O Atalii ma Afafine o le Tama e Faavavau

O i tatou o fanau a le Atua, ua foafoaina i Lona faatusa paia ma e mafai ona avea e faapei o Ia.

Mai le Soifuaga o Iosefa F. Samita

Ia Novema 1909, sa tuuina atu ai e Peresitene Iosefa F. Samita ma ona Fesoasoani i le Au Peresitene Sili, o John R. Winder ma Anthon H. Lund, se faamatalaga ua faaautuina “O le Amataga o le Tagata” e tali atu ai i fesili o loo tulai mai pea “i lea taimi ma lea taimi e uiga i le tulaga o le Ekalesia a Iesu Keriso o le Au Paia o Aso e Gata Ai… e tusa ai ma le amataga o le tagata. Ua i ai le talitonuga o se faamatalaga o le tulaga o loo i ai le Ekalesia e faatatau i lenei mataupu taua o le a fetaui le taimi ma aoga lelei.” O lenei faamatalaga e aofia ai upu nei:

“Sa faia e le Atua le tagata i lona lava faatusa, o le faatusa o le Atua na ia faia ai o ia; na faia e ia o i la’ua o le tane ma le fafine.’ [Kenese 1:27.] I nei upu tuusao ma le faigofie sa faaali mai ai e lenei tusitala musuia o le tusi a Kenese i le lalolagi le upumoni e faatatau i le amataga o le aiga o tagata,”¹. O le mataupu lenei o loo i ai vaega mai le “O le Amataga o le Tagata.”

Sa faamaonia mai pea e Peresitene Samita le moni o le uiga faale-tamā o le Atua: “E pei ona ou iloa, ma ona o loo i ai a’u mafuaaga e tatau ai ona iloa, o loo ou i ai iinei ma o loo ola a’u, o lea ou te talitonu ai o loo ia te au le mafuaaga e iloa ai o le Atua, lo’u Tama, o loo soifua.”²

Aoaoga a Iosefa F. Samita

O i tatou o fanau faaleagaga a lo tatou Tama oi le Lagi.

Tatou te mananao e iloa le mea sa tatou o mai ai, ma le mea tatou te o i ai. O fea na tatou o mai ai? Mai le Atua. Sa i ai o tatou agaga ao le’i o mai i lenei lalolagi. Sa i ai i latou i le aufono o le lagi ao lei faavaeina le lalolagi. Sa tatou i ai iina. Sa tatou pepese faatasi ma au a le lagi i le olioli ina ua fausia le faavae o le lalolagi, ma ina ua faataoto le faafanua o lo tatou olaga i luga o le lalolagi ma le faaolataga. Sa tatou i ai iina; sa tatou naunau, ma sa tatou faia se vaega i lenei sauniuniga tele. Sa tatou i ai e aunoa ma se masalosalo i aufono… ina ua ofo mai e Satani lava ia e avea ma faaola o le lalolagi pe afai na te maua le paia ma le mamalu o le Tama i lona faia o lea. Ae sa fetalai Iesu, “Lou Tama e, ia faia lou finagalo, ma ia ia te oe pea le mamalu e faavavau.” O le mea lea, ona o le fouvale o Satani i le Atua, ma lona saili e faaumatia le saolotoga o le tagata, o lea sa teena ai o ia e le Tama ma sa tuliese o ia i lalo, ae sa talia Iesu.

Sa tatou i ai iina, e leai ma se masalosalo, ma auai i na vaaiga uma, sa tatou matua popole i le faataunuuina o nei fuafuaga ma faamoemoega sili, sa tatou malamalama i ai, ma e mo lo tatou manuia sa poloaiina ai, ma e ao ona faataunuuina. O nei agaga ua oo mai i lenei lalolagi ina ia latou maua ni tapeneko po o ni tino, ina ia mafai ona avea faapei o Iesu Keriso, ua “fausia i lona faatusa ma foliga,” mai le amataga o le foafoaga seia oo mai i le taimi nei, ma o le a faaauau pea seia oo mai le iuga, seia oo ina oo mai agaga ua fuafuaina e o mai i le lalolagi ma faataunuuina la latou misiona i la le tino.³

