O le Ata Sili o le Ola ma le Faaolataga

O lo tatou Tama oi le Lagi ua ia saunia le ata mo ona atalii ma afafine ina ia avea faapei o Iesu Keriso ma olioli ai i le faaeaga.

Mai le soifuaga o Iosefa F. Samita

I le 1874 e lei umi talu ona taunuu o ia i Egelani e pulefaamalumalu ai i le Misiona i Europa ma i le faamanatuina o lona 36 tausaga, sa tusia ai e Iosefa F. Samita i lana tusi faamaumau:

“Sa malulu le aso, pogisa ma pagatia, o se faamanatuga fetaui ma talafeagai ma le aso pogisa ma le faigata o lo’u aso fanau; Ina ua tuuina lo’u tama o [Ailama] ma lona uso o [Iosefa] i le falepuipui ona o le talalelei ma tulieseina mai le Au Paia mai o latou aiga i Misuri e tagata saua. O le susulu malamalama o lo’u agaga e lei matua faateaeseina auiliili mai le pogisa o le ata ua lafoia i ona luga le pouliuli o lena taimi ma mea na tutupu ai.

“Ae ui i lea o le alofa tunoa o le aao o le Atua ma lana foai agalelei ua faateleina pea mo au, e mai lava i lo’u tamaitiiti, ma ua faaleleia pea ou aso e ala i le lotomaulalo ma le tulimataia o le atamai ma le fiafia i le malo o le Atua. O le faamoemoega o lo’u olaga ua manino ao faagasolo pea i luma taimi ma faatupula’ia foi mea e tutupu mai. O nei faamoemoega o le folafolaga o le talalelei, poo le faatuina o le malo o le Atua i le lalolagi; O le faaolataga o agaga, ma le sili ona taua ia te au—e mo a’u lava ia ma lo’u aiga.”¹

E tusa ai ma le malamalama ma le talitonuga maumaututu, sa aoao atu ma molimau Iosefa F. Samita i lo tatou Tama oi le Lagi ma lana ata e faavavau o le faaolataga. “E leai se mea i lalo o le lagi,” ua ia folafola mai, “ua sili ona taua ia te au poo le fanau a tagata e pei o le ata sili o le ola ma le faaolataga.”²

Aoaoga a Iosefa F. Samita

Ua fuafuaina e lo tatou Tama oi le Lagi ia le ata o le faaolataga ina ia faaeaina ai i tatou.

O loo soifua le Alii Silisiliese; na ia faia le lagi ma le lalolagi, ma punavai; ma o i tatou o ana fanau, [ioe] o ana lava fanau, ma e le’i faafuasei ona tatou oo mai iinei. Sa fuafua e le Alii lo tatou oo mai, ma le faamoemoega o lo tatou i ai. Sa ia fuafua ina ia faataunuuina ai la tatou misiona, ina ia usiusitai e faapei o Iesu Keriso, aua a faapei o ia, e mafai ona leai sa tatou agasala ina ia faaeaina, e faapei o ia e mafai ona faatumulia i tatou i le poto atoatoa, ma faapei o ia e mafai ona faaolaina i tatou i le lima taumatau o le Tama, ma nonofo i le nofoalii ma i ai le pule ma le mana i le tulaga o le a valaauina i tatou e galulue ai. Ou te molimau atu i lenei mataupu faavae, aua ua fesoasoani mai le Alii ina ia ou iloa ma lagona le upumoni mai le tumuai o lo’u ulu e oo i alofivae o o’u vae.³

O le a faamasinoina le tagata i le olaga a sau e tusa ai ma galuega sa ia faia i lenei olaga, ma o le a tali atu e tusa ai ma le tulaga tausimea ua faatuatuaina ai i lana tausiga iinei, ao le i oo mai le faamasino i e o ola ma e ua oti, o le Tama o o tatou agaga, ma lo tatou Alii ma le Matai. O le fuafuaga lea a le Atua, o se vaega o lona faamoemoega sili. Ua tatou le o mai iinei e ola ai mo ni nai masina poo tausaga, e aai, feinu ma momoe, ona feoti lea, mou ese atu ma pala. O le Alii Silisiliese na te le i fuafuaina le tagata mo na o sina taimi, ta’ulēaogaina ma lē atoatoa e pei o lenei.⁴

