Te Oraraa e te Tau Faatereraa a George Albert Smith
I te hoê mahana i roto i ta’na taviniraa ei Peresideni no te Ekalesia, ua faataehia mai ia George Albert Smith ra te hoê hoho‘a e te nota te na ô ra e, « te hapono atu nei au i teie hoho‘a ia oe na no te mea e hoho‘a papa‘i-rima-hia o te taata ta matou e ti‘aturi nei ». E hoho‘a ïa no te peresideni Smith te farerei ra i te hoê metua vahine e ta’na na tamarii apî e maha. I taua mahana taa ê ra, te rû ra te peresideni Smith no te ta‘uma i ni‘a i te hoê pereoo auahi a tape‘a mai ai te hoê metua vahine ia’na, ma te ti‘aturi e, e nehenehe ta ta’na mau tamarii e aroha rima i te hoê peropheta a te Atua. Ua roaa i te hoê taata ia pata i te hoho‘a o taua taime ra.
Te parau faahou ra taua nota ra e, « te tumu i poihere ai matou [i teie hoho‘a] no te mea ïa e, noa’tu te rahi ta oe ohipa, noa’tu e, te rû ra oe ia ta‘uma i roto i to oe pereoo e i muri iho i roto i te pereoo auahi e tia’i mai ra, ua rave â oe i te taime no te aroha rima i te tamarii tata‘itahi i roto i teie utuafare ».1
Ua riro te mau ohipa mai teie te huru ei faaiteraa i te oraraa e te faatereraa a George Albert Smith. Na roto anei i te horo‘araa i te here e i te faaitoitoraa i te hoê taata tupu i te rohiraa i roto i to’na faaroo e aore râ, na roto anei i te faanahoraa i te mau ohipa totauturu rahi no te faaamu e rave rahi tauatini taata, ua haapa‘o o George Albert Smith i te faaueraa a te Faaora, « e aroha’tu oe i to tatou tupu mai to aroha ia oe iho na » (Mareko 12:31).
Te mau matahiti matamua, 1870–90
Mai te mea ra e, e 4 matahiti
Ua fanauhia o George Albert Smith i te 4 no eperera 1870, na John Henry e o Sarah Farr Smith i roto i te hoê fare haehaa i Roto Miti. E aamu roa to te fetii Smith no ni‘a i te taviniraa i roto i te basileia o te Atua. I muri a‘e ua tavini te metua tane o George Albert i roto i te Pŭpŭ no te Tino Ahuru Ma Piti Aposetolo e i roto i te Peresideniraa Matamua. To’na papa ruau, hoê â i‘oa e to’na, o George A. Smith, e taea‘e fetii ïa no te peropheta Iosepha Semita e o oia te hoê o te mau pionie feia mo‘a i te mau mahana hopea nei matamua i tomo mai i roto i te Afaa no Roto Miti i te matahiti 1847 ; e Aposetolo atoa o George A. Smith e e tauturu no te Peresideni Brigham Young. Te papa o te papa ruau o George Albert, o John Smith, tei tavini ei Patereareha no te Ekalesia e ei peresideni tĭtĭ matamua i Roto Miti. E to’na papa ruau i te pae o to’na mama, o Lorin Farr, o te tavana oire matamua ïa no Ogden, Utaha, e te peresideni tĭtĭ matamua i roto i taua oire ra.
John Henry Smith
E mea here roa e e mea faahiahia roa na George Albert Smith i to’na na metua. Ua parau oia e, na to’na metua tane i haapii ia’na ia haere e tauturu i te feia nava‘i ore,2 e ua haapoupou oia i to’na metua vahine no te mau tusia ta’na i rave no te aupuru i to’na utuafare i roto i te evanelia. « Noa’tu e, e mea veve roa matou », te haamana‘o nei oia e, « e tei roto to’u metua tane i te hoê tau misioni i te paeraa o to’u matahiti, aita vau i faaroo noa a‘e i to’u metua vahine i te amuamuraa, e aita vau i ite noa a‘e ia’na ia ta‘i no te huru o to’na oraraa. Aitâ vau i ite a‘e nei i te hoê taata e nehenehe e faarava‘i i te hoê tara marite mai ia’na te huru…
Sarah Farr Smith
« … I te taime aita o papa to te fare tei te misioni, ua rave o mama i to’na ti‘araa, e ua riro mau oia ei upoo faatere no te utuafare. E amui matou no to matou mau pure, e haamaitai i te maa, e i te taime e tupu te ma‘i, e pii oia i te mau peresibutero, no te mea e faaroo rahi to’na i roto i te mau oro‘a o te evanelia. Ua riro oia ei taata aufau tuhaa ahuru ti‘a i te mau taime atoa, e i to’u iteraa, aita i ô noa a‘e i roto i to’na upoo te mana‘o e, penei a‘e te vai ra paha te hoê hape, e e ere ‘te faaroo Momoni’ i te parau mau. Ua ti‘aturi oia i te reira ma to’na varua atoa ».3
Ua haamana‘o taa ê o George Albert Smith i to’na mama i te haapiiraa ia’na i te pure e i te ti‘aturi e, e pahono mai te Atua : « Ia haamana‘o ana‘e au i te faaururaa a to’u mama i to’u tau [tamariiraa] e tupu mai te faatura e te mau roimata. … Te haamana‘o nei au mai te huru ra e, no nanahi noa nei, ua rave oia i to’u rima e ua ta’uma maua na ni‘a i te e‘a no te haere i te tahua piti. I reira ua tuturi au i mua ia’na e ua tape‘a vau i to’na rima e ua haapii mai oia ia‘u ia pure. Mauruuru e te Atua no taua mau metua vahine ra tei roto i to ratou aau te varua o te Evanelia e te hinaaro ia haamaitai. E nehenehe ta’u e faahiti faahou i taua pure ra i teie nei, e e râ ê te mau matahiti to’u haapiiraa. Na te reira i horo‘a mai ia‘u i te hoê haapapûraa e, e Metua i te Ao ra to’u, e te faaiteraa ia‘u e, te faaroo mai nei Oia e te pahono mai nei Oia i te pure. I to’u paariraa mai ua tamau noa â matou i te ora i roto i te hoê fare tahua piti, e ia pupuhi puai ana‘e mai te mata‘i, e aueue ïa te fare mai te huru ra e, te taahuri ra. I te tahi mau taime e rahi roa to’u ri‘ari‘a no te haere e taoto. Tei roto to’u ro‘i i te hoê piha na‘ina‘i, e e rave rahi pô ua pou vau i raro i te ro‘i no te tuturi e no te ani i to’u Metua i te ra‘i ra ia tia’i i te fare, ia paruru i te reira, eiaha ia parari hu‘ahu‘a roa, e ua ta‘uma faahou vau i roto i to’u ro‘i iti na‘ina‘i ma te ite papû e, e paruruhia vau i te ino mai te huru ra e, ua tape‘a vau i te rima o to’u Metua tane ».4
Ma te hi‘o faahou i muri i roto i to’na oraraa tamarii, ua parau o George Albert Smith e :
« Ua ora ra na to’u na metua i te hoê oraraa haehaa roa, te haapoupou nei râ vau i tei Hamani e te haamauruuru nei au ia’na ma to’u aau atoa no te tonoraa mai ia‘u i roto i to raua utuafare.
« … Ua haapii mai au i to’u tamarii-rii-raa e, na te Fatu teie ohipa. Ua haapii mai au e, te vai ra te mau peropheta e ora ra i ni‘a i te fenua nei. Ua haapii mai au e, na te faaururaa a te Manahope e faauru i te feia tei ora no te fana‘o i te reira.
« … Te mauruuru nei au no to’u fanauraa, mauruuru no te mau metua tei haapii ia‘u i te evanelia a Iesu Mesia e tei faaite i te hi‘oraa maitai i roto i to raua utuafare ».5
Ua matauhia o George Albert ei tamaiti oaoa e te ha‘uti. E mea au roa na te mau hoa to’na huru oaoa, e e mea au roa na’na e faata‘i i te upaupa vaha, te banjo e te tita no te faaoaoa ia ratou, e ia himene e rave rahi mau himene arearea. Ua roaa atoa ia’na te mau iteraa tei tauturu ia’na ia faahotu i te hoê iteraa hohonu no te hopoi‘a o tei riro ei ohipa maere ia au i to’na matahiti apî. I te 12raa o to’na matahiti, ua haere o George Albert i te Fare Haapiiraa no Brigham Young, i reira oia i te fariiraa i te tahi haapiiraa tei haaputapû roa i to’na oraraa. Ua haamana‘o oia i muri a‘e e :
« Ua fana‘o vau i te mea e, te tahi tuhaa o ta’u haapiiraa no roto mai ïa i te Dr. Karl G. Maeser, te hoê teie orometua haapii aravihi tei riro na ei taata patu matamua no ta tatou mau fare haapiiraa rarahi a te Ekalesia. … Aita ta’u e nehenehe e haamana‘o rahi i te mau mea i parauhia i roto i te roaraa o te matahiti tei reira vau, tera râ, te vai ra hoê mea eita roa’tu paha e mo‘ehia ia‘u. Ua faahitihiti noa vau i te reira e rave rahi mau taime. … I te hoê mahana ua ti‘a a‘e ra te Dr. Maeser i ni‘a e na ô mai ra :
« ‘Eita outou e faautu‘a-noa-hia no te mau ohipa ta outou i rave, e faautu‘ahia râ outou no te mau mana‘o ta outou i feruri’.
