“Maluʻi 1,” Maluʻi ki hono Fakaʻaongaʻi ʻo e Tekinolosiá (2015)
“Maluʻi 1,” Maluʻi ki hono Fakaʻaongaʻi ʻo e Tekinolosiá
Maluʻi 1
Moʻui Taau ke Maʻu e Ngaahi Ueʻi Fakalaumalié
ʻOku talaʻofa mai ʻe Nīfai ʻi he 2 Nīfai 32:5, “Kapau te mou hū ʻi he halá, pea maʻu ʻa e Laumālie Māʻoniʻoní, te ne fakahā kiate kimoutolu ʻa e meʻa kotoa pē ʻoku totonu ke mou faí.” ʻE hoko hoʻo fakaʻaongaʻi angatonu hoʻo tauʻatāina ke filí ʻi he tataki ʻa e Laumālie Māʻoniʻoní, ko hoʻo founga lelei taha ia ki he fai leleí ʻi hoʻo fakaʻaongaʻi ʻa e tekinolosiá, pea ʻe hoko ia ko hoʻo maluʻanga lelei taha mei he koví.
Kuo faʻu ha ngaahi meʻasivi ke ne fakangatangata ʻa e ngaahi polokalama ʻi hoʻo telefoni toʻotoʻó ke maluʻi koe mei he ngaahi polokalama taʻetāú. Ka neongo iá, he ʻikai lava ʻe he ngaahi meʻasivi mālohi tahá ʻo maluʻi koe ʻi he taimi kotoa pē. Ko e meʻasivi lelei taha ʻokú ke maʻú ko ho lotó mo hoʻo holi ke fai e ngaahi fili ʻoku māʻoniʻoní. Naʻe pehē ʻe ʻEletā Tēvita F. ʻĒvani: “Ko e founga pē taha ki hono siviʻi moʻoni e ngāue lelei ʻaki ʻo e tekinolosiá ko e loto mo e fakakaukau fakafoʻituitui ʻo e tokotaha kei talavou ko iá. … ʻOku mau tui lahi ko e … laui afe ʻo e [kau faifekaú te nau] fakatupulaki ha ngaahi tōʻonga moʻui fakaʻilekitulōnika lelei, ʻa ia ʻe faitāpuekina ai ʻenau moʻuí mo honau fāmilí ʻo taʻengata” (“Elder David F. Evans Discusses Expanded Missionary Efforts,” mormonnewsroom.org). ʻOku totonu ke toʻo fakamātoato ʻe he kau faifekaú ʻa honau fatongia ko e hokohoko feinga ke “fakamaʻa [honau] lotó” (Tokāteline mo e Ngaahi Fuakava 88:74).
Kuo foaki atu ʻe hoʻo Tamai Hēvaní ha ongo meʻafoaki mātuʻaki makehe mo mālohi ʻe tokoni kiate koe: ko hoʻo tauʻatāina ke fili ki he totonú mo e meʻafoaki ʻo e Laumālie Māʻoniʻoní. Naʻe fakahā ʻe he ʻEikí Hono finangaló: “ke lava ʻe he [tokotaha] kotoa pē ʻo ngāue ʻi he tokāteline mo e tefitoʻi moʻoni ʻo kau ki he kahaʻú, ʻo fakatatau ki he tauʻatāina ke fili ki he totonú ʻa ia kuó u foaki kiate iá, koeʻuhí ke lava ʻo ʻekeʻi mei he [tokotaha] kotoa pē ʻa ʻene ngaahi angahala ʻaʻaná ʻi he ʻaho ʻo e fakamāú” (Tokāteline mo e Ngaahi Fuakava 101:78). Naʻe akonaki ʻa Palesiteni Poiti K. Peeka ʻo pehē, “ʻOku ʻikai ha mēmipa ʻi he Siasí ni—pea ʻoku ʻuhinga ia kiate kimoutolu takitaha—te ne teitei fakahoko ha fehālaaki lahi taʻe tomuʻa fai atu ha fakatokanga ʻi he ngaahi ueʻi ʻa e Laumālie Māʻoniʻoní” (How to Survive in Enemy Territory,” New Era, Apr. 2012, 3).