Mataupu 46: O le Faaolaina o o Tatou Tagata ua Maliliu e Ala i le Auauna Atu i le Malumalu

Mataupu 46

O le Faaolaina o o Tatou Tagata ua Maliliu e Ala i le Auauna Atu i le Malumalu

E avea i tatou ma faaola i Mauga o Siona mo i latou ua maliliu, e ala i auaunaga i le malumalu.

Mai le Soifuaga o Iosefa F. Samita

“Ua matua nutimomoia lo’u agaga. Ua ta’e lo’u fatu, ma ua tātāvale mo le ola! Oi lo’u atalii pēlē, o lo’u olioli, ma lo’u faamoemoe! … Le Atua e, fesoasoani mai!”¹ o le auega lea a Peresitene Iosefa F. Samita i le maliu faafuasei o lona atalii matua, o Ailama M. Samita, o se tasi o le Korama a le Au Aposetolo e Toasefululua. E 45 tausaga le matua o Ailama. Sa pulefaamalumalu Peresitene Samita i le ono masina mulimuli ane i le Fanuatanu o le Aai o Sate Leki, ina ua faatuina se maa faamanatu e faamamaluina ai lona tama, o Ailama. O le aso 27 Iuni 1918, e faamanatu ai le tagatavaleina o lona tama ma le uso o lona tama, le Perofeta o Iosefa Samita.

Atonu ai na lāgā ona lagona e le Agaga o le Alii a’o ia mafaufau loloto i le toesea o e pele ia te ia. I ni nai masina mulimuli ane, na o nai vaiaso ae maliu o ia, sa tusia ai e Peresitene Samita e faapea: “Sa ou nofo i totonu o lo’u potu ma mafaufau loloto i tusitusiga paia; Ma sa ou toe manatunatu ai i le osigataulaga sili o le togisala lea sa fai e le Alo o le Atua, mo le togiolaina o le lalolagi … A o ou faia lea mea, sa toe faafoi lo’u mafaufau i tua i tusitusiga a le Aposetolo o Peteru [tagai 1 Peteru 3:18-20; 1 Peteru 4:6]. … A o ou mafaufau loloto i ia mea sa tusia, sa tatalaina mata o lo’u malamalama, ma sa oo mai le Agaga o le Alii i o’u luga, ma sa ou vaai ai i au o e ua maliliu, e toalaiti ma toatele foi” (MFF 138:1-2, 5, 11).

Ona ia mauaina lea o le faaaliga o le togiolaina o e ua maliliu, o loo faamauina i le Mataupu Faavae ma Feagaiga 138, lea sa aoaoina ai mataupu fou o le upu moni ma faamaonia ai mataupu faavae sa ia talitonu ai ma aoao i le tele o tausaga.

Aoaoga a Iosefa F. Samita

Sa muai faauuina Iesu Keriso e laveai e ola ma e ua oti.

[O le Faaola] sa auina mai e le gata ina aoao le talalelei ia i latou o loo nonofo i le lalolagi, ae peitai sa faamanuiaina o Ia ma faauuina e le Atua na te tatalaina faitotoa o falepuipui mo e o loo saisaitia ai ma talai atu ai lana talalelei ia te i latou.²

I le aso tolu o Oketopa, i le tausaga e tasi le afe iva selau sefulu valu, sa ou nofo ai i totonu o lo’u potu ma mafaufau loloto i tusitusiga paia;

Ma manatunatu ai i le osigataulaga sili o le togiola lea sa faia e le Alo o le Atua, mo le togiolaina o le lalolagi;

Ma na faaalia e le Tama ma le Atalii le alofa sili ma le matagofie i le afio mai o le Togiola i le lalolagi;

E ala i Lana togiola, ma le usiusitai i mataupu faavae o le talalelei, e le taumate o le a faasaoina ai le tagata. …

A o ou mafaufau loloto i ia mea sa tusia [tagai 1 Peteru 3:18-20; 1 Peteru 4:6], sa tatalaina mata o lo’u malamalama, ma sa oo mai le Agaga o le Alii ia te au, ma sa ou vaai ai i au o e ua maliliu, sa toalaiti ma toatele foi.

Ma sa faapotopoto uma i le mea e tasi e le mafaitaulia i latou o loo tuu faatasi i agaga o le mea moni, o e sa faatuatua i le molimau a Iesu Keriso a o ola i latou i le tino. …

A o talatalanoa ma faatalitali ia tagata e toatele, ma fiafia i itula ia sa aveese ma tatalaina ai mai filifili o le oti, sa faaali mai le Alo o le Atua, ma tuuina mai le saolotoga ia i latou sa i ai le faatuatua;

Ma o iina sa ia aoao atu ai ia te i latou le talalelei e faavavau, o le mataupu faavae o le toetu ma le togiolaina o le tagata mai le pau, ma mai agasala a le tagata lava ia e fuafua i le salamo;

Ma a o ou mafaufau pea, sa pupula ou mata, ma sa faavave mai lou malamalama, ma sa ou iloa ai, sa le i alu atu le Alii lava ia e aoao i tagata leaga ma le faalogogata, o i latou ia sa tetee i le upu moni.

