Kapitulo 19

Matinguhaon, Matinuoron, Kinasingkasing nga Pag-ampo

Kita makadawat og daghang mga panalangin kon kita makanunayong maghimo sa kinaugalingon ug pangpamilya nga mga pag-ampo.

Gikan sa Kinabuh ni Heber J. Grant

Isip usa ka batan-ong lalaki, si Heber J. Grant, kanunay nga magbisitahan sa panimalay ni Presidente Brigham Young. Kon si Heber maatlan sa panahon sa pag-ampo, siya dapiton sa pagluhod uban sa pamilya ug moapil sa pag-ampo sa pamilya. Kadto nga mga pag-ampo may malungtarong epekto kang Heber. Siya nahinumdum sa kaulahian, “Labaw pa sa usa ka higayon, tungod sa pagdasig sa Ginoo ngadto ni Brigham Young samtang siya nangamuyo sa Dios alang sa paggiya, ako mihangad, milingi ug mitan- aw sa dapit diin si Brigham Young nag-ampo, aron tan-awon kon ang Ginoo wala ba diha. Kanako ingon ug siya nakigsulti sa Ginoo, sama sa usa ka tawo nga nakigsulti sa laing tawo.”¹

Daghang mga panghitabo sa kinabuhi ni Presidente Heber J. Grant naghatag og panig-ingnan sa iyang pagsalig sa iyang Langitnong Amahan ug sa iyang hugot nga pagtuo diha sa gahum sa pag-ampo. Pananglitan, sa dihang ang iyang unang asawa hapit na mamatay, ang iyang kamagulangang anak nga babaye hilabihan ang kaguol ug kalibog. Siya nag-ampo pag-ayo nga ang iyang anak makadawat sa kamatayon sa iyang inahan (tan-awa sa mga pahina 55–56 niini nga basahon). Sa ubang mga higayon, si Presidente Grant nag-ampo sa pagtabang sa iyang igsoon sa laing inahan kinsa nasalaag gikan sa Simbahan (tan-awa sa mga pahina 13–15) ug sa pagpangamuyo sa Ginoo sa pag-ayo sa usa ka batang- babaye nga gitakbuyan og dipterya (tan-awa sa pahina 119).

Sa iyang mga pakigpulong ngadto sa mga Santos, si Presidente Grant sa kanunay mipakigbahin sa mga pag-ampo sa iyang kasingkasing. Siya misulti sa iyang paglaum nga ang Ginoo mogiya sa mga pangulo sa pangagamhanan sa ilang mga kapangakohan.² Siya mipahayag sa iyang lawom ug kinasingkasing nga pag-ampo nga ang Ginoo manalangin sa mga sundalo ug sa ilang mga pamilya sa panahon sa gubat.³ Siya miingon nga siya nag-ampo “alang sa tanang mga opisyal niini nga Simbahan, sa Priesthood man o sa kaabag nga mga asosasyon.”⁴ Mihangyo siya sa Dios sa pagtabang sa mga Santos nga magsunod sa ebanghelyo ug sa paggiya sa uban ngadto sa kahibalo sa kamatuoran.⁵ Ug siya mipaambit bahin sa iyang pangamuyo alang sa iyang kaugalingon: “Ang akong kanunay ug matinguhaon nga pag-ampo… mao nga ang akong hunahuna dili mahimong mangitngitan, nga ako dili mobiya sa dalan sa kaayo ug katarung, nga sa akong pagkatigulang hinaut nga madugangan ang akong panabut, nga ang kahayag ug pagdasig sa Espiritu sa Ginoo modasig sa akong kasingkasing ug hayagan ang akong panabut ug kanunay akong magmalig-on ug matinuoron diha sa pag-alagad sa akong Langitnong Amahan.”⁶

Mga Pagtulun-an ni Heber J. Grant

Kinahanglan kitang mag-ampo sa tanan natong buhaton.

