O lo Tatou Tiute Faafaifeautalai

E o atu faifeautalai i le lalolagi e molimau ia Iesu Keriso ma toto le fatu taua o le ola e faavavau.

Mai le Soifuaga o Iosefa F. Samita.

E lei umi ona taunuu o ia i Hawaii i le aso 20 Oketopa 1854, ona tusia lea e Iosefa F. Samita se tusi ia Siaosi A. Samita o se tasi o le Korama a le Toasefululua sa faauuina o ia o se toeaina. Sa tuuina atu e le faifeautalai talavou ia lava mo le galuega a le Alii, ma faapea atu, “Ua ou fiafia e faapea atu ua ou saunia e alu atu i taimi lelei ma taimi leaga mo lenei faamoemoe ua ou galue ai; ma tatalo ma le faamoemoe o le a tumau lo’u faatuatua e oo i le iuga.”¹ E tele taimi o le a tofotofoina ai lona faatuatua.

I se tasi taimi sa faaleagaina ai e le afi le tele o ana meatotino, e aofia ai “lavalava, o kopi o lomiga muamua (gagana Peretania) o le Tusi a Mamona, le Mataupu Faavae ma Feagaiga, sa tuuina atu o se meaalofa i le Peteriaka o Ailama Samita. I le tasi o nei tusi sa tuuina i ai e Elder Samita lona tusi faamaoni i le avea ai o se toeaina. Ina ua faaleagaina le fale i mea uma lava, sa liu efuefu uma lava le pusa a Elder Samita, ma mea uma lava sei vagana ai le tusi faamaonia. O se mea ofoofogia sa faasaoina lenei tusi, sei vagana ai ua mu ia pito faataamilo, ae leai ma se upu sa faaleagaina e ui ina sa matua faaleagaina uma le tusi sa tuu ai i totonu. E le gata ua faaleagaina ia tusi ae faapena foi le tusi o talaaga a Elder Samita sa ia tausia ma le faamaoni.”

Mai lenei tulaga na oo mai ai se mea malie, sa avea ma mea matuia i lea taimi. O lavalava o faifeautalai ua faaleagaina, o lea mo sina taimi puupuu sa faaaoga fetufaai ai e Elder Samita ma lana soa le suti e tasi. E nofo le faifeau e toatasi i le fale ae ofu le isi i le suti ona alu lea i le fonotaga po o le sauniga. Ona fesuiai lea ua nofo le tasi i le fale ae alu le isi i le fono po o sauniga. “E moni e lei tumau ai pea lenei mea, ae ua na o se taimi puupuu, ae o se tasi o tala malie sa faamatalaina pea i tausaga na mulimuli mai, ina ua leva se taimi talu ona te’a le puapuaga ma le maasiasi o faifeautalai ma le faigata.”²

Aoaoga a Iosefa F. Samita

E ao i faifeautalai ona ola ina ia mafuta faatasi pea ma le Agaga o le Atua.

O se tasi o mea taua e tatau ona maua e faifeautalai o loo malaga atu i le lalolagi e talai, o le lotomaualalo, agamalu, alofa le faatuaoia, mo le manuia ma le faaolataga o le fanauga a tagata, ma le naunautaiga e faatupuina le filemu ma le amiotonu o tagata i le lalolagi. E le mafai ona tatou talai atu le talalelei a Keriso e aunoa ma lenei agaga o le lotomaualalo, agamalu, faatuatua i le Atua ma le faalagolago i lana folafolaga ma lana upu ia i tatou. Atonu tou te aoaoina le poto uma o tagata, ae o le a lē agavaa ai outou e faapei o lē ua lotomaualalo e faia nei mea, le aafiaga o le taitaiga e faia e le Agaga o le Atua. “O le faamaualuga e muamua i le malaia, e muamua foi le loto faasiasia i le pa’ū,” [Faataoto 16:18.]

E taua i alii faifeautalai e o atu i le lalolagi e talai ona aoao le agaga o le talalelei, o le agaga o le lotomaualalo, o le agaga o le agamalu ma le naunautai atoa poo le a lava le faamoemoega ua e mafaufau i ai e fai. Afai o le talaiina o le talalelei, e ao ona tuuina atu i tatou atoa i le tiute o lena talaiga, ma e ao ona tatou taumafai i le malosi tatou te mafaia ina ia agavaa i tatou e faia lena galuega, ma o le auala e fai ai o le ola lea ina ia mafuta pea ma le agaga o le Atua ma mau ma i tatou e taitaiina i tatou i mea uma ma itula o la tatou talaiga, i le po ma le ao.³