A e peitai o lenei, sa ia faatulaga ai ‘au ma tofiaina avefeau, mai e amiotonu ma faaofuina i le malosi ma le pule, ma faatonuina latou ina ia o atu ma avatu le malamalama o le talalelei ia te i latou o loo i le pogisa, e tusa lava foi poo agaga uma o tagata; ma o le mea lea ua aoao atu ai le talalelei i e ua maliliu;

Ma o avefeau filifilia sa o atu ma tautino atu le aso ua filifilia e le Alii ma tautino atu foi le saolotoga o e ua ave faatagataotauaina, e oo lava ia te i latou uma ua salamo ia latou agasala ma maua le talalelei.

Ma o le mea foi lea ua aoao atu ai le talalelei i e ua oti ia latou agasala, o e aunoa ma le malamalama o le upu moni, poo e fai agasala, poo le faafitia o perofeta.³

Sa le i uma le galuega a Iesu ina ua faasatauroina lona tino, sa le i uma foi ina ua uma lona toetu mai nai e ua oti; e ui lava sa ia faataunuuina le faamoemoe o le mea sa afio mai ai i le lalolagi, ae peitai e lei faataunuuina uma ana galuega. Ma o afea la? E le mafai seiloga na te togiolaina uma ma faaola uma atalii ma afafine o lo tatou tama o Atamu o e sa i ai ma e o le a fananau mai i le faaiuga o taimi, sei vagana ai atalii o le to e le gata. O Lana misiona lena.⁴

O e ola ma e oti o loo galulue faatasi ina ia aumaia le talalelei i fanau uma a le Atua.

O le a lē uma la tatou galuega sei vagana ua faasaoina i tatou lava, ma sei vagana foi o le a faasaoina i latou uma o loo faalagolago ia te i tatou; aua o tatou o le a avea ma faaola i Mauga o Siona, e faapena foi Keriso. Ua valaauina tatou i lea misiona. E le atoatoa e oti e aunoa ma tatou, e faapena foi tatou e aunoa ma i latou [tagai MFF 128:18]. O loo i ai se misiona tatou te faia mo, ma fai ma sui o i latou; o loo i ai se galuega tatau e tatou te faia ina ia faasaoloto ai i latou, ona o le le iloa o se mea, ma mea le taupulea sa oo ia te i latou a o i ai iinei, ma le latou le sauniuni mo le ola e faavavau; e tatau ona tatou tatala le faitotoa mo i latou, e auala lea i le faataunuuina o faamauga aua o mea ia e le mafai ona latou faia, e mafai ai ona faasaoloto mai latou mai le “falepuipui” ina ia o mai ma ola ai i le agaga i la le Atua, ma faamasino ai le tagata i la le tino [tagai MFF 138:33-34].

Sa saunoa mai le Perofeta o Iosefa Samita e faapea: o se tasi lea o tiute sili ona taua ua tuuina atu i le Au Paia o Aso e Gata ai. Aisea? Aua o le Tisipenisione lenei o le atoatoaga o taimi, o le a aumaia ai le nofoaiga i le meleniuma, ma o mea uma lava sa tuu mai e fofoga o perofeta paia, mai le amataga o le lalolagi, e tatau ona faataunuuina, ma faatasia mea uma, o mea o i le lagi ma mea o i le lalolagi.⁵

O mataupu faavae lava ia e tasi e faatatau i e ola e faapena foi e oti… ma o le mea lea o loo tatou papatiso ai mo e ua oti. O i latou o e ola e le mafai ona atoatoa e aunoa ma e oti, e faapena foi e oti e aunoa ma e ola. E tatau ona i ai se tuu faatasiga ma se sooga faatasi o matua ma fanau ma fanau ma matua seia fesootai uma le filifili o le aiga o le Atua ma sosoo faatasi uma i le filifili e tasi, ma avea ai o se aiga e tasi o le Atua ma Lana Keriso.⁶

