Usiusitai i Musumusuga a le Agaga.

O tagata uma lava o le Ekalesia ua i ai le aia tatau mo musumusuga a le Agaga Paia mo le taitaiina o le tagata lava ia.

Mai le Soifuaga o Iosefa F. Samita

Sa toe taliu mai Peresitene Iosefa F. Samita faatasi ai ma Epikopo Charles W. Nibley i le nofoaafi, mai se malaga i le itu i sasae. I tafatafa ane o Green River i Wyoming, sa laa ese atu o ia i fafo i o le taavale ae ia faalogoina se leo ua faapea mai: “Alu i totonu ma nofo i lalo.” Sa ia toe foi atu i totonu o le nofoa afi, sa lē mautonu mo sina taimi, ma sa faapea ifo ia te ia lava, “Oi auoi, e leiloa pe ua na o ni o’u mafaufauga.” Sa toe faalogo o ia i le leo ua toe faapea mai, “Nofo i lalo.” O lona tali vave atu, lea sa nofo ai loa Peresitene Samita i lona nofoa. I le taimi lena, sa sipa ai le nofoa afi ona ua gau se uamea ma ua mafua ai ona alu ese le afi ma le tele o taavale mai le ala o le nofoa afi. Sa ta’ua e Epikopo Nibley ana le gaioi ia Peresitene Samita e pei ona ia faia, semanu ua matua faamanu’alia o ia, aua e ui o le taavale sa ia malaga ai sa i ai pea i luga o le auala, ae o isi taavale uma ua “fe’oma’i faatasi ma ua matua faaleagaina ai.”

Sa faapea mai Peresitene Samita i lea mea na tupu, “Sa ou faalogo i lena leo i le tele o taimi i lo’u olaga, ma e sa faamanuiaina lava a’u ona o le usiusitai i ai.”

“[O Peresitene Samita] sa soifua vavalalata ma le Agaga o le Alii,” sa iloa ai e Epikopo Nibley, “ma o lona soifuaga sa avea ma faataitaiga lelei ma le mama ma sa faigofie ai i le Alii ona faaali mai o Ia i lana auauna. E moni e mafai ona ia faapea mai, ‘Fetalai mai, le Alii e, aua ua faalogologo lau auauna.’ [1 Samuelu 3:9.]… O le agaga o Peresitene Samita sa o gatasi ma faaaliga faale selesitila—sa mafai ona ia faalogo, ma sa ia lagona.”¹

Aoaoga a Iosefa F. Samita

Ua i ai i tagata uma o le Ekalesia le aia tatau e maua ai lona lava taitaiga mai le Agaga Paia.

O le agaga o musumusuga, o le meaalofa o faaaliga, e le mo se tagata e toatasi, e le o se meaalofa e fuafua mo na o le Au Peresitene Sili o le Ekalesia ma Aposetolo e Toasefululua. E le faapitoa mo na o le au pulega pulefaamalumalu o le Ekalesia, e mo tagata taitoatasi uma o le Ekalesia; ma o le aia ma le faamanuiaga mo alii taitoatasi, tamaitai taitoatasi, ma tamaiti taitoatasi ua aulia le tausaga e agavaa ai, e maua le agaga o faaaliga, ma maua le agaga o musumusuga i le faataunuuina o o latou tiute i le avea ai ma tagata o le Ekalesia.²

O tagata taitoatasi uma o le Ekalesia ua i ai le aia tatau e maua ai le agaga o faaaliga ma le malamalama mai le Atua ua aumaia ia te ia e lena agaga o faaaliga, mo lona lava lelei, e pei ona i ai i le epikopo ina ia mafai ai e ia ona pulefaamalumalu i lana uarota. O tagata taitoatasi uma ua i ai le avanoa e faaaogaina ai nei meaalofa ma nei faamanuiaga i le faataunuuina o ana galuega, i le tausia o ana fanau i le ala e tatau ai, ma le puleaina o lana faatoaga, o ana manu, ma le puleaina o lana pisinisi… ; o lana aia tatau le maua o le agaga o faaaliga ma musumusuga ina ia faia le mea tonu, ina ia poto ma faautauta, amiotonu ma lelei i mea uma na te faia. Ou te iloa o se mataupu moni lenei..³

