Alofa Moni I o Tatou Loto

E ao ona tatou alolofa ma tausi i latou o e manaomia le fesoasoani ma ia faatumulia [i tatou] i le agalelei ma le alofa i tagata uma.

Mai le Soifuaga o Iosefa F. Samita

Sa faatauanau atu Peresitene Iosefa F. Samita i tagata o le Au Paia ina ia alolofa i o latou tuaoi ma tagai totoa i mea o loo manaomia e isi—faaletino ma le faaleagaga— i le agalelei ma le alofa mama moni. “O le taimi e aoao ai e le tagata o le Au Paia ona tiute, o le a ia iloa ai o lana matafaioi… le faatumulia i le agaga o le agalelei, alofa, agalelei, ma le loto faamagalo,” sa ia aoao mai ai.¹

O ia foi sa maua ni fesoasoaniga sili, e pei ona faamaonia mai i lana asiasiga i Hawaii a o avea ma Peresitene o le Ekalesia, faatasi ma le Epikopo o Charles W. Nibley. Sa mulimuli ane faamatala mai e Epikopo Nibley lenei mataupu:

“Ina ua matou tulaueleele i le uafu i Honolulu, sa lolofi ane tagatanuu o le Au Paia e toatele ma a latou faasolo fugalaau, o fugalaau matagofie o ituaiga eseese ma le felanulanuai. Sa faaulaina ai i matou, aemaise lava o ia, sa sili atu nai lo se isi lava. O le faaili lauiloa a Hawaii sa tata ai i le feiloaiga. … Ose vaaiga matagofie le vaaia o le loloto o le alofa, e oo lava i le maligi o loimata o le lagona alofa o nei tagata mo ia. I le taulotoaiga o nei mea uma sa ou vaaia ai se tina matua, tauaso, mativa, o tau setusetu mai ona ua ivasefulu tausaga lona matua, o taitai mai i totonu. Sa ia te ia ni nai fa’i i lona lima. Na o le pau ia o mea sa ia maua— o lana taulaga. Sa ia valaau mai, ‘Iosepa, Iosepa,’ I le taimi lava lena, ina ua iloa atu o ia [e le perofeta], sa ia momoe atu ma opo mai o ia i ona aao, fusi atu ia te ia, ma sogi atu pea lava pea ia te ia, popo i lona ulu ma faapea atu, ‘Mama, Mama, oi la’u Mama matua pele.’

“Ma loimata ua tafe ifo i lalo o ona alafau sa ia liliu mai ia te au ma faapea mai, ‘Charlie, sa ia tausi ia te au a’o o’u tama, i lo’u ma’i ma sa leai se tasi na ia tausi ia te au. Sa ia aveina a’u ma sa avea o ia ma tina ia te a’u.’

“Ioe, e faamomoi loto. … o se mea matagofie le vaai atu i le manatuaina ma le alofa, e lenei tagata aloa’ia, o le alofa ma le agalelei na tuuina atu ia te ia, i le silia ma le limasefulu tausaga talu ai; ma le tagata mativa matua ua tuuina mai lana foai alofa— o ni nai fai—o mea uma ia sa ia te ia—e tuuina atu i aao o lana pele o Iosepa!”²

Aoaoga a Iosefa F. Samita

Ia agalelei atu i e matitiva ma lē tagolima.

O le poloaiga sili, e pei ona aoao mai e lo tatou Alii ma le Matai, o le alofa i le Atua ma o tatou loto atoa, o tatou manatu atoa, ma lo tatou malosi atoa; e faapena foi i lona lua: ia e alofa atu i le lua te tuaoi e faapei o oe lava ia te oe. “O na poloaiga ua autu ai tulafono uma ma le au perofeta.” [tagai Mataio 22:37–40.] O lea, ia tatou alolofa moni ma loto faamagalo, ia alofa ma alofa mutimutivale le tasi i le isi; ma taumafai ma le malosi e fesoasoani ia i latou ua mafatia, ina ia lē alu a’e ai le leo o le tina ua leai sana tane i le Atua e faitinoina ai tagata ona o le leai o ni meaai, poo lavalava, poo fale. Ia leai se tamaitiiti matuaoti e leai sona fale po o sona aiga i nei tagata, pe leai foi ni meaai poo lavalava, poo le avanoa e faaalualu ai i luma lona mafaufau. Ia taitaiina e le alofa moni a outou gaoioiga ma ia mau ai i o outou loto, e musuia ai outou e tausi i e matitiva ma e mamai, faamafanafana i latou o i le falepuipui, pe a manaomia le faamafanafanaga, ma faamalolo ia i latou o mamai; aua o lē na te tuuina atu se ipuvai malulu i se perofeta i le suafa o se perofeta o le a ia maua le taui mai le perofeta.