« I to’u tamarii-rii-raa, aita vau i matau roa i te haavî i to’u mau mana‘o, e mea fifi roa no’u ia rave i te mea i titauhia ia‘u, e ua haape‘ape‘a te reira ia‘u. Oia ïa, ua mau mai te reira i ni‘a ia‘u mai te hoê matie piripiri. Fatata hoê hepetoma e aore râ ahuru mahana i muri iho, ua ite a‘e ra vau eaha te auraa. Ua nehenehe ia‘u ia ite i te haapiiraa o te reira. I taua taime ra, ua ite a‘e ra vau i te tatararaa i te mea ta’na i parau ra : No reira, no te aha oe e faahapahia ai i to oe mau mana‘o no te mea ia hope ana‘e to oe oraraa i te tahuti nei, o te taatoaraa ïa o to oe mau mana‘o. Ua riro taua mana‘o ra ei haamaitairaa rahi no’u i roto i to’u oraraa taatoa, e na roto i te reira, ua noaa ia‘u i te mau taime e rave rahi, ia haapae i te feruriraa tano ore no te mea te ite nei au e, ia hope ana‘e ta’u ohipa i roto i te oraraa nei, e riro mai ïa vau ei hotu no to’u mau mana‘o ».6
Ua amo te tamaiti apî o George Albert i te mau hopoi‘a rarahi i te fare i te matahiti 1882 a piihia ai to’na metua tane, o te tavini ra i roto i te Pŭpŭ no te Tino Ahuru Ma Piti e piti matahiti te maoro, ei peresideni no te Misioni no Europa. No te mea aita o John Henry faahou to te fare, ua tauturu o George Albert i te imiraa i te ora no te utuafare. E 13 to’na matahiti a ani ai oia i te hoê ohipa i roto i te fare hamaniraa tauhaa e te fare toa na te Ekalesia i Roto Miti, tera râ, ua parau te raatira ohipa e, eita ta ratou e nehenehe e tihepu i te hoê taata. Ua pahono atu ra o George Albert e, aita oia i titau ia aufauhia oia, no te rave noa râ i te ohipa. Ua parau faahou oia e, « Ua ite au e, mai te mea e, e faufaa to’u, e aufauhia ïa vau ».7 No to’na mana‘o ti‘aturi, i roaa ai ia’na te hoê ti‘araa ei rave ohipa i roto i te fare hamaniraa tauhaa e 2.50 tara marite i te hepetoma, e no ta’na ohipa puai, aita i maoro ua haamaraahia oia i te ti‘araa teitei a‘e i roto i te taiete.
I te 18raa o to’na matahiti, ua itehia ia’na te hoê ohipa hi‘opo‘a purumu tereraa pereoo auahi. A rave ai oia i te reira ohipa, na te anaana mahana i ni‘a i te one o te medebara i faaino roa i to’na na mata. Na te reira i faaino roa i te mata o George Albert, aita’tura e nehenehe maitai faahou ia’na ia tai‘o, e ua vai noa te reira fifi e hope noa’tu to’na oraraa.
Ohipa Misionare e Faaipoiporaa, 1891–94
I te ava‘e Setepa 1891 ua pii te peresideni Wilford Woodruff ia George Albert Smith ia tavini i te hoê tau misioni poto i Utaha Apatoa. Ta’na ohipa tei faataahia o te haa ïa i piha‘i iho i te feia apî o te Ekalesia i taua vahi ra. I roto i na ava‘e e maha i muri iho ua tauturu raua o to’na hoa misionare i te faanahonahoraa i te mau pŭpŭ feia apî i roto i te mau tĭtĭ e te mau paroita, ua paraparau i roto i te mau pureraa e rave rahi, e ua faaitoito i te feia apî ia haapa‘o i te mau ture a te Ekalesia.
I to’na ho‘iraa mai na ta’na misioni, ua tamau noa o George Albert i te faahoa i te tamahine i herehia e a’na mai to’na apîraa mai â, o Lucy Woodruff, te mootua tamahine a te peresideni Wilford Woodruff. Ua paari raua i te hoê â vahi, e ua ite o Lucy i te huru o George Albert. Ua papa‘i o Lucy i roto i ta’na buka aamu i to’na faahiahia ia’na : « I teie pô ua haere au e taoto ma te aau mauruuru i te Atua… e te pure nei au ia horo‘a mai oia ia‘u i te puai e ia fana‘o vau i te here o te hoê taata o ta’u e ti‘aturi papû nei e, o te hoê ïa o te mau taure‘are‘a maitai roa a‘e tei tuuhia mai i ni‘a i te fenua nei. No to’na maitai e to’na hamani maitai ua tahe to’u roi mata ».8
Lucy Emily Woodruff Smith
Tera râ, e mea rahi roa te mau taata e faahinaaro ra ia Lucy, e te vai ra te tahi pae o ratou e feia moni ïa e ua pûpû i te mau tao‘a horo‘a moni rahi na’na. Area o George Albert, ua auhia oia e Lucy no to’na haapa‘o i te ohipa a te Fatu. Ua papa‘i oia ia Lucy e, « mai te mea e, te hinaaro nei oe e faaipoipo i te hoê taata no te moni e ere ïa o vau, no te mea e râ ê te tau to’u faaotiraa e, eita vau e horo‘a ia‘u iho e i to’u oraraa e aore râ, i to’u taime no te haaputu i te moni, no te tavini râ i te Fatu e no te tauturu i Ta’na mau tamarii i roto i teie ao ».9 Ua rave o Lucy i ta’na ma‘itiraa, e i te 25 no me 1892, ua faaipoipo oia e o George Albert i roto i te hiero no Manti Utaha. Na te metua tane o George Albert i faatere i te reira oro‘a. I taua mahana ra, ua horo‘a o Lucy i ta’na tane i te hoê faatautau fifi arapoa e to’na hoho‘a i roto. Ua tamau oia i taua faatautau ra i ni‘a i te fifi o ta’na uati pute, i reira ho’i e tautau noa ai i piha‘i iho i to’na mafatu, e ua ta‘ita‘i noa oia i te reira fatata i te mau mahana atoa o te toe‘a o to’na oraraa.10
Aita i ava‘e roa e toe ra i na taata faaipoipo-apî-hia i te faaearaa hou a reva’tu ai o George Albert no te tahi faahou misioni, i teie taime, e ohipa poro evanelia ïa i te pae apatoa o te fenua Marite. Noa’tu e, ua ite raua e, ua fatata roa mai te taime revaraa—ua tae mai te piiraa e toru hepetoma hou a faaipoipo ai raua—e mea fifi noa râ te taa-ê-raa. E maha ava‘e i muri mai, ua rahi roa to raua oaoa i te pii-raa-hia o Lucy ia tavini i piha‘i iho i ta’na tane i roto i te piha ohiparaa a te misioni, i reira o Elder Smith i te pii-raa-hia ei papa‘i parau no te misioni aita i maoro roa.
O J. Golden Kimball te peresideni no te Misioni no te mau Tufaa Fenua Apatoa, e melo atoa oia no te Hitu Ahuru i taua taime ra. E piti taime i roto i te pu‘e tau taviniraa a Elder Smith, ua titauhia i te peresideni Kimball ia vaiiho mai i te misioni no te haere e haapa‘o i te tahi mau ohipa faufaa i Roto Miti—a tahi i muri noa iho i te riroraa o Elder Smith ei papa‘i parau no te misioni e i te tahi faahou hoê matahiti i muri a‘e. I roto i taua na taime e piti ra, ua vaiiho atu te peresideni Kimball i te hopoi‘a rahi no te arata‘iraa e no te faatereraa i te misioni ia Elder Smith ra, ma te paturu e ma te horo‘a i te a‘o na roto i te mau rata e rave rahi. Ia amuihia, ua tavini o Elder Smith ei mono peresideni no te misioni fatata 16 ava‘e. Ua pe‘ape‘a te peresideni Kimball no to’na taa-ê-maoro-raa, tera râ, ua ti‘aturi oia i ni‘a i to’na tauturu apî roa. I roto i te hoê rata ta’na i papa‘i ia Elder Smith, te na ô ra oia e, « te mana‘o nei au e, na roto i to’u ite e to’u maramarama, noa’tu e, e mea iti rii paha, ua ti‘a ia‘u ia haafaufaa i to oe parau-ti‘a e to oe faufaa, oia mau ta’u e parau atu nei ia oe ».11 I roto i te tahi atu rata ua papa‘i oia, « a tape‘a tamau noa i teie mana‘o ma te faufaa rahi : oia ho’i, te mauruuru nei au no ta oe mau ohipa, to oe itoito, e to oe varua maitai ».12
E rave rahi mau taime to te peresideni Kimball iteraa i te itoito e te varua maitai o Elder Smith. I te hoê taime te ratere ra raua toopiti, e ua anihia ia raua ia taoto i roto i te hoê fare raau na‘ina‘i. Ua haamana‘o o George Albert Smith i muri mai e :
« I te area hora ahuru ma piti i te pô ua ara maua na roto i te hoê tuoraa ri‘ari‘a i rapae i te fare. Ua faaroo to maua tari‘a i te mau parau iino a parahi mai ai maua i ni‘a i te ro‘i no te faaroo i te ohipa e tupu ra. E mea maramarama te ava‘e i taua pô ra, e e nehenehe ta maua ia ite e rave rahi mau taata i rapae. Ua ti‘a a‘e ra te peresideni Kimball i ni‘a e ua haamata i te oomo i te ahu. Ua tupa‘ipa‘i mai te taata i ni‘a i te opani e ua parau i te parau ino ma te faaue i te mau Momoni ia haere i rapae au, e pupuhi ho’i ratou ia raua. Ua ani te peresideni Kimball ia‘u e, aita anei au e ti‘a i ni‘a e ia oomo i to’u ahu, e ua parau atu vau ia’na e, aita, e faaea noa vau i roto i te ro‘i, e ua papû ia‘u e, e faaherehere te Fatu ia taua. Tau tetoni i muri iho, ua î roa te piha i te ofa‘i pupuhi. Mai te mea ra e, ua faataa ê te mau taata iino ia ratou e maha pŭpŭ e teie ratou e pupuhi nei i roto i te mau poro o te fare. Ua peepee haere noa te mau hu‘a raau na ni‘a a‘e i to maua upoo na te mau vahi atoa. Te vai ra te taime aita e maniania faahou, e i muri iho ua haamata faahou te pupuhi e te peepee haere faahou te hu‘a raau. Aita roa vau hoê iti a‘e ri‘ari‘a. Ua vai hau noa vau a tarava noa ai au i ni‘a i te ro‘i, ma te ite i te hoê o te mau mea ri‘ari‘a roa a‘e o to’u nei oraraa, tera râ, ua papû maitai ia‘u e… e paruru te Fatu ia‘u, e ua na reira ihoa oia.