O le aia tatau a tagata taitoatasi le musuia ma maua faaaliga o le Agaga Paia mo le taitaiina o i latou lava ina ia faamalosia lo latou faatuatua, ma uunaia i latou i galuega o le amiotonu, i le faatuatua ma le tausia o poloaiga ua tuuina mai e le Atua ia i latou; o le avanoa mo alii ma tamaitai uma le maua o faaaliga i lenei taimi, ae le o mamao atu. O le taimi e tulai ae ai se tagata ma faapea ua ia te ia le aia e pulea ma faatonu ai, poo le nofo e faamasino ai i ona uso, aemaise ia i latou ua pulefaamalumalu, e ao ona vave taofia o ia, ne’i i ai ni feteenaiga, fevaevaeaiga ma le felemalamalamaai. O alii ma tamaitai uma o lenei Ekalesia e ao ona sili lo latou iloa ma usitai i lenei agaga.⁴

E ao ona tatou ola faalatalata i le Alii, ia maualalo o tatou loto, faalogo ma naunau e usiusitai, i le aafiaga a le Agaga Paia, ina ia mafai ai ona tatou iloa le finagalo o le Tama e faatatau ia i tatou o tagata taitoatasi ma e o loo galulue i le Ekalesia a Keriso i soo se tulaga e i ai.⁵

E ao ona tatou… ola ina ia i ai le Agaga Paia i totonu ia i tatou o se vaiola, ua fuafuaina e taitai i tatou i le atoatoaga i le amiotonu, i le mama ma le faamaoni i luma o le Atua, seia faataunuuina la tatou misiona i le lalolagi, ma faia galuega uma ua manaomia tatou te faia.⁶

E oo mai faaaliga ia i tatou i le tele o taimi e ala mai le leo itiiti malu o le Agaga.

E le o se faaaliga ofoofogia ia te i tatou e ao ona tatou maua ai le upumoni, ae o le lotomaualalo ma le usiusitai ma le faatuatua i poloaiga ma tulafono a le Atua. A o avea au ma tama talavou i le faatoa amataina o le galuega, sa masani ona ou alu atu ma fesili i le Alii e faaali mai ia te au nisi o mea ofoofogia, ina ia mafai ai ona ou maua se molimau. Ae sa taofi mau e le Alii mea ofoofogia mai ia te au, ae faaali mai ia te au le upu moni, fuaiupu i le fuaiupu, upu i le upu, si mea itiiti iinei ma se mea itiiti iina [tagai 2 Nifae 28:30], seia ona ia faailoa mai ia te au le upumoni mai le tumuai o lo’u ulu seia oo i alofivae o ou vae, seia aveesea atoatoa mai ia te au le faaletonu ma le fefe. Sa ia le auina mai se agelu mai le lagi e faia lenei mea, pe ua ia tautala foi ma le pu a le agelu. E ala mai i le musumusuga o le leo itiiti ma le filemu o le Agaga o le Atua soifua, sa ia tuuina mai ai ia te au le molimau ua ou maua. I lenei mataupu ma le mana o le a ia tuuina atu i fanau uma a tagata o le malamalama o le upumoni o le a tumau ai ia i latou, ma o le a latou iloa ai le upu moni, e pei ona silafia e le Atua, ma faia le finagalo o le Alii e pei ona faia e Keriso. Ma o le a leai se aofaiga o faaaliga ofoofogia e mafai ona faataunuuina ai lenei.⁷

E le tatau lava ona outou fefefe, ou uso e ma tuafafine, afai ua outou le maua ia ni faaaliga ofoofogia tetele, pe tou te le maua foi ni faaaliga ofoofogia mai le lagi, ae ia outou ola ina ia mafai ona faaali mai le Atua lava ia ia te outou pe a Ia finagalo iai. O le a lē afaina outou, e leai se mea tou te fefefe ai, o le a leai se mea tou te vaivai ai, e tusa ai ma lo outou iloa, afai ua outou i ai i se tulaga e talia ai le finagalo o le Atua i soo se taimi lava e saunia ai o Ia poo ua finagalo ai e faaali mai ia te outou. Ua lava lena. Ona faaali mai lea e le Atua ia te outou o mea e tatau ai mo lo outou atinaeina, mo lo outou tuputupu ae ma le alualu i luma i le malamalama o le upumoni.⁸

Ia tatou faia mea ua taitaiina ai e le Agaga.

