Pene 22

Haapiiraa i te mau Tamarii i roto i te Maramarama e te Parau Mau

Ua horo‘a mai te Fatu i te hopoi‘a i te mau metua ia haapii i ta ratou mau tamarii i te evanelia na roto i te parau e i te hi‘oraa.

No roto mai i te oraraa o George Albert Smith

I te pae hopea o to’na oraraa, ua feruri maite te peresideni George Albert Smith i ni‘a i te aupururaa e te mau haapiiraa a to’na na metua:

« Ua fanauhia vau i roto i te hoê utuafare haehaa. … E mea ha‘iha‘i roa te oraraa o to’u na metua, tera râ, te haamaitai nei au i tei Hamani e te haamauruuru nei au ia’na ma to’u aau atoa i te tuuraa mai ia‘u i roto i to raua utuafare.

« Ua paari au i Roto Miti. I te va‘uraa o to’u matahiti, ua bapetizohia vau i City Creek. Ua haamauhia vau ei melo no te Ekalesia i roto i te pureraa iritiraa mana‘o i roto i te paroita ahuru ma hitu, e i to’u tamariiraa ua haapii mai au e, na te Fatu teie ohipa. Ua haapii mai au e, e te vai nei te mau peropheta ora e ora ra i ni‘a i te fenua nei. Ua haapii mai au e, na te faaururaa a te Manahope e faauru i te feia e ora ra no te farii i te reira…

« Aita vau i ite i te hoê taata i te ao atoa nei tei hau atu to’na tumu no te mauruuru ia‘u nei. Te mauruuru nei au no to’u fanau-raa-hia, te mauruuru nei au no te mau metua tei haapii ia‘u i te evanelia a Iesu Mesia e tei faaite i te hi‘oraa maitai i roto i to raua utuafare. Mai te mea e, ua rave au i te hoê mea o te ore e ti‘a ia‘u ia rave i roto i to’u oraraa, o te hoê ïa mea aita vau i haapii mai i roto i te fare o to’u metua vahine. I roto i te hoê utuafare tamarii rahi, ua titauhia i te hoê metua vahine te faaoroma‘i rahi, tera râ, ua vai faaoroma‘i tamau noa oia i ni‘a ia matou. Ua itehia i reira i te mau taime atoa te mărû, te hamani maitai e te here ».¹

I roto i to’na iho utuafare ua tamata o George Albert Smith i te pee i te hi‘oraa o to’na na metua i roto i te parau no te haapiiraa na roto i te faaoroma‘i e te here. Te haamana‘o ra ta’na tamahine o Edith i te hoê iteraa tei tupu i to’na apîraa ra :

« Ua a‘o tamau noa oia ia matou no ni‘a i to matou huru, ma te haapapû maitai i te parau no te haavare ore e te ti‘a. Te haamana‘o nei au i te hoê mahana te ho‘i ra vau i te fare na ta’u haapiiraa faata‘i piana mai, ua mo‘ehia i te taata faahoro pereoo i te ohi i ta’u moni pereoo. … Na piha‘i iho noa mai oia ia‘u, e ua tae au i te vahi e pou ai au e te tape‘a noa ra â vau i ta’u moni i roto i to’u rima, ua oaoa roa vau i te mea e, aita vau i aufau i to’u tere.

« … Ua horo vau ma te oaoa i to’u metua tane ra no te faaite ia’na i ta’u haamaitairaa. Ua faaroo noa mai oia i ta’u aamu ma te faaoroma‘i. Ua hamata vau i te feruri e, e manuïa rahi to’u. …Ua papû maitai ia‘u e aita te taata faahoro pereoo i ite e, aita vau i aufau i to’u tere, e no reira, e mea faahiahia roa ïa.

« Ia hope râ ta’u faati‘araa i ta’u aamu, ua parau maira o papa e, ‘Tera râ, e ta’u here, noa’tu e aita te taata faahoro i ite i teie ohipa, ua ite oe e ua ite au e ua ite te Metua i te Ao ra. No reira, te vai noa ra e toru o tatou o te oaoa ia ite e, ua aufau oe i te taatoaraa o te mea ta oe i farii.‘«

Ua ho‘i faahou o Edith i te poro purumu e ua aufau i ta’na tarahu i te ho‘iraa mai te pereoo. I muri a‘e ua faaite oia i to’na mauruuru i te huru no to to’na metua tane faaafaroraa i taua fifi ra : « Oia mau, te mauruuru nei au no te hoê metua tane tei nava‘i te paari no te faaite mai ia‘u ma te maitai i te hape i ravehia, no te mea ahiri aita i tau‘ahia, e riro ïa vau i te feruri e, ua farii oia i te reira, e e riro ïa vau i te tamata i te rave faahou i te ohipa mai te reira te huru i te tahi atu taime ».² [A hi‘o mana‘o tauturu 1 i te api 264.]