Ou uso e, ua outou i ai i le galuega a le Atua; ua outou galulue malosi; ua outou maua le Agaga o le Talalelei aua ua valaauina faapitoa i ai outou. O outou o faifeau o le feagaiga e faavavau. Ia outou tatalo; ioe, aua nei galo a outou tatalo. O le faifeautalai e le faagalo i ana tatalo; e le galo ia te ia le Alii; o le a manatua pea o ia e Ia pe afai ua tumau ai i lona tiute. Afai ua tuu o ia i le tulaga e mafai ai ona maua le mea sili, ua le galo ia te ia le Alii i le taeao, aoauli, ma le po. E tatalo o ia i le Alii, ma faamaulalo o ia lava i ona luma ma faafetai atu ia te ia. Afai o i ai oe i lenei tulaga o le a e olioli i lona Agaga.⁴

O le faifeautalai e ao ona i ai ia te ia lava le molimau o le Agaga o le Atua—o le molimau o le Agaga Paia. … E le liua tagata e ala i le susua o faaupuga; e talitonu i latou pe a faamalieina ua ia te oe le upumoni ma le Agaga o le Atua.⁵

E ao i faifeautalai ona faamaoni, amio mama, ma faatuatua i a latou feagaiga.

E le talafeagai le auina atu o alii i le lalolagi e folafola atu i isi e ala i le usiusitai i le talalelei lea latou te le’i mauaina e i latou lava. E le talafeagai foi le auina atu o alii ina ia suia ai i latou. E ao ona suia i latou muamua i o latou aiga pe afai sa latou le matua tausia lelei poloaiga a le Atua. E faatatau foi lenei i le Upu o le Poto e faapei foi o isi tulafono o le lagi. E leai se faalavelave e tuuina atu i alii ua valaauina o e sa faigata ma taase i tausaga ua mavae, pe afai i tausaga ua mulimuli mai ua latou ola ai i le amioatua ma faaalia mai fua taua o le salamo.⁶

Matou te mananao i alii talavou … o e ua latou tausi ia i latou i le mama mai le lalolagi, ma o atu i atunuu o le lalolagi ma fai atu i tagata, “Mulimuli mai ia te au, e pei ona ou mulimuli ia Keriso.” Ona tatou mananao lea ina ia latou iloa ona pepese, ma tatalo. Tatou te mananao ia faamaoni i latou, amio mama, ma faatuatua e oo lava i le oti a latou feagaiga, i o latou usoga, i a latou ava, i o latou tama ma tina, i o latou uso ma tuafafine, ia i latou lava ma le Atua. O le mea tou te maua mai ai alii faapenei e talai le talalelei i le lalolagi, pe latou te iloa poo fea e amata mai ai, o le a tuu i ai e le Alii lona Agaga i o latou loto, ma o le a ia faapaleina i latou i le poto ma le mana e faaola ai le agaga o tagata. Aua o le amataga o le olaga ua ia te i latou. Ua le faaleagaina lava lea; e le i aveeseina mai ia i latou.⁷

E le tatau ona iloa e o tatou tagata talavou ia le amioleaga o loo faia i isi nofoaga. O lenei malamalama e le faaeaina, ma e foliga mai e mafai e le sili atu i le toatasi ni alii talavou, ona o lona fiailoa, ona vailiiliina le uluai sitepu o lona pa’ū ma oo atu ai lava i nofoaga e ono fesiligia. Talosia ia alii talavou o Siona, pe o i ai i le misiona po o le aiga, ia alo ese mai nofoaga o le tiapolo. E le tatau ona latou iloa mea o loo tutupu ai i na nofoaga. E leai se tagata ua sili atu pe malosi mo lea ituaiga malamalama. Ia latou manatua “o le malamalama i le agasala e faaosoosoina ai ina ia faia,” ma ia aloese mai na faaosoosoga, ina ne’i oo mai i se taimi mulimuli ane i le lumanai, aua e ono lamatia ai lo latou ola mama ma o latou tulaga i le Ekalesia a Iesu Keriso.⁸

O uiga o le faifeautalai lelei o : O le tagata e mafai ona fegalegaleai lelei ma isi—e tumau lona faauo ma e olaola—e mafai ona ia tuu ia lava i le faatuatuaga o tagata o loo i le pouliuli. E le mafai ona faia lenei mea e aunoa ma le sauniuni lelei i ai. E ao ona e faamasani ma se tagata, aoao ma iloa o ia ma ia maua lana faatuatuaga ma ia lagona ma iloa e ia pau lava lou naunautaiga o le faia lea o le mea lelei mo ia ma faamanuia ia te ia; ona mafai loa lea ona e ta’u i ai o lau savali, ma tuuina atu i ai mea lelei ua e saunia mo ia, i le agalelei, ma le agaalofa. O lea, i le filifilia o ni faifeautalai, ia filifili mai e mafai ona fesootai ma tagata, e faauo ma e le ita i tagata; afai e leai se isi i lau uarota, aoao ma faaagavaa nisi o alii talavou mo lenei galuega.⁹

