O le Faatasia e Faavavau o le Tane ma le Ava

O le alii ma le tamaitai ua faamauina mo le faavavau e le pule o le perisitua paia e mafai, e ala i lo la’ua faatuatua, ona maua le faaeaga i le malo selesitila o le Atua.

Mai le Soifuaga o Iosefa F. Samita

Ao galue o se fesoasoani mo Peresitene Ioane Teila, sa malaga Iosefa F. Samita i Hawaii ma lona faletua o Iuliana, o le ua ia ta’ua o se “sila faamaoni, e tumau e faapei o le fetu i matu, e faatuatua e faapei o le taimi ma e sili atu nai lo le auro.”¹ I Hawaii sa gasegase tigaina ai Peresitene Samita i se ma’i faigata ma e sa tausia e Iuliana seia toe malosi o ia. I ni nai masina mulimuli ane, ia Mati 1887, ua alagatatau ai ia Iuliana ma lana fanau ona toe foi atu i Amerika ae nofo ai Iosefa F. Samita i le atumotu.

Ia Mati 15 sa ia faamauina ai i lana tusi o lona soifuaga: “Na sisi taula o le vaa i le 12 i le aoauli ma i le ta tonu o le 12:15 sa amata ai ona malaga ese atu o ia mai le uafu; ma e sa ou toe vaai mulimuli i le mou malie atu o la’u pele ma la’u fanau pele seia toe faatagaina e le Atua i lona alofa tunoa matou te toe feiloai. Ina ua mou atu le vaa, sa ou faataalise atu [i se tasi tulaga e sili ona iloa lelei atu ai] … e toe vaai atu ai i le saosaoa o le vaa o le Ausetalia ma ana oa sili ona taua ma le paia seia mou atu ai i tua atu o le Ulu Taimane (Diamond Head). Ina ua ou nofo na o au, sa tagitui lo’u agaga i loimata ma sa ou tagi seia oo ina matūtū puna o loimata, ma sa ou lagona le faanoanoa tele ona o le motusia o le mafutaga ma le oloa sili ona taua i lo’u fatu i le lalolagi.”²

E ui i le tiga o lenei mafutaga motusia, ae sa silafia e Peresitene Samita le mana ma le folafolaga o mataupu e faavavau ua faaalia mai i le lalolagi e le Perofeta o Iosefa Samita: “O le a lea? O le tuufaatasia o le tane ma le ava mo le taimi nei ma le ola e faavavau. … O ai na te malamalama i le tiute o loo i ai i le tuufaatasia o le tane ma le ava, seia faaalia e Iosefa Samita i lona tulaga faigofie sa ia faaalia ai i le lalolagi?… Sa ia tatala i o’u mata. A i ai se mea i le lalolagi e avea ai a’u ma se tagata sili ona lelei, poo se tane ua sili ona lelei, … o le mataupu lena ua faaalia mai e le Alii, ua faailoa mai ai le tuutuuga o loo ou i ai.³

Aoaoga a Iosefa F. Samita

Ua faatulaga e le Atua le faaipoipoga mo lo tatou mamalu ma le faaeaga e faavavau.

Sa faatulagaina e le Atua le faaipoipoga mai le amataga. Na ia fausia le tagata i lona lava faatusa ma foliga, o le tane ma le fafine, ma ina ua foafoaina i la’ua, sa fuafuaina ina ia faatasia i la’ua i noataga paia o le faaipoipoga, ma e lē atoatoa le tasi e aunoa ma le isi.⁴

O le faatasiga faaletulafono o le tane ma le ava [o le] auala ina ia o la’ua iloa ai le faamoemoega sili ona maualuga ma paia mo i la’ua. Mo tagata o le Au Paia, o le faaipoipoga e lei fuafuaina e le Tama oi le Lagi ua na o se faatasiga i le lalolagi, ae o se tasi e mafai ona gafatia faigata o le olaga, ma tumau ai mo le faavavau, e tuuina atu ai le paia ma le olioli i lenei lalolagi, mamalu ma le ola e faavavau i lalolagi o le a oo mai.⁵