Te mau haapiiraa a George Albert Smith

Te hopoi‘a matamua a te mau metua o te haapiiraa ïa i ta ratou mau tamarii i te evanelia.

Te hoê o te haamaitairaa rahi a‘e e te faufaa a‘e i to outou mau haamaitairaa atoa, o te haamaitairaa ïa e roaa mai na roto i to outou haapiiraa ia au i tei titauhia ia outou, e to outou faaineineraa ia au i tei titauhia ia outou, i teie mau varua ma‘itihia ta to tatou Metua i te Ao ra e tono mai nei i te ao nei i teie anotau hopea nei. … Eiaha e vaiiho na te mau fare haapiiraa a te hau e haapii i ta outou mau tamarii. Eiaha e vaiiho na te Paraimere, na te Haapiiraa Sabati, na te mau [Pŭpŭ feia apî a te Ekalesia] e haapii ia ratou. E tauturu ïa ratou ia outou e e horo‘a mai ratou i te hoê horo‘araa maitai, tera râ, eiaha e haamo‘e i te parau ta te Atua i parau e, te mau metua o te ore e haapii i ta ratou mau tamarii i te faaroo i te Atua, te tatarahapa e te bapetizoraa e te tuuraa rima i te va‘u o te matahiti, tei ni‘a iho te hara i te upoo o te mau metua [a hi‘o PH&PF 68:25–28]. E ere teie i te faari‘ari‘araa, e au mau taea‘e e au mau tuahine, e haapiiraa maitai e te here teie na to tatou Metua i te Ao ra tei ite i te mau mea atoa e o tei haroaroa e o tei ite i te auraa ia vaiihohia te mau tamarii ia tupu i te paari e aita teie haapiiraa.³

Te mea ta’u e parau atu i teie nei, te hinaaro tuutuu ore nei au ia ô te reira i roto i te upoo o te mau metua atoa i Ziona, oia ho’i, noa’tu e, ua horo‘a mai te Fatu i teie mau faanahoraa haapiiraa nehenehe atoa, noa’tu e, ua horo‘a mai te mau ite ihi i te au e te haamaitairaa, noa’tu e, ua faaineine te Ekalesia i te mau vahi e nehenehe ta tatou e tono i ta tatou mau tamarii i reira ia haapiihia ratou i te evanelia a te Mesia, aita te reira e haamama ia outou e aore râ, ia‘u nei i te hopoi‘a e i te titauraa tei tuuhia mai i ni‘a ia tatou e to tatou Metua i te Ao ra ia haapii i ta tatou iho mau tamarii. … Eita e nava‘i ia haapiihia ta’u mau tamarii i te faaroo noa, te tatarahapa e te bapetizoraa e te tuuraa rima no te horo‘a i te Varua Maitai i roto i te mau pŭpŭ tauturu. Ua faaue mai to’u Metua i te ra‘i ra e, na’u iho e rave i te reira.⁴

Aita e taata ê atu e nehenehe e rave i te tuhaa ta te Atua i faataa na tatou te mau metua. Ua amo tatou i te hopoi‘a i te taime a riro ai tatou ei rave‘a no te faahaereraa mai i te mau tamarii i roto i te ao nei. Eita ta tatou e nehenehe e faauta i te reira hopoi‘a i ni‘a i te hoê pŭpŭ. Na tatou te reira. … Na mua roa, tei ni‘a ia outou e ia‘u nei te hopoi‘a eiaha i te arata‘i e i te a‘o noa, i te haapii atoa râ, na roto i te faaiteraa i te hoê hi‘oraa maitai, na roto i te horo‘araa i te taime au no tei herehia e tatou, teie mau tamaiti e teie mau tamahine, ia ore ho’i ratou ia arata‘ihia i roto… i te mau haere‘a rahuihia ra.⁵

A haaputuputu i to outou utuafare i piha‘i iho ia outou, e mai te mea e, aita outou i horo‘a ia ratou i te matamua ra, i te hoê iteraa i te mau opuaraa o te oraraa e i te ite i te Evanelia a to tatou Fatu, a rave i te reira i teie nei, no te mea, te parau atu nei au ia outou i roto i to’u ti‘araa ei tavini no te Fatu, e hinaaro ratou i te reira i teie nei e e hinaaro ratou i te reira mai teie atu taime.⁶ [A hi‘o mana‘o tauturu 2 i te api 264.]

Eiaha te tahi atu mau mea e haafariu ê ia tatou i ta tatou hopoi‘a haapiiraa i ta tatou mau tamarii.