O faifeautalai e ao ona aoao atu i le agaga le talalelei o le ola ma ia faafaigofie

Ua faatonuina o tatou faifeautalai iinei, ma ua aoaoina i latou mai lo latou laiti, latou te le o atu ma sii atu le taua i faalapotopotoga o lotu a le lalolagi pe a valaauina i latou e malaga atu e talai le talalelei a Iesu Keriso, ae o atu ma molimau atu le mataupu ua tuuina mai ia i tatou e ala i le tufugaaao o le Perofeta o Iosefa, i lenei tisipenisione o aso e gata ai, e mafai ai e tagata ona aoao le upumoni, pe a latou mananao ai.

Ua auina atu i latou e tuuina atu le lala o le olive o le filemu i le lalolagi, e tuuina atu le malamalama ua fetalai mai ai le Atua mai le lagi i lana fanau i le lalolagi; o le alofa mutimutivale o le Atua ua toefuataiina mai ai i le lalolagi le atoaga o le talalelei a lona Alo Pele e Toatasi, i le tino, ua faaali mai e le Atua ma toefuataiina i tagata le mana paia ma le pule mai ia te ia lava, ina ia latou mafai ma pulea ai le faiga o sauniga o le talalelei a Iesu Keriso e tatau ai mo le Faaolataga; ma le faataunuuina o nei sauniga e tatau ona talafeagai ina ia talia ai e le Atua o lē na tuuina atu ia i latou le pule e faia ai i lona suafa.

E auina atu a tatou faifeautalai e talai le salamo i agasala, ina ia talai le amiotonu, talai i le lalolagi le talalelei o le ola, o le felagolagomai, ma le faauo i tagata, e aoao i alii ma tamaitai ina ia faia le mea e sa’o i le silafaga a le Atua ma i le vaai a tagata uma, ia aoao i latou i le mea moni ua faatulagaina e le Atua lana Ekalesia, o se Ekalesia, o ia lava o le pule ma o ia foi na afua mai ai.¹⁰

O le fesili e masani ona tuu mai i le mafaufau o alii talavou ua i ai i le misiona, “O le a la’u tala e fai?” Ma le isi e sosoo mai ai, “E faapefea ona ou fai atu?”… E ui e leai se tulafono patino ua tuuina mai, ua aoao mai o le ala e aupito faigofie o le auala sili lea. Ina ua aoaoina i mataupu faavae o le talalelei, e ala i le tatalo o le agaga, ma le suesue loloto, e ao ona tuuina atu nei [aoaoga] i tagata i le lotomaualalo, i le tautala atu i upu e sili ona faigofie, i le agaga o le misiona a Keriso. E le mafai ona faia lenei tulaga pe a faapea e tele le taimi e faaalu o le faifeau i le fia viia ma taumafai e lauga malomaloā. O le mea lenei ou te fia tautino atu i alii faifeau, o lauga i nofoaga faitele ia faia i le taimi ma nofoaga e tatau ai. O le misiona e le o le nofoaga lea mo nei taumafaiga. E le atoatoa le aoaoina atu o le talalelei e ala i le fia viia i upu ma manatu, ae ia tuuina atu i le faigofie o lona moni, tautalagia i se auala e oo atu ai i agaga ma aoao ai, ma mafaufau loloto ai.

… E tatau ona i ai muamua i le faifeau le agaga, pe afai e manuia i le faaleleia o ana fetufaaiga ma e faalogologo; ma e faamaoni lenei tusa poo upu o loo tautala i talanoaga, faafesaga’i, poo le nofoaga faitele. O le a le faaali atu e le agaga ia lava i le tagata ua tuuina atu lona taimi e tuuina atu ai lauga faaviivii. Ua faamoemoe o ia e faafiafia ia fafo, ae lē o galue i totonu o le loto.¹¹