Luhod ug pag-ampo ngadto sa Dios aron magiyahan kamo sa tanan ninyong buhaton.⁷

Sa panahon nga ang usa ka tawo mohunong sa pag-ampo ngadto sa Dios, alang sa iyang espiritu ug mga paggiya niana dayong higayona siya inanay nga mahimong estranghero kaniya ug sa iyang mga buhat. Sa panahon nga ang mga katawhan mohunong sa pagampo alang sa espiritu sa Dios, ilang gibutang ang ilang pagsalig sa ilang kaugalingong panabut, ug sila inanay nga mawad-an sa espiritu sa Dios, sama ra sa suod nga managhigala, kon dili magsinulatay o magbisitahay sa usag-usa, mahimong mga estranghero. Kinahanglan kitang tanan nga mag-ampo aron dili kita biyaan sa Dios nga mag inusara, bisan sa makadiyot, nga wala ang iyang espiritu nga maoy mogiya ug motabang kanato sa pagsugakod sa sala ug pagpanintal.⁸

Ipabuhat sa mga batan-on ang kanunay nga pag-ampo sa sekreto ug mangamuyo sa Dios, gabii ug buntag, alang sa direksyon sa Iyang Balaang Espiritu.⁹

Sa panahon sa kahilum, sa panahon sa tumang mga kalisud, ug sa mga kakuyaw sa adlaw; sa mga panahon sa pagpanintal, sa kasubo, sa kalinaw ug mga panalangin, kanunay kitang mag-ampo, mag-inusara man, ug kauban ang pamilya nga naglibut kanato, nga mapasalamaton sa mga panalangin sa kinabuhi, alang sa pagsabut sa mga problema niini, ug alang sa kalig-on sa paglahutay hangtud sa katapusan.

“Pag-ampo kanunay, aron ikaw mahimo nga magmadaugon; oo, nga unta makabuntog ikaw ni Satanas ug nga ikaw makalingkawas, sa mga kamot sa mga sulugoon ni Satanas. (Doktrina ug Pakigsaad 10:5.)

“Pag-ampo kanunay, nga kamo dili mawad-an og kaisug, hangtud ako moabot.” (Doktrina ug Pakigsaad 88:126.)¹⁰

Sa makausa pa mahimo ba ako nga mangamuyo sa mga katawhan sa pagluhod ug mohangyo sa Dios sa paggiya kanila sa matag kalihokan sa kinabuhi, ug dayon kon madawat nila ang espiritu sa Dios sila mobati ug kalipay, makuntento sa unsay ilang buhaton. Ayaw pagbuhat og butang nga dili kamo makahangyo sa Dios sa pagtabang kaninyo sa pagbuhat niini. Uswag diha sa kahayag ug kahibalo sa Ebanghelyo, ug isip usa ka sulugoon sa Dios ako mosaad kaninyo ug kalinaw ug hingpit nga kalipay, ug himaya, sa ngalan sa atong Manunubos.¹¹

Ang Pag-ampo Mahinungdanon alang sa Espirituhanong Pag-uswag.

Kami nagpamatuod nga ang Dios usa ka buhi nga Dios, … nga Siya buhi ug nagmahal sa Iyang mga anak; nga Siya naminaw ug motubag sa atong mga pag-ampo; nga Siya dili motugot nga sa Iyang mga anak nga maglakaw sa kangitngit ug sala nga walay kahayag; nga ang matag tawo angayang makadawat niana nga kahayag nga mao ang maggiya sa iyang mga tiil sa tibuok kinabuhi; nga diha sa nagkausab nga kalibutan ang Iyang mga anak mahimo gihapon nga modangup ngadto Kaniya ug Siya mamulong ngadto kanila diha sa kahayag sa adlaw o sa mahilum nga mga oras sa gabii, sa pinulongan nga ilang masabut, kon sila mosunod sa Iyang espiritu.¹²