« Mai te mea ra e, ua paruparu te mana‘o o te mau taata iino e ua reva ê ratou. I te po‘ipo‘i a‘e, a iriti ai maua i te opani, te vai noa ra hoê ruru raau teiaha mai ta te mau taata iino i faaohipa no te ta‘iri i te mau misionare i te pae Apatoa ».13
E rave rahi matahiti i muri a‘e, ua faaite o George Albert Smith i ta’na mau mootua i teie ohipa tei tupu no te haapii ia ratou ia ti‘aturi i te Fatu. Ua parau oia e, « te hinaaro nei au e haapapû ia outou e, e haapa‘o te Fatu ia outou i roto i te mau taime ati, mai te mea e, e horo‘a outou ia’na i te taime ».14
Te Oraraa Utuafare
Ua hope ta George Albert e o Lucy misioni i te ava‘e tiunu 1894. Tau ava‘e i muri a‘e i to raua ho‘iraa mai i Roto Miti, ua farii o Lucy i te hoê haamaitairaa na roto mai i to’na papa ruau, te peresideni Wilford Woodruff, ma te fafau atu ia’na e, e fanau oia i te tamarii. I te 19 no novema 1895, ua fanau mai oia i te hoê tamahine tei piihia o Emily, e e maha matahiti i muri a‘e, ua fanau-faahou-hia mai te hoê tamahine, o Edith. Ta raua tamarii hopea, o George Albert Tamaiti, ua fanauhia ïa i te matahiti 1905.
Ua riro o George Albert Smith ei metua tane here roa, tei herehia e ta’na mau tamarii. Ua papa‘i o Edith no ni‘a ia’na e : « No’u nei, ua hope te mau huru atoa i roto i to’u metua tane o te faariro i te hoê metua tane ei metua tane herehia e ta’na tamahine Ua tupu pauroa te mau mea ta’u i hinaaro i roto i te hoê metua tane ». Te hoê mea faahiahia roa na te mau tamarii o te huru ïa no to George Albert aupururaa i ta’na vahine here. Ua papa‘i o Edith e, « e mea nehenehe mau te here e te haapa‘o o papa ia mama ». « Eita oia e ma‘iri i te hoê taime no te faaite i to’na mauruuru ia’na. Te mau mea atoa ta raua i rave, ua rave amui raua mai te hoê pŭpŭ e ma te faanahonaho maitai. Ua riro oia ei vahine faufaa rahi no’na. … Noa’tu e ua here matou paatoa ia mama, ua papû ia‘u e, na roto i to’na huru aupuru e te mărû i ni‘a ia mama, na te reira i faarahi roa’tu i to matou here i to matou metua vahine ».15
Ei metua tane, ua tamata o George Albert Smith, ma te itoito, i te tauturu i ta’na mau tamarii ia farii i te oaoa ta’na i farii na roto i te oraraa i te evanelia. I te hoê mahana noela, ia oti te mau tao‘a horo‘a i te tatarahia, ua ani atu ra oia i ta’na mau tamahine apî roa, eaha to ratou mana‘o mai te mea e, e horo‘a ratou i te tahi o ta ratou mau ha‘uti na te mau tamarii tei ore i farii noa a‘e i te hoê tao‘a horo‘a no te noela. Ua farii te mau tamahine ia horo‘a i te tahi mau tao‘a ha‘uti tahito ta ratou na te mau tamarii nava‘i ore, i te mea e, ua farii iho nei ratou i te mau tao‘a ha‘uti apî.
« Aita anei outou e hinaaro e horo‘a atoa i te tahi mau tao‘a ha‘uti apî na ratou ? » te parau ïa a George Albert ma te mărû.
Ua feaa rii ta’na mau tamahine, tera râ, i te pae hopea ua farii ratou ia horo‘a hoê e aore râ, e piti tao‘a ha‘uti apî ta ratou. Ua arata‘i atu ra o George Albert i te mau tamahine i te fare o te mau tamarii ta’na i mana‘o, e ua horo‘a’tura ratou i te mau tao‘a aroha. Ua riro taua ohipa ra ei ohipa faateitei i te aau, no reira, i to ratou ho‘iraa mai, ua parau a‘e ra te hoê o te mau tamahine ma te oaoa rahi e, « e haere ana‘e tatou e tii i te toe‘a o te mau tao‘a ha‘uti e afa‘i na ratou ».16
Pŭpŭ no te Tino Ahuru Ma Piti Aposetolo, 1903–45
I te mahana piti 6 no atopa 1903, e mea rahi roa te ohipa a George Albert Smith e aita i nehenehe ia’na ia haere i te amuiraa rahi i taua mahana ra. I te taime a faaru‘e atu ai oia i to’na piha toro‘a, ua fatata roa te tuhaa pureraa avatea o te amuiraa i te faaoti, no reira ua ho‘i oia i te fare ma te opua e afa‘i i ta’na mau tamarii i te ta‘urua faaiteiteraa tao‘a.
Ia tae atu oia i te fare, ua maere roa oia i te iteraa’tu i te nahoa taata, e ua haere maira te hoê o ratou e haapoupou maitai ia’na.
« Eaha ho’i teie ? » ta’na ïa uiraa.
« Aita o oe i ite ? » te pahonoraa ïa a teie vahine.
« I ite i te aha ? »
« Eaha, ua paturuhia oe ei melo no te Pŭpŭ no te Tino Ahuru Ma Piti Aposetolo », te parau ïa a teie taata.
« E parau ti‘a ore te reira », te parau ïa a George Albert. « Te vai ra paha te tahi hape ».
« Ua faaroo roa to’u taria », te parau ïa a teie vahine.
« Te tahi paha ïa Smith ê atu », ta’na ïa parau. « Aita roa vau i faaarahia mai no te reira, e aita ta’u e nehenehe e ti‘aturi e, e parau mau te reira ».
Ma te haamâ rii, ua ho‘i faahou atu ra taua vahine ra i te Fare Menemene no te haapapû e, ua hape anei oia. I reira ua faaitehia mai ra ia’na e, ua ti‘a oia—o George Albert Smith te melo apî roa a‘e o te Pŭpŭ no te Tino Ahuru Ma Piti Aposetolo.17
I muri a‘e ua faati‘a ta’na tamahine o Emily i taua ohipa ra i te fare o Smith : « Mai te huru ra e, te taatoaraa o te Fare Menemene tei haere mai na ni‘a i te aihere e tae roa mai i roto i to matou fare, ma te ta‘i e te apa ia mama. Ua parau te mau taata atoa e, e Aposetolo o papa, e ua feruri matou e, te riroraa oe ei aposetolo o te hoê ïa ohipa ino roa e ti‘a ia tupu i ni‘a ia oe ».
Noa’tu te haapapû-raa-hia te parau faaite i muri a‘e, ua faaoti ihoa o George Albert e, e afa‘i oia i ta’na mau tamahine i te ta‘urua faaiteiteraa tao‘a mai tei fafauhia, « noa’tu e, maa vahi iti noa ta’na i ite », te na reira ra o Emily. « Ua rave oia i te taatoaraa o te taime i te turu‘iraa i te tua i ni‘a i te papa‘i no te paraparau i te taata ».18
E piti mahana i muri mai, i te 8 no atopa 1903, ua faatoro‘ahia o George Albert Smith ei Aposetolo i roto i te hoê piha teitei no te hiero no Roto Miti e te Peresideni Joseph F. Smith. I muri a‘e i te faatoro‘araa ua anihia ia’na ia faaite i to’na mau mana‘o i mua i te mau melo o te Pŭpŭ no te Tino Ahuru Ma Piti tei tae mai. Ua parau oia e, « te paruparu nei e te ere nei au i te paari ia faaauhia i te mau taata paari a‘e, tera râ e mea ti‘a to’u aau, e te hinaaro papû nei au ia tere te ohipa a te Fatu i mua. … E iteraa papû ora to’u no ni‘a i te hanahana o teie ohipa ; ua ite au e, ua tae mai te evanelia i te fenua nei i raro a‘e i te faatereraa e te arata‘iraa a te Fatu iho, e te feia tei ma‘itihia no te faatere, e mau tavini ïa No’na i roto i te mau mea atoa. Te hinaaro nei au e te pure nei au ia ora vau ma te viivii-ore e te haehaa, ia ti‘a ia‘u ia farii i te mau muhumuhu e te mau a‘oraa a te Varua no te arata‘i ia‘u i roto i to’u oraraa ».19
Ua tavini o George Albert Smith i roto i te Pŭpŭ no te Tino Ahuru Ma Piti fatata e 42 matahiti te maoro, ma te tai‘o atoa i na matahiti e 2 i te taviniraa ei Peresideni no te pŭpŭ. I roto i taua area taime ra ua rave oia e rave rahi ohipa e ua haamaitai i te taata na te ao atoa nei na roto i te mau rave‘a e rave rahi.
Faaiteraa i te Evanelia e te Faahoaraa i te mau Taata no te Ekalesia
E taleni tupu noa to Elder Smith ia ore te mau taata e taiâ i mua ia’na e no te faariro i te mau enemi ei mau hoa. Teie te parau a te hoê taata faatupu ohipa, e ere i te melo no te Ekalesia, no ni‘a ia’na i te taime o to’na hunaraa : « E taata ohie roa teie ia haamatau. E taata teie o ta oe e hinaaro ia matau. To’na mata ataata, ta’na aroharaa rima puai, e te mahanahana o ta’na fariiraa, na te reira e faaite i roto i to outou aau, i te aau tae mau o to’na auhoaraa no outou e no to’na mau taata tupu ».20
Ua faufaa-mau-hia taua taleni to’na ra i te hoê taime aita te Ekalesia i ite-maitai-hia’tura na te ao nei e o ta te mau taata e rave rahi e hi‘o araara noa ra. I te hoê taime, a haere ai oia i Virginia Tooa o te Râ no te hoê ohipa, ua faaroo oia e, ua opua te mau ti‘a faatere o te hau e haru i te mau taata atoa e itehia e te poro ra i te parau no te Momoni. Ua farerei o Elder Smith i te papa‘i parau o te oire, o Engle tane, no te tamata i te taui i te ture. I muri a‘e, ua papa‘i oia i roto i ta’na buka aamu : « I te taime matamua a farerei ai au ia Engle tane, e mea papû maitai to’na mana‘o e ua faaite mai ra oia ia‘u ma te iria e, eita tatou e fariihia i roto i te reira oire. … Ua parau atu ra vau ia’na e, te ti‘aturi nei au e, aita i tano te mau parau i faaitehia mai ia’na, e te hinaaro nei au e parahi maua i raro e e paraparau rii. … Ua rave maua te tahi maa taime no te aparauraa no ni‘a i te faaroo Momoni. Ua mărû roa oia hou a faaru‘e atu ai au ia’na, e ua aroha rima mai oia ia‘u e ua horo‘a mai i ta’na tareta. Ua haere ê atu vau ma te ite papû e, ua iriti au i te tahi mau mana‘o hape ».21 E toru mahana i muri mai ua haere faahou o Elder Smith e farerei ia’na e i teie taime, ua vaiiho atu oia i te hoê Buka a Moromona na’na.22
Ua imi tamau noa o Elder Smith i te mau rave‘a atoa no te paraparau i te taata no ni‘a i te Ekalesia. I te mau taime atoa ua titauhia ia’na ia ratere no ta’na mau ohipa, ua rave oia i te tahi mau Buka a Moromona, te mau ve‘a a te Ekalesia, e te tahi atu mau buka na te Ekalesia o ta’na e ti‘aturi e horo‘a na te taata. No te mea ho’i e, te faaite nei te Buka a Moromona i te hoê iteraa puai no ni‘a ia Iesu Mesia, ua feruri o Elder Smith e, ua riro ïa te reira ei tao‘a horo‘a maitai roa no te noela, e e mea pinepine oia i te hapono na roto i te fare rata i te tahi mau buka na te mau hoa no te tahi atu haapa‘oraa e na te tahi atoa mau taata ti‘araa teitei aita oia i farerei a‘e nei.23 I roto i te hoê rata apee i te reira huru tao‘a horo‘a no te noela, ua papa‘i oia e : « Tau mahana rii noa toe e faahanahana ai te keritetiano i te fanauraa o te Faaora, e e peu matauhia i taua pu‘e tau ra ia haamana‘o i to tatou mau hoa. No reira, te ti‘aturi nei au e, e farii oe i teie Buka a Moromona ta’u e faatae atu nei. … Te ti‘aturi nei au e, e oaoa oe ia vai te reira i roto i ta oe vairaa buka, no reira, te hapono atu nei au i te reira ei tao‘a horo‘a na oe no te noela ».