[O le talalelei] na te aveina ia alii ma tamaitai ma na te faatasia i latou i le feagaiga e faavavau o le faaipoipoga, e paia ma mama, ua aumaia e le Atua, e maua ai mea e manaomia ma faafetaui ai le mama ma le malosi sili o naunautaiga o le agaga. E faaatoatoa ai alii ma tamaitai—tane ma ava mo le olaga nei ma le olaga e faavavau. E maeu le mamalu ma le paia o lenei manatu!⁶

Ua le gata ina fautuaina mai e le Atua ae ua ia poloaiina foi le faaipoipoga. A o le i maua e le tagata le tino ola pea, a o lei oo mai le agasala i le lalolagi, o lo tatou Tama oi le Lagi lava ia sa faataunuuina le uluai faaipoipoga. Na ia tuufaatasia o tatou uluai matua i le faatasiga o le faaipoipoga paia, ma poloaiina i laua ina ia fanafanau ma uluola ma ia tumu ai le lalolagi. O lenei poloaiga na te lei suia lava, aveesea pe soloia; ae sa faaauau pea lona faataunuuina i augatupulaga o tagata soifua.⁷

[O tagata] … ua saga talitonu pea i le manatu faapito ma le faasatani e faapea o le faaipoipoga e sese ma o fanau o le luma. O le Ekalesia a Iesu Keriso o le Au Paia o Aso e Gata Ai ua matua ese lo latou manatu, ma e talitonu, ma aoao atu o se upumoni o le talalelei, o le uluai poloaiga tusitusia a le Atua i le tagata: “Ia fanafanau, ma uluola ina ia tumu ai le lalolagi, ma faatoilalo i ai.” [Kenese 1:28.]

… Ua poloaiina e le Atua, faatagaina ma faatulagaina le fesootaiga o le faaipoipoga. Ua faamanino lelei mai lenei i le faaaliga a le Atua i le Perofeta o Iosefa Samita, e pei ona molimauina i lenei gagana i le Mataupu Faavae ma Feagaiga, mataupu 49:15: “O lenei foi ou te fai atu ia te outou, o se faasa i le faaipoipoga e lei faauuina lea e le Atua, aua o le faaipoipoga ua faapaiaina e le Atua i tagata.”⁸

O le faaipoipoga … o se mataupu poo se sauniga o le talalelei, e sili lona taua e maua ai le fiafia e tagata, e tusa pe foliga mai e le taua, pe faaleano i ai le toatele. E leai se mataupu e le talafeagai i le ata o le ola, ae leai se mataupu e sili atu lona taua pe sili atu lona talafeagai mo le fiafia o le tagata—e le gata iinei, aemaise le olaga o loo mulimuli mai, nai lo le faaipoipoga.⁹

O se faamanuiaga silisili le faatasia o se tane ma se ava mo le olaga nei ma le ola e faavavau.

O se faamanuiaga silisili le maua o se faatagana e ulufia ai le malumalu o le Atua ina ia faatasia ai o se tane ma le ava i le faatasiga o le faaipoipoga paia mo le olaga nei ma le ola e faavavau e le pule o le Perisitua Paia, o le mana o le Atua, aua oi laua ua tuufaatasia “e le toe faateaeseina e le tagata,” aua ua faatasia i laua e le Atua.¹⁰

O le alii ma le tamaitai ua maua lenei sauniga o le faaipoipoga ua maua se mea ua sili ona taua lona taunuuga, ma le tele o lona taua, ma o lea ua faamoemoe i ai le ola ma le oti, ma le faavavau silisili. O lea ua faamoemoe i ai le fiafia e faavavau, poo le pagatia e faavavau.¹¹

Aisea ua aoao mai ai e le Atua ia i tatou mataupu o le faatasiga e faavavau o le tane ma le ava? … Ina ia mafai ai e le tane ona talia lana ava i le mana o le Atua, mo le olaga nei ma le faavavau atoa, o le a i ai le aia na te maua ai o ia, ma le ava na te maua lana tane, i le lalolagi a sau.¹²

