O la Tatou Galuega o le Faaolaina o Agaga

O la tatou galuega sili ona taua o le galulue mo le faaolataga o e o loo soifua ma e ua maliliu.

Mai le Soifuaga o Iosefa F. Samita

I lona soifuaga, sa galue ai Iosefa F. Samita e auauna i le malo o le Atua, “ma le naunautai mo le alualu i luma o le galuega a le Alii.”¹ I se konafesi faapitoa ina ua lagolagoina o ia o le Peresitene o le Ekalesia, sa ia apoapoai atu i le Au Paia: O lo tatou tiute le faataunuuina o le galuega ma le malosi, i le atoatoa o le faamoemoe o le loto e faataunuuina ai, faatasi ai ma le fesoasoani a le Alii, ma e tusa ai ma musumusuga a lona Agaga, e pei ona i ai i le amataga.”²

Sa ia faamalosiauina le Au Paia i uarota ma paranesi o loo tuputupu ae i le lalolagi e auauna ma faamanuia isi i soo se auala e mafai ona latou faia. A o pulefaamalumalu o ia i le misiona i Egelani, o Viliamu Fowler, o se tagata o le ekalesia i Sheffield, sa faaalia e ia ni mea sa ia faia e feasoasoani e faalautele ai le galuega o le Malo o le Atua. Sa tele ni faafitauli ma faigata na faafeagai ma Brother Fowler i le taimi na ia auai i le Ekalesia, sa ia fatuina se pese e faaalia ai lona faatuatua i le talalelei ma lana faafetai mo mea sa ia maua. Sa auai Peresitene Iosefa F. Samita i le sauniga sa lagiina ai lenei pese mo le taimi muamua. Sa amata le pese i ni upu ua lauiloa i le Au Paia o Aso e Gata Ai i le lalolagi atoa: “Ia Viia Oe le Atua, mo le perofeta” (Viiga, numera 10).

Sa talisapaia e Peresitene Iosefa F. Samita le feasoasoani mai o tagata taitoatasi faatuatua o le Au Paia i le galuega a le Alii ma sa ia manao ai e faaaogaina lona lava soifua e auauna ai i tagata uma lava, o e o loo soifua ma e foi ua maliliu. Sa ia fiafia tele e galue i totonu o le malumalusa, sa ia auauna ai e avea ma tagata e faamaumauina lipoti o le malumalusa; sa ia vaavaaia le galuega i le malumalu i le Fale e faia ai Faaeega Paia; ma sa mulimuli ane avea o ia ma Peresitene i le Malumalusa i Sate Leki. O le Sosaiete o Gafa o Iuta, sa faatuina i le tausaga e 1894, sa matua lelei lava i lalo o lana taitaiga. O le soifuaga o Iosefa F. Samita o se misiona mo le manuia ma le faaolataga o tagata uma, o se misiona sa ia faafetaia ai le Au Paia: “E leai se mea e sili atu ma matagofie i lenei lalolagi nai lo le galue ai mo le faaolataga o e o loo soifua ma le faaolaina mai o e ua maliliu.”³

Aoaoga a Iosefa F. Samita

Ua tatou i ai i lenei lalolagi e faia le galuega a le Atua.

O ia na auina mai lona Alo pele e Toatasi i le lalolagi e faataunuuina ai le misiona sa ia faia, sa auina atu foi ia agaga uma ua oo atu i ai lo’u leo, ioe o alii ma tamaitai uma i le lalolagi, e faataunuuina se misiona, ma o lena misiona e le mafai ona faataunuuina i le musua, poo le le popole, pe faataunuuina foi i le valea. E ao ona tatou aoao i o tatou tiute; aoao i mea ua finagalo i ai le Alii e tatau ona tatou faataunuu, ma malamalama i matafaioi ua ia tuuina mai i o tatou luga. E ao ona tatou aoao i o tatou matafaioi mo le Atua ma le tasi i le isi, ma o loo tatou i ai foi i le faamoemoe mo Siona, ua toefuataiina mai i le lalolagi i aso e gata ai.⁴

