maramarama e te here.12
« Te oraraa ma te oaoa o te tupuraa ïa i te rahi i roto i te puai pae varua e tae atu i te maitai roa ra ».
3
Te hinaaro nei te Metua i te Ao ra ia oaoa tatou, e e haamaitai Oia ia tatou mai te mea e, e haapa‘o tatou i to’na hinaaro no tatou.
« Te vai nei te mau taata ia noaa to ratou oaoa » (2 Nephi 2:25). Te hinaaro nei to tatou Metua i te Ao ra ia oaoa tatou. Te tiaʻi nei Oia ia oaoa tatou. Aita râ e oaoa i roto i te faaru‘eraa i te mau ture. Aita e oaoa ia ore ana‘e outou e ora mai te au i to outou mau ti‘aturiraa, mai te au i te mau mea ta outou i ite ua ti‘a. E mea ohie roa ia haamâtau i te haapa‘o rii noa i te tahi mau ohipa. E mea ohie roa ia haamâtau i te ohipa imi i te hape o te tahi, e aore râ, te faainoraa, te tape‘araa i roto i to tatou aau i te mana‘o tapitapi no ni‘a i te tahi mau mea i roto i te Ekalesia. E mea ohie roa no tatou ia mainoino rii, e ia tamau noa i te reira huru, e ia tupu te oto e ia faaʻite noa i te mata oto. Aore te mata oto i upooti‘a a‘enei i roto i te tama‘i e aore râ, i roto i te here.13
Te ite anei ra tatou e, te oaoa i ô nei e i teie nei, o te farii-rahi-raa ïa ma te here e te oaoa, i te hinaaro o te Atua no tatou—e te raveraa i te reira na roto i te mau rave‘a atoa e te mau ohipa atoa, tei rahi e tei iti ? Te oraraa ma te maitai roa, o te oraraa ïa ma te oaoa. Te oraraa ma te oaoa, o te tupuraa ïa i te rahi i roto i te puai pae varua e tae atu i te maitai roa ra. Te mau ohipa atoa i ravehia mai te au i te hinaaro o te Atua, e tuhaa ïa te reira no te tupuraa i te rahi. Eiaha e tapupu i to tatou oraraa. A tahoê ana‘e tatou i to tatou oraraa, ma te tauʻa ore i te tura e te hinuhinu haavare e tae mai nei ma te mana‘o farii ore o te Atua. E haamana‘o tatou e, te tumu mau no to tatou puai e to tatou oaoa, tei ô atu ïa i te tororaa rima taata e te huru oraraa.14
Titauhia ia tatou ia haapii e ia haapii faahou â e, na roto ana‘e i te fariiraa e te oraraa i te evanelia no te here mai tei haapiihia e te Orometua, e na roto ana‘e i te raveraa i to’na hinaaro, te mau taamu o te poiri e te feaa e taamu nei ia tatou e mutu ai. Titauhia ia tatou ia haapii i teie parau mau ohie e te hanahana, ia ti‘a hoʻi ia tatou ia farii i te oaoa mărû o te Varua i teie nei e a muri noa’tu. Titauhia ia tatou ia haamo‘e ia tatou iho i roto i te raveraa i To’na hinaaro. Titauhia ia tatou ia tuu Ia’na i mua roa i roto i to tatou oraraa. Oia ïa, e rahi atu to tatou mau haamaitairaa mai te mea e, e horo‘a tatou i To’na here i to tatou taata tupu.15
« E au mau taea‘e », te parau ïa a Paulo, « aore au i mana‘o ia’u iho nei, e ua noaa, hoê roa a’u mea e rave nei, i te haamo‘eraa i te mau mea i muri ra, e te ti‘aturiraa’tu hoʻi i tei mua,
« Te nene‘i ti‘a’tu nei au i te tapa‘o, ia noaa te berabeio i te parauraa a te Atua no nia maira i te Mesia nei ia Iesu ». (Philipi 3:13–14).
A faaî i to outou feruriraa i te opuaraa ia riro mai te Fatu ra te huru, ei reira te mau mana‘o faaturuma e pee ai i rapae, a imi tuutuu ore noa ai outou ia ite ia’na e ia haapa‘o i to’na hinaaro. « Ia hoê atoa o outou huru aau », te na reira ra o Paulo (Philipi 2:5). « A hi‘o mai ia’u nei i to mau mana‘o atoa na », te na reira maira Iesu. (PH&PF 6:36). E eaha te ohipa e tupu mai, mai te mea e, e na reira tatou ? « E riro oe i te tiai ia’na, e ei hau rahi roa te hau, o oia i ti‘aturi ia oe ra ». (Isaia 26:3).16
E ore roa tatou e vai otahi noa mai te mea e, e ora tatou mai tei titauhia ia tatou, no te mea, e parahi tamau noa to tatou Metua i piha‘i iho ia tatou no te haamaitai ia tatou. Te hinaaro nei oia ia manuïa tatou. Te hinaaro nei Oia ia oaoa tatou. Te hinaaro nei Oia ia faaoti tatou i te mau opuaraa maitai ta tatou i haamau. E rave Oia i Ta’na tuhaa mai te mea e, e rave tatou i ta tatou.17
Te mau mana‘o tauturu no te tuatapaparaa e te haapiiraa
Uiraa
-
I to outou mana‘o no te aha te faaroo i te Atua e horo‘a mai ai ia tatou nei « te ti‘aturi i te ananahi, e te mana‘o maitai i roto i ta tatou ohipa i teie mahana » ? Eaha te mau parau a‘o i roto i te tuhaa 1 e ti‘a ia outou ia faaʻite i te hoê taata e imi ra i te hau roto ? No te aha outou e ma‘iti ai i te reira mau parau ?
-
A hi‘opo‘a ai outou i te tuhaa 2, a feruri i te hoê tau a hinaaro ai outou « e tape‘a maite ma te parau-ti‘a » i roto i te taime ati. A feruri na i te mau mea i roaa ia outou na roto i te reira iteraa. Nahea te Fatu i te tauturu mai ia tatou mai te mea e, e hinaaro mau to tatou ia rohi maite i roto i te mau tamataraa ma te faaroo ?
-
Eaha te tahi mau iteraa tei tauturu ia outou ia ite e, te hinaaro nei te Metua i te Ao ra ia oaoa e ia manuïa outou ? I to outou manaʻo, no te aha « te oaoa i ô nei e i teie nei, o te farii-rahi-raa ïa… i te hinaaro o te Atua no tatou » ? (A hi‘o i te tuhaa 3).
Te mau papa‘iraa mo‘a
Mataio 11:28–30 ; Ioane 14:27 ; 16:33 ; Galatia 5:22 ; Mosia 2:41 ; Moroni 9:25–26 ; PH&PF 101:11–16
Tauturu haapiiraa
« A imi i te hoê hi‘oraa na roto anei i te tai‘oraa i te buka, te pene e aore râ, i te irava e aore râ, na roto i te hi‘o-faahou-raa i te mau upoo parau. A imi ia maramarama i te aamu o te mau papa‘iraa » (Ia Poro Haere i Ta‘u nei Evanelia [2004], 26). A opua ia tai‘o i te hoê pene e aore râ, i te hoê tuhaa hau atu i te hoê taime ei reira outou e maramarama maitai atu ai. Mai te mea e, e na reira outou, e riro te mau iteraa hohonu i te itehia ia outou.