E mafai ona faaolaina alii ma tamaitai taitoatasi, ae le mafai ona faaeaina alii ma tamaitai taitoatasi. E ao ona faatasia i latou i lena faatasiga ua uma ona faaalia mai i lenei tisipenisione sili o aso e gata ai. E leai se tane pe a leai se fafine i le Alii, e leai foi se fafine pe a leai se tane i le Alii. O a lava mea e tautala ma manatu i ai alii ma tamaitai e uiga i lenei mea, e le mafai ona latou maua le faaeaga i le malo o le Atua i le nofofua ma le nofo toatasi. …

Ua tatou o mai iinei ina ia faapei i tatou o foliga o le Atua. Sa ia faia i tatou mai le amataga i lona lava faatusa ma ona lava foliga, ma sa ia faia o le tane ma le fafine. E le mafai ona avea faapei i tatou o foliga o le Atua pe ana le avea i tatou o ni tane ma ni fafine. … Pe a avea i tatou faapei o Ia o le a outou iloa ai o le a tuuina atu i tatou i ona luma i le tulaga e pei ona foafoaina ai i tatou, o le tane ma le fafine. O le a le alu atu le fafine na o ia iina, ma e le alu atu foi le tane na o ia iina, ma maua le faaeaga. Atonu la te maua se tikeri o le faaolataga taitoatasi, ae a oo ina faaeaina o le a faaeaina i laua e tusa ai ma le tulafono o le malo selesitila. E le mafai ona faaeaina i se isi lava auala.¹³

E leai se faatasiga mo le olaga nei ma le faavavau e mafai ona faaatoatoa i fafo atu o le tulafono a le Atua, ma le faatulagaga o lona maota. Atonu e naunau i ai alii, atonu latou te faia lea, i lenei olaga, ae leai sona taua sei vagana ua faataunuuina ma faapaiaina e le pule mamana, i le suafa o le Tama ma le Alo ma le Agaga Paia.¹⁴

E faaipoipo tagata o le Au Paia i le olaga nei ma le faavavau, e lē faapea seia oo i le oti ona tetea lea. O faaipoipoga e faia i luga o le tulafono faalemalo ma faifeau o isi ekalesia ua faamamaluina ma aoga e tusa ai ma lenei soifuaga, ae ina ia mafai ona tauaogaina i le olaga a sau o nei feagaiga e ao ona faia mo le faavavau, o nei faatasiga e ao ona faia e tusa ai ma tulafono a le Atua ma lana pule, a leai, e leai sona malosi ma le aoga i le taimi mulimuli mai. O le aiga o le faavae o le mamalu e faavavau, o le ogatotonu o le malo e leai sona gataaga. O le a i ai i le tane lana ava, o le ava o lana tane, o matua o a latou fanau, i le faavavau, pe afai latou te tausi ia i latou i le tulaga ua saunia e ia o lana aia e fuafua ai mea uma e faatatau i lona malo.¹⁵

Faaipoipo i totonu o le Ekalesia, i le taimi talafeagai, ma i le maota o le Alii.

Tatou te tau atu i o tatou tupulaga talavou, ia faaipoipo, ma faaipoipo sa’o. Faaipoipo i totonu o le talalelei, ma ia faia le sauniga i le nofoaga ua saunia e le Alii. Ola ai ina ia e agavaa mo lenei faamanuiaga.¹⁶

Ou te manao i alii talavou o Siona ina ia latou iloa o le faatulagaga o le faaipoipoga e le o se faatulagaga na faia e se tagata. Ua faia e le Atua. E mamalu. … E lei fuafuaina i se tulaga e faafaigofie ai mo na o le tane, ina ia fetaui ma ona lagona, ma ona manatu; e faaipoipo ona toe tetea lea, e talia ona toe lafoai lea, e pei ona ia fiafia i ai. E i ai taui sili e aafia ai, o taui e i tua atu o le taimi nei, e oo atu i le faavavau atoa, aua o lenei ua aumaia ai agaga i le lalolagi, ua maua ai tino o alii ma tamaitai i le lalolagi. O le faaipoipoga e faasaoina ai tagata soifua. A aunoa ma lena, o le a faaleaogaina faamoemoega o le Atua; o le a faaleagaina galuega lelei ma o le a oo mai ai le vaivai ma le toilalo, ma o le lalolagi o le a pogisa ma toagaogao.¹⁷