Bisan asa ang ebanghelyo ni Kristo moabut, mga lalaki ug babaye sa gatusan ug kaliboan midawat ug nakahimo sa pagsulti sa ilang kinaugalingong pagpamatuod nga sila nakadawat og usa ka saksi sa pagkabalaan sa gimbuhaton nga atong gilihok isip mga Santos sa Ulahing mga adlaw human kita mangayo sa Dios og pagpamatuod. Kini nga pagpamatuod wala moabot pinaagi sa ilang kaugalingong pagtuon, ni pinaagi sa natural nga kahibalo nga gihatag sa Dios kanila, apan agi og tubag sa matinguhaon ug kinasingkasing nga pag-ampo, nga gipamulong diha sa ngalan ni Jesukristo nga atong Manunubos, alang sa kahayag ug kahibalo mahitungod sa pagkabalaan niini nga buhat.¹³

Ang natural nga kinaiya sa tawo mao ang pagpatigbabaw sa garbo sa iyang kasingkasing, mahimong isipan, malimot sa Dios; apan ang ebanghelyo nanginahanglan nga kita kinahanglan nga mag-ampo matag adlaw sa atong mga kinabuhi, dili lamang uban sa pamilya apan sa tago. Kini nga panginahanglan nagpugong kanato nga mahimong isipan; kay kini makahimo kanato sama sa gagmayng mga bata, magduko ug mag-ampo ngadto sa Dios alang sa kahayag ug pagdasig sa iyang Balaang Espiritu.¹⁴

Ako ligdong nga nagtuo nga walay tawo kinsa matinuorong nagyukbo matag adlaw sa iyang kinabuhi ug nag-ampo sa Dios sa kinasingkasing alang sa kahayag sa Iyang Balaan nga Espiritu aron mogiya kaniya nga mamahimong garboso ug mapahitas-on. Sukwahi hinoon niini ang iyang kasingkasing mahimong mapuno sa kaaghup, pagpaubos, ug kayano sama sa usa ka bata.¹⁵

Ako adunay gamay lamang o walay kahadlok alang sa batang lalaki o batang babaye, sa batan-ong lalaki o batan-ong babaye, kinsa matinuoron ug makugihon nga mag-ampo sa Dios kaduha matag adlaw aron giyahan sa Iyang Espiritu. Ako nakasiguro nga kon ang pagpanintal moabot sila adunay kusog sa pagsugakod niini pinaagi sa pagdasig nga ihatag ngadto kanila. Ang pag-ampo ngadto sa Ginoo aron giyahan sa Iyang Espiritu nagbutang palibot kanato og usa kapanalipod, ug kon kita matinguhaon ug matinudanon nga mangita sa paggiya sa Espiritu sa Ginoo, ako makapasalig kaninyo nga kita makadawat niini.¹⁶

Karon, ang usa ka butang nga labaw sa uban, nga buot nakong masilsil diha sa kasingkasing ug kalag sa mga kabatan-onan, mao ang pag-ampo ngadto sa Ginoo. Pagbaton ug hugot nga pagtuo. Kon wala kay kahibalo, pagbaton ug hugot nga pagtuo. Palamboa kanang hugot nga pagtuo ug sa dili madugay o sa kaulahian ang kahibalo moabot.¹⁷

Usa sa mga kinahanglanon nga gihimo sa mga Santos sa Ulahing adlaw mao nga sila kinahanglan nga magmatinud-anon diha sa ilang mga pag-ampo, ilang sekreto ug pangpamilya nga pag-ampo. Ang katuyoan sa atong Langitnong Amahan sa pagbuhat niini mao nga kita makigsulti kaniya, ug nga kita adunay agianan tali kanato ug sa mga langit diin kita makadawat og mga panalangin gikan sa kahitas-an. Walay tawo nga mapainubsanon ug mainampuon sa atubangan sa Dios, ug mangamuyo Kaniya matag adlaw alang sa kahayag ug pagdasig sa Iyang Balaang Espiritu, nga mahimong “mabayaw sa garbo diha sa iyang kasingkasing, o mobati nga ang kahibalo ug kaalam nga iyang naangkon igo na alang kaniya. Ang mainampoon ug mapaubsanon nga tawo mobati ug makaamgo nga siya nagsalig sa Dios sa matag panalangin nga iyang natagamtam ug sa pag-ampo sa Dios siya dili lang mag-ampo alang sa kahayag ug pagdasig sa Iyang Balaang Espiritu aron mogiya kaniya, apan siya mobati sa pagpasalamat sa Dios alang sa mga panalangin nga iyang nadawat, nakaamgo nga ang kinabuhi, nga ang kahimsog, ug nga ang kalig-on, ug nga ang tanang kahibalo nga iyang naangkon nagagikan sa Dios, kinsa mao ang Tiglalang sa atong kinabuhi.