Ou te le o lagonaina se tulaga gafatia i le tino po o le mafaufau e faia ai tiute ua manaomia ai a’u e aunoa ma le fesoasoani mai o le Agaga o le Alii. Ou te leiloa pe i ai se tagata e mafai ona ia tauaveina le galuega a le Alii e manaomia ai o ia, e aunoa ma le Alii, pe aunoa foi ma uuna’iga ma musumusuga a le Agaga ia e oo mai mai le Tama o le Malamalama.⁹

Afai tatou te ola ina ia mafai ona tatou lagona ma malamalama i musumusuga a le leo itiiti ma le malu o le Agaga o le Atua, ia tatou faia mea uma ua taitaiina ai e le Agaga e aunoa ma le fefe i se taunuuga. E leai se afaina pe talafeagai ma manatu o i latou ua tauemu ma sailiili masei, poo fili o le malo o le Atua pe leai foi. E o gatasi ea ma le finagalo o le Alii? Pe talafeagai ma le agaga o le galuega sili o aso e gata ai ua tatou auai? O le taunuuga ea ua fuafua mo le faaalualuina i luma o le Ekalesia ma faamalosia ai i le lalolagi? Afai o le faamoemoe o loo i ai i lena alafua, ia tatou faia ia, tusa lava poo a upu ma manatu o tagata e fai.¹⁰

E le lava mo i tatou ona faamalieina i le na o le malamalama o le mea moni. O le iloa o le mea ua sao, e ao ona tatou o atu ma faia le mea sao, poo fea lava le mea o i ai, poo le a lava ua finagalo ai [Iesu Keriso] mai ia i tatou. Afai tatou te iloa le meatonu, afai tatou te iloa le upumoni, e tatau ona tatou usiusitai i le meatonu ma le upumoni, ma e ao ona tatou faia o le meatonu, i taimi uma, i soo se tulaga lava, ma ia aua lava nei usiusitai i lē faaosooso pe aloese foi mai le ala sao, o le ala sao ma le vaapiapi e tau atu i le finagalo o le Atua.¹¹

[O lo tatou] usiusitai e ao ona fai i le loto fuatia ifo; e le tatau ona faamalosia; e le tatau ona i ai se faamalosi. E le tatau i tagata ona faamalosia e faasaga atu i o latou loto e usiusitai i le finagalo o le Atua; e ao ona latou usiusitai i ai ona ua latou iloa ua sa’o lea, aua ua latou naunau e faia lea, ma ona o lo latou fiafia e faia ai. E fiafia le Atua i le loto naunautai.¹²

O le faamatuu atu e usiusitai i le Agaga, tatou te maua ai le malamalama sili ma tuputupu ae ai i le mana e iloa ai le lelei mai le leaga.

Ua nofo aitalafu le tagata i le sosia o le atamai uma ma le upumoni, mo le malamalama ua ia maua; ma o i latou uma o le a usiusitai i musumusuga a le Agaga, o le a taitaiina i le mama, le mamalu, i le alofa o le Atua ma le tagata, ma le alofa i le upumoni o lena ua faalautele i le agaga, o le a maua le mama sili, faalauteleina sili, ma le taitaiga sili ma le malamalama atoa o le upumoni a le Atua e le mafai e se tasi lava ona maua.¹³

E tatau i alii ma tamaitai ona taofimau i le upumoni, ma faamauina i le malamalama o le talalelei, e le faamoemoe i se malamalama o se isi, ae na o le faatuatua i le Agaga Paia, e le suia lava, ua susulu e faavavau ma molimau i le tagata ma le perisitua, o le ua ola faatasi ma tulafono o le talalelei, i le mamalu ma le finagalo o le Tama. Ona latou maua lea o le malamalama e faavavau e le mafai ona nanaina.¹⁴