O le leai o se ava ma aiga toalaiti ua oo mai ai i le mafaufau le manatu e manaomia lea aua e faaitiitia ai le matafaioi latou te fai. O le agaga e aloese mai matafaioi, e aloese mai foi i galuega. O le paie ma le faafifilemu e sui i le galue malosi ma le ola tauivi. O le naunau ina ia maua le fiafia ma le olaga faigofie e oo mai ai le uunaiga i alii talavou o ē ua mumusu e faaipoipo ma le iuga o le faatoateleina o le aiga o se tiute paia. …

… O le toilalo i le aiga o se toilalo e ao i le atunuu ona lagona, a’o faagasolo ia tausaga. O le a oo mai le taimi e faamaonia ai o tulafono a le Atua ma le upumoni e maua ai le fiafia o tagata taitoatasi, e maua i le galue ae lē o le faafifilemu ma le saoloto mai le tausia lelei.

O le agaga o le lalolagi e sosolo. E le mafai ona tatou ola i le totonugalemu o ituaiga tulaga faapea e aunoa ma le pologa mai aafiaga o o latou faaosoosoga. O le a faaosoosoina o tatou tagata talavou e mulimuli i faataitaiga a le lalolagi e uiga ia i latou. O loo i ai nei le taumafaiga malosi ina ia faatauemu i le matafaioi ina ia faaipoipo. O le faafoliga o faamoemoega ua avea ma ‘alofaga ina ia faatuai ai le faaipoipoga seia maua le faaiuga o se mea faapitoa o manaomia. O nisi o naunautaiga o loo faamuamua e alii talavou o le faamaeaina lea o lana mataupu o loo suesue ai i lona atunuu poo atunuu mamao. I le avea ai ma taitai faalenatura i le nuu, o la latou faataitaiga ua matautia ma o le ‘alofaga ua fesiligia le tonu. Sa sili ai ona leai se tasi o nei alii talavou e alu i le kolisi nai lo le faaaoga o le alu i le kolisi e fai ma ‘alofaga e mafua ai ona faatuai ona faaipoipo i luga atu o tausaga ua talafeagai ai.¹⁸

O alii talavou e mananao ina ia maua ni fale tetele ma le manaia, e matagofie ona meaafale, ma ua fou e faapei o fale o isi ao le i faaipoipo i latou. Ou te lagona o se mea sese lea. Ou te manatu o alii talavou ma tamaitai talavou, foi, e ao ona naunau, e oo lava i aso nei, ma le tulaga o loo i ai mea i lenei vaitaimi, e ulufale atu i le faatasiga paia o le faaipoipoga e faatasi ma saili faatasi ai lo la’ua auala i le manuia, e faafetaiai i o la’ua faafitauli ma o la’ua faigata, ma tuufaatasia e agai atu i le manuia, ma galulue faatasi i mea o loo fai i le olaga faaletino, ina ia manuia ai i la’ua. Ona la’ua aoao ai lea o le alofa sili o le tasi i le isi, ma o le a sili ai ona felataai i lo la’ua olaga, ma o le a sili ona faamanuiaina i la’ua e le Alii.¹⁹

O i latou o loo i ai le pule i le Ekalesia ma faiaoga o a tatou faapotopotoga e ao ona toto le paia, ma aoao le tiute o le faaipoipoga, e pei ona sa faaalia mai i aso e gata ai ia te i tatou. E ao ona i ai se … alofa ua fofoa mai le faaipoipoga paia, ina ia taofia ai soo se alii talavou, poo se tamaitai talavou, o se tagata o le Ekalesia, mai le faaipoipo sei vagana ua faia i lena pule ua faapaiaina e le Atua.²⁰