E ao ona tatou manatua ua tatou i ai i le galuega a le Atua— ma afai ou te faapea atu o le galuega a le Atua, o lona uiga ua tatou i ai i le galuega ua faatuina e le Silisiliese i le lalolagi mo lo tatou faaolataga taitoatasi. E ao i tagata taitoatasi ona galulue mo lona lava lelei atoa ai ma le mafai e oo i ai mo le manuia o isi. E leai se mea faapea i le saienisi o le soifuaga e ta’ua o le galue o le tagata lava ia mo na o ia lava. Tatou te le o faamoemoe e nonofo taitoatasi i le taimi nei ma le faavavau. O tagata taitoatasi o se iunite i le aiga o le faatuatua, ma o iunite taitoatasi e ao ona lagona lana vaega o le matafaioi e aafia ai le mea atoa. E ao i tagata taitoatasi ona atamai i le faataunuuina o ona tiute. I le faia o lenei mea, ma le tausia o ia lava ina ia mama ma lē eleelea mai le lalolagi, ua ia fesoasoani ai i isi e tausia i latou lava i le mama ma le lē pona.⁵

[O le talalelei a Keriso] o le talitonuga e ola, e mo aso uma, ma itula uma. E manaomia ai i tatou ina ia faia le mea tonu i le aso, i le itula lenei, i le vaiaso lenei, i le masina lenei ma le tausaga lenei; ma faapena ai mai lea tausaga i lea tausaga, o le ola ai i lo tatou talitonuga— o le talitonuga ia Iesu Keriso—o le ola amiotonu, o le upumoni, o le alofa tunoa, o le alofa, faamagaloga, agalelei, faatasiga ma le filemu i le lalolagi ma le agaga lelei i tagata ma le lalolagi atoa. O la tatou misiona lenei.⁶

Ua i ai i o tatou luma se taunuuga matagofie; ua tatou auai i se galuega matagofie. E matua tauia lelei lava lo tatou taumafai uma, e aoga i o tatou ola ma mea uma ua tuuina mai e le Alii ia i tatou, ma le faasefulu o afe e sili atu. Ioe, e leai se faatusatusaga, ua i ai mea uma lava, e le ma faatusalia. O mea uma lava o loo i ai ma mea uma lava o le a i ai. O le talalelei o le faaolataga, ma a aunoa ma lea e leai se aoga o mea tatou te maua.⁷

Ua taitoatasi i tatou ma le matafaioi o le faia o mea uma e mafai ona fai ina ia maua ai lo tatou faaolataga.

Tatou galulue i lo tatou faaolataga i le mata’u ma le gatete i luma o lo tatou Tama, ma faamaoni seia oo i le iuga. Ia manatua ua tofia outou i lenei galuega mo le taimi nei ma le faavavau. E leai se toe solomuli, poo le aluese mai ai, seia vagana ua agasala, ona oo mai ai lea o le faasalaga o le soligatulafono. Ae afai ua e fia maua le faaeaga; afai ua e manatu i tama ma tina, uso ma tuafafine, fanau ma uo; afai ua e fia maua le mamalu, poto ma le ola e le uma, e te maua lena i le galuega a le Atua; aua e leai se mea i fafo atu e te maua ai. O lea, ia i ai uma le agaga alofa ma le fiafia e totonugalemu i ai lenei faamoemoe. Ia tuuina atu lou alofa atoa mo lenei faamoemoe, ma ua na o lenei lava. Ia aveesea mea o le lalolagi.⁸

O le talalelei a Iesu Keriso o le mana o le Atua i le faaolataga, ma e matua alagatatau mo alii ma tamaitai uma i le Ekalesia a Keriso ina ia galulue i le amiotonu, ia tausia tulafono a le Atua, ma tausia poloaiga ua ia tuuina mai, ina ia mafai ai ona latou maua le avanoa i le mana o le Atua i le faaolataga i lenei olaga.⁹

Tatou te talitonu ua alagatatau i alii i lenei vaitaimi ona ola ma galue ma fesootai ma le Atua le Tama ma le Alo, ma ia latou iloa i laua, aua o le iloa o i laua o le ola lea e faavavau. Tatou te talitonu ina ia iloa i laua ma fesootai ai ma i laua e taua i lenei vaitaimi ona tatou ola e faapei ona soifua tagata o le Au Paia i taimi anamua, ina ia tatou maua ai faamanuiaga faapei ona latou maua, ma aoaoina ai e uiga ia te ia i lea aso ma lea aso, i lea fuaiupu ma lea fuaiupu, mataupu i le mataupu, o si mea itiiti iinei ma sina mea itiiti iina, seia tatou maua le malamalama o le Tama ma iloa o ia e i tatou lava. E le mafai ona ou iloa mo oe, poo se tasi tagata na te iloa mo au. E le faaali mai e le Agaga o le Alii ia le Talalelei, pe molimau mai ia te oe le Tama, mo a’u. E le mafai ona ou faaolaina oe; e le mafai ona e faaolaina a’u. E le mafai e le tagata ona avea ma faaola i le tulaga lenei mo se isi lava tagata. Ae o le tagata ua i ai le molimau o le Agaga i lona loto ma ua i ai le malamalama i uluai mataupu faavae o le Talalelei, e mafai ona ia folafola atu i se isi, ma o le folafolaina atu atonu e mafai ai e se tasi o agaga ona talia le upumoni ma taitaiina atu e opoina mai mo ia lava. Ae o lona usiusitai i le Talalelei ma ana lava galuega o le amiotonu ua faaolaina ai o ia, ae lē o galuega a le tagata na molimau atu ia te ia. Ua na o le auala lenei e mafai ai ona faaolaina le tagata.¹⁰