Kon dili nato ipabiling abli kini nga agianan sa pagpakigsulti tali kanato ug sa atong Langitnong Amahan, nan, kita mawad-an sa kahayag sa pagdasig sa Iyang Espiritu ug nianang pagbati nga mapasalamaton ug sa paghatag og pasalamat nga nagpuno sa atong kasingkasing ug sa pagdayeg sa Dios alang sa Iyang kaayo ug kalooy ngari kanato.

Walay pagbati nga sama ka Diosnon kaysa pagbati sa hilabihang pagpasalamat ug paghatag og pasalamat ngadto sa Dios kon kita makaamgo ug mobati nga ang Dios mipanalangin kanato. Kana mao ang pagpamatuod niadtong nagagikan sa langyaw nga dapit nga nagtudlo sa Ebanghelyo, ug kinsa midala ug hugot nga pagtuo ngadto sa kasingkasing sa mga katawhan nga ilang gitudloan sa pagkabalaan sa misyon nga ilang gihimo, nga ang hingpit nga kalipay ug pagpasalamat nga nagpuno sa ilang mga kasingkasing sa ingon nahimong instrumento sa Dios sa pagdala sa katawhan ngadto sa kasayuran sa plano sa kinabuhi ug sa kaluwasan labaw pa sa ilang gahum sa pagsulti. Kinahanglan natong palamboon kana nga espiritu ug ang tinguha sa pagmando sa atong mga kinabuhi nga kita kanunay anaay usa ka pagbati sa pagkamapasalamaton ug sa paghatag og pasalamat diha sa atong mga kasingkasing ug usa ka tinguha sa pagdayeg sa Dios alang sa Iyang kaayo ngari kanato. Kita dili makabaton niini nga pagbati kon kita magpasagad ug dili maghunahuna sa pagtuman sa atong katungdanan sa pag-ampo ngadto sa atong Langitnong Amahan.

Pagpuyo nga limpyo, pagbaton sa mga kasugoan sa Ginoo, pag-ampo kanunay ngadto Kaniya aron ipabilin kamo diha sa kamatuoran ug sa pagkamatarung, buhata ang inyong gi-ampo ug dayon kon unsa man ang mahitabo kaninyo ang Ginoo maguban kaninyo ug nga walay butang nga mahitabo kaninyo nga dili makahatag og dungog ug himaya ngadto sa Dios ug ngadto sa inyong kaluwasan ug kahimayaan. Moabut diha sa inyong mga kasingkasing gikan sa pagpuyo nga putli ang kinabuhi nga inyong giampo, usa ka hingpit nga kalipay labaw pa sa inyong masulti o masabut. Ang Ginoo kanunay nga duol kaninyo; Siya mohupay kaninyo; mabati ninyo ang Iyang presensya panahon sa tumang kalisdanan; Siya mobantay ug manalipod kaninyo kutob sa mahimo sumala sa Iyang maalamong katuyoan.¹⁹

Magpamatuod ako kaninyo nga ako nasayud nga ang Dios buhi, nga Siya naminaw ug nagtubag sa mga pag-ampo.²⁰

Ang matinguhaon, matinuoron, ug tim-os nga pag-ampo ngadto sa Dios labaw nga bililhon nganha kaninyo kay sa tanan nga akong masulti.²¹

Ang pag-ampo sa pamilya makatabang sa mga ginikanan ug sa mga anak nga mahimong mahiuyon sa Espiritu sa Ginoo.