Faauta … o le tagata, o le palealii o galuega a le Atua, i lenei lalolagi, o le mataisau, pe a e manao iai, ua aoao mai e musumusuga ia i tatou, o fanau a Lē Foafoa o mea uma lava e faavavau, o ia ua sili lona atoatoa i lana faalapotopotoga, ua i ai amioga silisili, le mana o le faautauta, ma le poto nai lo se isi lava tagata, ua avea ai o ia ma “alii o le foafoaga,” ma e sili ona faapei o le Foafoa. Tatou te vaai atu i nei mea ma maua ai se faaiuga o lenei galuega e le o se taumatematega, ae o le faaiuga o le fuafuaga ma faamoemoega mamana ma le faautauta, o lena tagata o le Alo o le Atua, ua i ai uiga ma foliga o lona Tama, ma e mai le amataga o le tele o lenei poto, ua avea ai ma soa ma lagolago a le Atua ma ola ai faatasi ma ia, ma sa leiloa se agasala. Sa tuuina atu ia te ia e le Alii le lalolagi o se meatotino ma faasinomaga, ma tulafono mo lona malo, ina ia mafai ai ona ia faataunuuina le fuafuaga faamoemoeina o lana foafoaga ma maua ai le olioli.⁴

O tusitusiga faavae o tusitusiga paia ua faailoa mai ai o tagata uma lava e o mai i lenei lalolagi ma ua fananau mai i le tino, sa i ai lona uiga faaleagaga i le muai olaga, o ni atalii ma afafine o le Tama e Faavavau. … O Iesu Keriso o le ulumatua. O se agaga e fanau mai i le Atua o se tagata e ola pea. A oti le tino, e le oti le agaga. I le toetu o le a ola pea le tino faapea foi ma le agaga.⁵

Ua faia i tatou i le faatusa o le Atua.

O le a le tulaga o le tagata, i le agaga ma le tino, e pei ona muai faia ai? I se tulaga aotelega o le tali ua tuuina mai i upu [nei]. … ’Ua faia e le Atua le tagata i lona faatusa.” O loo faamanino mai i le Tusi a Mamona e faapea: O tagata uma lava sa faia i le amataga i lo’u faatusa” (Eteru 3:15). O le Tama o loo fetalai. Afai, e mafai, ona tatou faamaonia le tulaga o le “Tama o Agaga,” “O le Atua o Agaga o tino uma,” o le a mafai ona tatou iloa le tulaga o le uluai tagata.

O Iesu Keriso, le Alo o le Atua, o le “faatusa moni” o lona lava Tama (Eperu 1:3). Sa ia savalia le fogaeleele e faapei o se tagata, o se tagata atoatoa, ma faapea mai i se tali i se fesili ua tuuina atu ia te ia: “O le ua vaai mai ia te au ua vaai o ia i le Tama” (Ioane 14:9). O lenei lava mea ua tatau ona faaleleia le faafitauli mo se maliega o se mafaufau loloto ma le paia. O le iuga e faigata ona taofia, pe afai o le Alo o le Atua ua matua foliga ( o lona uiga o le faatusa) o lona lava Tama, o lona Tama ua faapei o le tulaga o le tagata; aua o le tulaga lena o le Alo o le Atua, e le gata i le taimi o lona soifua i la le tino, ae o le taimi foi e lei fanau mai o ia i le tino, ma ina ua tuanai lona toetu. O le tulaga lenei na avea ai le Tama ma le Alo, o ni peresona e lua, na faaali mai ia Iosefa Samita, ina o tama o ia e sefulufa ona tausaga, sa ia maua ai lana uluai faaaliga.

Pe afai na faia e le Atua le tagata—le uluai tagata—i lona lava faatusa ma foliga, sa ia faia o ia e faapei o Keriso, ma mulimuli ane e faapei o tagata o le taimi o Keriso ma le aso nei. O lena tagata sa faia i le faatusa o Keriso, e pei ona taua mai i le Tusi a Mose: “Ma o au le Atua, sa faapea atu i lo’u Atalii e Toatasi, na fanaua ma sa i ai faatasi ma au talu mai le amataga. Ina ta faia ia o le tagata i lo ta’ua faatusa, ia foliga ia i ta’ua, ma ua faapea ona faia. … Ma o au, le Atua, na faia le tagata i lo’u lava faatusa, o le faatusa o lo’u lava Atalii e Toatasi sa ou faia ai o ia, o le tane ma le fafine sa ou faia i laua” [Mose 2:26–270.]