Ua parauhia tatou i roto i te Luka e, te vai ra te taime e paremo ai te mau taata i raro a‘e i te mau peu e te mau tao‘a e te mau mea navenave o te oraraa nei [a hi‘o Luka 8:14]. Te haamana‘o nei au… tae roa mai i teie nei, i te mau tane e te mau vahine ta’u i here, tei ino roa to ratou oraraa varua na roto i teie mau mea, e te arata‘i nei te enemi ia ratou na ni‘a i taua e‘a ohie ra e navenave ai, e te haapa‘o ore nei ratou i ta ratou ohipa ei mau metua e ei mau melo no te Ekalesia a Iesu Mesia.

… I teie nei i roto i te arepurepuraa, te arearea e te mau mea atoa e navenave ai o te oraraa nei… eiaha tatou e haamo‘e i ta tatou hopoi‘a no teie mau tamaroa e teie mau tamahine tei hamanihia i te hoho‘a o te Atua. O Oia te Metua no to ratou mau varua, e riro ïa tatou i te faahapahia e ana no te huru o te haapiiraa tei fariihia e ratou. Te ti‘aturi nei au e te pure nei au e, e haapii tatou ia ratou ia tae mai ho’i te hopea ra e farii tatou na roto mai ia’na ra i taua haamaitairaa ra, « ua ti‘a roa, e teie nei tavini maitai e te haavare ore, e haere oa i roto i te oaoaraa a to oe Fatu », e ia vai noa mai te mau taata ta tatou i here i piha‘i iho ia tatou e amuri noa’tu.⁷

Te hinaaro nei au e faati‘a’tu ia outou i te hoê aamu. E rave rahi matahiti i ma‘iri a‘e nei, te ora ra i Indiana e piti na tamaroa, e na hoa taure‘are‘a e rave ohipa i roto i te faaapu—e mau faaapu e hitu maire te atea te tahi i te tahi. Ua rave puai raua i te ohipa i te mau mahana atoa, te raveraa i ta raua mau tuhaa ohipa, te faateraa i te û puatoro e te vai atu ra. I te hoê mahana, ua haere te tamaiti matamua, 13 e aore râ, 14 matahiti to’na, e farerei i to’na metua tane e na ô atu ra, « e papa, te hinaaro nei au e haere i te oire. Te hinaaro nei au e hi‘o i te mau mori anaana. Te feruri nei au e, eita anei e ti‘a ia‘u ia haere oioi i te hoê ahiahi, mai te mea e, e faaitoito vau i te faaoti i ta’u ohipa ? » Na ô maira te metua tane e, « eita ta oe e nehenehe ia na reira no te mea eita e oti ia oe ta oe ohipa ». « E mai te mea e, e ti‘a vau i ni‘a i te hitiraa mahana e e rave au i te ohipa i te mahana taatoa, e nehenehe anei ta’u e haere i te oire ? E ere i te mea atea roa, e e nehenehe ia‘u ia faaea i reira e hoê e aore râ e piti hora e i muri iho e ho‘i vitiviti mai au i te fare ». Na ô maira te metua tane e, « na reira, mai te mea e, e oti pauroa ta oe mau ohipa, e nehenehe ïa ta oe e haere ». E te mau metua tane, a faaroo mai i teie. No reira, ua haere oia. Ua fatata i te pouri a tae atu ai oia i roto i te oire. Ua piri te mau fare toa e te mau fare moni. E rave rahi mau fare patiaraa poro e te pereraa moni e matara ra. Te mau taata maitai tei roto ïa i te mau fare, te rahiraa o ratou tei roto ïa i to ratou iho mau fare. Tei ni‘a i te purumu te mau ‘taata ori’ atoa e aore râ, tei roto i teie mau vahi ha‘utiraa. Ua ite maira ratou i teie taure‘are‘a i te haereraa mai e ua rave a‘e ra ratou ia’na. Aita i maoro ua hope ia ratou i te faaite ia’na i te tahi mau mea aita e ti‘a i te tamarii ia hi‘o. Tera ïa te ohipa tei tupu ia’na. Ua ite ïa oia i te huru o te hoê mea e ere i te mea maitai no’na.

Te piti o te tamaiti, ua haere atu ra oia e farerei i to’na metua tane mai te reira atoa te huru. Na ô atu ra oia e, « e papa, te hinaaro nei au e haere i te oire i te hoê taime. Aita anei oe e hinaaro e haere au e hi‘o i te tahi mau mea aitâ vau i ite a‘e nei ? E mea ti‘a ia‘u ia haere na mua a‘e i te pô no te hi‘o i te mau huru mea atoa ». Ua pahono maira te papa e, « e ta’u tamaiti, te mana‘o nei au e, ua ti‘a ia oe ia haere i roto i te oire, e te mana‘o atoa nei au e, ua ti‘a i to oe metua tane ia haere na muri iho ia oe. Na oe e faataa mai i te mahana, e e tauturu vau ia oe i te faaotiraa i ta oe mau ohipa, ia ti‘a ho’i ia taua ia haere oioi, ia nehenehe ia oe ia farerei i te tahi mau hoa to’u ».