E le gata ina e talitonu, ae ao foi ona e usiusitai ma faia mea ua poloaiina ai e le [Atua]. E le gata ina e faia mea na, ae ao foi ona tuuina atu lou loto, lou lagona ma lou agaga atoa ma le manatu naunautai i le Atua. E ao ona tuuina atu lou manao i le finagalo o le Tama, ma ia e faia mea uma ua ia finagalo i ai mai ia te oe, pe afai o le a faasaoina ma faaeaina oe i Lona afioaga.¹¹

E ao ina tatou galulue ina ia faaolaina i tatou lava.

Le Atua e! ia aua nei aveesea a’u lava. E le gafatia e a’u pe a aveesea a’u lava, ua tuuina mai e le Atua ia te au ma ua avea ma o’u tiute i luma o le Alii, ma ē ua faamoemoe mai ia te au mo le taitaiga, mo faatonuga, mo aafiaga e talafeagai ai. Tama, aua nei faatagaina a’u e gata lo’u fiafia ia te au lava, i lo’u taumafai e faasaoina isi tagata. O le alofa moni e amata i le aiga. O le ola e faavavau e ao ona amata i le aiga. O le a ou lagona le faanoanoa i lo’u iloa i le taimi o lumanai, e ala i lo’u faatamala i le aiga, ao ou taumafai e faasaoina isi tagata, ae aveesea ai a’u lava. Ou te le manao i lena mea. E fesoasoani mai le Alii e faasaoina a’u lava, pe afai e fesoasoani le tasi i le isi. Ou te iloa e le mafai ona ou faasaoina se tagata, ae ou te aoao ia i latou le ala e faaolaina ai. Ou te faia se faataitaiga i luma o la’u fanau i le ala e faaolaina ai i latou, ma o lo’u tiute le faia muamua o lena mea. O la’u matafaioi o le faia muamua mo i latou nai lo se isi lava i le lalolagi. Ma, ina ua maea ona faataunuuina ona faia le galuega e ao ona ou faia i le li’o o lo’u lava aiga, ona faalautele atu ai lea o lo’u malosi mo le lelei o isi i le mamao e mafai ona oo i ai.¹²

O la tatou misiona i lenei lalolagi o le faia o le lelei, o le tuuina o le agasala i lalo o o tatou vae, o le faaeaina i le amiotonu, mama, ma le paia i loto o tagata, ma faatuina i mafaufau o a tatou fanau, i luga o mea uma lava, o le alofa mo le Atua ma lana upu, ia avea lena mea ia i latou o se puna o le malamalama, malosi, faatuatua ma le mana, e taitaiina ai i latou mai lo latou laiti seia oo ina matutua, ma avea i latou ma talitonuga maumaututu i le upu a le Alii, i le talalelei toefuataiina ma le Perisitua, ma le faatuina o Siona, e le toe tia’ia i lalo poo le tuuina atu i isi tagata. Afai e i ai se mea ou te manao i ai e sili a’e i se isi mea i lenei lalolagi, o le maua lea e la’u fanau o lenei malamalama ma le faatuatua, ina ia latou le liliuese mai ai.¹³

O le faasaoina o se agaga mai le lalolagi e taua i luma o le Atua e faapei o se agaga ua faasaoina i le aiga. Ae o loo i ai a tatou galuega e faia i le aiga, i o tatou lava faitotoa; ma e le tatau ia i tatou ona faatamala i le galuega ua alagatatau ona faataunuuina i o tatou lava aiga, ma alu atu i le lalolagi e faia galuega ua lē sili atu le taua. Ia faia o tatou tiute i mea uma lava.¹⁴

E ao ona tatou galulue mo le faaolataga o e o loo soifua ma e ua maliliu.

