2. Fili ke Ngāue

ʻĪmisi

Ko e hāʻele ʻa Kalaisi ʻi he fukahi tahí

Ko hoʻo ʻiloʻi pē ʻokú ke ongoʻi vaivaí pe ʻoku ʻikai ke ke muimui ki ha taha ʻo e ngaahi tuʻutuʻuní, fakakaukau pe ko e hā te ke fai ke ke muimui ai ki he tuʻutuʻuni maluʻí, peá ke fili leva ke fakahoko ʻa e palani ko iá. Hiki ʻa e ngaahi ngāue pau te ke fai ke ke muimui ai ki he ngaahi tuʻutuʻuni maluʻí mo fakasiʻisiʻi ai e ongoʻi vaivaí mo tākiekinangofuá.

Kapau te ke ongoʻi ʻoku ʻahiʻahiʻi koe ke ke kumi ki he ngaahi ʻata taʻetaau ʻi he ʻinitanetí pe fakahoko ha meʻa ʻoku fehangahangai mo e ngaahi tuʻutuʻuni maluʻi ko ʻení, te ke lava ʻo fakahoko ha ngaahi ngāue pau ʻe tokoni ke ke mapuleʻi ai ʻa e ngaahi ongo ko ʻení. Fakaʻaongaʻi ʻa e ngaahi ngāue ʻoku lelei taha kiate koé. Ko e ngaahi fokotuʻu fakakaukau ʻeni te ke ala fakaʻaongaʻi:

Lotua ha mālohi mo ha maluʻi mei he ngaahi ʻahiʻahí. Fakahā ki he Tamai Hēvaní e meʻa ʻokú ke ongoʻí.
Vahevahe, fakamatala, pea talanoa ki ho ngaahi ongó mo ho hoá, taki fakavahé, taki fakasouní, pe hoa takí. Manatuʻi, “ʻOua naʻa faleʻi [ʻe ha] ʻeletā ki ha sisitā, neongo kapau ʻoku [nau] ngāue ʻi ha tuʻunga fakataki. ʻE lava ke fakatupu ʻe he talanoa peheé ha ngaahi ongo pe vā fetuʻutaki ʻoku taʻetāú” (Tohi Tuʻutuʻuni ʻa e Faifekaú, 34).
Tuʻu ki ʻolunga ʻo ngaungaue. Luelue mo ho hoá, pe fakamālohisino.
Lau ha veesi folofola pe hivaʻi ha himi te ne tākiekina hoʻo fakakaukaú ki he Fakamoʻuí.
Taʻofi ho ngāue ʻoku faí, kuikui ho matá pea mihi tuʻo fā ho mānavá. Fakahoko ʻeni ʻi ha ngaahi miniti. ʻOua naʻa hoko atu hoʻo ngāue ʻi he ʻinitanetí kae ʻoua leva kuó ke manatuʻi hoʻo taumuʻá peá ke ongoʻi ha nonga mo maʻu ha loto fie ngāue.
Siviʻi hoʻo tuʻunga fakaesinó. ʻOkú ke fie maʻu nai ha inu, pe meʻatokoni, pe mālōlō? Tokangaekina hoʻo ngaahi fie maʻú.
Fakamanatu ʻi ha miniti ʻe taha pe ua, ki haʻo aʻusia fakalaumālie pe ki ha feituʻu fakaʻofoʻofa ʻe ala tokoni ke fiemālie ai ho fakakaukaú.
Hiki ha ngaahi meʻa ʻe nima ʻokú ke houngaʻia ai.
Fakaʻaongaʻi ha miniti ʻe nima ke ke hiki ʻi hoʻo tohinoá e meʻa ʻokú ke ongoʻí.

Toe vakai ki he Ko e Fakaangaanga ki he Moʻui Fakafaifekaú ki ha ngaahi fakakaukau ki hono mapuleʻi ʻo e ongoʻi vaivaí, pea tānaki ki hoʻo palaní ʻa e ngaahi fakakaukau ʻoku felāveʻi mo iá. ʻI hoʻo faʻu palaní, vakai foki ki he kalasi Maluʻi ki hono Fakaʻaongaʻi ʻo e Tekinolosiá ʻi he ʻinitanetí. Vahevahe ʻa e palani ko ʻení mo ho hoá, kau taki ngāue fakafaifekaú, mo e palesiteni fakamisioná.