Te parau nei au no te hoê â mea—e ere na faaapu e piti i te mea atea roa te tahi i te tahi. I roto i te hoê hepetoma ua ma‘iti oia i te mahana. Ua faaoti raua i te mau ohipa, e haere ana‘e’tura i roto i te oire. Ua tae atu raua na mua rii noa a‘e i te hora maha. Ua tae raua i reira hou a piri ai te mau fare moni. Ua oomo mai teie tamaiti i to’na mau ahu maitai. Ua arata‘i atu ra to’na papa ia’na i roto i te fare moni e ua faaite atu ra ia’na i te taata no te fare moni, tei tape‘a i to’na rima e na ô mai nei e, « Ia haere mai oe i roto i te oire nei, haere mai e farerei ia matou e e farii poupou ïa matou ia oe ».

Ua arata‘i atu ra to’na papa ia’na i roto i te mau fare tei reira ta’na ohipa imiraa moni, i reira ho’i te mau taata i farii ai ia’na ma te au maite. I to raua ho‘i-ana‘e-raa i te fare, i muri a‘e i to raua mata‘ita‘iraa i te hoê ha‘utiraa, ua matau teie tamaiti i te tahi mau taata maitai a‘e i roto i te oire. Te ohipa i tupu mai maori râ, ia paari a‘e oia e a haere atu ai oia i roto i te oire, ua haere oia i piha‘i iho i te mau taata maitata‘i.⁸ [A hi‘o mana‘o tauturu 3 i te api 265.]

Te hinaaro nei au e horo‘a’tu i teie mana‘o ia outou… aita e taime, aita e rave‘a hau atu i te maitai, i te taime e i te rave‘a ta outou e nehenehe e hamau‘a, ta outou e nehenehe e faaohipa, i te haapiiraa i ta outou mau tamaiti e ta outou mau tamahine ia ti‘amâ no te farii i te mau haamaitairaa a to tatou Metua i te Ao ra ».⁹

E nehenehe te hi‘oraa maitai o te metua e arata‘i i te hoê tamarii i te vahi papû, i te parau-ti‘a, e i te oaoa.

Ia riro na tatou ei mau hi‘oraa no te parau-ti‘a no ta tatou mau tamarii, a faatupu i to tatou mau pureraa fetii e a haamaitai i te maa. A faaite i ta tatou mau tamarii e, ei mau tane e ei mau vahine faaipoipo te here nei tatou te tahi e te tahi. A vaivai a‘e â te tau, a rave i te taime ei mau tane e ei mau vahine faaipoipo no te haamaitai te tahi e te tahi i to outou here, i to outou hamani maitai e i ta outou tautururaa i te mau mahana atoa. A vavai a‘e â te tau, a rave i te taime no te haapii i ta outou mau tamaroa e ta outou mau tamahine nahea ia ora e oaoa ai. … Ia riro na to tatou mau utuafare ei haapûraa no te hau e no te ti‘aturiraa e no te here.¹⁰

Tau mahana noa i ma‘iri a‘e nei to’u iteraa i te hoê rata na te hoê taata tei afa paha to’na pu‘e tau oraraa. I roto i ta’na rata i papa‘i i to’na metua tane ua parau oia e : « To oe haapa‘o i tei herehia e oe, ta oe mau haapiiraa ia‘u, te mau hi‘oraa maitai ta oe i faaite ia‘u, ua riro ïa ei faaururaa ia‘u ia rave i te mea ta te Fatu i hinaaro ia rave au. Ua ite au e, ia pee au i to oe mau taahiraa avae e paruruhia ïa vau ». E metua tane paari mau teie, e metua tane haamaitaihia teie, tei tanu i te ti‘aturiraa i roto i te feruriraa o ta’na tamaiti. … No te huru o te metua tane—ua faaite oia i roto i ta’na rata i te ohipa ta to’na metua tane i rave—no te hi‘oraa ta’na i faaite i roto i to’na utuafare, i teie mahana ua riro ïa oia ei hoê o te mau taata papû no teie Ekalesia. E nehenehe ta’na e ora i roto i te ao nei e ia haapa‘o i te mau faaueraa a te Fatu. To’na hinaaro onono ia rave i te maitai no roto mai ïa i te utuafare ta’na e faaea ra. Aita i itehia ia’na te huru pipiri i roto i te utuafare, te aau horo‘a râ. Aita te mau metua i onoono ia imi i te mau mea atoa e nehenehe e roaa ia ratou e ia tape‘a i te reira ma te pipiri na ratou iho, ua haere râ ratou e imi i te feia e hinaaro ra ia ratou, ma te faaitoito e ma te haamaitai ia ratou. E ere ïa na te mau parau atoa i roto i te ao nei i tuu i roto i te aau o taua taata ra te mea ta’na e mau nei i teie mahana, na te hi‘oraa râ o to’na na metua, e o te feia i ora i roto i te utuafare i orahia e a’na.