O le Tama o Iesu o lo tatou Tama foi lea. O Iesu lava ia na Ia aoao mai lenei upumoni, ina ua ia faatonu i ona soo le ala e tatalo ai: “Lo matou Tama e oi le Lagi,” ma isi foi. O Iesu, foi o le ulumatua o atalii uma o le Atua—o le atalii pele muamua i le agaga, ma o le atalii pele e toatasi i le tino. O ia o lo tatou uso matua, ma o i tatou foi, e faapei o ia, ua foliga i le Atua. …

“Na faia e le Atua le tagata i Lona lava faatusa.” O lenei mea e moni i le agaga e faapei ona moni i le tino, ua na o le faaofuina o le agaga, lona fesoasoani; o le lua ua faatasi i ai i le tagata [tagai MFF 88:15]. O le agaga o le tagata ua i ai le tulaga o le tagata, ma o le agaga o meaola uma ua i ai i le faatusa o o latou tino. Na aoao manino mai lenei mea e le Perofeta o Iosefa Samita (MFF 77:2). …

Ina ua vaaia e le uso o Iareto le Alii o lē sa i lona tino agaga [tagai Eteru 3:6–16], sa Ia faaali mai Ia lava o se tagata, ua i ai aano ma le toto, sa ia faaali mai o se tagata, ua i ai le “tino, vaega ma le lagona,” e faapei o isi tagata, e ui ina silisili lona maualuga nai lo isi uma, aua o Ia o le Atua, o Ia lava o le Alo o le Atua, ua liu tino tagata le upu: o totonu ia te Ia o loo mau ai le tumu o le Aigaatua.” [Kolose 2:9.] Pe le tatau ea i se a ona faaali mai o ia o se tagata? O le tulaga lena o lona agaga, ma e tatau ona i ai sona faamalumaluga talafeagai, o se tapeneko e tatau ai. Sa afio mai o Ia i le lalolagi e pei ona ia folafola mai (III Nifae 1:13), i se tapeneko o se pepe meamea, ma tausia faasolosolo seia atoatoa le tino o lona agaga. Na sau o Ia e faapei ona o mai tagata i augatupulaga, ma faapei ona o mai ai pea tagata. Peitai, o Iesu, e pei ona faaalia, o le atalii e toatasi o le Atua i le tino.

O Atamu, lo tatou tama sili, “o le uluai tagata,” sa faapei o Keriso, o se agaga sa i ai i le muai olaga, ma faapei o Keriso sa i ai foi sona tino e tatau ai, o le tino o le tagata, ma sa avea ai ma “tagata ola.” O le mataupu faavae o le muai olaga,—ua faaalia manino mai ai, aemaise lava i aso e gata ai, ua liligi mai ai ia te i tatou lologa o le malamalama sili semanu e avea ma ni faafitauli lilo o le amataga o le tagata. Ua faaalia mai o tagata, i le avea ai o se agaga, sa pele ma fanau mai i ni matua faalelagi, ma tausia ina ia matua i le maota e faavavau o le Tama, ao le’i oo mai i le fogaeleele i le tino faaletino ina ia maua ai aafiaga faaletino. O loo aoao mai ai o tagata uma sa i ai i le agaga ao lei i ai se tagata i la le tino, ma o i latou uma ua aumau ai i le lalolagi mai le taimi o Atamu ua i ai tino ma avea ma tagata i lena lava tulaga.

Ua talitonu nisi o Atamu e le o le uluai tagata i luga o le fogaeleele, ma o le uluai tagata soifua o se faasolosologa mai se olaga maualalo o le foafoaga o manu. Peitai ane, o nei talitonuga, o teori po o manatunatuga o tagata. Ua folafola mai i le afioga a le Alii o Atamu o le “uluai tagata o tagata uma lava” (Mose 1:34), ma ua avea ma o tatou tiute tumau le ta’ua o ia o le uluai matua o lo tatou ituaiga. Sa faaali atu i le uso o Iareto o tagata uma sa faia i le amataga i le faatusa o le Atua; pe tatou te talitonu i ai o lona uiga o le agaga poo le tino, poo mea uma e lua, tatou te tau atu ai i lea lava faaiuga: Sa amata le olaga o le tagata o se tagata ola, i le faatusa o lo tatou Tama oi le lagi.

E moni o le tino o le tagata e amata mai o se fua, ona avea lea ma se pepe meamea, e segia i se vaega faapitoa e le agaga o le tapeneko o loo i ai, ma o le tamaitiiti, ina ua tuanai ona fanau mai, o le a tuputupu a’e ma avea o se tagata.⁶

E avea i tatou faapei o le Atua lo tatou Tama pe a usiusitai i mataupu o le talalelei.