E le mafai e se tagata ona talai atu le talalelei a Iesu Keriso e ia lava; aua o mea a le Atua e le iloa e se tagata ua na o le agaga o le Atua o loo i totonu ia te ia [Tagai 1 Korinito 2:11]. Mo se tagata e taumafai e talai le upu a le Alii i lona lava poto ma le malamalama, e aunoa ma le faalagolago i le musumusuga, e ulagia lea. E leai se tasi na te talai atu i le Atua ma le upumoni e pei ona i ai ia Iesu Keriso sei vagana ua musuia o ia e le Agaga Paia. O le au soo i aso anamua sa savavali ma talanoa ma le Faaola i le taimi o lana talaiga i fanau a tagata, ae peitai … sa poloaiina i latou ina ia latou nonofo i Ierusalema ma ia aua le o atu e talai seia faapaiaina i latou i le mana mai luga; i nisi upu, seia liligi mai le Agaga Paia i o latou luga o le a faafouina ai o latou lagona; faateleina ai lo latou malamalama, ma totoina ai i o latou loto le molimau ia Iesu Keriso ina ia latou molimau atu ia i latou ua talai i ai.¹²

O faifeau taitasi e tuuina atu i le taitaiga e le agaga o lona valaauga, lea e tatau ona ia faataunuuina. Afai e le mafai ona ia atinaeina lena agaga, o le agaga galue ma faatino ai, o le a vave ona vaivai, musua, ma faanoanoa. O faifeautalai uma e ao ona taumafai e tuuina atu se vaega o aso taitasi e suesue ma tatalo ai i mataupu o le talalelei ma le talitonuga o le Ekalesia. E ao ona faitau, mafaufau ma tatalo. Ioe, tatou te tetee i le saunia o ni lauga e tuuina atu ma le manatu matagofie, ae afai e tulai se alii faifeautalai e tautala atu i se faapotopotoga i le aiga poo fafo, e ao ona matua saunia lelei lana lauga. O lona mafaufau e tatau ona lelei ona faatamaoaiga i manatu e tatau ona ta’u atu, e tatau ona faalogo i ai, e tatau foi ona manatua; ona aumai lea e le agaga o musumusuga le upumoni o loo fia faalogo i ai e faalogologo, ma tuuina atu ana upu i le mana ma le pule.¹³

Ua matua fautuaina lava ia alii faifeautalai o loo i atunuu mamao, e pei lava foi o tagata uma o le Au Paia, ina ia taofia le finau e uiga i mataupu faavae. O le moni o le talalelei e le faalagolago i le tuuina mai o le finauga vevela; o le feau o le upumoni e atoatoa lona tuuina atu pe a tuuina atu i upu faigofie.

… O le molimau o le upumoni e sili atu nai lo le faamatuu atu i le mafaufau, o le talitonuga maumaututu o le loto, o le malamalama e faatumulia ai le agaga atoa o e faalogologo.

O faifeautalai ua tuuina atu e talai ma aoao muai mataupu faavae o le talalelei, o Keriso ma lona faasatauroga, ma e leai se mea e sili atu i le ala o le mataupu faavae. E le valaauina i latou e tuuina atu o latou lagona i fesili o mataupu o le lotu, pe faaofo foi ē faalogologo i se faaaliga o aoaoga maoae. O faiaoga e faapea lava, pe afai latou te faamalieina i se vaega le taua o lo latou valaauga maualuga; ae e ao ona latou aoao atu i le ala ma uiga o le Matai— saili e taitai i latou i le alofa, e ala i faamatalaga faigofie ma le faatauanau; ae le o le faamalosi.

Uso e, taatia nei mataupu e le aoga; faalatalata i aoaoga o upu faaalia, e pei ona faamanino faigofie i tusi faavae o le Ekalesia ma saunoaga a perofeta soifua; ma ia aua nei avea le eseesega o manatu i mataupu faigata e alu ai le tele o outou taimi, ina nei aveese mai ia te outou le Agaga o le Alii.¹⁴

O le galuega faafaifeautalai e taua i le aiga e faapei foi o atunuu mamao.

O se faanoanoaga pe a maea ona faia misiona a le tele o o tatou alii, ua foi mai i le aiga, ua faagalo ma lē amanaiaina e i latou e pulefaamalumalu i le Ekalesia ma ua see ese atu i le le faaeteete ma le le popole, ma mulimuli ane, ua o ese atu mai o latou tiute o le Ekalesia. E ao ona faa-galulue i latou, ma faamalosia le galuega o le talaiga, ina ia tumau ai pea le agaga o le talalelei i o latou mafaufau ma loto ma aoga ai i le aiga ma fafo atu.