Pe a na fai tatou te lē iloaina ae tatou te le’i o mai i le [lalolagi] le alagatatau o lo tatou o mai, le taua o le maua o tino, o le mamalu e maua i le iuga, le faamoemoega sili e ausia e ala mai le tofotofoina ma le suesueina—ua fuatia i le fua faatautau, i le faia o uiga paia, mana faaleatua ma le filifiliga saoloto ua faauuina ai i tatou; o lea, e pei ona alu ifo o ia i lalo o mea uma, e faapei o Keriso, tatou te mafai ona alu ae i mea maualuga uma [tagai MFF 88:6], ma faapei o lo tatou Tama, Tina ma le Uso Matua, Silisiliese ma Faavavau!—semanu tatou te lē o mai.⁵

E leai se mea i lalo o le lagi ua sili le taua ia te au poo le fanau a tagata e faapei o le ata sili o le ola ma le faaolataga sa fuafuaina i le lagi mai le amataga, ma ua tuuina mai i lea vaitaimi i lea vaitaimi e ala i le musuia o alii paia ua valaauina e le Atua seia oo mai le aso o le afio mai o le Atalii o le Tagata, ona o lenei talalelei ma lenei ata o le faaolataga sa faaali mai i o tatou uluai matua. O le agelu a le Atua sa ia tuuina atu ia i latou le ata o le togiola, ma le faaolataga mai le oti ma le agasala ua uma ona faaali mai i lea taimi i lea taimi i le pule paia mo fanau a tagata, ma e lei i ai lava se suiga. E leai ni mea o i ai, i le amataga, sa lē tatau ai pe le talafeagai; e leai se mea o i ai e tufatufaina atu ai; o se fuafuaga atoatoa sa fuafuaina mai le amataga e le atamai o le Tama ma le toatasi paia mo le togiolaina o tagata soifua ma le faaolataga ma le faaeaina i le afioaga o le Atua. … I augatupulaga uma o taimi, o le talalelei e tasi, o le ata o le ola ma le faaolataga e tasi, o sauniga e tasi, ua tanumia ma Keriso, faamanatuga o le taulaga tele e osia mo agasala a le lalolagi ma le togiolaina o le tagata, ua uma ona tuuina mai i lea taimi i lea taimi, mai le taimi o le foafoaga.⁶

O le ata o le ola sa toefuataiina mai e le Silisiliese i tagata i aso e gata ai mo le faaolataga o agaga o tagata, e le gata i le lalolagi o le a sau, ae faapena i le olaga i le taimi nei, aua ua faatuina e le Alii lana galuega ina ia fiafia ai ona tagata i faamanuiaga o lenei olaga i le atoatoa; ina ia faasaoina i lenei olaga, ma faapena i le olaga a sau, ina ia latou faataatia le faavae iinei ina ia saoloto ai mai le agasala ma isi ona aafiaga ma taunuuga, ina ia latou fai ma suli i le malo o le Atua i tua atu o lenei vanu o loimata. O le talalelei a Iesu Keriso o le mana lea o le Atua i le faaolataga.⁷

Sa fetalai le Atua i Lana auauna o Iosefa Samita, ma sa faaali atu ia lava ia te ia; e le na o le Tama, ae faapena i le Alo. Sa la faaali atu i la’ua lava ia te ia, ma sa la tuuina atu ia te ia poloaiga ma la la’ua tulafono, o la la’ua Talalelei ma la la’ua ata o le ola e faavavau. … O lenei fuafuaga ua le aofia ai na o le faaolataga mai le agasala ma le aafiaga o le agasala nei ma le lumanai, ae faapea i le togiola, paia, mana ma le pule, e oo mai i fanau a le Atua e ala i le usiusitai i tulafono ma mataupu o le talalelei.⁸

Sa tatou o mai i le lalolagi e saunia ai i tatou mo le ola e faavavu.

O le faamoemoega o lo tatou i ai i le lalolagi ina ia tatou maua le atoatoaga o le fiafia, ina ia avea i tatou ma atalii ma afafine o le Atua, i le atoatoaga o le uiga o lenei faaupuga, o le avea ma suli o le Atua ma suli faatasi ma Iesu Keriso [tagai Roma 8:14–17], e avea ma tupu ma faitaulaga a le Atua, ina ia maua le mamalu, pule, togiola, nofoalii ma mana uma ma uiga moomia ma o loo i ai i lo tatou Tama oi le Lagi. O le faamoemoega lenei o lo tatou i ai i le lalolagi. Ina ia mafai ona maua lenei tulaga faaeaina, e talafeagai ona tatou i ai i lenei olaga faaletino, pe faataitai, ina ia faamaonia ai lo tatou agavaa, e ala i le fesoasoani a lo tatou uso matua o Iesu.⁹