Ua na o le pau lava le auala tatou te faia, o ni tagata taitoatasi, o le ola lea ma le lotomaualalo, amiotonu ma le faatuatua i luma o le Atua ina ia tatou maua ai le Agaga i le tulaga e mafai ai ona tatou faamasino ma le amiotonu, ma iloa le upumoni mai le sese, o le mea sao mai le mea sese.¹⁵

E faapefea ona tatou iloa o le [fautuaga ua tatou maua mai taita ti o le Ekalesia] e moni? E ala i le i ai o le Agaga o le Atua i totonu o o tatou loto, e mafai ai ona tatala o tatou manatu ma faamalamalamaina, ina ia tatou iloa ai mataupu faavae mo i tatou lava, ma ia mafai ai ona vaevae le upumoni mai le sese, malamalama mai le pouliuli ma le lelei mai le leaga.¹⁶

Mo le tagata o le Au Paia faatuatua ua tuuina atu i ai le aia e iloa ai le upumoni, e pei ona silafia e le Atua; ma e leai se mana i lalo ifo o le malo selesetila e taitaiina o ia i le leaga, faapogisa lona malamalama, faapuaoa lona mafaufau ma faaitiitia lona faatuatua poo lona malamalama i mataupu o le talalelei a Iesu Keriso. E le mafai ona fai, aua o le malamalama o le Atua ua susulu malamalama sili atu nai lo le pulapula o le pepelo ma le sese; o lea, o i latou ua maua le malamalama o Keriso, le agaga o faaaliga ma le malamalama o le Atua, ia tulai ae i luga o nei manatu lē tonu i le lalolagi; ua latou iloa lenei mataupu faavae, o ā le Atua ia ae lē o le tagata.¹⁷

Pe afai tatou te ola e tusa ai ma mea ua faaalia mai, o le a faaopoopo mai e le Alii i lo tatou malamalama ma le poto.

E tele mea e lei faaalia mai. E i ai mea e lei faaalia o le a faailoa mai e le Atua i lona lava taimi ua tatou lē malamalama i ai. Mo lau lava vaega, e tele mea ua faaalia mai e foliga mai e mafai ia te au ona malamalama i ai. Afai ua na o lo’u talia o mea uma ua faaalia mai e le Atua, ma malamalama i ai e pei ona tatau ona i ai ma faaaogaina i le amiotonu i lo’u olaga, ou te manatu e ao ai ona ou saunia mo se mea sili atu, pe afai o o’u agavaa pea mo lea. Oi, amuia outou, o loo i ai tagata o i tatou o loo popole ma atuatuvale i mea sa le’i faaalia mai lava i fanau a tagata. … Afai e totogi e tagata a latou sefuluai, afai latou te tausi i le upu o le poto, afai latou te fai a latou tatalo, afai ua latou tuuina atu o latou soifua mo galuega o le amiotonu i le lalolagi ma suesue i le talalelei mo i latou lava ma usiusitai i ai, o le a faaitiitia le manaomia o lo latou fesili atu ai, ma aua nei galo le mea moni e faapea o le a sili mea ua latou iloa nai lo mea latou te fai.¹⁸

Tatou te le iloa se mea, ma o le a tatou le laugaina atu se mea i tagata seia vagana mea ua faaalia mai e le Alii le Atua, ma ua tatou fautuaina ma talanoa ia i latou o loo i ai le pule, o e o lo latou tiute ma le pisinisi o le aoao ma lauga atu i mataupu o le talalelei i le lalolagi ma tagata o le Au Paia, ina ia faasino a latou aoaoga ma a latou mataupu i le upu a le Atua ua faaalia mai. O loo i ai le vaega tele ua maea ona faaalia mai ae le’i mafai ona soifua ai, ou te tautino atu ia te outou. E tele mea e lei aoaoina. E tele ni mea e le i aoaoina i le agaga o le aoaoga, ma e tele foi ua maea ona faaalia e ala mai i le Perofeta o Iosefa ma ana uo e lei mauaina e tagata i o latou loto ma e lei liua lava e pei ona tatau ona i ai.