Ako nagtuo nga ang usa sa mga halangdon ug usa sa labing maayong butang sa tibuok kalibutan aron magpabilin ang tawo nga matinud-anon diha sa ebanghelyo ni Ginoong Jesukristo, mao ang tinago nga pangamuyo sa Dios diha sa ngalan ni Jesukristo, alang sa paggiya sa Balaang Espiritu. Ako nagtuo nga ang usa sa labing mahinungdanon nga mga butang nga mahitabo sa bisan asa nga panimalay nga makapalambo sa batang mga lalaki ug babaye diha sa gugma sa Dios ug diha sa gugma sa ebanghelyo ni Jesukristo, mao ang pag-ampo uban sa pamilya. Dili lang alang sa amahan sa pamilya ang pag-ampo, apan kinahanglan nga ang inahan ug mga anak mobuhat usab sa ingon, nga sila makaambit sa espiritu sa pag-ampo, ug mahiuyon, o agig pasumbingay, matunong sa tukma nga estasyon diin madungog ang tingog sa Espiritu sa Ginoo. Ako nagtuo nga gamay lang kaayo ang mahisalaag, nga gamay lang ang mawad-an sa pagtuo, kinsa kausa dihay kahibalo sa ebanghelyo, ug kinsa wala mapakyas sa ilang pag-ampo uban sa ilang mga pamilya, ug sa ilang sekretong mga pangamuyo ngadto sa Dios.²²

Ang Ginoo nagsugo kanato sa pag-ampo uban sa atong mga pamilya, ug sa sekreto, nga kita dili mahikalimot sa Dios. Kon ato kining pakyason, kita mawad-an sa pagdasig ug gahum gikan sa langit; kita mahimong walay pagpakabana, mawad-an sa atong pagpamatuod, ug mapaubos ngadto sa kangitngit.²³

Ang mga bata makamatikud sa mga panig-ingnan sa ilang mga ginikanan, sa ilang mga kahigalaan, ug sa ilang mga magtutudlo. Sa usa ka higayon, … sa dihang ang mga [home teacher] mibisita sa usa ka panimalay ug sila nag-ampo, usa ka gamayng bata miingon: “Papa, dili lagi ta tig-ampo, di ba, gawas lang kon duna tay bisita?”²⁵

Ang pamaagi sa pagtudlo sa atong mga anak sa pag-ampo mao ang pag-ampo sa atong kinaugalingon mismo sa sekreto ug uban sa atong mga pamilya. Adunay dako kaayong pagpasagad sa pagpakigsulti sa Dios sa bahin sa mga Santos sa Ulahing mga Adlaw. Akong gibati ang hingpit nga kalipay ug kamaya matag adlaw sa akong kinabuhi diha sa pagpakigsulti sa akong Magbubuhat, sa ngalan ni Ginoong Jesukristo, nga akong Manunubos. Ug kadtong walay mga radyo nga maoy gamiton sa pagpakigsulti sa Langitnong Amahan, sa laing pagkasulti, mawad-an sa pagdasig gikan sa Ginoo.²⁵

Mga Sugyot alang sa Pagtuon ug Panaghisgutan

Sa unsa nga paagi ang atong personal nga mga pag-ampo mahimong mas makahuluganon? Sa unsa nga paagi ang pagkamapasalamaton alang sa mga panalangin sa Dios makadugang og kahulugan sa atong mga pag-ampo?
Unsay atong buhaton aron ang atong pag-ampo sa pamilya mahimong usa ka espirituhanong kasinatian alang sa tanang sakop sa pamilya? Unsa nga mga panalangin ang nadawat sa inyong pamilya isip resulta sa hiniusang pag-ampo?
Unsa nga mga hagit ang giatubang sa inyong pamilya sa pagtagana og panahon alang sa pag-ampo sa pamilya? Sa unsa nga paagi ninyo nabuntog kini nga mga hagit?
Sa unsa nga paagi ang inadlaw nga pag-ampo nagtabang kanato nga mahimong “matinud-anon sa ebanghelyo ni Jesukristo”? Sa unsa nga paagi ang pag-ampo makatabang kanato nga “mapuno sa kaaghup, pagpaubos, ug pagkayano sama sa bata”?
Unsay ipasabut sa “pangamuyo sa Dios”?
Nganong mahinungdanon nga kita mangamuyo sa Dios matag adlaw alang sa paggiya sa Balaan nga Espiritu?