O le faamoemoega o lo tatou i ai iinei o le faia lea o le finagalo o le Tama e pei ona faia i le lagi, ia galue ma le faamaoni i le lalolagi, ia lafoai i le amioleaga ma soli i o tatou vae, ia manumalo mai le agasala ma puapuaga o o tatou agaga, ia tulai ae i luga o le le atoatoa ma le vaivai o le tagata leaga ma le pau, i le musumusuga a le Atua Silisiliese ua faaalia ai lona mana, ma avea ai ma tagata paia ma auauna a le Alii i le lalolagi.¹⁰

E oti i tatou uma. Pe o le iuga ea lena o i tatou? Afai sa tatou ola ai ae le i o mai iinei o le mea moni o le a faaauau lo tatou ola ai pe a tuua iinei. O le a i ai pea le agaga e faapei ona i ai muamua, faatasi ai ma se faaopoopoga sili ua maua mai ona ua i ai i lenei olaga faataitai. Ua matua alagatatau ona tatou o mai i le lalolagi ma maua tino faitino, aua ana leai le maua o tino faaletino ua le mafai ona faapei i tatou o le Atua, poo Iesu Keriso. … Ua fuafuaina ina ia tatou tutu ae mai le tuugamau e faapei o Iesu, ma maua le tino ola pea e pei ona maua e ia—o lenei, o le a avea o tatou tino ma tino ola pea e pei o lona tino ua avea ma tino ola pea, o le a faatasia ai le tino ma le agaga ma avea ma tino ola e tasi, ua le mavaevae, pe tuueseeseina, e faavavau.¹¹

O loo ou naunau atu i le taimi o le a ou alu ese ai mai lenei vaega o le soifuaga, o iina o le a ou maua ai le faatagaga e maua ai le olioli i lona atoatoa i meaalofa uma ma faamanuiaga ua mafua ai lo’u fiafia i lenei lalolagi; i mea uma lava. Ou te le talitonu ua na o se tasi se mea ua fuafuaina po ua manaomia e maua ai lo’u olioli pe maua ai lo’u fiafia, o le a le mafai ona ou maua i le taimi mulimuli, pe afai ou te faaauau pea i le faatuatua; a leai o le a lē atoatoa lo’u olioli. … Ou te manatu i le fiafia e maua mai le saili i le faia o le finagalo o le Atua i le lalolagi e pei ona faia i le lagi. Tatou te faamoemoe ia i ai a tatou ava ma tane i le faavavau. Tatou te faamoemoe o le a iloa e a tatou fanau i tatou, o o latou tamā ma tina i le faavavau. Ou te faamoemoe i le tulaga lea; e leai lava se isi mea ou te naunau atu i ai. A aunoa ma lea, o le a ou lē fiafia.¹²

O mataupu o le talalelei ua faaalia mai e le Alii i aso nei o le a taitaiina ai i tatou i le ola e faavavau. O le mea lea o loo tatou tulimatai i ai, ma ua foafoaina ai i tatou, ma ua foafoaina ai le lalolagi. O le mafuaaga o lo tatou i ai iinei ina ia mafai ai ona manumalo mai amioleaga uma ma saunia ai i tatou mo le ola e faavavau i le lumanai. …

Ia tatou faatuatua ma lotomaualalo; tatou ola i aoaoga a Keriso, tuu ese a tatou amioleaga ma agasala ma vaivaiga i le tino, ae pipii atu i le Atua ma lana upumoni i loto atoatoa, ma le naunautaiga uma e tau le taua lelei o le faatuatua ma tumau e oo i le iuga.¹³

O se tasi o faamoemoega autu o lo tatou i ai iinei, o le ola ai ia foliga e faapei o Iesu Keriso.