O i latou e faia nei mea i e matitiva i le mea tatou te i ai, o le a faapea atu ia i latou i se aso: “Aua na ou fiaai, ona outou aveane ai lea o ni mea ou te ai ai; sa ou fia inu, ona outou aveane ai lea o ni vai ou te inu ai. Sa fai au ma tagata ese, ona outou talia lea o au; na ou le lavalava, ona outou faaofuina lea o au; sa ou mai, ona outou asiasi mai lea ia te au; na ou i le falepuipui, ona outou o ane ai lea ia te au.” Ae o le a tatou lē faapea atu; “Le Alii e, na matou iloa anafea oe ua e fiaai,” aua o i latou uma ua i ai le poto ua latou iloa afai ua ia galue mo le tagata mativa agavaa, ua ta’uaogaina e faapea ua faia mo Ia o le Tama o o latou agaga. [tagai Mataio 25:31–45.]³

O a tatou fanau e ao ona aoaoina ina ia faaaloalo e le gata i o latou tama ma o latou tina, ma o latou uso ma tuafafine, ae ao foi ona aoaoina i latou ina ia faaaloalo i tagata uma, aemaise lava le aoaoina ma tausia ina ia faaaloalo i tagata matutua ma e ua vaivai, o ē lē tagolima ma matitiva, o tagata o manaomia le fesoasoani, ma e ua lē alofagia e tagata.⁴

E masani ona tatou mafai ona tuuina atu se mea mo e matitiva, ma lē tuliesea se tasi ua manaomia se meaai. Ou te talitonu o le lagona lautele lenei ma le amio e masani ai tagata o le Au Paia. Ou te manatu o tagata Mamona uma e agalelei ma alolofa atu i e matitiva ma le tagolima, ma e leai se tagata o le Au Paia o loo lagona mai lo’u leo poo fea lava, na te lē tufatufa atu lana vaega i ona uso a tagata pe afai ua manaomia. …

Na ou vaaia tagata na o ese atu mai lo’u faitotoa ma ni falaoa lelei ma ni pata i o latou lima (ua lelei lea mo soo se tupu e taumafa ai, aua o o’u matua sa faia ni falaoa lelei ma ni pata lelei, sa ou ‘ai ai ma e matua lelei lava) ae ina ua te’a ese atu ia tagata ma le faitotoa sa latou fetogi i luga o le auala. E lē o meaai sa latou mananao i ai. Sa latou mananao i ni tupe. Mo le a? Ina ia latou o atu ai i se nofoaga o taaloga faitupe poo se falepia. Ioe, ua ia te i latou lava le puleaina o lena mea. Ua na ona mafai ona tatou faamasinoina i uiga ma le musumusuga a le agaga lelei o loo ia i tatou; ma e sili atu le tuuina atu i se taseni ua lē agavaa nai lo le tuliesea o se tagata agavaa e toatasi.⁵

O le alofa moni, poo le alofa, o se mataupu silisili o loo i ai. Afai tatou te tuuina atu se lima fesoasoani i le o loo mafatia, afai tatou te fesoasoani ia i latou ua feagai ma le faanoanoa, afai tatou te siitia ma faaleleia le soifuaga o tagata, o la tatou misiona le faataunuu, o se vaega taua o lo tatou talitonuga le faia o lea.⁶

Alofa i lou tuaoi e faapei o oe lava ia te oe.

