“Maluʻi 3,” Maluʻi ki hono Fakaʻaongaʻi ʻo e Tekinolosiá (2015)
“Maluʻi 3,” Maluʻi ki hono Fakaʻaongaʻi ʻo e Tekinolosiá
Maluʻi 3
Mapuleʻi Koe
ʻOku akonaki mai ʻa Līhai ʻi he 2 Nīfai 2:26, “Ko e meʻa ʻi hono huhuʻi ʻa kinautolu mei he hingá kuo … hoko ai [e fānau ʻo e tangatá] ʻo tauʻatāina ʻo taʻengata, ʻo nau ʻiloʻi ʻa e leleí mei he koví; ke fili maʻanautolu pē kae ʻikai fakamālohiʻi ke ngāue ʻi ha faʻahinga founga.” Fakaʻaongaʻi hoʻo tauʻatāina ke filí ke ke mapuleʻi mo fai ha ngaahi fili angatonu ki he founga te ke ngāue ʻaki ai ʻa e tekinolosiá. Naʻe pehē ʻe ʻEletā D. Toti Kulisitofasoni fekauʻaki mo e fehokotaki e tauʻatāina ke filí mo e mapuleʻí, “Ko e mapuleʻi ʻo e angamaʻá ko e tauʻatāina ke fai maʻu pē ʻa e fili ʻoku totonú he ko e meʻa ia ʻoku totonu ke faí, neongo hono faingataʻá” (Mapuleʻi ʻo e Angamaʻá,” Ensign pe Liahona, Nōv. 2009, 105). Koeʻuhí ʻoku fehokotaki mālohi ʻa e mapuleʻí mo e tauʻatāina ke filí, fakakaukau fakapotopoto ke fili ke ke mapuleʻi koe ʻi hoʻo fakaʻaongaʻi ʻa e meʻangāue fakaʻilekitulōniká ʻi hoʻo ngāue fakafaifekaú.
Fakatupulaki ha founga ke ke mapuleʻi ai hoʻo fakaʻaongaʻi e meʻangāue fakaʻilekitulōniká ki he taimi pē ʻoku taau ai ke ngāue ʻaki iá. Ko e taimi ʻokú ke talanoa mata-ki-he-mata ai mo e niʻihi kehé, ʻoua naʻá ke vakaiʻi hoʻo meilí pe tali hoʻo telefoní. Mapuleʻi hoʻo founga ngāue ʻaki ʻa e ngaahi meʻangāue ko ʻení. ʻOua naʻa tuku ke nau puleʻi koe. Mahalo ʻokú ke ʻiloʻi ha niʻihi ʻoku maʻunimā kinautolu heʻenau ngaahi meʻangāue fakaʻilekitulōniká. Hangē ʻoku taʻeʻiloa kiate kinautolu ʻa e ʻātakai fakasōsiale ʻoku nau ʻi aí ʻi heʻenau tokanga ke vakaiʻi ʻenau meilí, femoʻuekina ʻi he keimí, pe hanganoa ʻi he ngaahi ʻekitivitī kehe ʻi heʻenau meʻangāue fakaʻilekitulōniká.
ʻI hoʻo hoko ko e faifekaú, ʻoua naʻa tohoakiʻi koe ʻe hoʻo meʻangāue fakaʻilekitulōniká. Naʻe akonaki ʻa Palesiteni M. Lāsolo Pālati: “ʻOku hoko e fanga kiʻi device toʻotoʻó hangē ko e smartphones ko ha tāpuaki, ka te ne ala tohoakiʻi foki kitautolu mei heʻetau fanongo ki he ‘kihiʻi leʻo siʻí.’ ʻOku fie maʻu ke nau fakaongoongo kiate kitautolu kae ʻoua te nau puleʻi kitautolu” (“Ke Mou Fakalongolongo pea ʻIloʻi ko e ʻOtuá Au” [fakatahaʻanga lotu ʻa e Ngaahi Akoʻanga ʻa e Siasí, 4 Mē 2014], lds.org/broadcasts).