O le faaipoipoga e ao ona faavae i luga o mataupu o le alofa ma le faamaoni paia

E le tatau ona i ai se faafitauli i le umia o le mamalu maualuga ma le manatu faaeaina, o le aiga, afai e faavaeina i luga o mataupu o le mama, o le alofa moni, o le amiotonu ma le faamasino tonu. O le tane ma le ava ua i ai le faatuatuaga atoatoa o le tasi i le isi, ma ua naunautai ina ia mulimuli i tulafono a le Atua i o latou olaga ma faataunuuina le fuafuaga faamoemoeina o la la’ua misiona i le lalolagi, o le a lē mafai, ma o le a lē mafai lava, ona fiafia e aunoa ma so la’ua aiga. O o la’ua loto, lagona, mafaufau, ma naunautaiga o le a agai atu i le faatuina o se fale ma le aiga ma lo la’ua lava malo; i le faataatiaina o le faavae o le faavavau faateleina ma le mana, paia, faaeaga ma malo, o lalolagi e leai se gataaga.²¹

O se aiga e lē o se aiga e tusa ai ma le talalelei, seia vagana ua i ai le talitonuga atoatoa ma le alofa i le va o le tane ma le ava. O le aiga o se nofoaga faatulagaina lelei, alofa, faatasiga, malologa, talitonuga, ma le faatuatuaga atoatoa; e leai sina masalosalo po o se lē faamaoni e oo mai i ai; e i ai i le tamaitai ma le alii le faatuatuaga atoatoa o le tasi i le isi i le mamalu ma le mama.²²

O Siona e lē o se nofoaga o taua po o misa mo alii ma tamaitai. Ua finagalo le Atua ina ia tasi i laua, ma ua ia ta’utino mai ai. E le faataunuuina Lana galuega pe a tuueseese i la’ua, pe mafua ona maua ai ni lagona ua eseese ma feteenai i la’ua i mataupu e fiafia i ai, ma o le tuueseeseina, ae lē o le tuufaatasia, o le faamoemoega o lo laua foafoaina.²³

O le a la le aiga e tatau ona i ai—o le aiga e fai ma faataitaiga, e avea ma faanaunauga o tagata o le Au Paia latou te fausia … ? O le aiga e avea ai mea uma faalelalolagi ma vaega lona lua. O se aiga e matua galue faamaoni ai le tama ua faamanuiaina, ai o ia e le Atua, ma taua e numera tasi lona taua, ma ua latou faatagaina o ia e ola i totonu o o latou loto. O se aiga o loo i ai le faatuatuaga, tuufaatasiga, alofa, faamaoni paia i le va o le tama ma le tina ma le fanau ma matua. O se aiga ua maua e le tina le fiafia uma i ana fanau, e lagolagoina e le tama—e amio uma i le mama, ma matata’u i le Atua.²⁴

O matua … e ao ona alofa ma faaaloalo le tasi i le isi, ma tausi le tasi i le isi i le faaaloalo ma amioga talafegai ma lagona agalelei, i taimi uma. E tatau i le tane ona tausi i lana ava i le faaaloalo sili. E lē tatau i le tane ona faaita ia te ia; e lē tatau ona ia soona tautala e uiga ia te ia, ae ao ona tuu o ia i se tulaga sili ona maualuga i totonu o le aiga, i le i ai faatasi o le fanau. … O le ava foi e tatau ona tausi lana tane i le faaaloalo sili. … O le ava e tatau ona avea ma fiafiaga i lana tane, ma ia ola o ia i le aiga ma tausi ia te ia lava ina ia avea le aiga ma nofoaga sili ona fiafia, sili ona faamanuiaina i le lalolagi i lana tane. O le tulaga lenei e tatau ona i ai le tane, ava, o le tama ma le tina, i totonu o le vaega paia o lena nofoaga mamalu, o le aiga.²⁵