Ua farii oia i teie pahonoraa : « E faataahia te hoê vairaa no teie buka i ni‘a i ta matou vairaa buka, e e tai‘o-maite-hia te reira [mai te tahi tapo‘i e tae atu i te tahi tapo‘i] na roto i te hoê varua mahorahora. Eita te reira e ore i te faaaano i te mau mana‘o e i te faarahi ho’i i te varua farii o te mau taata atoa e tai‘o i te reira ma te feruri maite ».24
Te Ohipa i Roto i te Oraraa Tivira
Ua faaitoito o Elder Smith i te mau melo o te Ekalesia ia rave i te ohipa i roto i te vahi ta ratou e faaea ra e ia faaohipa i to ratou mana no te haamaitai i te huru i roto i te ao nei. Ua rave oia iho i te ohipa i roto i te mau faanahonahoraa tivira e rave rahi noa’tu te teimaha o to’na piiraa ei Huimana Faatere. Ua ma‘itihia oia ei peresideni no te « International Irrigation Congress » [Amuitahiraa no te Faarari i te Fenua Maro no te Ao atoa nei] e te « Dry Farming Congress » [Amuitahiraa no te mau Fare Faaapu Maro], e ua ma‘itihia oia e ono taime ei mono peresideni no te « National Society of the Sons of the American Revolution » [Sotaiete Fenua no te mau Tamaiti no te Tama‘i no Amerika]. Ua riro o Elder Smith ei taata puai i te tura‘iraa i te parau no te faaohiparaa i te manureva ei rave‘a na te mau Huimana Faatere no te rave maitai atu i ta ratou mau ohipa ratereraa, e ua rave oia i te ohipa i roto i te tomite faatere no Western Air Lines [Taiete Manureva Marite]. Ua rave itoito atoa oia i te ohipa i roto i te « Boy Scouts of America » [Tamaroa Scout no Amerika] e i te matahiti 1934 ua haafeti‘ahia oia i te feti‘a « Silver Buffalo »[Feti‘a Moni Buffalo], te faaturaraa teitei roa a‘e i roto i te ohipa scout. I roto i te mau matahiti i muri mai i te Tama‘i Matamua o te Ao nei, ua tavini oia ei ti‘a faatere no Utaha no te Ohipa Tautururaa, e ei ti‘a no te tuhaa fenua i roto i te « International Housing Convention » [Taatiraa no te Imi i te Fare na te Ao atoa nei], te opuaraa a teie taatiraa o te imiraa ïa i te faaearaa no te feia aita e fare faahou i muri a‘e i te tama‘i.25
Hou a piihia ai oia ei Aposetolo, ua rave itoito o George Albert i te ohipa politita, e ua haa ma te puai no te paturu i te parau e i te taata ta’na i mana‘o e nehenehe e haamaitai i te oraraa o te taata. Ia riro mai oia ei Huimana Faatere, ua iti rii ta’na ohiparaa i roto i te politita, tera râ, ua tamau noa oia i te paruru i te mau tumu parau ta’na i ti‘aturi. Ei hi‘oraa, i roto i te matahiti 1923 ua tauturu oia i te tuuraa i te hoê ture i roto i te Apooraa Iriti Ture no Utaha no te patu i te hoê fare ma‘i no te mau taata ma‘i tutoo.26
Ua ite-papû-hia te aau aroha o Elder Smith no vetahi ê i roto i to’na taviniraa ei peresideni no te « Society for the Aid of the Sightless » [Sotaiete no te Tauturu i te Matapô], te hoê ti‘araa ta’na i mau mai i te matahiti 1933 e tae atu i te matahiti 1949. Ua fifi o Elder Smith i roto i te parau no to’na na mata, e no reira, e here taa ê to’na no te feia matapô. Ua faatere oia i te nene‘iraa o te Buka a Moromona na roto i te reo o te matapô, e ua haamau oia i te hoê faanahoraa no te tauturu i te feia matapô ia haapii i te tai‘o i te reo matapô e ia faatano i to ratou hapepa na roto i te tahi atu mau rave‘a. Na roto i ta’na mau tautooraa ua herehia oia e te mau taata ta’na i tavini. Ua faaite te hoê melo no te « Society for the Aid of the Sightless » [Sotaiete no te Tauturu i te Matapô] i to’na mauruuru na roto i te papa‘iraa i te hoê pehepehe tei horo‘ahia’tu ia Elder Smith ra i te 70raa o to’na mahana fanauraa :
Ia otu‘itu‘i ana‘e te oraraa e te mau rima puai,
E ia tahe te mau roimata oto ;
Ia to‘eto‘e ta’u varua i te To‘eto‘e hoa ore,
E i te pahonoraa ore—
‘E fariu ê au, ma te ti‘aturiraa puai,
I to’u mau taahiraa noa’tu te fifi e te hapepa,
No te imi i te hoê aau haroaroa,
Tei reira ho’i te hoê auahi hoa—
Te hoê aau tei roto i reira te Paari maitai,
Te Aroha e te hamani maitai,
E no to’na faaroo i te Atua e i te taata, ua haapii
Atoa ïa i te Matapô i taua huru faaroo ra. …
Noa’tu e, aita tatou e ite
I to’na mata here,
Te ite ra râ tatou i te paari
O to’na aau haroaroa ;
Te ite nei tatou i te hoê hau i roto i to’na varua
E e ite atoa tatou i te hau ;
E faaroo tatou i ta’na pure muhu ore o te parau ra e
Aita tatou e haere otahi noa ;
Na to’na faaroo i roto ia tatou e horo‘a i te puai ia tatou,
A haere ai tatou na ni‘a i te mau e‘a ite-ore-hia ;
Ua faateiteihia to tatou mau varua na te hoê taata
Tei haa apiti e te Atua.27
To’na Ma‘i e Te Tahi atu mau Tamataraa
No te pae rahi o to’na oraraa, e ere te ea o George Albert Smith i te mea maitai roa. Noa’tu e, e mea au na’na te ohipa au, te ori-haere-raa na ni‘a i te puaa-horo-fenua, e te tahi atu mau tuaro, e mea na‘ina‘i roa ïa to’na tino e e mea pinepine te paruparu. Taa ê noa’tu to’na mata ma‘i, e ma‘i atoa to Elder Smith i roto i te faarii maa e te tua, e rohirohi tamau, e fifi i te mafatu, e e rave rahi atu mau ma‘i i roto i to’na oraraa. Ua riro atoa te teimaha o ta’na mau hopoi‘a e rave rahi ei faateimaha roa’tu ia’na, e i te haamataraa, aita oia i hinaaro e tamarû i te tereraa o ta’na mau ohipa no te faaherehere i to’na ea. E no reira, mai te matahiti 1909 e tae atu i te 1912 ua roohia oia i te hoê ma‘i rahi e ua titauhia ia’na ia faaea noa i ni‘a i te ro‘i, e aita i ti‘a faahou ia’na ia rave i ta’na mau ohipa i roto i te Pŭpŭ no te Tino Ahuru Ma Piti. Ua riro ïa ei taime fifi roa no Elder Smith, ua hinaaro ho’i oia ia rave faahou i ta’na ohipa. No te pohe o to’na metua tane i te matahiti 1911 e te ma‘i hota o ta’na vahine, ua rahi roa’tu te fifi no te faaora i te ma‘i o Elder Smith.
Tau matahiti i muri a‘e, ua faaite mai oia i te ohipa tei tupu ia’na i taua taime ra:
« Tau matahiti i ma‘iri a‘e nei e ma‘i rahi to’u. Ia‘u i mana‘o aita te taata i ti‘aturi faahou, maori râ, ta’u ana‘e vahine. … Ua paruparu roa vau e aita e nehenehe maitai faahou ia haere. Ua titauhia ia‘u ia faaitoito no te huri mărû noa i roto i te ro‘i.
« I te hoê mahana, i roto i taua mau fifi ra, ua mo‘e to’u hiroa i te mau mea ati a‘e ia‘u e ua feruri au e, ua reva vau i te tahi pae mai. Ua ite au ia‘u te ti‘a ra ma te huri atu to’u tua i te hoê roto rahi e te nehenehe, e ma te hi‘o atu i te hoê uru raau rahi. Aita hoê a‘e taata i reira, e aita e poti i ni‘a i te roto e aore râ, aita te tahi atu mau mea no te faaite e, e mea nahea vau i tae mai ai i reira. Ua ite a‘e ra vau, e aore râ, mai te mea ra e, ua ite a‘e ra vau e, ua oti ta’u ohipa i te tahuti nei e ua ho‘i au i te fare…
« Ua haamata a‘e ra vau e haere e mata‘ita‘i, e aita i maoro, ua ite atu vau i te hoê e‘a na roto i te uru raau mai te mea ra e, aita i faaohipa-pinepine-hia, e ua huru mo‘e rii i raro a‘e i te aihere. Ua pee au i taua e‘a ra, e i muri a‘e i te tahi tau taime to’u haereraa e to’u ratereraa atea na roto i te uru raau, ua ite atu ra vau i te hoê taata te haere maira ia‘u ra. Ua ite a‘e ra vau e, e taata rahi roa teie, e ua haavitiviti a‘e ra vau i te haere ia tae au i piha‘i iho ia’na, no te mea, ua taa a‘e ra ia‘u e, o to’u ïa papa ruau [George A. Smith]. I to’na oraraa ra, ua hau to’na teiaha e hanere e pae ahuru kilo ïa, no reira, te ite ra ïa outou e, e taata rahi teie. Te haamana‘o nei au i to’u oaoa i te iteraa ia’na i te haereraa mai. Ua piihia vau i to’na ra i‘oa e ua te‘ote‘o noa vau i taua i‘oa ra.