Aita to’u e feaaraa e e rave rahi hanere tane e te vahine, e rave rahi tauatini o ratou, i roto i te vahi ta tatou e faaea nei e i roto i te ao nei, o te parau atoa i te reira parau no ni‘a i te mau haapiiraa a to ratou mau metua tane e to ratou mau metua vahine. Te taiâ nei râ vau i te mea e, te vai ra te tahi pae o tatou tei ruri-ê-hia e te mau peu o te ao nei e ua paari to ratou mana‘o e, e mea ti‘a ia tatou ia pee i te nahoa ma te hi‘o ore i te mea ta ratou e ti‘aturi ra e aore râ, e rave ra. I roto i te reira huru ra, e ore ïa to tatou hi‘oraa e riro ei haamaitairaa, e haamou râ te reira i te oaoa o ta tatou mau tamarii.¹¹

E faaite tatou i te iteraa i roto i te mau ohipa ta tatou e rave i te mau mahana atoa, i roto atoa i ta tatou aparaparauraa e, te ti‘aturi nei tatou e, na te Metua teie ohipa, i reira te oaoa faito ore e tae mai ai i roto ia tatou, e te mau tamarii e tupu ra i te paari i roto i to tatou utuafare, e tupu ïa to ratou faaroo e te haehaa i te rahi. E rahi atu te mana e horo‘ahia ia ratou no te tura‘i i te hiti i te mau raau a te enemi tei faatorohia i ni‘a ia ratou, e i te vahi o te ati o tei haape‘ape‘a i te mau tamarii a te taata nei, no te ino, e itehia ïa te mahanahana, te hau e te oaoa, e…e parahi te mau tane e te mau vahine i roto i teie fenua, e e roaa ia ratou te puai no te faaatea ê i te mau ino o te oraraa nei.¹² [A hi‘o mana‘o tauturu 4 i te api 265.]

Na roto i te hereraa e i te haapiiraa i to tatou feia apî, e nehenehe ta tatou e tauturu i te parururaa ia ratou i te ino.

E te feia mo‘a i te mau mahana hopea nei, a haapii i ta outou mau tamarii ia haapa‘o i te ture morare. A haati ia ratou i te mau rima o to outou here, ia ore ho‘i te hinaaro ia tupu i roto ia ratou ia amu i te mau faahemaraa o te ino e haati nei ia ratou i te mau vahi atoa…

Aue ïa e haamaitairaa no te mau metua ia parahi i raro i roto i to ratou mau utuafare, ma te haatihia e te hoê utuafare tamaroa e te tamahine viivii-ore tei horo‘ahia mai ia ratou ra na to tatou Metua i te Ao ra, to ratou mau varua tei fanauhia e to tatou Metua i te Ra‘i ra ! Aue ïa te oaoa ia amui ia ratou e ia amu i te mau haamaitairaa a to tatou Metua i te Ao ra e i te oaoaraa i te hoaraa i to’na Varua, e ia haapiipii maite ia ratou i to ratou apîraa, e ia paari mai ho‘i ratou, ua tape‘a maite ratou i te viivii-ore o to ratou oraraa !

E au mau taea‘e e au mau tuahine, te taparu atu nei au ia outou ia paruru i te u‘i apî e ti‘a mai nei, i te mau herepata ta te enemi i tuu no to ratou mau avae, e ia rave outou i te reira ma te papû rahi atu, ma te feruri maite hau atu, ma te faaoroma‘i hau atu i tei te matamua ra. E rave rahi o ta tatou [mau hoho‘a teata], te mau faanahoraa ratio, te mau ve‘a, te mau buka, e te vai atu ra, e ere i te mea maitai… e mai te mea e, aita tatou e haavî i te ruri-ê-raa a teie mau mea na roto i te haapiiraa e te oraraa mâ, na roto ho‘i i te horo‘araa i te feia apî i te maitai no roto mai i te iteraa i te oraraa o te mau tane e te mau vahine maitai, na roto ho‘i i te haapiiraa ia ratou i te mau maitai o te mau peropheta e i te auraa o te Evanelia a Iesu Mesia, e riro ïa te tahi pae o ratou ta tatou e here nei i te faatea ê atu ia tatou nei…