Uso e ma tuafafine, e leai se mea e tatau ona faatagaina e oo mai i le va o outou—le tama ma le tina, tane ma le ava; e le tatau lava ona i ai se lanu o se eseesega o ni lagona; e le tatau lava ona i ai se mea e faatagaina ona oo mai i le va o outou ma faaese mai ai le tasi mai le isi; e le tatau ona outou faatagaina lena mea. E taua lenei mo lo outou manuia ma le fiafia ma le faatasiga e tatau ona i ai i o outou aiga. E tofu i tatou ma vaivaiga ma faaletonu. O nisi o taimi ua iloa atu e le tane se faaletonu i lana ava, ona ia osofaia lea o ia i lena mea. O nisi o taimi e lagona ai e le ava ua lē faia e lana tane le mea tonu, ona ia osofaia lea o ia. O le a le mea lelei e maua mai ai? E le sili ea le faamagalo? E le sili ea le alofa mama? E le sili ea le alofa? E le sili ea le aua le tautala i faaletonu, aua le faalauteleina vaivaiga e ala i le talanoa i ai i taimi uma? E le sili ea lena? E le avea ea le faatasiga ua faamauina i le va o oulua ma le fanau mai o ni fanau ma le faatasiga o le feagaiga fou e faavavau, e sili atu ona mausali pe a galo ona e tautau atu vaivaiga ma faaletonu o le tasi ma le isi? E le sili ea ona faagalo ma aua nei talanoaina—tanumia i latou ma ta’uta’u atu na o mea lelei ua e iloa ma lagona, o le tasi i le isi, ma tanumia ai faaletonu o isi ma lē faalauteleina i latou; e le sili ea lena?²⁶

O le a le fiafiaga sili e mafaufau i ai nai lo le mea moni [o le alii] ua alofa i lana ava ma e alofa lana ava ia te ia, ua ia faamaoni ma ua faamaoni mai o ia i aso uma o le la faatasiga ma ia o se ava ma se tina, o le a maua le faamanuiaga i le alu ae i le taeao o le uluai toetu ua ofu o ia i le tino ola pea ma le ola e faavavau, ma faaauau le mafutaga sa i ai i lo la’ua va i lenei olaga, o le mafutaga o se tane ma le ava, tama ma le tina, o matua ia latou fanau, ina ua uma ona faataoto le faavae mo le faavavau paia ma le faaeaga e faavavau i le malo o le Atua!²⁷

O le faaipoipoga, ua faapaiaina ma talia e le Atua, ua faavae ai le aiga paia —ua faamanuiaina, faafiafiaina, faaeaina, ma taitaiina atu ai i le mafutaga ma o tatou matua Faalelagi, ma le olaga e faavavau, tuufaatasia ma le faateleina.²⁸

Fautuaga mo Suesuega

O le a le faamoemoega ua faatulagaina ai le faaipoipoga e le Atua? E faapefea e le faaipoipoga e faavavau ona mafai ai ona tatou iloa o tatou “faamoemoega sili ona maualuga ma le paia”?
Aisea o le faaipoipoga e “sili ona taua mo le fiafia o tagata soifua”? Aisea ua manatu ai nisi e toatele e le taua?
E faapefea e le faavavau faateleina ma le fiafia e faavavau ona faalagolago i le faatasiga e faavavau o le tane ma le ava? O le a sou lagona ina ua e iloa o le a e maua lau tane poo lau ava i le faavavau atoa?
Aisea tatou te saili ai e faaipoipo i le malumalusa?
O le a se taunuuga mo i tatou lava ma isi pe a motusia le faatasiga o le feagaiga fou e faavavau o le faaipoipoga?
O a faaosoosoga poo faalavelave e ono taitaiina ai nisi tagata e faatuai pe taofia ai le faaipoipoina? E faapefea ona tatou iloa ua talafeagai ona tatou faaipoipo?
Sa folafola mai e Peresitene Iosefa F. Samita o le aloese mai le faataunuuina o le faaipoipoga o le “ toilalo e ao i le atunuu ona lagona, ao faagasolo ia tausaga.” E faapefea ona lagonaina e le atunuu lenei tulaga?
E faapefea e le feagaiga o le faaipoipoga e faavavau ona faamalosia ia ulugalii pe a latou faafeagai ma o “latou faafitauli ma o latou faigata”?
Aisea e taua ai le faatuatuaga sili i le va o le tane ma le ava? O a nisi uiga e ao ona atinaeina i le va o le tane ma le ava? E faapefea e uiga le fiafia—e pei o le muimui, faauiga lua, musu e faamagalo atu, ma le faamaualuga—ona faavaivai ai mafutaga faale-faaipoipoga?
O le a le uiga o le tane ma le ava ina ia tasi? O a osigataulaga e mafai e le ulugalii ona manaomia ina ia mafai ai ona avea i laua ma tino e tasi? O a nisi o mea e mafai ona fai e ulugalii e faamalosia ai la laua faatasiga e faavavau?