O le Peresitene o le Perisitua Maualuga o le Ekalesia

E ao ona tatou lagolago ma faalogo i le Peresitene o le Ekalesia, ua umia ki o le perisitua paia ma taitai i le Ekalesia a le Atua i le lalolagi.

Mai le Soifuaga o Iosefa F. Samita

O Peresitene Iosefa F. Samita sa lagolagoina o le Peresitene lona ono o le Ekalesia a Iesu Keriso o le Au Paia o Aso e Gata Ai i se konafesi faapitoa i le aso 10 o Novema 1901. O lenei valaauga sa faataunuuina ai le folafolaga a Peresitene Lorenzo Snow o Iosefa F. Samita o le a avea ma Peresitene o le Ekalesia.¹

Sa valaauina o ia o se Aposetolo e Peresitene Polika Iaga i le tausaga e 1866 ma sa avea o ia ma se Fesoasoani mo ni Peresitene e toafa o le Ekalesia— o Polika Iaga, Ioane Teila, Uilifoti Uitilafi, ma Lorenzo Snow—sa masani ona molimau Peresitene Samita “i le pule paia… i le faamaoni, i le mamalu, i le mama o le ola, i le atamai, ma i le paia o le misiona ma tofiga” o ia auauna a le Atua.²

Mo le 17 o tausaga sa auauna ma le faamaoni o ia o se Peresitene o le Ekalesia, ma le lotomaualalo sili ma le maelega . Sa ia fai atu i tagata o le Au Paia, “E lē taua lava a’u i lenei galuega, o se mea noa a’u sei vagana o le taumafaiga lotomaualalo e faia lo’u tiute e pei ona tuuina mai e le Alii ia te au le atamai ou te faia ai nei mea.”³

Sa ia molimau o le Ekalesia ua taitaiina mai le lagi: “ Ou te fia fai atu ia te outou sa leai lava se taimi i le faatulagaina o le Ekalesia a Iesu Keriso o le Au Paia o Aso e Gata Ai, sa taitaiina ai e se tagata le Ekalesia, e leai lava se taimi e tasi. E lei i ai foi i le taimi o Iosefa, e lei i ai foi i taimi o Polika Iaga, e lei tupu lava i soo se isi taimi, ma e o le a le tupu lava. O le taitaiga o lenei galuega i tagata o le lalolagi o le a lē tuuina lava i tagata. O le galuega a le Atua.”⁴

Aoaoga o Iosefa F. Samita

O le Atua lava ia e taitai Lana galuega ma Ona tagata.

Sa faatuina e le Atua mea uma lava i o latou tulaga. O le fale o le Atua o se fale faatulagaina tatau, a e lē o se fale o le faasoesa. I lenei fale, o le Atua lava ia o le Ao Silisili, ma e tatau ona usiusitai ia te ia. O Keriso o le foliga ma le faatusa o ia, o lona Alo Pele e Toatasi, ma ua tu o ia o lo tatou Faaola ma lo tatou Atua. … E sosoo atu i le Atua ma Keriso, i le fogaeleele o loo i ai lē ua faaee i ai ki ma le mana ma le pule o le Perisitua paia, ma o ia ua tuuina atu i ai le aia tatau o le au Peresitene. O ia o le fofoga o le Atua i ona tagata, i mea uma lava e faatatau i le atinaeina o Siona ma le faaolataga faaleagaga ma le faaletino o tagata.⁵

E le taitaiina e se tagata ia tagata o le Atua poo lana galuega. E filifili e le Atua ia tagata ma fai i latou ma meafaigaluega i ona aao mo le faataunuuina o lona faamoemoega, ae o le paia ma le mana e a le Tama ia, o loo i ai le atamai ma le malosi e taitaiina ona tagata ma vaaavaaia lana Siona. Ou te le o taitaiina le Ekalesia a Iesu Keriso, poo le Au Paia o Aso e Gata Ai, ma e ou te manao ina ia malamalama lelei lenei mea. E le faia e se tagata. … Ia manatua o le Atua na te taitaiina le galuega. O lana galuega. E le o se galuega a se tagata. Ana faapea o se galuega a Iosefa Samita, poo Polika Iaga, poo Ioane Teila, Uilifoti Uitilafi, poo Lorenzo Snow, semanu latou te lē gafatia ia tofotofoga na oo mai i ai.⁶