Sa amata e le Atua ma fuafuaina mea uma, ma o tagata uma o lana fanau. Ua tatou fananau mai i le lalolagi o i tatou o ana fanau; ua ia te i tatou uiga e tutusa. O fanau a tagata e afua mai i le Silisiliese, tusa pe manao le lalolagi e faailoa mai pe leai. O Ia o le Tama o o tatou agaga. O Ia o le tupuaga o o tatou tapeneko faalelalolagi. Tatou te ola ma gaioi ma i ai o tatou tagata i le Atua lo tatou Tama Faalelagi. Ma talu ai tatou te o mai mai ia te Ia ma a tatou taleni, o tomai, lo tatou atamai, o lea e ao ai ona tatou naunau e faailoa atu o Ia lava e ou le tamaoaiga uma e mafai ona tatou maua i le olaga, ma faafoi atu le viiga ma le mamalu mo mea uma i la le tino. …

… [O le tagata] ua faia i le faatusa o le Atua lava ia, ina ia mafai ai ona ia mafaufau, tomanatu, tatalo, faaaoga le faatuatua; e mafai ona ia faaaoga lona malosi e faataunuu ai manaoga o lona loto, ma pe afai e tuuina atu lona taumafai i le taitaiga sao, o le a ia maua ai le vaega faateleina o le Agaga o le Silisiliese e musuia o ia i le poto sili, i le tamaoaiga sili ma le fiafia i le lalolagi; ae afai ua ia faaaoga sese lona malosi mo le tiapolo, o le a aveesea le musumusuga a le Silisiliese mai ia te ia, seia matua pogisa lava ma lē malamalama lava o ia, ma e tusa ai ma lona iloa o le Atua, ua valea o ia e faapei o se meaola ua le mafai ona tautala ma mafaufau.

… E ao ona avea i tatou faapei o le [Atua]; ina ia mafai ona nonofo i luga o lona nofoalii, ma maua le pule, mana, ma faatamaoaigaina e faavavau. Sa fuafuaina e le Atua lenei mea mai le amataga. … O le faamoemoega lenei o lo tatou ola ai i le lalolagi; ma e mafai ona tatou maua nei pe a usiusitai i ni mataupu faapitoa, e ala i le savavali ai i ni ala faapitoa, e ala i le maua o ni faamatalaga faapitoa, o le poto faapitoa mai le Atua, a leai o lona uiga o le a lē mafai e se tasi ona faamaeaina lana galuega pe faataunuuina le misiona ua ia sau ai i le lalolagi. O nei mataupu o mataupu o le talalelei o le upumoni e faavavau, o mataupu o le faatuatua, salamo, ma le papatisoga mo le faamagaloina o agasala, o mataupu o le usiusitai i le Atua le Tama e faavavau; aua o le usiusitai o se tasi o uluai mataupu poo tulafono o le lagi.⁷

O le tagata o le atalii o le Atua, ua faia i le faatusa paia ma faauuina i uiga paia, e oo lava i le atalii pepe o se tama ma se tina i le lalolagi, o le a oo mai le taimi e mafai ai ona avea ma tagata matua, o lea o le tamaitiiti e le’i atoatoa lona tuputupu ae mai matua selesitila e mafai, e ala i le malamalama i le gasologa o tausaga, ona avea e faapei o le Atua.⁸

Fautuaga mo Suesuega

O le a sou lagona pe a e iloa o oe o se atalii o le Atua? E faapefea e lenei malamalama ona aafia ai au faaiuga ma gaioiga i aso uma?
O fea na tatou muai faalogo ai i le fuafuaga a lo tatou Tama o i le Lagi mo lo tatou alualu i luma e faavavau? O a ni faamoemoega na tatou o mai ai i le lalolagi?
O a ni uiga ua tatou maua i le avea ai o ni fanau a le Atua? O a ni faasalaga e tusa ai ma le faaaoga sese o o tatou uiga ma le poto ua foai mai le Atua?
O a molimau mai tusitusiga paia o loo ia i tatou o le Atua le Tama ma lona Alo o Iesu Keriso, e i ai tino i le tulaga o tagata? O le a le taua o nei molimau ia te outou?
E faapefea e le mataupu faavae o le muai olaga ona sasaa mai tafega o le malamalama sili i fesili e uiga i lo tatou amataga?
E faapefea e le upumoni faaalia e uiga i le amataga o le tagata soifua ona ese mai isi teori po o manatunatuga o le tagata i lenei mataupu?
Aisea e taua ai lo tatou tuuina atu i lo tatou Tama oi le Lagi “le paia ma le mamalu o mea uma ua tatou faataunuuina i le tino?
O a mataupu e ao ona tatou usiusitai i ai ina ia mafai ai ona avea i tatou faapei o lo tatou Tama oi le Lagi?