George A. Smith
« Ia fatata mai o papa ruau i te tahi tau metera te atea ia‘u, ua faaea a‘e ra oia. Ua riro to’na faaearaa ei aniraa ia‘u ia faaea atoa. I muri iho—e teie ta’u e hinaaro nei i te mau tamaroa e te mau tamahine e i te feia apî eiaha roa ratou e haamo‘e—ua hi‘o mai ra oia ia‘u ma te papû e na ô mai ra :
« ’Te hinaaro nei au ia ite e, eaha ta oe i rave i to’u i‘oa.
« Ua tere a‘e ra i mua ia‘u te mau mea atoa ta’u i rave i mua ra mai te au i te hoho‘a e tere ra i ni‘a i te hoê paruai—te mau mea atoa ta’u i rave. Aita i maoro ua tae maira teie hoho‘a i te taime a ti‘a ai au i reira. Ua tere to’u oraraa taatoa i mua ia‘u. Ua ataata a‘e ra vau e ua hi‘o atu ra i to’u papa ruau e na ô atu ra e :
« ’Aita roa vau i rave noa a‘e i te hoê mea i to oe i‘oa e haamâ ai oe.‘
« Ua taahi mai ra oia i mua e ua tape‘a mai ra i to’u rima, e a na reira ai oia, ua araara faahou a‘e ra vau i te mau mea o te tino e haati ra ia‘u. Ua rari roa to’u turu‘a mai te huru e, ua maniihia te pape i ni‘a iho ua rari i te roi mata—mauruuru i te mea e, ua ti‘a ia‘u ia pahono ma te haamâ ore.
« Ua feruri noa vau i taua ohipa ra e rave rahi taime, e te hinaaro nei au e parau atu ia outou e, ua tamata vau, mai taua taime ra, ia haapa‘o hau roa’tu â i taua i‘oa ra. No reira te hinaaro nei au e parau atu i te mau tamaroa e te mau tamahine, i te feia apî tamaroa e i te feia apî tamahine, i te feia apî o te Ekalesia e i te ao atoa nei : A faatura i to outou mau metua tane e to outou mau metua vahine. A faatura i te mau i‘oa ta outou e mau ra ».28
I te pae hopea ua haamata o Elder Smith ia farii faahou i te puai, e ua matara mai oia i rapae i to’na ati ma te aau mauruuru apî no to’na iteraa papû i te parau mau. I roto i te hoê amuiraa rahi i muri mai ua parau oia i te feia mo‘a e : « Ua haere au na roto i te peho o te mărû pohe i te mau matahiti i ma‘iri a‘e nei, ua fatata roa’tu i te tahi pae mai, e no reira, ua papû roa ia‘u e, [ahiri aita] te haamaitairaa taa ê a to tatou Metua i te Ao ra aita ïa vau e faaea mai i ô nei. Tera râ, te iteraa papû e ua haamaitai mai to’u Metua i te Ao ra ia‘u, aita roa ïa i morohi hoê noa a‘e taime. Noa’tu e ua fatata roa vau i te haere i tera pae mai, ua rahi roa’tu ïa to’u papûraa e, e parau mau te evanelia. I teie nei ua faahereherehia to’u ora te oaoa nei au ia faaite papû e, ua ite au e, e parau mau te evanelia, e ma to’u varua atoa te haamauruuru nei au i to’u Metua i te Ao ra no to’na heheuraa mai i te reira ia‘u.29
Ua rau te mau fifi o te tino e te tahi atu mau ati tei tamau noa i te haamauiui ia Elder Smith i te mau matahiti i muri mai. Penei a‘e to’na ati rahi roa a‘e ua tupu ïa i te mau matahiti 1932 e tae atu i te matahiti 1937, a roohia ai ta’na vahine o Lucy i te ma‘i mauiui rumati e te ma‘i roro. Ua vai oia i roto i te mauiui rahi e i te matahiti 1937 ua titauhia ia haapa‘o tamau noa ia’na. E i roto i te hoê ma‘i mafatu i te ava‘e eperera 1937, ua fatata roa oia i te pohe e ua ino roa’tu oia.
Noa’tu to’na haape‘ape‘araa tamau no Lucy, ua tamau noa o Elder Smith i te rave i ta’na mau ohipa ma te maitai e maraa ia’na. I te 5 no novema 1937, ua paraparau oia i te hunaraa ma‘i o te hoê hoa, e i to’na parahiraa mai i raro i muri a‘e i ta’na a‘oraa, ua toro mai ra te hoê taata i te hoê api parau ia’na ra o te parau ra ia’na ia ho‘i i te fare i te reira ihoa taime. Ua papa‘i oia i muri a‘e i roto i ta’na buka aamu : « Ua faaru‘e atu vau i te fare pureraa i taua iho taime ra tera râ, ua huti ta’u vahine here i to’na aho hopea hou a tae mai ai au i te fare. Ua pohe oia i te taime a paraparau ai au i te hunaraa ma‘i. Ua ere ïa vau i teie nei i te hoê tauturu papû e e vai noa ïa o vau ana‘e aita oia ».
Ua faaipoipohia o Lucy e o George Albert hau rii atu i te 45 matahiti i te taime a pohe ai oia. E 68 matahiti to Lucy. Noa’tu to’na mihi rahi i ta’na vahine, ua ite o Elder Smith e, no te hoê tau poto noa taua taa-ê-raa ra, e na teie iteraa i horo‘a mai i te puai i roto ia’na. Ua papa‘i oia e, « a vai ai to’u utuafare i roto i te ati rahi, ua riro te iteraa e, e tahoêhia matou ia mama mai te mea e, e vai faaroo noa matou, i tamahanahana ia matou. Ua riro oia ei vahine e ei metua vahine haapa‘o, te tauturu, e te aroha ia vetahi ê. Ua mamae oia e ono matahiti i te maoro i te mau huru mauiui atoa, e ua papû roa ia‘u e, te oaoa nei oia i piha‘i iho i to’na mama e te tahi atu mau taata herehia i reira. … E hamani maitai rahi to te Fatu e ua iriti ê oia i te mau mana‘o atoa no ni‘a i te poheraa, e o ta’u ïa e mauruuru rahi nei ».30
Peresideni no te Misioni no Europa
I te matahiti 1919 ua pii te peresideni Heber J. Grant, tei paturu-noa-hia a‘e nei ei Peresideni no te Ekalesia, ia Elder Smith ia faatere i te Misioni no Europa. I roto i te hoê a‘oraa i roto i te amuiraa rahi te tahi noa tau mahana hou to’na revaraa, ua parau o Elder Smith e :
« Te hinaaro nei au e parau atu ia outou, e au mau taea‘e e au mau tuahine e, te faaite nei au e, e tura—eiaha na, ua hau atu i te tura, te faaite nei au e, e haamaitairaa rahi mau—i te mea e, ua aupuru te Fatu ia‘u mai roto mai i te paruparu aita i maoro a‘e nei, e ua faaora ia‘u ia ti‘a i te mau taea‘e ia ite e, e ti‘a ia‘u ia rave i te hoê misioni i roto i te hoê fenua rapae…
« … I te mahana toru i muri nei ua titauhia ia‘u ia rave i te pereoo auahi no te tere i te hiti fenua e i muri iho na ni‘a i te moana e tae roa’tu i te vahi i piihia ai au. Mauruuru e te Atua no teie haamaitairaa ia haere. Te oaoa nei au i te mea e, ua tae mai te iteraa o teie parau mau i roto i to’u varua ».31
I taua taime ra tei roto â o Europa i te faati‘a-faahou-raa mai roto mai i te Tama‘i Matamua o te Ao nei, tei hope i te ava‘e rii noa na mua’tu. Na roto i te tama‘i, ua topa roa te numera o te mau misionare i Europa, e te hoê o te mau ohipa a Elder Smith o te haamaraaraa ïa i taua numera ra. No te fifi râ o te oraraa i te pae faarava‘iraa faufaa i Europa i muri a‘e i te tama‘i, aita ïa te mau faatereraa hau i farii ia horo‘ahia te mau parau faati‘a (visas). E no te haafifi roa’tu i te reira, te vai noa ra â te tahi mau mana‘o hape no ni‘a i te feia mo‘a i te mau mahana hopea nei. No te haamaitai i te hi‘oraa o te Ekalesia, ua farerei o Elder Smith e rave rahi mau ti‘a faatere o te hau e i te tahi atu mau taata ti‘araa teitei. No te haamaramarama i te opuaraa o te mau misionare i Europa e i te ao atoa nei, e parau pinepine oia e, « a tape‘a na outou te mau mea maitai atoa, a tape‘a na outou te mau mea atoa ta te Atua i horo‘a mai na outou o tei haafaufaa i to outou oraraa, e i muri iho, a vaiiho ia matou ia faaite atu ia outou i te hoê mea o te amui atu i to outou oaoa e o te haamaraa i to outou oaoa ».32 Ia au i te parau a te hoê o te mau misionare tei tavini i raro a‘e ia’na, « na roto i to’na aravihi e te maitai ua roaa ia’na to ratou faatura e te auhoaraa e ua roaa mai te mau parau faati‘a no ni‘a i te mau misionare tei opanihia na mua’tu ».33
I te hopea o ta’na tau taviniraa i te matahiti 1921, ua manuïa o Elder Smith i te haamaraaraa i te numera o te mau misionare no te tavini i Europa e i te taui i te tahi mau mana‘o hape no ni‘a i te feia mo‘a i te mau mahana hopea nei. Ua roaa atoa ia’na te tahi mau hoa no te Ekalesia, e ua tape‘a noa oia i te reira auhoaraa na roto i te mau rata e rave rahi matahiti i muri mai.