Ou te talitonu o lo tatou Faaola o le faataitaiga ola lea i tagata uma. … O galuega na ia faia, ua poloaiina i tatou e fai. Ua poloaiina i tatou e mulimuli ia te ia, e pei ona ia mulimuli i lona Taitai; o le mea e i ai o ia, tatou te i ai foi; ma o le i ai faatasi ma ia, tatou te faapei ai o ia.¹⁴

O le manatu taua e lē po o le a le umi e mafai ona tatou ola ai, ae o le lelei o lo tatou aoao i lesona o le olaga, ma le faataunuuina o o tatou tiute ma valaauga i le Atua ma le tasi i le isi. O se tasi o faamoemoega taua o lo tatou i ai iinei, ina ia mafai ai ona tatou ola ai i foliga ma uiga o Ia o lē sa soifua i le tino e aunoa ma se ila—e paia, mama, ma le lē pona! Na afio mai Iesu e le gata ina togiola mo agasala a le lalolagi, ae ia faia se faataitaiga i luma o tagata uma ma faatuina faatulagaga o le atoatoa o le Atua, o tulafono a le Atua, ma le usiusitai i le Tama.¹⁵

E leai se mataupu faavae sa sili lona atoatoa e faapei o Keriso. … Sa ia faaalia mai ia te i tatou le ala mo le faaolataga, mai le amataga, ma fesouaiga uma o lenei olaga seia oo atu i le faaeaga e le uma ma le mamalu i lona afioaga, ma le olaga fou o loo i ai. …

Amuia le tagata, o le a ia maua lenei molimau faamalie loto, ma malolo ai, ma lē saili ai i se isi lava auala i le filemu vagana ai mataupu faavae a Iesu Keriso. O lana talalelei ua aoao mai ia i tatou e alolofa i tagata, ia faia i isi e faapei ona tatou faia ia i tatou lava, ia faamaoni, alofa tunoa, ia loto faamagalo, ma ia faia mea uma lava ua fuafuaina e atinaeina ai le agaga o le tagata. …

… “O mai ia te au, o outou uma o e tigaina ma mafatia i avega, o au foi e malolo ai outou,” [Mataio 11:28] o lana valaau lea i atalii ma afafine uma o tagata.¹⁶

O Keriso o le faataitaiga sili mo tagata uma, ou te talitonu o tagata sa muai faauuina ina ia avea faapei o ia, e pei ona muai faauuina ai o ia e avea o le Togiola i le tagata. … O i tatou. … ua foliga i le Atua, i le faaletino, ma atonu e avea faapei o ia i le faaleagaga, ma faapei o ia i le maua o le poto, malamalama, atamai ma le mana.

O le faamoemoega sili o lo tatou o mai i le lalolagi ina ia avea i tatou e faapei o Keriso, aua afai ua le faapei i tatou o ia, e le mafai ona avea i tatou ma atalii o le Atua, ma avea o ni suli faatasi ma Keriso.¹⁷

Tatou mulimuli i le Alo o le Atua. Ia fai o ia ma faataitaiga mo i tatou, ma o tatou taiala. Faataitai ia te ia. Fai lana galuega. Ia avea faapei o ia, i le mea e mafai ai e lo tatou malosi e avea ai faapei o ia o lē na atoatoa ma leai se agasala.¹⁸

E na o Iesu Keriso e i ai lo tatou faamoemoe i le ola e faavavau faatasi ai ma lo tatou usiusitai i Lana Talalelei.

E leai lava se isi igoa, i lalo o le lagi, ua tuuina mai, ae na o Iesu Keriso, e faaolaina ai outou pe faaeaina ai i le malo o le Atua.¹⁹

O le tagata ua faamanuiaina i lenei olaga faataitai, ma e faamaoni, ua togiola mai le agasala e ala i le toto o Keriso, e ala i sauniga o le talalelei, ma maua ai le faaeaga i le malo o le Atua, ua lē itiiti ifo ae ua sili ae nai lo agelu.²⁰

Ua tatou ulu atu i noataga o lena feagaiga fou ma le faavavau ma ua tatou malilie ai e usiusitai i poloaiga a le Atua i mea uma lava poo le a lava ua ia poloaiina ai i tatou. O le fegaiga e faavavau lenei e oo lava i le iuga o o tatou aso. … Tatou te le vaai lava i le aso i le taimi nei poo le faavavau, pe afai e tatau ai, ma pe afai e lē o se mea e fiafia ai ma so tatou tiute, i le avea ai ma ana fanau, le usiusitai i poloaiga uma a le Alii i augatupulaga lē mavae o le faavavau. O luga o lenei mataupu tatou te fesootai ai pea ma le Atua, ma tumau ai faatasi ma lona faamoemoega. Ua na o le pau lenei o le auala tatou te faataunuuina ai la tatou misiona, ma maua ai lo tatou pale ma le meaalofa o le ola e faavavau, o le meaalofa sili lea a le Atua. Mata e mafai ona e manatu i se isi lava auala?²¹