O le mamalu ma le viiga e tuuina atu [i le Peresitene o le Ekalesia,] o le meafaigaluega i aao o le Atua i le faatuina o le faatulagaga i le totonugalemu o le lē mautonu, ma nisi o tulafono ua tatou iloa e tatau ona mulimuli ai.⁷

E toatolu faitaulaga sili pulefaamalumalu o loo tutu i le Ao o le Ekalesia i le lalolagi.

O le Atua le Tama, le Atua le Alo, ma le Atua le Agaga Paia, ua fausia ai le Aigaatua ma le korama le mafaatusalia e pulea ia foafoaga uma a le Tama. E toatolu alii o loo tutu i le Ao o le Ekalesia i le lalolagi… o alii o lo latou agaga o le faia o mea lelei mo tagata soifua uma, o la latou vaavaaiga sili o le manuia o tagata o le Alii, ma o la latou taumafaiga e le aunoa o le tuufaatasia lea o i latou ma ia galulue, o le tagata i lona nofoaga ma le valaauga, e fesoasoani e atinae ia Siona.⁸

O le Alii i le amataga o lenei galuega sa faaalia e faapea e tatau ona toatolu ia faitaulaga sili e pulefaamalumalu i le Perisitua Maualuga o lana Ekalesia ma le Ekalesia aoao. (MFF 107:22, 64, 65, 66, 67, 91, ma le 92.) Sa ia faaee atu i o latou luga uma le pule e tatau ai e pulefaamalumalu ai i mataupu uma o le Ekalesia. Ua latou umia ki o le fale o le Atua ma sauniga o le talalelei, ma faamanuiaga uma ua toefuataiina mai i le lalolagi i lenei tisipenisione. O lenei pule o loo i ai lea i le au Peresitene o faitaulaga sili e toatolu. O i latou o ni Peresitene se toatolu. O le Alii lava ia na valaauina i latou. (Mataupu Faavae ma Feagaiga vaega e 107:29.) Ae toatasi le Peresitene pulefaamalumalu, ae o ona fesoasoani o peresitene foi.⁹

O loo pulefaamalumalu i le Ekalesia aoao ia le aufono ua ta’ua o le au peresitene sili, e aofia ai le peresitene ma fesoasoani e toalua, ona sosoo ai lea ma aposetolo e toasefululua, e tutusa le latou pule ma le au peresitene sili, e ui e galulue i latou i lalo o la latou taitaiga.¹⁰

O le taitai pulefaamalumalu o le Ekalesia e ao ona ta’ua ma faasuafaina o le “Peresitene;” e faapena foi i fesoasoani i le Au Peresitene Sili, aua o i latou taitoatasi o se Peresitene e pei ona faapea mai ai le Alii (MFF 107:22, 24, 29); ae le talafeagai le soona talanoa e uiga i le Peresitene o le Ekalesia, ma e le sa’o foi le faalagi o ia o le “Perofeta,” “Tagata Vaai,” poo le Tali Faaaliga,” e ui o nei suafa faaeaina ua faatatau tonu mo ia, ma e faapea foi i ona fesoasoani, ma i latou o le Toasefululua. … O faasinomaga nei o mana faaleagaga ma galuega, ma e matua paia na’uā, e lē tatau ai ona soona faaaoga e faaigoa ai.¹¹