Ia tatou lagolago Keriso, o ona tagata, ma lona faamoemoega mo le amiotonu ma le faaolataga; ia tatou lagolago le tasi i le isi i le sao, ma ia apoapoai atu ma le agalelei le tasi i le isi e faatatau i mea sese, ina ia avea i tatou ma uo ma faaola i le Mauga o Siona, o le tasi i le isi, ina ia tatou fesoasoani ai i e ua vaivai ma faamalosia i latou, faamalosi i e ua lē talitonu ma aumai i le malamalama moni i le auala e tatau ai, ina ia avea i tatou ma mea faigaluega i aao o le Atua ma faaola i tagata. E le faapea o ia i tatou le mana e faaolaina ai tagata. Ua lē ia i tatou; ae ua ia i tatou le mana e faaali atu ai ia i latou le ala e faaolaina ai i latou e ala i le usiusitai i tulafono a le Atua. E mafai ona tatou faaali atu ia i latou le ala e ui ai ina ia mafai ona faaolaina ai, aua ua ia te i tatou le aia tatau e faia ai lena mea, ua ia i tatou le poto ma le malamalama i le auala e faia ai, ma o lo tatou faamanuiaga le aoao atu… e ala i faataitaiga ma faapea foi i mataupu i o tatou tagata poo fea lava le mea ua tatou i ai i le lalolagi.¹⁵

O la tatou misiona o le faaolaina o tagata. Sa tatou galulue… ina ia maua e tagata le malamalama o le talalelei a Iesu Keriso, ia maua e i latou le salamo, usiusitai i le finagalo o le Atua ma lana tulafono. Ua tatou taumafai e faasaoina le tagata mai mea sese, ma fesoasoani ia i latou e fulitua ese mai le tiapolo ma aoao ina ia faia le lelei.¹⁶

O la tatou misiona o le faaolaina, o le faasaoina mai le tiapolo, o le faaeaina o le tagata, o le aumaia o le malamalama ma le upumoni i le lalolagi, ia taofia i luga o tagata o le lalolagi ina ia savavali i le amiotonu i luma o le Atua, ma faamamalu ia te ia i o latou olaga.¹⁷

O le suega… o le atoatoa o o tatou agaga o le… saili o lo tatou agavaa tatou te faamafanafana ma faamalulu ai, o lo tatou tomai e fesoasoani ai i isi, ae lē o lo tatou tomai e fesoasoani ai ia i tatou lava ma solipala isi tagata i lalo i tauiviga o le olaga.¹⁸

E ao ona tatou fuafua e fesoasoani i [isi] ia manumalo—ae lē o le faatoilalo o i latou! O lo tatou faamoemoega o le ola e faavavau—o la tatou sini o le siitia i luga o tagata–ae lē o le faatoilalo ia i latou.¹⁹

O la tatou galuega o le faasaoina o le lalolagi, o le faasaoina o tagata; ina ia aumaia i latou faatasi ma le tulafono a le Atua ma mataupu o le amiotonu ma le faamasinoga ma le upumoni, ina ia faasaoina ai i latou i le malo o lo tatou Atua, ma avea ai, mulimuli ane, ma suli o le Atua ma ua suli faatasi ai ma Iesu Keriso e ala i le usiusitai i sauniga o le talalelei. O la tatou misiona lena.²⁰

O le a lē maea la tatou galuega seia faasaoina i tatou lava, ma seia maea ona faasaoina i latou uma o loo faalagolago mai ia i tatou; aua ua avea i tatou ma faaola i luga o le Mauga o Siona, e faapena foi ma Keriso. Ua valaauina i tatou i lenei misiona. Ua lē atoatoa e ua maliliu e aunoa ma i tatou, e faapena foi i tatou e aunoa ma i latou. O la tatou misiona le faia o galuega mo i latou; e i ai la tatou galuega faapitoa ina ia faasaolotoina mai ai i latou, ona o lo latou le malamalama ma tulaga le talafeagai na latou i ai a o i ai iinei, ua lē saunia ai mo le ola e faavavau; tatou te tatala le faitotoa mo i latou, e ala i le faia o sauniga ua lē mafai ona latou faia mo i latou lava, ma e alagatatau mo le faasalotoina mai o i latou mai le “fale puipui,” ina ia o mai i luma ma ola ai e tusa ai ma le Atua i le agaga, ma faamasinoina e tusa ai ma tagata i le tino.²¹