O se mea e faatusalia ona faigofie i se tagata ona faapea mai ua ia talitonu i le Atua ma le togiola o le toto o Iesu Keriso, ua ia talitonu i le salamo mai agasala, i le papatisoga mo le faamagaloga o agasala, ma le faaee atu o lima mo le meaalofa a le Agaga Paia. E foliga mai e faigofie i se tagata ona alualu i luma e pei o lenei. Ae a oo mai i le alofa atu i le lua te tuaoi e faapei o oe lava ia te oe, e lē faigofie. O i ua tatou oo mai ai i se mauga e faigata ona aea, tatou te faaaoga ai lo tatou malosi uma e manaomia ina ia oo ai i le tumutumu; ae ui ina atonu sa tatou fe’a’ei i le tele o tausaga o o tatou olaga, ou te faapea atu sa tatou ala a’e i le taeao nei ma iloa ai o loo tatou a’ea’e pea lava i lalo o auvae mauga, tatou te le’i iloa atu lava le tumutumu. Aua e toaitiiti alii, poo tamaitai, e oo lava i le Ekalesia a Iesu Keriso o le Au Paia o Aso e Gata Ai, e mafai ona faapea mai ma le faamaoni, “Ou te alofa i lo’u tuaoi faapei ona ou alofa ia te au lava.”

E le o se tulafono lo tatou alolofa atu i o tatou tuaoi e faapei ona tatou alolofa ia i tatou lava. [Ose tasi] na faapea mai, “I fanau tama uma lava a lo’u tina, e sili lo’u alofa ia te au lava.” E faapena foi i fanau a le Atua i lenei lalolagi. E ui ina e toatele fanau a lo tatou Tama, e tasi lo tatou toto, o i tatou foi o ni tagata o se nuu se tasi, o se faatuatuaga e tasi ua talitonu i le Atua e tasi ma le Alii o Iesu Keriso e tasi, ae o i tatou taitoatasi ua sili le alofa o le tagata ia te ia lava. O lenei lagona e oo mai i o tatou olaga i aso uma, i a tatou mafutaga i itula uma ma isi. E masani foi ona oo soo mai e oo lava i le va o le tane ma le ava; e masani ai i le va o le tama ma le fanau, aemaise ai lava i le va o le fanau lava latou. O se faa-Kerisiano ea lenei? O se mataupu faavae ea lenei a Iesu Keriso? E le tusa ai ma lo’u faitau ai i tusi ma malamalama ai i mataupu o le olaga ma le faaolataga. Ua aoao mai tusitusiga paia ia i tatou ia ava le tasi i le isi i le alofa; ia faamatuu atu i mea ua faamalieina ai o tatou lava loto, o mea e fetaui mo i tatou, o o tatou lava manaoga, poo lo tatou fiafia i manaoga, o mea e faamalieina ma fiafia i ai o tatou tuaoi;—e faaopoopo i o tatou aiga ma fanau.⁷

E faapefea ona tatou alolofa i o tatou tuaoi e faapei ona tatou alolofa ia i tatou lava. O se mea ua sili ona faigofie i le lalolagi; ae o le toatele o tagata ua manatu faapito na o i latou lava, ma ua leai se lagona alofa e aapa atu ma mafaufau ai i le manuia mo o latou tuaoi; ma ua latou faatapulaaina o latou lava manuia faapitoa ma faamanuiaga mo na o i latou, ma faapea mai ai: “E tausia e lo’u tuaoi ia lava.” E lē o le agaga lena e tatau ona maua e se tagata o le Au Paia.⁸

Afai ua tatou manatu ua tatou iloa atu ni faaletonu, vaivaiga poo mea sese, pe moni pe na o ni mafaufauga, i o tatou uso ma tuafafine, nai lo lē luai atu ma faasalalau ia tatou uo ma tuaoi, poo fea lava tatou te feiloai ai, afai tatou te faaaoga le atoatoa o le alofa moni, ma le fefaauoai,… e ao ona tatou o atu ia tatou uo o e ua tatou le fiafia i ai, poo e ua tatou talitonu ua i ai ni faaletonu po o ni vaivaiga, ma ta’u atu ia i latou o tatou lagona ma mea ua tatou manatu i ai, ma ia faia i le agaga o le fesoasoani ia i latou ina ia foia o latou vaivaiga, ma o le a maua ai e i tatou lava, faapena foi ma i latou o mea lelei. Tatou te lē o atu ia i latou i le agaga o le faamisa ma le faitio, ma faatiga ai i o latou lagona ma faatumulia ai o latou loto i le ita.⁹