O le talalelei lenei sa faaali ia Iosefa Samita lea ua uma ona talaiina i agaga i le falepuipui, ia i latou ua tuua lenei lalolagi e aunoa ma le malamalama i le talalelei. O loo talaiina e Iosefa Samita lena talalelei ia te i latou. E faapena foi Ailama Samita. E faapena foi Polika Iaga, ma Aposetolo uma lava sa soifua ai i lenei Tisipenisione i lalo o le taitaiga a Perofeta Samita [tagai MFF 138:36-37, 51-54]. O loo i ai i latou iina, o loo ia te i latou le Perisitua sa maua mai e i latou mai le pule a o i ai i latou i le lalolagi; o loo latou talai le talalelei i agaga o i le falepuipui; mo Keriso, a o i ai lona tino i le tuugamau, sa Ia talai atu le saolotoga i e o loo faapologaina ma tatala faitotoa o le falepuipui mo i latou o e sa saisaitia [tagai MFF 138:27-30]. E le gata la ia te i latou ia o loo faia pea le galuega, ae afe ma afe isi; o faifeau sa maliliu i le misiona e lei uma a latou misiona, ae o loo faaauau pea i le lalolagi o agaga [tagai MFF 138:57]. Atonu sa silafia e le Atua ua tatau ona faapuupuu galuega a nei faifeau e pei ona i ai. Ma ou te le fesiligia lena mafaufauga pe faumalo ai foi. Ae ou te tuuina atu i aao o le Atua, aua ou te talitonu o ia mea uma e mātū lava mo le lelei, aua o le a le tigaina lava le Alii i se mea e aumai i ona tagata i le lalolagi aua na te puleaina ma avea o se mea lelei mo latou.⁷

E masani lava ona ou talitonu, ma ou te talitonu pea ai lava au ma lou agaga atoa, e faapea o tagata e pei o Peteru ma Iakopo ma soo e toasefululua sa filifilia e le Faaola i lona taimi, sa faia ma o loo faia pea le galuega i Senituri ua mavae talu ona tagatavaleina i latou mo le molimau ia Iesu Keriso, i le talaiga o le saolotoga i e o loo faapologaina i le lalolagi o agaga ma tatala o latou faitotoa o le falepuipui [tagai MFF 138:38-50]. Ou te le talitonu e i ai se isi galuega silisili atu e mafai ona latou faigaluega ai. O lo latou valaauga faapitoa ma le faauuina o i latou e le Alii lava ia, e mo le faasaoina o le lalolagi, ma talai le saolotoga i e o loo puapuagatia, ma le tatalaina o faitotoa o le falepuipui mo i latou o loo saisaitia pea i filifili o le pogisa, talitonuga sese, ma le le iloa o se mea. . …

. … O mea ua tatou aafia ai iinei o mea masani lava ia a le Atua ma le olaga i tala atu o i tatou. O loo tutusa tele lava i le faamoemoega o le Atua e pei ona tuuina mai iinei ma lona faamoemoega e pei ona tauave pea i le mea o loo i ai ma lona malo. O i latou ua faatagaina e aoao le talalelei iinei ma tofia e faia le galuega o le a lē faapea e leai se mea e fai pe a te’a ese ma le lalolagi, ae o le a faaauau pea ona faaaoga aia tatau sa maua iinei i lalo o le Perisitua o le Alo o le Atua e auauna atu ai mo le faaolataga o i latou ua maliliu ae le’i malamalama i le upu moni.⁸

E mafai ona avea i tatou ma faaola i le mauga o Siona e auala lea i le faataunuuina o sauniga faa-faaola mo e ua maliliu i totonu o malumalu.

Ia aoaoina a outou fanau ma aoaoina foi outou ina ia iloa ua tatau ona avea outou ma faaola i le mauga o Siona mo i latou ua maliliu ae le’i malamalama i le talalelei, o malumalu a le Atua i luga o nei mauga, ua faatuina foi i isi atunuu, ua fausiaina ma fuafuaina lelei mo le faataunuuina o sauniga paia ua aoga mo i latou ua maliliu e aunoa ma ia sauniga. Aua nei galo ia mea. Ia tuu i o outou mafaufau aua e aoga mo tatou.⁹

O le galuega tele lenei o le togiolaina o o tatou tagata ua maliliu, o le tuu faatasia o e ola ma e oti, o le mana o faamauga… ma sauniga uma lava ua toe faaalia mai e tatau ona faia i ia nofoaga paia ua taua o malumalu, lea ua poloaiina ai i tatou e le Atua ina ia fausia i Lona Suafa paia, … o nei mea uma ua uma ona faaali mai ia te i tatou i lenei Tisipenisione o le atoatoaga sili ma le le pona i talaaga o le lalolagi e pei ona tatou iloa.¹⁰

Tatou te faamoemoe e vaavaai i ni aso o le a i ai ni malumalu i vaega eseese o le laueleele ma mea o loo manaomia ai mo le faafaigofieina i tagata; aua o le mea ua tatou iloaina o se tasi o tiute tauave sili ua i luga o tagata o le Atua i aso nei o le liliu atu lea o latou loto i o latou tama [tagai Malaki 4:5-6; MFF 2], ma fai galuega o loo manaomia e fai mo latou ina ia faatasia ai i le sootaga o le Feagaiga Fou ma le Faavavau mai lea tupulaga i lea tupulaga. E pei ona fetalai mai le Alii, e auala i perofeta, o se tasi lenei o tiutetauave silisili ua tuuina mai ia te i tatou i aso nei.¹¹