O galuega mo o tatou tagata ua maliliu, ua tuuina mai ai e le Perofeta o Iosefa ia i tatou e sili atu nai lo poloaiga e masani ai, ua faatonuina ai i tatou ina ia tatou tausi ia i latou o o tatou tagata ma tuaa ua maliliu e aunoa ma se malamalama i le talalelei, e lē tatau ona faagaloina. E ao ona tatou faaavanoa o tatou taimi e faia ai nei sauniga paia ma le mautu o le talalelei ua faaalia e alagatatau mo le fiafia, faaolataga ma le toetutu o i latou sa soifua i lenei lalolagi ae ua latou le aoao i le talalelei ma ua maliliu e aunoa ma so latou malamalama i ai, ma ua latou faatalitali nei ia i tatou, o a latou fanau, o loo soifua mai nei i le taimi e faataunuuina ai nei sauniga, ina ia faia galuega e tatau ai mo le tuu saolotoina mai o i latou mai le falepuipui. E ala i a tatou taumafaiga mo i latou, o le a pauu ese mai ia i latou filifili o noanoataga, ma o le pogisa o loo siosiomia ai i latou o le a matafi ese, ina ia susulu mai le malamalama i o latou luga ma o le a latou faalogo ai i le lalolagi o agaga i le galuega ua faia mo i latou e a latou fanau o loo iinei, ma o le a latou olioli faatasi ma outou ona o lo outou faataunuuina o nei tiute.²²

E leai lava se taimi, o le a le oo mai lava se taimi ia i latou ua umia le Perisitua i le Ekalesia a Iesu Keriso o le Au Paia o Aso e Gata Ai, e mafai ai ona faapea mai alii ia i latou lava, ua lava a latou galuega. Ao faaauau pea le soifuaga, ma o le i ai pea o lo tatou tomai e faia ai le lelei, e galulue ai mo le atinaeina o Siona, ma mo le manuia o le aiga o tagata, e ao ia i tatou, ma le maelega, ona tuuina atu ma le olioli i faatulagaga ua faia mo i tatou e faia ai o tatou tiute, pe itiiti pe tele.²³

Fautuaga mo Suesuega

Aisea e taua ai le iloa o tagata uma lava sa auina mai i le lalolagi “e faataunuuina se misiona”? Aisea ua faigata ai ia i tatou ona faataunuuina la tatou misiona e ala i lo tatou “galulue malosi” mo i tatou lava?
E faapefea ona tatou faia le galuega a le Atua o la tatou galuega? Aisea o le galuega a le Alii e ao ona tuuina atoa atu i ai lo tatou maelega uma”? E faapefea e filifiliga tatou te faia ona faailoa mai ai lo tatou galulue atoatoa i le galuega a le Alii?
O le a se mea tatou te fai i luga atu o le talitonu ma usiusitai ina ia “faasaoina ma faaeaina ai i le afioaga o le [Atua]”? O le a le uiga ia te oe o le tuuina atu o “lou loto, lou lagona ma lou tagata atoa ma le manatu naunautai i le Atua”? Pe a maea a tatou taumafaiga uma, e faapefea ona tatou maua le faaolataga? (Tagai foi 2 Nifae 25:23.)
O a mea tatou te saili i ai ina ia faatupuina ai i manatu o tagata o o tatou aiga “e sili atu nai lo isi mea uma”?
E faapefea ona tatou taumafai e faasaoina i tatou lava ma faataunuuina isi a tatou auaunaga ma matafaioi? E faapefea i la tatou auaunaga i isi i le Ekalesia ma isi nofoaga ona avea o se faamanuiaga i o tatou aiga?
E faapefea ona tatou saili e “faaeaina tagata soifua”? O le a se mea tatou te fai e fesoasoani ai i isi ina ia faamaoni i tulafono a le Atua?
O le a se mea tatou te fai e aveesea mai ai “filifili o noanoataga” mai ia i latou ua maliliu e aunoa ma se malamalama i le talalelei? O le a se lagona e oo mai ia te oe pe a e iloa o tagata o loo e fesoasoani i ai ua “olioli faatasi ma oe ona o lou faataunuuina o ou tiute”?
Aisea o le “suega… o le tele o o tatou loto” ua maua mai “lo tatou tomai e fesoasoani ai i isi”? Aisea ua e manatu ai o le mea tonu lea? E faapefea ma o anafea sa e ositaulaga ai mo le lelei o isi? O le a sou lagona ina ua e faia lenei mea?