Ou te fautua atu ia tatou aoao e alofa le tasi i le isi, ona maua ai lea o se faauoga moni ma le suamalie. Sa faapea mai se tasi, “atonu tatou te foai atu e aunoa ma le alofa, ae le mafai ona tatou alofa e aunoa ma le foai atu.” Tatou te mananao ina ia alofa le tasi i le isi, ma faapei ona fetalai atu le Alii ia Peteru, e ao ona tatou fafaga i ana mamoe [tagai Ioane 21:15–17], ia faamalosi le tasi i le isi. E ao ona tatou sapasapaia ma siitia e le tasi le isi, ae lē o le tau faaleaga, poo le toso i lalo, poo le taofi mau ai i vaivaiga o o tatou tuaoi poo uso, poo faaletonu ua tatou iloa i uso a tagata, ae o lea afai tatou te iloa se mea lelei ia tatou faateleina lena, ma, a mafai ai, ia faasusulu atu i le afi mumu e maua ai le malamalama ma le ola, le malosi ma le faamalosiau ia i latou uma ua vaai atu i ai, aemaise lava i latou ua sese ma pogisa, ina ia aumaia i latou i le malamalama.¹⁰

Ua aoao mai e la’u lotu ia te au ia ou alofa i tagata uma. E ui lava ina ou le fiafia ia latou amioga ma faanoanoa i lo latou amioleaga ma le pogisa o manatu, ae peitai o i latou ua fausia i le faatusa ma foliga o lo’u Tama ma le Atua— o i latou o o’u uso ma tuafafine. E manaomia a’u ou te alofa i o’u tuaoi e pei o au lava. Atonu ou te lei oo ae i lena tulaga maualuga o le atoatoa; atonu o loo taamilo i totonu ia te au le manatu faapito e faasilia a’u i luga atu o lo’u tuaoi; ae ou te faamoemoe e faia le mea sao i o’u uso a tagata, aua e manaomia e le talalelei.¹¹

Sa pagatia le Atua i lenei tisipenisione e faailoa mai ia i tatou le atoaga o le Talalelei, e aoao ai i tagata lenei mataupu o le ositaulaga o le tagata lava ia mo le lelei o isi, ma aoao mai ai i tatou ua tatou faia mea lelei mo i tatou lava pe afai tatou te faia mea lelei mo isi tagata. … E toatele tagata i le lalolagi ua noanoatia ia i latou lava, ma ua mata’ū’ū i o latou loto, ma ua latou lē naunau ai e tauivi mo nisi ae ua na o i latou lava. … O le tiute o le tagata soifua, e pei ona ou malamalama ai, e ala i le Talalelei paia ua tatou maua, o le puipui lea i tagata amiotonu, o le amio mama, o le mamalu ma aia tatau a alii ma tamaitai uma ma le faaeteete e faapei ona tatou puipui ia i tatou lava.¹²

Ua saunia e le Atua auala i Lana ekalesia mo le tausia o i latou ua manaomia le fesoasoani.

Ua saunia e le Atua auala i lana Ekalesia, i lona faatulagaga atoatoa, ina ia mafai ai e tagata faatuatua uma o loo i ai ona vaavaaia ma faafailele ma tausia i le taimi e manaomia ai.¹³

Ua poloaiina e le Atua ona tagata ina ia manatua e matitiva, ma foai atu mea e lagolagoina ai i latou. … Tatou te le talitonu i le alofa moni o se pisinisi; ae ua tatou faalagolago i le alofa o le tasi i le isi. Ao manaomia e le feau a le talalelei le faatuatua ma le salamo, e manaomia foi le tatau ona faamalieina mea e manaomia mo le ola faaletino. O lea ua faaalia ai e le Alii fuafuaga mo le faaolataga o le soifuaga faaletino o tagata.

Mo le manuia o e ua matitiva ua tatou faatulaga ai le anapogi, ma se tasi o ona faamoemoega e taitaiina ai e faapea e tausia ai e matitiva i taumafa ma isi mea e manaomia seia mafai ona latou tausia e i latou lava. Aua ua manino o fuafuaga ua manatu e na ona faamama avega ai i le tulaga faaletonu o loo i ai i le taimi nei, e lē lava. E sailia pea lava pea e le Ekalesia ina ia tuu ona tagata i se ala e fesoasoani ai latou ia i latou lava, nai lo le aumaia o metotia a le anoanoai o faalapotopotoga agaalofa e maua ai na o mea o loo manaomia i le taimi nei. Pe a faamuta lea fesoasoani pe uma foi ona faaaogaina, e ao foi ona toe tele nisi mea e saunia mai i ia lava punavai, ma o le a na o le faalagolago ai o e matitiva i isi tagata, ma aoao atu ai ia te i latou mataupu sese o le faalagolago i isi mo le fesoasoani, nai lo le faalagolago ia te i latou lava. … O le mea lea, o lo tatou faamoemoega o le alofa moni, o le faamama avega lea i mea o loo manaomia i le taimi nei, ona aoao ai lea o tagata matitiva e fesoasoani ia i latou lava ina ia mafai ai foi e i latou ona fesoasoani atu i isi. O le matafaioi o le faasoasoaina o tupe ua tuu atu lea i tagata atamamai, o le tulaga masani o epikopo o le Ekalesia, o lo latou tiute o le tausia lea o e matitiva.