E haapii na tatou i ta tatou mau tamarii ia vai viivii-ore noa i roto i to ratou oraraa, ia vai parau-ti‘a noa. A haapii i ta outou mau tamaiti ia paruru i te viivii-ore o to ratou mau tuahine e o to ratou mau hoa tamahine. A haapii i ta outou mau tamahine ia paruru i te viivii-ore o te mau tamaroa ta ratou i matau. … E faatumu tatou, mai te mea e, e ti‘a ia tatou ia faaohipa i te reira parau, i roto i te parau no te aupururaa i ta tatou mau tamaroa e ta tatou mau tamahine i raro a‘e i te faaururaa a te Varua o te Atua, ia ore ho‘i ia roaa i te enemi i te mana no te arata‘i ê ia ratou.¹³ [A hi‘o mana‘o tauturu 5 e te 6 i te api 265.]

Mai te mea e, e haapii te utuafare i te evanelia, e tauturu te reira ia tatou ia tape‘a i to tatou utuafare i piha‘i iho ia tatou.

I roto i to tatou mau utuafare, e te mau taea‘e e te mau tuahine, e haamaitairaa no tatou, e ohipa na tatou, ia haaputuputu i to tatou utuafare no te oaoa e no te haapuai e no te paturu te tahi e te tahi, ia haapiihia i te mau parau mau o te mau papa‘iraa mo‘a. I roto i te mau utuafare atoa, e ti‘a ia faaitoitohia te mau tamarii ia tai‘o i te parau a te Fatu mai tei heheuhia mai ia tatou i roto i te mau tau tuuraa atoa. E ti‘a ia tatou ia tai‘o i te Bibilia, te Buka a Moromona, Te Parau Haapiiraa e Te Mau Parau Fafau, e te Buka Poe Tao‘a Rahi ; eiaha e tai‘o noa i te reira i roto i to tatou mau utuafare, e haamaramarama atoa râ i te reira i ta tatou mau tamarii ia ti‘a ho‘i ia ratou ia ite… i te mau ohipa ta te Atua e rave nei i ni‘a i te mau taata o te fenua nei.

E hi‘o na tatou e, eita anei e nehenehe ia tatou ia rave i teie mau mea i te mau tau i muri nei hau atu i ta tatou i rave na mua a‘e nei. E fafau na tatou ia haapa‘o i te parau e i te faaohiparaa o te haaputuputuraa i to tatou utuafare i piha‘i iho ia tatou i roto i to tatou iho mau utuafare. E ui tatou ia tatou iho e : « Ua faaoti anei au i roto i to’u utuafare i ta’u ohipa tai‘oraa e te haapiiraa i te evanelia, mai tei heheuhia mai na roto i te mau peropheta a te Fatu ? Ua tape‘a anei au i ta’u mau tamarii i piha‘i iho ia‘u e ua faariro anei au te utuafare ei vahi au maitai e ei vahi no te faatura, no te here, no te haroaroa, e no te haamoriraa ? »

Mai te mea e, aita tatou i na reira, a tatarahapa ana‘e tatou i to tatou haapa‘o ore e a haaputu mai i to tatou utuafare i piha‘i iho ia tatou e a haapii ana‘e ia ratou i te parau mau…

« Ua faanahonaho anei au i to’u fare ? » Teie te uiraa e ti‘a ia vai i roto i te mau aau atoa. Eiaha e, ua na reira anei to’u taata tupu ? E ui râ e, ua rave anei au i te mea ta te Fatu i titau mai ia‘u ?¹⁴

Ua riro ta tatou mau tamarii ei horo‘a faufaa roa a‘e ta to tatou Metua i tuu mai i ni‘a ia tatou. Mai te peu e, e nehenehe ta tatou e arata‘i i to ratou avae i ni‘a i te e‘a o te faaoraraa, e oaoa mure ore ïa te roaa ia tatou e ia ratou atoa…

Hoê rave‘a e nehenehe ai ia tatou ia tape‘a ia ratou i piha‘i iho ia tatou maori râ, ia farerei amui pinepine i roto i to tatou mau utuafare. Ua ani te Ekalesia ia faataahia hoê a‘e pô no te utuafare i te hepetoma tata‘itahi ia haaputuputu te taatoaraa o te utuafare e ia oaoa i te tahi e te tahi, ia oaoa i te mau arearea ohie o te pureraa pae auahi o te utuafare, e ia aparaparau te tahi e te tahi i te mau mea faufaa rahi e te vai maoro mai.

