1. Tokanga pea Fakahaaʻi

ʻĪmisi

Tō folofola ʻa e Tuʻi ko Penisimaní ki he kakaí

ʻOku fie maʻu ke ke ʻiloʻi ʻa e taimi ʻoku ʻikai ke faaitaha ai hoʻo fakakaukaú pe ngāué mo e ngaahi tuʻutuʻuni ko ʻení, koeʻuhí kae lava ke ke ako ke moʻui ʻaki maʻu pē ʻa e ngaahi maluʻi ko ʻení. ʻOku fie maʻu foki ke ke ʻiloʻi ʻa e taimi ʻokú ke ongoʻi te ke ala tākiekinangofua ange aí. Hangē ko ʻení, ʻe lava ʻe he ongoʻi taʻeoliʻiá, taʻelatá, ʻitá, loto-hohaʻá, ilifiá, loto-mafasiá, fiekaiá pe ongosiá ʻo fakafeʻātungiaʻi e ngāue fakapotopoto ʻaki ʻo e tekinolosiá. ʻE fakaʻatā ʻe hono ʻiloʻi ʻo e ngaahi makatuʻunga mo e ongo ko ʻení ke ke mohu founga ai ʻi hono tali hoʻo ongo ko iá. Naʻe akonaki e Tuʻi ko Penisimaní, “Kapau ʻoku ʻikai te mou ʻiloʻi ʻoku mou faitotonu maʻu pē, mo hoʻomou ngaahi fakakaukaú, mo hoʻomou ngaahi leá, mo hoʻomou ngaahi ngāué, pea tauhi ʻa e ngaahi fekau ʻa e ʻOtuá, ʻo tui maʻu pē ki he ngaahi meʻa kuo mou fanongo ai ʻo kau ki he hāʻele mai ʻa hotau ʻEikí, ʻo aʻu ki he ngataʻanga ʻo hoʻomou moʻuí, pehē kuo pau ke mou malaʻia. ʻOiauē ʻe tangata, manatu, pea ʻoua ʻe malaʻia” (Mōsaia 4:30).

ʻĪmisi

ongo ʻeletā ʻokú na ngāue ʻaki ha ongo komipiuta

ʻOku aʻusia ʻe he kau faifekau kotoa pē ʻa e ngaahi vaivaí mo e ongoʻi tākiekinangofuá. Fakahā totonu ia koeʻuhí ka ke lava ʻo tokoniʻi pē koe ke ke fili ha tali ʻoku lelei angé pea ikunaʻi ʻa e ʻahiʻahí, kae ʻoua ʻe fūfuuʻi pe tukunoaʻi pē e ngaahi ongo ko iá. Fakapapauʻi hoʻo ongó, pea fakakaukau pe ʻoku ʻi ai ha ʻuhinga pe tūkunga pau ʻokú ke ongoʻi pehē aí. Fakamatala tauʻatāina ki ho hoá mo e kau faifekau falalaʻanga kehé koeʻuhí ke nau tokoniʻi koe ke ke ʻiloʻi ʻa e ongo ʻokú ke maʻú mo e founga ʻokú ne uesia ai koé. ʻI hoʻo lotú, vahevahe totonu ki he Tamai Hēvaní ʻa e meʻa ʻokú ke ongoʻí koeʻuhí ke Ne tokonia mo fakaivia koe ke ke ikunaʻi e ʻahiʻahí tuʻunga ʻi he Fakalelei ʻa Kalaisí.