E i ai lava le ao o le Ekalesia, ma afai ua aveeseina le Au Peresitene o le Ekalesia ona o le maliu poo nisi o mafuaaga, o le ao e sosoo ai o le Ekalesia o Aposetolo ia e Toasefululua, seia oo ina toe faatulaga se au Peresitene o ni faitaulaga sili pulefaamalumalu e toatolu o e ua i ai le aia tatau e umia ai le tofi o le Au Peresitene Sili mo le Ekalesia;… ma o le tiute o Aposetolo e Toasefululua o le faaauau loa lava, i le tulaga ua uma ona faasino mai, ina ia faatulaga le Au Peresitene Sili, ina ia leai se faaletonu i le galuega ma le faatulagaga o le Perisitua i le Ekalesia.¹²

O le Peresitene o le Perisitua Maualuga e umia ki o le perisitua paia.

O le Perisitua i lona tulaga lautele o le pule ua tuuina mai i le tagata e galue ai mo le Atua. O alii uma lava ua faauuina i soo se vaega o le Perisitua, ua i ai le pule ua faamatuu atu ia te ia.

Ae e alagatatau i galuega uma ua faia i lalo o lenei pule ona faia i le taimi ma le nofoaga e tatau ai, i le auala e tatau ai, ma le faatulagaga e talafeagai ai. O le mana e taitaiina ai nei galuega o loo i ai lea i ki o le Perisitua.¹³

O ki uma ma le pule ma le mana uma lava e tusa ai ma le taitaiina a le Ekalesia ma le Perisitua Arona ma le Mekisateko o loo taulai atu i le taitai pulefaamalumalu o le Ekalesia. E leai se pisinisi poo se tofiga, i totonu o le Ekalesia, e le mafai e le Peresitene o le Ekalesia ona ia faatumuina, ma faia, pe a talafeagai ai, pe afai ua manaomia ai o ia na te faataunuuina [tagai MFF 107:9]. Ua ia umia le tofiga o le peteriaka; ua ia umia le ofisa o le faitaulaga sili ma le aposetolo, o le fitugafulu, o le toeaina, o le epikopo ma le ositaulaga, o le aoao ma le tiakono i le Ekalesia; o ia tofiga uma ua i ai i le Au Peresitene o le Ekalesia a Iesu Keriso o le Au Paia o Aso e Gata Ai, ma e mafai ona galulue i latou i soo se valaauga po o valaauga uma pe a i ai se tulaga e manaomia ai.¹⁴

E leai lava se isi, ae ua na o le toatasi lē ua tofia i se taimi na te umia ki o le malo o le Atua i le lalolagi. Ao i ai Keriso i le lalolagi sa ia umia ia ki; ae ina ua ia tuua le lalolagi, sa ia tuuina atu ia Peteru, o ia o le Peresitene poo le taitai o le au aposetolo; ma ua ia te ia le aia tatau e taitai ma maua ai faaaliga mo le Ekalesia, ma tuuina atu ia fautuaga i uso uma. Ina ua maea ona faasagatau Satani ma tagata amiolega i le Ekalesia, faasatauro i le Faaola ma fasioti i aposetolo, sa aveesea ki o le malo mai le lalolagi. … Mai le taimi na aveesea mai ai ki o lenei Perisitua mai le lalolagi seia oo ina maua e Iosefa Samita, sa leai se alii na ia maua lena Perisitua, poo ki foi, ma le pule e atinaeina ai le Siona a le Atua, ma saunia se ekalesia poo tagata mo le afio faalua mai o Keriso.¹⁵

Ua faamanino mai i le Mataupu Faavae ma Feagaiga ao i ai le aia tatau i taitai taitasi o le Ekalesia e galue ai i lona lava valaauga, “o le Perisitua Mekisateko ua umia le aia tatau o le au Peresitene, ma ua i ai le mana ma le pule i luga o taitai uma o le Ekalesia i augatupulaga uma i le lalolagi, e taitai ai i mea faaleagaga.” (Mataupu Faavae ma Feagaiga, vaega e 107:8.)