… I te matahiti 1915 teie te mau mea ta te Peresideniraa Matamua i papa‘i atu i « te mau peresideni tĭtĭ, te mau episekopo, e te mau metua i Ziona », e te faahiti nei au i ta ratou i parau :

« Te a‘o e te faaitoito puai atu nei matou ia haamauhia te hoê ‘Pô Utuafare’ i roto i te Ekalesia taatoa, i reira ho‘i te mau metua tane e te mau metua vahine e haaputuputu ai i ta ratou mau tamaiti e ta ratou mau tamahine i piha‘i iho ia ratou i roto i te utuafare, e e haapii ai ia ratou i te parau a te Fatu. … E faataahia teie ‘Pô Utuafare’ ei taime no te pure, no te himene i te mau himene pureraa, i te mau himene arearea, no te faata‘i i te mauhaa upaupa, no te tai‘o i te papa‘iraa mo‘a, no te mau tumu parau no te utuafare, e no te hoê haapiiraa taa ê no ni‘a i te mau parau tumu o te evanelia, e no ni‘a i te mau fifi morare o te oraraa, e tae noa’tu i te mau ohipa e te mau titauraa a te mau tamarii i ni‘a i te mau metua, i ni‘a i te utuafare, i te Ekalesia, i te oraraa sotiare e i ni‘a i te nunaa ».

E teie ïa te haamaitairaa i fafauhia mai i te feia o te rave i te mea i anihia mai :

« Mai te peu e, e haapa‘o te feia mo‘a i teie a‘o, te fafau atu nei matou e, e tae mai te mau haamaitairaa rarahi. E tupu i te rahi te here i roto i te utuafare e te haapa‘o i te parau a te mau metua. E hotu te faaroo i roto i te aau o te feia apî no Iseraela, e e roaa ia ratou te puai no te aro i te mau hutihutiraa e te mau faahemaraa o te ino e tae mai i ni‘a ia ratou ».

Te vai noa nei â teie mau parau tumu e teie mau fafauraa i mua ia tatou.¹⁵

Ahiri te pô utuafare e riro ei ohipa tamau na te feia mo‘a i te mau mahana hopea nei, ahiri e, e ora tatou i piha‘i iho i to tatou utuafare hoê a‘e pô i te hepetoma, i raro a‘e i te faaururaa a te varua o te Fatu, i roto i ta tatou iho putuputuraa pae auahi ma te haatihia e te mau taata ta te Fatu i horo‘a mai ia tatou nei, ma te parau taa ê mai ia tatou e, e haapii tatou ia ratou, ehia ïa rahiraa utuafare oaoa e itehia i te vahi tei reira te oto e te tama‘i e te pe‘ape‘a i teie mahana…

… Mai te mea e opani tatou i te ao nei e i te mau mea no rapae, e na roto i te mana o te pure e te haamauruuru, e horo‘a ïa tatou i ta tatou mau tamaiti e i ta tatou mau tamahine i teie mau parau mau tao‘a rahi ta te Fatu i tuu mai i roto ia tatou no to tatou e no to ratou ora maitai, e tupu mai ïa te hoturaa mau o te faaroo. Mai te mea e, ua faaru‘e tatou i te reira arata‘iraa, te ti‘aturi nei au e, e nehenehe ia tatou ia ho‘i faahou mai. A haaputuputu i ta tatou mau tamarii i piha‘i iho ia tatou e a faariro i to tatou fare ei vahi parahiraa no te Varua o te Fatu. Mai te mea e, e haapa‘o tatou i ta tatou tuhaa, e ite tatou e e papû tatou e, e haapa‘o to tatou Metua i te Ao ra i ta’na tuhaa.¹⁶ [A hi‘o mana‘o tauturu 7 i te api 265.]

Te mau Mana‘o Tauturu no te Tuatapaparaa e te Haapiiraa

A feruri i teie nei mau mana‘o a tuatapapa ai outou i te pene e aore râ, a faaineine ai outou i te haapii. No te tahi atu mau tauturu, a hi‘o i te mau api v–viii.