Ua tatou tuuina atu le fuafuaga o le aso anapogi a le Alii i ekalesia o le lalolagi o se auala atamai ma le fuafua lelei e tausia ai e matitiva. … O se mataupu faigofie lenei mo tagata e tausia lenei faatulagaga o le le tagofia o taumafa ma vai mo le aso e tasi i le masina, ma faapaiaina mea sa fuafua e faaaogaina mo lena aso mo e matitiva, ina ia faamalieina ai o latou manao. Ua faatulagaina e le Alii lenei tulafono; e faigofie ma atoatoa, e faavae i luga o mafuaaga ma le poto, ma e le gata ua faamaonia ai o se fofo i le fesili o le tausia o e matitiva, ae o le a tauia lelei ai i latou ua tausia le tulafono. O le a… tuuina atu ai le tino i le agaga, ma siitia ai le fesootaiga ma le Agaga Paia, ma mautinoa ai le malosi faaleagaga ma le mana o loo manaomia tele e tagata o le atunuu. Ona o le anapogi e tatau ona o faatasi ma le tatalo, o lenei tulafono o le a ia aumaia ai tagata e faalatalata i le Atua, ma faaliliu atu o latou mafaufau e le itiiti ifo i le faatasi i le masina; mai le vevesi vale i mea faalelalolagi ma mafai ai ona aumaia i latou e fesootai sa’o ma le ekalesia o gaoioiga, mama ma le le pona—e asiasi atu i le ua leai se tamā ma le tina ua oti lana tane, ma tausia i latou i le mama mai agasala o le lalolagi [tagai Iakopo 1:27].¹⁴

Ua faaamonia o le anapogi tonu, o le anapogi lea e i ai ma le agaga moni o le alofa i le Atua ma le tagata; ma o le faamoemoega o le anapogi o le puipuia o le mama atoatoa o le loto ma le faigofie o mea e faamoemoe i ai—o se anapogi i le Atua i le agaga atoatoa ma le loloto—aua o lea anapogi o le a avea ma fofo mo mea sese uma i le tino ma le mafaufau; o le a tuuese le manatu faapito, o le a i ai le alofa mo o tatou tagata, ma o le a tatou fiafia e fesoasoani i e matitiva ma lē tagolima.¹⁵

O le talalelei na te faia ia tatou lē manatu faapito ai, ma naunautai e ositaulaga o tatou lava manaoga mo le manuia o isi.

Matou te apoapoai atu, matou te faatoga atu i o tatou uso ma tuafafine i le talalelei a Iesu Keriso, e le gata ina ia faamamaluina ai i latou lava e ala i le auala tonu e soifua ai, ae ia faamamalu ma agalelei ma alolofa moni i o outou tuaoi, outou uma lava.¹⁶