E le gata i lea, o le faaaliga lava lea i le fuaiupu e 65 ma le 66, o loo ta’u mai ai ia te i tatou:

“O lea, e tatau ona tofia ai se Perisitua Maualuga e taitai i le Perisitua, ma ta’ua o ia o le Peresitene o le Perisitua Maualuga o le Ekalesia:

“O lona uiga, o le Faitaulaga Sili Pulefaamalumalu i le Perisitua Maualuga a le Ekalesia.”¹⁶

O le mea aupito taua e tatau ona manatua o le Perisitua e sili atu nai lo se isi lava tofiga; ma soo se alii o ia umia le Perisitua Mekisateko e mafai, e ala i lona umia o lea perisitua, ona faataunuu soo se sauniga e talafeagai ai, pe e tusa ai ma le fesootaiga, pe a valaauina ina ia faataunuuina e se tasi o umia le pule e tatau ai, o lenei pule e tatau ai o loo i ai i le Peresitene o le Ekalesia, poo se tasi ua ia tofia. O tofiga uma lava o le Ekalesia o loo i lalo o lana taitaiga, ma e taitaiina o ia e le Atua. Ua filifilia foi o ia e le Alii o le Ao o le Ekalesia, ma avea ai, o le Perisitua o le Ekalesia (e aofia ai ma ona taitai ma ona tagata), o le a talia ma lagolagoina o ia. (Mataupu Faavae ma Feagaiga, vaega 107:22.)¹⁷

E filifilia le Peresitene na te mauaina faaaliga mo le Ekalesia aoao.

Ua filifilia foi e le Alii se alii e toatasi i le taimi i le lalolagi na te umia ki o faaaliga mo le Ekalesia aoao i ona faalapotopotoga uma, pule, sauniga ma mataupu faavae. O le agaga o faaaliga ua oo mai i tagata uma o le Ekalesia mo le manuia ma le faapupulaina o tagata taitoatasi ua maua ia faaaliga, ma e tusa ai ma le tulaga ua valaauina ai o ia e galue ai. Ae mo le Ekalesia aoao, o lē o loo tu i le ao ua filifilia ia na o ia lava e maua faaaliga e ala i poloaiga ma le faamutaina o feeseeseaiga. E fesoasoani i ai ona fesoasoani, na te pulefaamalumalu i le Ekalesia aoao i le lalolagi atoa; o lea o le Au Peresitene Sili o loo umia le aia e tuuina atu ai le taitaiga e tusa ai o mea uma aua le atinaeina ma le pulega ma tulafono o le tino.¹⁸

O tagata o le Au Paia ua umia o se mataupu faavae o lo latou faatuatuaga, e faapea… o le Peresitene o le Ekalesia ua faaalia ua na o ia le tagata e ala mai ai fesootaiga paia e avea o ni tulafono ma mataupu faavae i le tino o le ekalesia; o lea e mafai ai ona oo mai o faaaliga i soo se taimi, e uiga i soo se mataupu, faaleagaga pe faaletino, e pei ona finagalo i ai le Atua; ma, le mea mulimuli, e faapea, i le manatu o tagata faatuatua uma o le Au Paia, o nei faaaliga, poo le a lava lana fautuaga, timaiga poo manaoga, ua sili ona taua.¹⁹

O le taimi e tulai ae ai se tagata ma faapea ua ia te ia le aia e pulea ma faatonu ai, poo le nofo e faamasino ai i ona uso, aemaise ia i latou ua pulefaamalumalu, e ao ona vave taofia o ia, ne’i oo mai feteenaiga, fevaevaeaiga ma le lē femalamalamaai. O alii ma tamaitai uma o lenei Ekalesia e ao ona sili lo latou iloa nai lo le faamatuu atu i sea ituaiga agaga; o le taimi e oo mai ai lenei lagona ia i latou e ao ona latou tetee iai, aua ua feteenai tonu ma le faatulagaga o le Perisitua, ma le agaga ma le atamai o lenei galuega. Tatou te le taliaina lava se mea e pule faamalosi ae o mea e tuuina sa’o mai i le auala filifilia, o le faatulagaga aloaia o le perisitua, o le auala ua filifilia e le Atua ua ia faailoa mai ai lona finagalo ma manatu i le lalolagi.²⁰