E tusa ai ma le aveeseina mai o agaga mai le falepuipui, e moni lava, tatou te talitonu e faatoa mafai ona fai pe a uma ona talai atu le talalelei ia te i latou i le agaga, ma latou taliaina lea lava mea e tasi, ma o le galuega o loo manaomia i le togiolaina o i latou e mafai ona fai e i latou o e o ola. O lenei galuega e tatau ona faatopetope ina ia maua uma e i latou o e talitonu i le lalolagi o agaga le faamanuiaga o le aveeseina mai, ua faaalia mai e faapea o le galuega silisili o le Meleniuma o galuega i totonu o le malumalu mo le togiolaina o e ua maliliu; ma tatou te faamoemoe o le a fiafia i faamanuiaga o faaaliga … i lea lava tulaga e pei ona faaalia i le Alii e faatatau ia te i latou o loo taumafai atu i ai lenei galuega … E foliga mai e faapea a o aoao atu le talalelei i tagata uma, o le lelei ma le leaga, o i latou ua salamo faapea foi i latou e lei salamo i le lalolagi o agaga, e tutusa foi ma iinei, o le togiolaina o le a oo mai na o latou ua salamo ma usiusitai.¹²

O lenei gaoioiga tele ua tuuina mai … i le vaega a le au paia i galuega e faia i malumalu. O le agaga e galulue ai mo le togiolaina o e ua maliliu o le a faalagolago lea i luga o i latou. Ma ua faateleina le fiafia ua faaalia i lenei galuega paia. O lenei galuega, e pei ona tauina mai e Iosefa Samita, “e manaomia mo lo tatou faaolataga, e pei ona fai mai Paulo e faatatau i tama, ‘o i latou e aunoa ma i tatou e le mafai ona faaatoatoaina, e faapena foi i tatou e aunoa ma e oti.’”[MFF 128:15]. O le poloaiga a le Atua e mo le au paia e galulue ma le malosi mo le togiolaina o latou tagata ua maliliu. …

… O le agaga o loo uunaiina le au paia ia galulue mo le togiolaina o e oti o se mea lea o loo toto i loto o fanau o folafolaga ia sa fai i o tatou augatama. O le agaga lava lea e tasi o loo uunaiina loto o tagata taua o le lalolagi o loo faamaumauina le tele o latou taimi e faamaopoopo mai tala faamaumau ma gafa. … E tatau i le au paia ona ave uma avanoa latou te maua e saili mai ai tala faamaumau i le mamao lava e oo i ai le mafai i o latou tuaa, ina ia togiolaina i latou e auala i sauniga paia o loo faia i le Maota o le Atua. Matou te faamalo atu i le au paia mo le filiga i lenei galuega taua ma le manaomia.¹³

Tatou te aveina atu i le lalolagi le lala olive o le filemu. Tatou te tuuina atu i le lalolagi tulafono a le Atua, o le afioga a le Alii, o le upu moni, e pei ona faaalia i aso nei e gata ai mo le laveaiina mai o e ua oti ma le faaolataga o e ola.¹⁴

Fautuaga mo Suesuega

O le a le “Galuega” ma le “Misiona” a le Faaola? O le a le mea sa fai e le Alii Faaola i le lalolagi o agaga e fesoasoani ai i le faataunuuina o lenei galuega taua? (Tagai MFF138:11-12, 18-19, 29-30).
Sa faapefea ona faia le galuega faafaifeautalai i le lalolagi o agaga? O ai faifeautalai? (Tagai MFF 138:29-34, 57-59).
O le a le mea tatou te faia ina ia tatala ai “faitotoa o le falepuipui mo i latou o loo noanoatia pea i filifili o le pogisa, talitonuga sese, ma le le iloa o se mea”? O le a se mea sa fesoasoani i au taumafaiga e sue ai faamatalaga e uiga i ou tuaa ma fai ai sauniga o le malumalu?
E faapefea ona mafai ona “avea i tatou ma faaola i le mauga o Siona”? Aisea ua avea ai lenei galuega, “o se tasi o tiutetauave sili ua i luga o tagata o le Atua i aso nei”?
O a nisi faamoemoega o malumalu? O a ni faamanuiaga ua e maua ona ua uma ona fai galuega mo isi i le malumalu ma ave atu igoa ina ia mafai ona fai galuega?
O le a “le galuega silisili o le Meleniuma”? E faapefea ona tatou auai i lenei galuega i le taimi nei?
E faapefea ona faamanuiaina lou olaga i lou malamalama lelei i le fuafuaga a le Atua mo le togiolaina o e ua maliliu? O le a se mea o ta’u mai i lenei fuafuaga e uiga i le alofa o le Atua i Ana fanau uma?