Ou te manatu e ao ona tatou ola ai i o tatou talitonuga. E tatau ona tatou tausi i poloaiga a le Atua. E ao ona tatou maua ma fiafia i le agaga o le talalelei i o tatou loto ma ia fua mai fua o le agaga i o tatou olaga; faatuatua, faamoemoe, alofa moni, agalelei, lotomaulalo ma le loto faamagalo i o tatou loto o le tasi mo le isi, ma aveesea, mamao ese lava, le agaga o le taufaaleaga, o le fefinauai, lea e oo atu ai i feeseeseaiga, i le fenumiai ma le fevaevaeai o tagata, ma le agaga o le matau’a. Ia faaatea ese le ita mai ia te outou. O le i ai o le ita i o tatou loto, poo le loto fuā, o le a faamanualia ai i latou ua talia e mau ai nei mea i o latou loto ma tumau ai i o latou manatu e faaafe ona sili atu nai lo le faamanualia ai o isi. O lea e ao ona tatou tuuese nei mea mai o tatou loto, ma o tatou mafaufau. Ia tatou ola i le ola sao, ia alofa le tane i lana ava ma faamaoni ma agalelei ia te ia, ma faamaoni ma agalelei le ava i lana tane, ma ia laua faamaoni ma alofa ma auauna atu i le manuia o a la’ua fanau; ia tuufaatasia i latou e faapei o se iunite o le aiga i le Ekalesia ma a o faatupulaia lena tulaga i fafo atu i tuaoi o Siona, o le a tatou maua le faaeaga o le meleniuma ia i tatou, ma o le a i ai le filemu i le lalolagi ma le agalelei i tagata i mea uma lava.¹⁷

Ua faatulagaina le Talalelei ina ia aveesea mai ai ia i tatou mea uma ua lē talafeagai ai ma le Atua ma le ata o le faaolataga ua ia faaalia i tagata. Ua fuafuaina ina ia agavaa ai i tatou ina ia tatou ola ma maua ai le fiafia i le atoaga o le malamalama i le upumoni, ma malamalama i le faamoemoega o le Atua, ma mafai ai ona ola latalata ia te Ia ina ia tatou ola ai e tusa ma Lona finagalo e le aunoa. O mataupu o le Talalelei ua fuafuaina ina ia tatou maua ai le alofa, e faalauteleina ai o tatou mafaufau, ina ia faateleina ai o tatou naunautaiga mo le lelei, ia aveesea ai le ita, mataua, ma le ita mai o tatou loto, ma ia maua ai e i tatou le filemu, usiusitai, aoaoina, ma le naunau ina ia lafoai o tatou manaoga, ma faatuatuanai mea tatou te fiafia i ai, mo le manuia o o tatou tagata, ma le faaalualuina i luma o le malo o le Atua. O le tagata na te lē lafoai i ona lava manaoga, ua lē faapea ifo i lona loto, ‘Tama, ia faia Lou finagalo, ae lē o lo’u loto,” e lē o se tagata o le Atua ua moni ma atoatoa lona liliu mai; o loo i ai pea o ia, i se tulaga, sese ma tauataata o le pogisa o loo siomia ai le lalolagi, o loo faalafi ai le Atua mai le tagata.¹⁸

Fautuaga mo Suesuega

O a poloaiga sili e lua? (Tagai foi Mataio 22:37–40.) Aisea ua taua tele ai nei poloaiga?
O le a le alofa moni? (tagai foi Moronae 7:45–48.) O a mea tatou te fai ina ia susulu atu ai le alofa moni i mea uma tatou te fai ma tumau ai i o tatou loto? Aisea ua e manatu ai o le “alofa moni e le uma”? (tagai Moronae 7:46)
O le a la tatou matafaioi ia i latou ua le tagolima ma ua manaomia le fesoasoani poo ua “le alofagia e tagata”?
E faapefea ona faateleina lo tatou tomai e faapea atu ai i le faamaoni, “Ou te alofa i lou tuaoi e faapei ona ou alofa ia te au lava”? E faapefea ona tatou foia le faaletonu ua tatou iloa atu i isi? (Tagai foi Luka 6:41–42.) E faapefea ona tatou faalauteleina uiga lelei i isi?
O a faamanuiaga e ala mai le tausia o le aso anapogi i masina ma le foai atu o taulaga anapogi? Filifili ma le agaga tatalo le ala tou te fesoasoani ai i le Ekalesia ma lona tausia o lē ua le tagolima e ala i taumafaiga o le sailia o tagata fou ma ua faaaunuua o le ekalesia, galue i le nuu e aunoa ma se taui, faateleina o le taulaga anapogi, poo le auai i galuega faale-uelefea ma mo le manuia o tagata.
O a “fua o le agaga i o tatou olaga”? (tagai foi Kalatia 5:22–23.) O a faamanuiaga tatou te maua ma maua e isi pe afai tatou te naunau e lafoai o tatou lava manaoga mo le lelei o isi?
E faapefea e le Ekalesia a Iesu Keriso ona “aveesea le ita, mataua, ma le ita mai i o tatou loto” ma fesoasoani ai ina ia tatou alofa moni atu mo isi?