O le a matua lē talafeagai lava, lē faavaea ma mataga le manatu ifo a mae’a ona filifili e le Atua se tasi o alii ma valaauina o ia i lenei galuega, ona ia le manatu lea ia te ia ma alu atu i se isi tagata ina ia faataunuuina ai le faamoemoega lava lea e tasi. E leai se tagata mafaufau lelei na te talia i soo se taimi sea valaauga. Ina ia mafaufau totoa i lenei manatu o se faasagatau lea i le Silisiliese ma le lē mautonu, ma avea ai ma mafuaaga o le fenumiai, feteenaiga ma fevaevaeaiga. E le mafai ona faatuina le malo o le Atua i le lalolagi i se auala faapenei.²¹

Afai [o le Peresitene o le Ekalesia] ua le faamaoni, o le a aveesea e le Atua o ia mai lona valaauga. Ou te molimau atu i le suafa o le Atua o Isaraelu o le a lē tuuina le ao o le Ekalesia, o lē na Ia filifilia e tulai mai le ulu, e solia Ana tulafono ma liliuese; o se taimi lava na te faia ai se mea o le a tau atu ai i lea tulaga i se taimi, o le a aveesea e le Atua o ia. Aisea? Aua afai e nofoia e se tagata amioleaga lena tulaga, pe afai o le a faatagaina, o le a leaga le punavai, o se mea Na te lē mafai ona faatagaina.²²

O le a faamamaluina e le Atua mafaalauteleina Ana auauna.

E le o se galuega [lenei] a le tagata ae o le Atua Silisiliese; ma e o Lana matafaioi o le tagai o tagata o loo faatumuina lenei valaauga o ni tagata ua tusa ai ma Lona finagalo, o tagata latou te maua ia faatonuga mai ia te Ia, ma o le a tauaveina lena e tusa ai ma musumusuga o Lona finagalo.²³

O le Perisitua [a le Atua] e tatau ona i ai i tagata sa’o mo le nofoaga, o alii o le a saunia e faataunuu le galuega, o alii e mafai ona latou galulue ma faagaioi ia mataupu o lana Ekalesia e tusa ai ma musumusuga o lona lava finagalo. O le taimi lava e saili ai e tagata nisi punavai, o le taimi foi lea o le a latou lafoai ai i latou lava i aafiaga taufaasese a Satani, ma tuuina atu i latou lava e avea o ni auauna a le tiapolo; ua latou faagalo le faatulagaga moni e ala mai ai faamanuiaga e maua ai le fiafia; ua latou laa ese ma le faamaonia i le malo o le Atua, ma ua i ai i se tulaga matautia.²⁴

O le a faamamalu ma faalautele e le Atua ana auauna i luma o tagata. O le a ia lagolago i latou i le amiotonu. O le a ia siitia maualuga i latou, faaeaina i latou i lona afioaga, ma o le a latou maua lona mamalu e faavavau lava.²⁵

Ou te tuuina atu la’u molimau i le pule mamalu ai latou na sosoo mai ma le Perofeta o Iosefa Samita i le au Peresitene o lenei Ekalesia. O i latou o tagata o le Atua. … Ou te molimau atu i le faamaoni, i le mamalu, i le mama o le olaga, i le poto, ma le paia o le misiona ma le valaauga o Polika [Iaga], o Ioane [Teila], o Uilifoti [Woodruff], ma Lorenzo [Snow]. Na musuia i latou e le Atua e faatumuina le misiona ua valaauina i ai i latou, ma e ou te iloa lena mea. Ou te faafetai i le Atua mo lena molimau ma le Agaga ua musuia a’u ma uunaia a’u i nei alii, i la latou misiona, i nei tagata, i lo’u Atua ma lo’u Togiola.²⁶