E leai se faaolataga ua na o le ala ua faasino mai e le Atua. E leai se faamoemoe o le ola e faavavau e na o le usiusitai i le tulafono ua saunia e le Tama o le ola, “e le o ia te ia se mea faaletumau, poo sina liliu itiiti” [Iakopo 1:17]; ma e leai lava se isi auala e mafai ai ona tatou maua lena malamalama ma le faaeaga. O na mea ua leai se popole i ai o lo’u mafaufau; ou te iloa le moni o i latou.²²

O faamanuiaga uma, avanoa, mamalu, poo le faaeaga e maua mai i le usiusitai i le tulafono lea e autu ai. Afai tatou te tausi i le tulafono, o le a tatou maua le taui; ae tatou te le maua mai se isi auala.²³

E oo ia Keriso lava ia e lei atoatoa mai le amataga; e lei maua e ia le atoatoaga muamua, ae na maua e ia lea amioga mama ma lea amioga mama, ma faaauau ai pea ona maua e ia lea ma lea seia maua e ia le atoatoaga [MFF 93:11–13]. E le faapea ea lenei mo le fanau a tagata? E i ai se tagata e atoatoa? E i ai se tasi ua ia maua le atoatoaga i le taimi e tasi? Ua tatou oo ea i le taimi e ao ai ona tatou maua ai le atoatoaga o le Atua, o lona mamalu, ma lona malamalama? Leai; ae peitai, afai o Iesu, le Alo o le Atua, ma le Tama o le lagi ma le lalolagi o loo tatou ola ai, sa lei maua le atoatoaga i le amataga, ae na tupu le faatuatua, poto, malamalama ma le amio mama seia maua e ia le atoatoa, e le mafai ea e tagata uma ua fananau mai tina ona latou maua sia mea itiiti ma sia mea itiiti, o lea fuaiupu ma lea fuaiupu, upu i le upu, seia oo ina latou maua le atoatoaga, e pei ona ia maua le atoatoaga, ma faaeaina ma ia i le afioaga o le Tama?²⁴

O loo ou ola mo lo’u lava faaolataga i le taimi nei ma le faavavau; sosoo ai ma la’u fanau ma lo latou tina faapelepele ma le taua. E leai se mea e mafai ona ou faia i le lalolagi e saogalemu ai lenei faaiuga matagofie ua ta’ua o le ositaulaga. O se galuega o le alofa, o se faamoemoega mo le ola e faavavau ma le atoatoaga o le olioli. “O lē maua le ola e faavavau ua mauoa o ia.” [MFF 6:7.]²⁵

Fautuaga mo Suesuega

O ai le tusitala po o le pule o le ata o le faaolataga? E faapefea ona fesoasoani lenei malamalama ia i tatou i lo tatou olaga faaletino?
O a faamoemoega o lo tatou olaga iinei i le lalolagi? E faapefea ona faatino e lou olaga lena malamalama?
Aisea e faaali mai ai e le Alii le ata lava lea o le faaolataga i tisipenisione uma? E faapefea ona galue le ata o le talalelei mo lo tatou faaolataga “i lenei olaga, ma faapea foi i le olaga a sau”?
Aisea ua alagatatau ai ia i tatou taitoatasi ona maua se tino? (Tagai foi i le MFF 93:33–34.) E faapefea ona tatou faaaoga o tatou tino e faataunuu ai le finagalo o le Atua?
O a ni auala ua avea ai le Faaola ma o tatou “faataitaiga sili” O le a la tatou mea e fai ina ia ogatasi ma “foliga ma uiga” o Keriso ma mulimuli ane avea faapei o ia?
Aisea e tatau ai ona tausia poloaiga a le Atua i le taimi nei ma le faavavau? E faapefea i le usiusitai i le Alii ona avea ma “mea fiafia ma se tiute”?
O le a le uiga ia te oe o le maua o le “amioga mama ma le amioga mama”? (tagai foi i le MFF 93:12.) O a ni auala ua tatou tuputupu ai e faapei o Keriso “o sia mea itiiti ma sia mea itiiti, fuaiupu i le fuaiupu, upu i le upu”?
Aisea o le ositaulaga o se mea noa pe afai e faia mo lo tatou lava faaolataga poo le faaolataga o isi?