Afai tatou te usiusitai ma agavaa e ola ai i mataupu o le talalelei ma tulafono a le Atua ma mea e manaomia i le lagi, ua maea ona faaalia, o le a sili atu i tatou ma latalata i le faamoemoega o le atoatoaga o le atamai, poto ma le mana nai lo le tulaga ua tatou i ai i aso nei. Afai e oo mai lena taimi, ona i ai lea o isi mea sili atu foi e lei faaalia i tagata o le Atua. Sei vagana ua tatou faia o tatou tiute, ia ua tatou maua, sei vagana ua tatou faatuatua i mea ua tuuina mai i o tatou lima, sei vagana ua tatou ola ai i o tatou talitonuga e pei ona tatou i ai i aso nei, e pei ona tuuina mai e le Alii ia i tatou, ina ia faaopoopo ai poloaiga, faaopoopo ai le malamalama ma le poto mo i tatou i luga atu o mea ua uma ona tatou maua, ia tatou te lei usiusitai ma le atoatoa i ai, o le faaopopoina le faasalaga i luga o o tatou ulu. Ua lava mo i tatou le ola ai i le malamalama o musumusuga ua i ai nei ma faaaliga ua i ai nei ma ia mafai e tagata taitoatasi o le Ekalesia e tausi i poloaiga a le Alii ma galue ai i le Ekalesia e pei ona uunaia ai o ia e le Agaga ma taitaiina ai o ia i le faia o ona tiute. O o tatou agaga uma lava ua agavaa mo musumusuga mai le Atua ina ia iloa ai o lo tatou tiute ma le auala tatou te faia ai.¹⁹

O le mea tatou te fai o le ola e tusa ai ma le malamalama ma le poto ua faaalia mai e le Atua ia i tatou i lenei tisipenisione, ina ia mafai ai ona tatou ola faatasi ai ma le mana o le lagi ma i latou o loo i le lagi, aemaise ai ma lo tatou Alii o Iesu Keriso o loo taimua, o lo tatou fai tulafono, o lo tatou faataitaiga, ma le ala o le ola ma le faaolataga mo le lalolagi atoa; o ia tatou te ui atu ai i le a malo selesetila o le Atua, ma a aunoa ma ia ua le mafai ona tatou ulufale atu i lena vaega o le mamalu o le lalolagi e leai sona iuga. O ia o le ala, le malamalama ma le ola o le lalolagi; ma o ai lava e usiusitai i poloaiga ua Ia tuuina mai, ma faia galuega sa faia e Ia, ma poloaiina tatou te fai, o le a lē savali i le pogisa, ae o le a i ai ia te i latou le malamalama o le ola.²⁰

Fautuaga mo Suesuega

O ai ua agavaa e maua le “agaga o faaaliga”?
O a vaega o lo tatou olaga tatou te maua ai le taitaiga a le Agaga?
Aisea ua e manatu ai ua taitaiina pea e le Atua i tatou e ala i le leo itiiti ma le malu o le Agaga ae le ala i “faaaliga ofoofogia”? (tagai foi 1 Tupu 19:11–12.) O a ni auala e taitaiina ai e le Atua i tatou i le leo itiiti ma le malu?
E mafai faapefea ona tatou iloa pe a faatosinaina i tatou e le Agaga o le Alii? (Tagai foi MFF 6:15, 22–23; 9:8–9; 11:12–14.)
Aisea e le faamalosia ai i tatou e mulimuli i musumusuga a le Agaga? Aisea ete manatu ai o le Atua e “fiafia i le loto naunautai”?
E faapefea ona tatou ola ina ia mafai ona maua le taitaiga a le Agaga? O le a le mea e taofia mai ai lo tatou agavaa e maua le musumusuga a le Agaga?
O a fea e fesoasoani ai le Agaga ia te oe e faalauteleina lou malamalama i le upumoni a le Atua?
O a faamanuiaga e oo mai ia i latou ua faatuatua i le musumusuga a le Agaga Paia ae le faalagolago i le “malamalama o se isi”?
E faapefea ona saunia i tatou lava e maua le malamalama ma le atamai sili? (Tagai foi Alema 12:10.)