E leai se fesiligia i le manaomia o le galuega faafaifeautalai i Siona, poo iinei i le aiga, poo atunuu mamao. Ua tatou vaai i le tele o tama ua pauu atu i le faatamala, ma ala ma amioga o le agasala. O alii faifeautalai uma ua foi mai i le misiona ua tumu i le faatuatua ma lagona lelei e ao ona tauave i ona lava luga le avea ma faaola mo ana uo laiti i le aiga. A iloa e se faifeautalai ua foi mai se tama ua pau atu i le leaga ma ua amio ai i le leaga, e ao ona ia lagona o lona tiute le taofi mai o ia, i le fesootaiga ma le pulefaamalumalu o le siteki poo le uarota o loo nofo ai, ma faia i le malosi uma ma aafiaga e mafai ona ia faia mo le faaolataga o lena alii talavou ua sese, e le i maua e ia se avanoa e pei o i latou sa i ai i atunuu i fafo, ma ua avea ma ala e faasaoina ai le toatele ma faamautuina ai i latou i le upumoni.¹⁵

O le galuega a le tagata i le misiona e faalauteleina ai lana vaai mamao, faamalosi ai lona malosi, faateleina lona tomai mo galuega lelei i vaega uma lava ma avea ai ma tagatanuu lelei ma aoga, ma se tasi e galue malosi i le Ekalesia. Ao galue ai le faifeautalai i le misiona, e ao ona avea ma faifeautalai atoatoa, tuuina atu i le atoatoa i le tiute faapitoa ua tuuina atu ia te ia. Afai e taliu mai i lona aiga o loo avea pea o ia o se faifeautalai; ae ao ona ia iloa ua ia toe foi i lona avanoa i le soifuaga e galue ai e maua lana meaai i le afu o ona mata. … O faifeautalai ua taliu mai e tatau ona i ai i mea e manaomia tele ai le loto totoa, mafaufau malosi, ma lima naunautai e galulue. O le poto o le talalelei e le o mea leaga ae o le naunautai i le malosi mo le lelei–i le faapuupuu, mo galuega.¹⁶

I le avea ai ma ē e tauaveina ma ē luluina le fatu lelei o le ola e faavavau, ia ogatasi o tatou olaga ma a tatou galuega, ia ogatasi a tatou upu ma le upumoni o loo tatou molimauina, ma ia ogatasi a tatou amioga ma le finagalo faaalia o le Atua; aua a lē ogatasi nei fua ma le tulaga o a tatou galuega o le faatuatua, o i tatou, o Alii Faifeau po o le Au Paia, ua na o ni faalavelave i le alualu i luma o le galuega, o ni faavaatu’ia i le mafaufau o isi, ma tatou te le o fesoasoani i le faalauteleina o le galuega mo le faaolataga o isi, ae ua tatou faaaafia ai i tatou i se tulaga matautia.¹⁷

Fautuaga mo Suesuega

E tatau i se a ona i ai le “lotomaualalo, agamalu ma le alofa lē faatuaoia ina ia agavaa i e avea ma faifeautalai? O a nisi o uiga e fesoasoani i alii faifeautalai ma tamaitai e avea ai o ni faifeau atoatoa? (Tagai foi MFF 4.) E mafai faapefea ona avea uiga faapenei e fesoasoani ai ia i tatou e avea o ni faifeautalai o le talalelei?
Aisea e taua ai i faifeautalai ona tausisia ia “mama mai le lalolagi”? E faapefea ona faamanuiaina e le Alii ia faifeautalai ua faapea ona fai?
E faapefea ona tatou maua le faatuatuaga o a tatou uo e le auai i le Ekalesia ma tuaoi ma fesoasoani ia latou iloa o lo tatou “naunautaiga o le faia o le mea lelei mo i latou ma faamanuia ia i latou”? E faapefea ona tatou fetufaai i le atoatoa o le talalelei ma a tatou uo e le auai i le talalelei?
O a upumoni e tatau ona saunia faifeautalai e aoao atu?
O a tulaga e matautia ai le faaaogaina e faifeautalai o finauga, felafolafoaiga, ma talanoaga lē aoga pe a aoaoina le talalelei? Aisea e sili ai le mana o le aoao atu i le auala faigofie i le Agaga? (Tagai MFF 100:5–8.)
E faapefea ona atinaeina e faifeautalai le “agaga o lona valaauga”? E faapefea ona tatou maua ma atinaeina le “agaga o le faamalosi ma le faatinoina” i le fetufaai atu o le talalelei?
E faapefea ona faatumau ia faifeautalai ua maea mai le galuega “i le galuega”? O a mea e fai e taitai o le Ekalesia ma isi tagata e fesoasoani ai i faifeautalai ua uma galuega ina ia tumau i le “auai i le galuega o le talaiga”? O a ni auala e fai e le faifeautalai ua foi mai, “e avea ma auala e faasaoina ai le toatele ma saga faamausaliina ai i latou i le upumoni”?