Faaherehereraa i te mau Vahi Haamana‘oraa a te Ekalesia
E mea au roa na Elder Smith ia paraparau ia vetahi ê no ni‘a i te Ekalesia e i te mau ohipa rarahi i roto i to’na aamu. I roto i te roaraa o to’na tau faatereraa ua haa rahi oia no te tauturu i te faaherehere i taua aamu ra na roto i te hamaniraa i te mau ofa‘i haamana‘oraa e te tapa‘oraa i te mau vahi haamana‘oraa i roto i te aamu o te Ekalesia. Mai te au i ta te hoê hoa to’na i papa‘i, « ua ti‘aturi oia e, na roto i te faafariuraa i te u‘i apî i ni‘a i te mau ohipa i ravehia e to ratou mau huimetua, e ohipa maitai roa ïa ta’na e rave ra no ratou ».34
Ei Aposetolo apî roa ua haere oia i Palmyra, New York, e ua aimarô no te hoo mai i te fare faaapu a Joseph Smith metua na ni‘a i te i‘oa o te Ekalesia. I New York ua haere atoa oia e farerei i te hoê taata o Pliny Sexton to’na i‘oa, oia te fatu fenua o te Aivi Cumora, te vahi i farii ai o Iosepha Semita i te mau api auro. Aita o Sexton tane i hinaaro e hoo i te reira fenua i te Ekalesia, noa’tu râ i te reira, ua riro mai oia e o Elder Smith ei mau hoa. Na roto i te auraa maitai ta Elder Smith i tape‘a noa e o Sexton tane, i te pae hopea ua nehenehe i te Ekalesia ia hoo mai i te reira tuhaa fenua e ia haamo‘a i te hoê ofa‘i haamana‘oraa i reira.
I te matahiti 1930, te hanereraa o te matahiti i faati‘ahia ai te Ekalesia, ua tauturu o Elder Smith i te haamauraa o te ‘Utah Pionner Trails and Landmarks Association’ (Te Taatiraa no te mau E‘a e te mau Vahi faufaa o te mau Pionie no Utaha), e ua ma‘itihia oia ei peresideni matamua no taua taatiraa ra. I roto i na matahiti e 20 i muri mai, ua haamau teie taatiraa hau atu e 100 ofa‘i haamana‘oraa e te mau tapa‘o, e e rave rahi o te reira ua riro ïa ei haamana‘oraa i te tere o te mau pionie i roto i te Afaa no Roto Miti. Ua faatere o Elder Smith i te rahiraa o te mau oro‘a haamaitairaa o te reira mau ofa‘i haamana‘oraa.35
No te haamaramarama i te anaanatae o te Ekalesia i roto i teie mau vahi haamana‘oraa, ua papa‘i oia e : « Ua riro ïa ei peu matauhia ia hamani i te mau ofa‘i haamana‘oraa no te mau taata ia haamana‘ohia ho’i to ratou parau. Ua haamau-tamau-hia ho’i i roto i te feruriraa o te taata te mau ohipa rarahi na roto i te paturaa i te mau ofa‘i haamana‘oraa. … E rave rahi mau mea faufaa o te mo‘e nei, e ua mana‘o te taata e, e ti‘a ia imihia te hoê rave‘a papû no te tapa‘o i te reira, ia ite ho’i te mau taata i muri mai i te mau ohipa faufaa tei tupu na ».36
Ua haere atoa te papa ruau o Elder Smith i Utaha na muri iho i te mau pionie, e no reira, e faatura rahi to’na no taua mau melo matamua ra o te Ekalesia tei faatusia rahi ia ratou no to ratou faaroo. I roto i te hoê a‘oraa na’na i mua i te Sotaiete Tauturu, ua faaite mai oia i teie iteraa tei roaa ia’na a ratere faahou ai oia na ni‘a i te purumu a te mau pereoo huti rima a te mau pionie :
« Ua tae matou i te vahi i reira te mau taata e rave rahi o te pŭpŭ pereoo huti rima a Martin i pohe ai. Ua ite matou te vahi fatata roa a‘e i puhapa ai ratou. Tei reira te mau taata e mau huaai no taua pŭpŭ ra, no te tautururaa ia tuu i te hoê tapa‘o. E i muri iho, ua haere atu matou i Rock Creek ; ua patiahia e matou te hoê tapa‘o no te taime poto i reira i te matahiti na mua’tu. I taua taime taa ê o te matahiti, te tupu ra te mau tiare oviri nehenehe i te mau vahi atoa, e rave rahi tiare ‘iris’ oviri, e ua pafa‘i te mau melo o te pŭpŭ i te tahi o te reira mau tiare e ua tuu ma te here i ni‘a i te haapu‘eraa ofa‘i tei haaputuhia i te matahiti na mua’tu. … I ô nei, ua hunahia 15 melo no te Ekalesia i roto i te hoê menema, ua pohe ratou i te po‘ia e te faaearaa ore.
« Ua ite outou e, te vai ra te tahi mau taime e te tahi mau vahi mai te mea ra e, e mea fatata roa tatou i to tatou Metua i te Ao ra. A parahi haati ai matou i te auahi i roto i taua afaa na‘ina‘i ra no Rock Creek, i reira ho‘i i tupu ai te ati rahi i ni‘a i te Pŭpŭ Pereoo Huti rima a Willie—o matou te mau huaai o te mau pionie, o te mau taata tei ratere na roto i te mau mou‘a i roto i te ve‘ave‘a e te to‘eto‘e—ua faati‘ahia te tahi mau aamu no ni‘a i te ohipa i tupu i ni‘a i to matou mau tupuna. … Ua riro ïa ei taime faahiahia roa. Ua faahiti-faahou-hia te aamu ei maitai no matou.
« … Mai te mea ra ia‘u e, tei rotopu mau matou i te mau taata tei horo‘a i te mau mea atoa na ratou ra, ia ti‘a ho’i ia matou ia farii i te mau haamaitairaa o te Evanelia. Mai te mea ra e, tei mua matou i te aro o te Fatu.
« A faaru‘e mai ai matou i reira, i muri a‘e i to matou ta‘iraa—ua ite au e, aita hoê taata aita i ta‘i i roto i te pŭpŭ e 30 e aore râ, e 40 taata—ua putapû roa to matou aau i te mau mea tei tupu i roto i taua haaputuputuraa ra, e tape‘a mai ra te hoê tuahine maitai i to’u rima e na ô mai ra, ‘e te taea‘e Smith, mai teie atu taime, e riro vau ei vahine maitai a‘e.‘ Teie vahine… o te hoê ïa o te mau vahine maitai roa a‘e, te ti‘aturi nei râ vau e, ua putapû roa oia, mai te rahiraa o matou, no te mea e ua ite matou i roto i te tahi mau mea taa ê aita matou i tuati roa i te mau fâ o te ti‘a ia vai mai i roto i to matou mau varua. Aita te mau taata tei hunahia i ô nei i horo‘a noa i to ratou ora, ua horo‘a râ ratou i te ora ei faaiteraa i to ratou ti‘aturi i te hanahanaraa o teie ohipa…
« Ahiri te mau melo o teie pŭpŭ [Te Sotaiete Tauturu] e riro na ei mau taata faaroo mai te mau taata tei hunahia i ni‘a i te mau faa, tei faaruru i to ratou mau fifi ma te faaroo i te Fatu, e amuihia’tu ïa te reira i ta outou mau ohipa e rave rahi i rave, ei reira ho’i te maitai o te hoê Metua e tahe mai ai i ni‘a ia outou e i te mau mea atoa na outou ra ».37
Peresideni o te Ekalesia, 1945–51
I te po‘ipo‘i roa i te 15 no me 1945, a tere ai oia na ni‘a i te pereoo auahi no te haere i te mau pae hitia o te râ, ua faaara te hoê ti‘a no te pereoo auahi ia Elder Smith e te hoê parau poro‘i : ua pohe te peresideni Heber J. Grant, oia ho’i te Peresideni o te Ekalesia i taua taime ra. Ua taui oioi noa o Elder Smith i te pereoo auahi e ua ho‘i i Roto Miti. Tau mahana i muri mai ua faataahia o George Albert Smith, te melo paari a‘e o te Pŭpŭ no te Tino Ahuru Ma Piti Aposetolo, te va‘uraa o te Peresideni o te Ekalesia a Iesu Mesia i te Feia Mo‘a i te mau Mahana Hopea Nei.