Ou uso e ma tuafafine, o la’u matafaioi, o lo’u tiute, o le talai atu o le Talalelei a Iesu Keriso ma o Ia sa faasatauroina ma toetu mai le tuugamau ma o loo nofo i le nofoalii i le paia, mamalu ma le matagofie i le itu taumatau o lona Tama, lo tatou Atua. … Ou te faia le mea e sili ona mafai, o le mea sili ou te iloa, mo i latou ua faatuatuaina ai a’u e le Atua ou te tausia. E tatau foi ona ou faia lo’u tiute mo tagata o le Atua ua Ia finagalo e avea ai a’u o se faifeau ma faiaoga lotomaualalo o le Talalelei.²⁷

O le galuega lenei a le Alii, ma ou te talosaga atu ia te outou ina ia aua nei galo. Ou te talosaga ia te outou ina ia talitonu i ai; aua e moni. O mea uma lava na fetalai i ai le Alii e faatatau i lenei galuega i aso e gata ai o le a oo mai lava. E le mafai e le lalolagi ona taofia. … O le Atua o loo i le foeuli ma o le a ia taitai ona tagata i le manumalo.²⁸

I soo se taimi, pe afai e i ai, ou te faia ai se upu e talia e le Atua, i soo se taimi ou te tautala ai i Lana upumoni, e ala mai i le auai mai ma le aafiaga o Lona Agaga, ma i Lona mamalu ma Lona viiga ou te faataunuuina ai. Ou te lē aveaina se mamalu mo a’u lava. Ou te le manaomia ni mamalu; ou te lē talia sea tulaga sei vagana ai o le avea ai o se tagata o le Ekalesia a Iesu Keriso, o le mamalu o le maua o se tulaga mama, manino, lē maluelue, ma mausali, i le malo o lo’u Atua ma Lana Keriso.²⁹

O le malo o le Atua poo le leai foi, e tusa ai ma lo’u iloa. E lē taua lava a’u i lenei galuega, ma o a’u o se mea noa, sei vagana ai se taumafaiga lotomaualalo e faia lo’u tiute e pei ona tuuina mai e le Alii ia te au le atamai ou te faia ai nei mea. Ae o le malo o le Atua. O le uiga o la’u tala o le malo o le Atua, o le faalapotopotoga lea o le Ekalesia a Iesu Keriso o le Au Paia o Aso e Gata Ai, ma o Iesu Keriso o le tupu ma le ao.³⁰

Fautuaga mo Suesuega

O ai e taitaiina le Ekalesia? Aisea e taua ai lo tatou malamalama e “lē taitaiina e se tagata le malo o le Atua poo lana galuega”?
O a faamanuiaga ua folafola i tagata o le Ekalesia pe a latou mulimuli ma le faatuatua i le Peresitene o le Ekalesia? (Tagai foi MFF 21:4–6.) O a ni auala ua faamanuiaina ai outou e ala i le mulimuli i fautuaga a perofeta soifua?
E faapefea ona outou lagolagoina le Au Peresitene Sili ma le Korama a Aposetolo e Toasefululua i la latou galuega?
O le a le uiga o le “faalaniga faaeaina” o le perofeta, tagata vaai, ma tali faaaliga? O ai e faatatau i ai nei suafa?
O a ki o le Perisitua? O le a le uiga o le lagolagoina o le Peresitene o le Ekalesia ua na o ia le tagata i le lalolagi ua i ai ma ua tofiaina e faaaoga ki uma o le perisitua?
Aisea e taua ai le iloa ua na o le Peresitene o le Ekalesia ua valaauina e maua faaaliga mo le Ekalesia aoao? E faapefea ona tatou puipui mai le talitonuina o perofeta pepelo ma faaaliga pepelo?
Aisea e mafai ai ona tatou talitonu o le Peresitene o le Ekalesia o le a taitaiina pea i tatou e tusa ai ma le finagalo o le Atua?