A feruri na i te aamu i te api 253–54. I to outou mana‘oraa no te aha i nehenehe ai ia George Albert Smith ia haapii i ta’na tamahine o Edith ma te manuïa rahi ? A feruri na i te hoê taime o to outou apîraa a haapii ai hoê metua ia outou i te hoê mea tei riro ei faaururaa i roto i to outou oraraa. No te aha taua haapiiraa ra i maitai ai ?
A tuatapapa i te tuhaa matamua o te mau haapiiraa (te mau api 255–56) e Te Parau Haapiiraa e Te Mau Parau Fafau 93:37–40. I to outou mana‘oraa no te aha te Fatu i horo‘a mai ai i te mau metua ra, eiaha râ i te tahi mau pŭpŭ, te hopoi‘a no te haapii i ta ratou mau tamarii i te evanelia ? Nahea e nehenehe ai i te mau pŭpŭ o te Ekalesia ia tauturu i te mau metua i roto i teie hopoi‘a ? Nahea e nehenehe ai i te mau melo tapiri o te utuafare ia tauturu ? Mai te mea e, aita ta outou e tamarii, a feruri i te mau rave‘a e ti‘a ai ia outou ia riro ei faaururaa ti‘a no te feia apî o te Ekalesia no te paturu i te mau metua.
A tai‘o faahou i te aamu i te mau api 256–58. Nahea te mau tamarii e fana‘o ai mai te mea e, e horo‘a to ratou mau metua i te taime no te parahi i piha‘i iho ia ratou ? Eaha te tahi mau « peu e… te mau mea e navenave ai ra o te oraraa nei » (api 257) e nehenehe e faatupu i roto ia tatou i te tau‘a ore i ta tatou mau hopoi‘a no to tatou utuafare ? Eaha te nehenehe ia tatou ia rave e vî ai teie mau faaarearearaa ?
A tai‘o i te tuhaa e haamata i te api 259. A feruri i to outou mau huru i mua i « te mau peu o te ao nei » e eaha ta te reira mau huru to outou e faatupu i roto i ta outou mau tamarii. Eaha te tahi mau « ohipa i te mau mahana atoa » o te faaite i ta tatou mau tamarii i te mau iteraa puai taa ê no ni‘a i to tatou mau ti‘aturiraa ?
Eaha te tahi mau faahemaraa ta te mau tamarii e ta te feia apî e farerei nei i te vahi e faaeahia ra e outou ? A tuatapapa i te tuhaa e haamata i te api 260, ma te imi i te mau mea e nehenehe ai i te mau metua, te mau metua ruau, e vetahi ê atu, ia rave no te tauturu i te feia apî ia pato‘i i te faahemaraa.
Ua a‘o mai te peresideni Smith e, e ti‘a ia tatou ia « faatumu », e aore râ, ia faaaravihi, i roto i te parau no te aupururaa i ta tatou mau tamarii i raro a‘e i te faaururaa a te Varua (a hi‘o api 261). Eaha te auraa o te reira no outou ? Eaha te mau ohipa e nehenehe i te mau metua e rave no te faaaravihi ia ratou i roto i te aupururaa i ta ratou mau tamarii i roto i te parau-ti‘a ?
I te mau api 261–64, te hi‘o faahou nei te peresideni Smith i te tahi mau fafauraa i horo‘ahia i te mau utuafare e faatupu tamau i te pô utuafare. Nahea te faatupu-raa-hia teie mau fafauraa i roto i to outou utuafare ? Eaha te arata‘iraa ta outou e horo‘a i te hoê utuafare aitâ i faatere a‘e nei i te pô utuafare na mua a‘e nei, te hinaaro nei râ e haamata i teie nei ?

Te mau papa‘iraa mo‘a : Maseli 22:6 ; Isaïa 54:13 ; Enosa 1:1–3 ; Mosia 4:14–15 ; Alama 56:45–48 ; Te Parau Haapiiraa e Te Mau Parau Fafau 68:25–31 ; a hi‘o atoa « Te Utuafare: E Poro‘i i to te Ao nei », Ensign, Novema 1995, 102.

Tauturu haapiiraa : « A ara eiaha outou e tapu o‘io‘i i te mau aparauraa maitai no te tamata i te vauvau hope roa i te haapiiraa ta outou i faaineine. Noa’tu e, e mea faufaa ia haapii hope i te haapiiraa, e mea faufaa a‘e râ ia tauturu i te mau piahi ia farii i te faaururaa a te Varua, ia tatara i ta ratou mau uiraa, ia faarahi i to ratou haroaroaraa i te evanelia, e ia faahohonu i ta ratou fafauraa ia haapa‘o i te mau faaueraa » (Te Haapiiraa, Aita e Piiraa Teitei A‘e, 64).

Te vahine a George Albert Smith, o Lucy, e ta raua na tamahine, o Edith (aui) e o Emily (atau).

« Aita e taime, aita e rave‘a hau atu i te maitai, i te taime e i te rave‘a ta outou e nehenehe e hamau‘a, ta outou e nehenehe e faaohipa, i te haapiiraa i ta outou mau tamaiti e i ta outou mau tamahine ia ti‘amâ no te farii i te mau haamaitairaa a to tatou Metua i te Ao ra ».

« Ahiri te pô utuafare e riro ei ohipa tamau na te feia mo‘a i te mau mahana hopea nei… ehia ïa rahiraa utuafare oaoa e itehia ».