I roto i ta’na a‘oraa matamua no te amuiraa rahi ei Peresideni no te Ekalesia, ua parau oia i te feia mo‘a tei paturu a‘e nei ia’na, « Te uiui nei au e, te vai ra anei te tahi taata ê atu e paruparu nei e e haehaa nei mai teie taata e ti‘a’tu nei i mua ia outou ».38 Ua faaite atoa oia i te reira huru mana‘o i mua i te mau melo o to’na utuafare : « Aita vau i hinaaro i teie ti‘araa. Aita vau i mana‘o e ua tano vau no te reira. Tera râ, ua tae mai i ni‘a ia‘u, e haapa‘o ïa vau i te reira ma te maitai roa. Te hinaaro nei au ia ite outou e, noa’tu te ohipa ta outou e rave nei i roto i te ekalesia, mai te hahaereraa utuafare e tae atu i te faatereraa i te hoê tĭtĭ, mai te mea e, e rave outou i te reira mai te maitai roa, ua aifaito noa ïa te faufaa o to outou ti‘araa e to’u ».39
E rave rahi tei feruri e, te mau tareni o te peresideni Smith, ua au maitai ïa no teie piiraa. Ua faaite te hoê Huimana Faatere i teie ti‘aturiraa i muri noa a‘e i te paturu-raa-hia te peresideni Smith : « E mea pinepine i te parauhia e, ua faatupu te Fatu i te hoê taata taa ê roa no te rave i te hoê misioni taa ê. … E ere na’u e parau e, eaha te misioni taa ê e vai nei i mua i te peresideni George Albert Smith. Tera râ, ua ite au e, i teie taime taa ê mau i roto i te aamu o te ao nei, aitâ i hinaaro-rahi-hia a‘e nei te here i rotopu i te mau taea‘e mai tei hinaarohia i teie mahana. Ua ite atoa vau e, aita e taata ta’u i matau o tei here i te utuafare taata nei, i te mau taata e i te taata hoê, hau atu i te rahi i to te peresideni George Albert Smith ».40
Te Tautururaa i te Feia Nava‘i ore i muri i te Ati o te Tama‘i Piti o te Ao nei
Ua hope te Tama‘i Piti o te Ao nei te tahi noa tau ava‘e i muri a‘e a riro ai o George Albert Smith ei Peresideni no te Ekalesia. Ua vaiiho mai te tama‘i e rave rahi tauatini taata aita e faaearaa e aore e oraraa faahou i Europa, e ua faaohipa oioi te peresideni Smith i te mau rave‘a totauturu a te Ekalesia no te horo‘a i te tauturu. I muri a‘e ua parau te peresideni Gordon B. Hinckley no ni‘a i teie tautooraa ra : « Tei roto atoa vau i te mau taata tei rave i te ohipa i te pô i te Welfare Square i Roto Miti, i te faatomoraa i te mau tauhaa i ni‘a i te mau pereoo auahi o te uta i te maa i te vahi e haponohia’tu ai na ni‘a i te moana. I te taime no te haamo‘araa i te hiero no Helevetia [i te matahiti 1955], a haere mai ai e rave rahi feia mo‘a no Helemani i te hiero, ua faaroo vau i te tahi pae o ratou, ma te roimata i te taheraa i ni‘a i te papari‘a, i te parauraa ma te mauruuru no taua maa ra tei faaora ia ratou ».41
Ua ite atoa te peresideni Smith e, te vai ra te hoê hinaaro rahi i te pae varua i rotopu i te taata o te ao nei i muri a‘e i te ati rahi o te tama‘i. Ei pahonoraa, ua faanaho oia i te mau misioni i roto i te mau fenua e ua tape‘ahia te ohipa misionare e te tama‘i, e ua faaitoito oia i te feia mo‘a ia haapa‘o i te evanelia o te hau i roto i to ratou iho mau oraraa. « Te faaiteraa maitai a‘e o te mauruuru i teie taime », ta’na ïa parau i muri noa‘e i te hoperaa te tama‘i, « maori râ, o te imiraa ïa i te mau rave‘a atoa no te hopoi mai i te oaoa i roto i teie ao oto, i te mea e, e mau tamarii paatoa tatou na to tatou Metua, e tei raro a‘e tatou paatoa i te faaueraa ia faariro i teie ao ei vahi oaoa a‘e no to tatou ia ora.
« E mata na tatou i te faaite i te maitai e te aroha i te mau taata atoa e titau ra i te reira, ma te ore e haamo‘e i te feia tei ere ra ; e i roto i to tatou taime oaoaraa i te hau, eiaha tatou e haamo‘e i te feia tei horo‘a i to ratou mau taata herehia ei tuhaa no te hoo o te hau…
« Te pure nei au ia fariu atu te taata i te Atua ra, e ia haapa‘o i to’na mau haere‘a, e na roto i te reira, e faaora i te ao nei i te tama‘i e te haamouraa. Te pure nei au ia tae mai te hau no ô ana‘e mai i te Metua i te Ao ra ra i roto i te aau e i roto i te utuafare o te mau taata atoa e oto nei ».42
Te mau rave‘a tei faarahihia no te faaite i te Evanelia
Ua tamau noa te peresideni Smith i te faaite i te evanelia ia vetahi ê i te mau taime atoa, e ua rahi roa taua mau taime ra i roto i to’na ti‘araa apî. I te ava‘e me 1946 ua riro mai te peresideni Smith ei Peresideni matamua no te Ekalesia tei haere e farerei i te feia mo‘a i Mehiko. Taa ê noa’tu te farereiraa i te mau melo o te Ekalesia e te paraparauraa i roto i te hoê amuiraa rahi, ua farerei atoa te peresideni Smith e rave rahi mau ti‘a mana i Mehiko e ua paraparau ia ratou no ni‘a i te evanelia i faaho‘i-faahou-hia mai. I roto i te hoê tere farerei i te peresideni Manuel Camacho no Mehiko, ua haamaramarama te peresideni Smith e : « Te haere mai nei matou e te hoê parau poro‘i taa ê na oe e na to oe nunaa. Tei ô nei matou no te parau atu ia oe no ni‘a i to outou mau huimetua e no te faaho‘i-raa-hia mai te Evanelia a Iesu Mesia. … Te vai nei ta matou hoê buka… o te faati‘a nei i te parau no te hoê peropheta rahi e to’na utuafare e te tahi atu mau taata, tei faaru‘e ia Ierusalema e 600 matahiti hou te Mesia, e ua haere mai i ni‘a… i teie fenua rahi o Amerika, tei faaitehia ia ratou e, e ‘fenua i parauhia, tei ma‘itihia i roto i te tahi atu mau fenua atoa.‘ Te parau atoa nei teie Buka a Moromona i te tere o Iesu Mesia i roto i teie fenua ra, e ua faanahonaho Oia i Ta’na Ekalesia e ua ma‘iti i Ta’na na pĭpĭ hoê ahuru e ma piti ».
E mea faatura e e mea haafaahiahia na te peresideni Camacho te feia mo‘a i te mau mahana hopea nei e ora ra i roto i to’na fenua, e ua anaanatae roa oia i te Buka a Moromona e ua ui a‘e ra e, « E nehenehe anei ia‘u ia farii i te hoê Buka a Moromona ? Aitâ vau i faaroo a‘e nei i te reira na mua a‘e nei ». I reira ua horo‘a’tura te peresideni Smith na’na i te hoê buka puohu iri puaa na roto i te reo Paniora, e te hoê tapura o te mau irava taa ê i mua i te buka. Na ô mai ra te peresideni Camacho e, « e tai‘o vau i te buka taatoa, no te mea e mea faufaa roa teie no’u e no to’u mau taata ».43
Te faahanahanaraa i te Hanereraa o te matahiti o te Taeraa mai o te mau Pionie
Te hoê o te mau ohipa rarahi i roto i na matahiti e ono to George Albert Smith faatereraa ei Peresideni no te Ekalesia, ua tupu ïa i te matahiti 1947, i te taime a faahanahana ai te Ekalesia i te hanereraa o te matahiti o te taeraa mai o te mau pionie i roto i te Afaa no Roto Miti. Ua arata‘i te peresideni Smith i te faahanahanaraa, tei itehia na roto i te fenua Marite taatoa, e ua tae i to’na faito teitei roa i te taime a haamo‘ahia ai te Ofa‘i Haamana‘oraa o Teie te Vahi i Roto Miti, i piha‘i iho i te vahi a tomo mai ai te mau pionie i roto i te afaa no te taime matamua. Mai te matahiti 1930 ua faanahonaho maite te peresideni Smith i te hoê haamana‘oraa no te faahanahana i te mau ohipa e i te faaroo o te mau pionie. Tera râ, ua haapa‘o maitai oia ia faatura atoa taua ofa‘i ra i te mau taata imi matamua, te mau misionare no te tahi atu mau faaroo, e te mau feia faatere faufaa no Amerika Inidia no taua tau ra.
I te taime no te haamo‘araa i te ofa‘i haamana‘oraa i Teie te Vahi, ua faaite o George Q. Morris, peresideni no te misioni no te mau Tuhaa no te Pae Hitia o te râ, i te hoê varua maitai, o ta’na i parau e, o te mau tautooraa a te peresideni Smith te tumu o te reira : « Ua itehia i roto i te oro‘a o te haamo‘araa, te horo‘araa a te peresideni Smith no te faatupu i te autaea‘eraa e te fariiraa. … Ua hamanihia te ofa‘i haamana‘oraa ma te faatura—ia au i te ti‘a ia hamanihia te hoho‘a tarai—no te mau taata tei hamani i te aamu o te tereraa na roto i te mau mou‘a i te pae tooa o te râ na mua’tu i te mau Pionie Momoni, ma te hi‘o ore i te taata e aore râ i te haapa‘oraa faaroo. A faaineinehia ai te tereraa o te oro‘a haamaitairaa, ua hinaaro te peresideni Smith ia tae atoa mai te hoê ti‘a no te mau ekalesia rarahi, taa ê atu te mau ti‘a mana no te tuhaa, no te mataeinaa e no te oire. Te feia ti‘araa teitei tei paraparau, o te hoê ïa tahu‘a katorika, hoê episekopo porotetani, hoê tahu‘a Ati Iuda, e te mau ti‘a no te Ekalesia a Iesu Mesia i te Feia Mo‘a i te Mau Mahana Hopea Nei. I muri a‘e i te oro‘a haamaitairaa, ua parau te hoê ratere no te pae hitia o te râ e, ‘i teie mahana ua bapetizo-faahou-hia vau i te varua. Te ohipa ta’u i ite e ore ïa e tupu i te tahi atu vahi i te ao nei. E mea nehenehe mau te varua farii i faaitehia i teie mahana‘ » 44
Noa’tu te rahi o taua ofa‘i haamana‘oraa ra, ua haapii te peresideni Smith e, te rave‘a maitai a‘e no te faatura i te mau pionie o te peeraa ïa i to ratou hi‘oraa no te faaroo e no te haapa‘o. I roto i te pure haamo‘araa i taua ofa‘i ra, ua parau oia e : « E to matou Metua i te ao ra… te ti‘a nei matou i mua ia oe i teie po‘ipo‘i i ni‘a i teie aivi maniania ore e te hi‘o nei matou i te hoê ofa‘i rahi tei patuhia ei faaturaraa i ta oe mau tamaiti e ta oe mau tamahine e i to ratou haapa‘o. … Te pure nei matou ia haamaitai-atoa-hia matou i taua varua ra tei vai i roto i taua mau taata faaroo ra tei ti‘aturi ia oe e i ta oe Tamaiti Here, tei haere mai i roto i teie afaa no te mea ua hinaaro ratou e ora i ô nei e ia haamori ia oe. Te pure nei matou ia vai noa te varua haamori e te mauruuru i roto i to matou mau aau ».45
Te mau feruriraa no ni‘a i te oraraa i te 80raa o te matahiti
Noa’tu to’na matahiti paari, no te pae rahi o ta’na peresideniraa, ua ti‘a i te peresideni Smith ia rave i ta’na mau hopoi‘a ma te fifi ore i te pae tino tei haaparuparu roa ia’na i te matamua ra. I roto i te hoê papa‘iraa i nene‘ihia i te ava‘e Eperera 1950, fatata atu i te 80raa o to’na mahana fanauraa, ua hi‘o te peresideni Smith i muri i roto i to’na oraraa e ua ite a‘e ra i ta te Atua patururaa e te haamaitairaa ia’na:
« I roto i teie nau matahiti e va‘u ahuru, ua ratere au hau atu i te hoê mirioni maire te atea na te ao nei no te maitai o te evanelia a Iesu Mesia. Ua tae au i roto i te mau anuvera e te mau fenua e rave rahi e i roto i te mau nunaa e rave rahi, e mai to’u tamarii-rii-raa, ua faaite mai te taata i te maitai e te tauturu i ni‘a ia‘u, te mau melo o te Ekalesia e te mau melo ore atoa. I te mau vahi atoa ta’u i haere, ua itehia ia‘u te mau tane e te mau vahine tei hau i te maitai…
« … Ia feruri ana‘e au i to’u paruparu, i to’u na‘ina‘i iti, ia piihia ei faatere no teie Ekalesia rahi, te ite nei au e, e e ua hinaaro rahi au i te tauturu. Te faaite nei au ma te mauruuru i te tauturu a to’u Metua i te ra‘i ra, e i te faaitoitoraa e i te hoaraa i roto i to’u oraraa a te mau tane e te mau vahine maitai a‘e e rave rahi o te nehenehene e itehia i te mau huru vahi atoa i te ao nei, i roto i te utuafare e i te ara ».
Ua tamau noa oia i te faaite i te here no te mau taata ta’na i tavini no te mau matahiti e rave rahi:
« E mea papû roa e, e mea maitai roa ia amui atu i te reira mau taata, e i roto i te hohonuraa o to’u varua te rave nei au i teie taime no te haamauruuru ia outou paatoa no to outou maitai i ni‘a ia‘u, e te rave atoa nei au i teie taime no te parau atu ia outou paatoa e : E ore roa outou e ite i te rahi o to’u here ia outou. Aita ta’u e parau no te faaite i te reira. E te hinaaro nei au ia riro vau mai te reira i ni‘a i te mau tamaiti e i te mau tamahine atoa a to’u Metua i te Ao ra.
« Ua ora maoro vau, ia faaauhia i te faito au o te taata nei, ua ora vau i te hoê oraraa oaoa. Eita e rahi roa te mau matahiti e toe, i roto i te tereraa matarohia o te mau mea atoa nei, ei reira te mau titauraa o te tahi atu pae e tae mai ai. Te tia’i nei au i taua taime ra ma te oaoa. I muri a‘e e va‘u ahuru matahiti i roto i te tahuti nei, ma te ratere na te mau vahi e rave rahi o te ao nei, ma te apiti atu i te mau tane e te mau vahine maitai e rave rahi, te faaite papû atu nei au ia outou e, ua ite au i teie mahana hau atu i te papû i mua a‘e nei e, te ora nei te Atua ; o Iesu te Mesia ; e peropheta o Iosepha Semita no te Atua ora ; e te Ekalesia tei faati‘a-faahou-hia i raro a‘e i te arata‘iraa a to tatou Metua i te Ao ra, te Ekalesia a Iesu Mesia i te Feia Mo‘a i te Mau Mahana Hopea nei… te faaterehia nei ïa i raro a‘e i te tura e te mana o taua autahu‘araa ra tei horo‘ahia e Petero, Iakobo e o Ioane i ni‘a ia Iosepha Semita e ia Olive Kaudere. Ua ite au i te reira, mai ia‘u i ite e, te ora nei au, e te ite nei au e, no te faaite i teie iteraa papû i mua ia outou, ua riro ïa ei ohipa faufaa roa e e faautu‘ahia vau e to’u Metua i te Ao ra no te reira e no te tahi atu mau mea ta’u i haapii i roto i to’na ra i‘oa. … Ma te here e te maitai i roto i to’u aau no te mau taata atoa, te faaite nei au i teie iteraa papû na roto i te i‘oa o Iesu Mesia ra to tatou Faaora ».46
Hoê matahiti i muri a‘e, i te 81raa o to’na mahana fanauraa, i te 4 no eperera 1951, ua pohe o George Albert Smith ma te hau i roto i to’na fare e ta’na tamaiti e ta’na mau tamahine i piha‘i iho i to’na ro‘i.
Te tahi mau ohipa rii no te taviniraa ma te here
Ua rave o George Albert Smith e rave rahi ohipa i roto i to’na na’u matahiti e 81—i roto i te Ekalesia, i roto i te vahi e faaeahia e a’na, e i roto i te ao atoa nei. Area râ, te feia tei matau maitai ia’na, ua hau a‘e to ratou haamana‘o ia’na no ta’na mau ohipa ha‘iha‘i e te haehaa e rave rahi ma te maitai e te here. Ua parau te peresideni David O. McKay, no ni‘a i te peresideni Smith i te taime o to’na hunaraa, « e varua maitai rahi mau oia, tei hau a‘e i te oaoa ia faatupu ana‘e oia i te oaoa i roto ia vetahi ê ».47
O Elder John A. Widtsoe, e melo no te Pŭpŭ no te Tino Ahuru Ma Piti Aposetolo, tei faati‘a mai i te hoê iteraa to’na a tamata ai oia i te tatara i te hoê fifi rahi :
« Ua parahi au i roto i to’u piha toro‘a ma te rohirohi i muri a‘e i te hoê mahana ohipa. … Ua rohirohi roa vau I taua taime ra, ua patotohia maira i ni‘a i te opani, e te tomo mai nei o George Albert Smith. Na ô mai ra oia e, ‘Te ho‘i ra vau i te fare, ua faaoti ta’u ohipa. Ua haamana‘o vau ia oe e i te mau fifi i titauhia ia oe ia faatiti‘aifaro. Ua haere mai au no te tamahanahana ia oe e no te haamaitai ia oe.‘
« Tera ïa te huru o George Albert Smith. … Eita roa e mo‘ehia ia‘u. Ua hahaere rii maua no te tahi maa taime iti ; ua taa ê maua, ua ho‘i oia i te fare. Ua faateiteihia to’u aau. Aita vau i rohirohi faahou.
« Te ite ra outou, te here… e ere ïa i te parau noa e aore râ, te hoê iteraa i roto. Ia riro ei here mau, e ti‘a ïa ia faaohipahia te reira. Ua na reira te peresideni Smith i taua taime ra. Ua horo‘a oia i to’na iho taime, to’na iho puai, no’u nei ».48
Ua faateniteni o Elder Matthew Cowley, melo atoa no te Pŭpŭ no te Tino Ahuru Ma Piti e hoa rahi roa no te Peresideni Smith, i to’na hunaraa mai teie te huru :
« Te mau taata atoa i atihia, te mau taata atoa tei roohia i te ma‘i e aore râ, i te tahi atu huru ati, tei haere mai i mua i te aro o teie tamaiti na te Atua, ua huti atu ïa i te maitai e te puai na roto atu ia’na. Te ti‘araa i mua i to’na aro o te ora ïa, mai te mea e, e ere i te tino, i te varua ïa…
« … E haru te Atua i te taata atua, e ua papû ia‘u e, te tere poto roa a‘e ta teie taata no te Atua i tere i roto i to’na mau tere taatoa o te tere ïa o to’na rave-ê-raa-hia. E here te Atua. E here o George Albert Smith. E taata oia no te Atua. Ua rave te Atua ia’na i roto ia’na iho.
« … Eita e ti‘a ia tatou ia faahanahana i te hoê oraraa mai teie te huru na roto noa i te mau parau. Aita e parau e au. Hoê noa iho rave‘a no te faahanahana i to’na maitai, te mărû o to’na huru, to’na here rahi, oia ho’i, na roto ïa i ta tatou mau ohipa…
« Ia riro na tatou ei mau taata faaore hapa hau a‘e, ei mau taata hau a‘e i te mărû i roto i to tatou auraa te tahi e te tahi, te feruri hau a‘e te tahi e te tahi, e aau horo‘a hau a‘e no te mau mana‘o o te tahi e te tahi ».49
I ni‘a i te ofa‘i menema o George Albert Smith ua papa‘ihia teie mau parau. Ua riro te reira ei puohuraa tano maitai no to’na oraraa tavini ma te here :
« Ua haroaroa e ua ueue oia i te mau haapiiraa a te Mesia e ua manuïa papû i te faaohiparaa i te reira. Ua riro oia ei taata maitai, te faaoroma‘i, te paari, te farii, e te haroaroa. Ua haere oia ma te hamani maitai. Ua here oia ia Utaha e ia Amerika, e ere râ oia i te taata feruriraa poto. E faaroo to’na, ma te oti‘a ore, no te hinaaro e no te mana o te here. E here oti‘a ore to’na no ta’na Ekalesia e no to’na utuafare e ua tavini ia ratou ma te here rahi. Aita râ to’na here i taoti‘ahia ; ua here oia i te mau taata atoa, noa’tu te huru o te taata, te faaroo e aore râ, te ti‘araa. Ua parau pinepine oia ia ratou e no ratou : ‘E mau tamarii paatoa tatou na to tatou Metua’ ».
Te mau misionare i roto i te Misioni no te mau Pae Apatoa no Marite. I muri noa a‘e i to raua faaipoiporaa ua tavini o Lucy (te toru na te aui) e o George Albert Smith (parahi i piha‘i iho ia’na) i roto i te fare misioni.
Te Pŭpŭ no te Tino Ahuru Ma Piti Aposetolo i te matahiti 1921 Te ti‘a ra, na te aui haere i te atau : Joseph Fielding Smith, James E. Talmage, Stephen L Richards, Richard R. Lyman, Melvin J. Ballard, e o John A. Widtsoe. Te parahi ra na te aui haere i te atau : Rudger Clawson, Reed Smoot, George Albert Smith, George F. Richards, Orson F. Whitney, e o David O. McKay.
Na Elder George Albert Smith i faatere i te nene‘iraa o te Buka a Moromona i roto i te reo o te feia matapô.
Te Ofa‘i Haamana‘oraa i ni‘a i te Aivi no Cumora, i reira to te melahi Moroni horo‘araa mai i te mau api auro ia Iosepha Semita ra.
Peresideni Smith e to’na na tauturu, J. Reuben Clark Jr. (aui) e o David O. McKay (atau)
Na te Peresideni Smith i haamo‘a i Te Ofa‘i Haamana‘oraa no Teie te Vahi i te matahiti 1947, haamana‘oraa i te taeraa mai te mau pionie i roto i te Afaa no Roto Miti.
Te Peresideni Smith i roto i ta’na piha toro‘a
Te mau tamarii a John Henry e o Sarah Farr Smith. Tei te aui o George Albert Smith.