“3. Ako mo Fakalakalaka,” Maluʻi ki hono Fakaʻaongaʻi ʻo e Tekinolosiá (2015)
“3. Ako mo Fakalakalaka,” Maluʻi ki hono Fakaʻaongaʻi ʻo e Tekinolosiá
3. Ako mo Fakalakalaka
ʻI hoʻo feinga ke muimui ki he ngaahi tuʻutuʻuni maluʻí, ako mei hoʻo ngaahi aʻusiá. Ko e ako mo fakalakalaká ko e fakatomalá ia, ʻa ia ʻokú ke ofi ange ai kia Kalaisi ʻi hoʻo fakaʻaongaʻi ʻEne Fakaleleí. ʻI hoʻo tafoki kiate Iá, te Ne tokoniʻi koe ke ke tupulaki. Kuó Ne talaʻofa mai, “Kapau ʻe haʻu kiate au [ʻeku fānaú] te u fakahā kiate kinautolu ʻa honau vaivaí. … ʻOku feʻunga ʻa ʻeku ʻofá [kiate kinautolu] kotoa pē ʻoku nau fakavaivaiʻi ʻa kinautolu ʻi hoku ʻaó, he kapau te nau fakavaivaiʻi ʻa kinautolu ʻi hoku ʻaó, pea tui kiate au, te u liliu ʻa e ngaahi meʻa vaivaí ko e mālohi kiate kinautolu” ( ʻEta 12:27). ʻE tokoniʻi koe ʻe he ʻOtuá ke ke ako mei hoʻo ngaahi fehalākí mo fakalakalaka koeʻuhí ke ke maʻu ha mālohi ke ikunaʻi ho ngaahi vaivaí. ʻI he Fakalelei ʻa Sīsū Kalaisí, ʻoku fakamolemoleʻi pea fakangaloʻi ai ʻe he ʻOtuá e ngaahi fehalaaki ko ia ʻi he kuohilí.
Ko e taimi ʻoku ʻahiʻahiʻi ai koe ke ke ngāue hala ʻaki ʻa e tekinolosiá, te ke lava ʻo ako mei hoʻo aʻusiá ʻaki haʻo tokanga ki he ngaahi fili naʻá ke fakahokó mo e ngaahi ola naʻe maʻu aí. Hiki ʻi hoʻo tohinoá ho ngaahi aʻusiá mo e ngaahi ongo naʻá ke maʻú. Ako ke ke ʻiloʻi ʻa e ngaahi sīpinga fakakaukau, ongo pe tōʻonga ʻokú ne fakafeʻātungiaʻi hoʻo ngāue totonu ʻaki e tekinolosiá. Te ke lava ʻo taʻofi e ʻahiʻahí ʻaki haʻo fakaʻehiʻehi mei he ngaahi sīpinga ko ʻení. Hangē ko ʻení, mahalo ʻe faingofua ange ke tohoakiʻi hoʻo tokangá ʻe hoʻo meʻangāué ʻi he taimi ʻoku ʻikai ai ha palani pau mo ʻuhingamālie ki he ʻaho ko iá. ʻI hoʻo palani maʻu pē ha ngaahi ʻekitivitī ʻoku ʻuhingamālié, ʻe siʻisiʻi leva ke tohoakiʻi ho fakakaukaú ki hoʻo meʻangāue fakaʻilekitulōniká.
ʻE tokoni foki ho hoá mo e kau taki ngāue fakafaifekaú ke ke ako mo fakalakalaka. Manatuʻi, ʻoku ngāue ʻaki ʻe he filí ʻa e fakafufuú mo e nofo tokotahá ke tohoakiʻi e kakaí ki he fakapoʻulí, ka ʻoku poupouʻi kitautolu ʻe he ʻEikí ke tau fekumi ki he māmá ʻi he faitotonu mo e moʻoni. Ko e taha ʻo e ngaahi maluʻanga lelei tahá ko hano langa ha vā fetuʻutaki ʻoku mālohi mo angatonú ʻiate koe mo ho hoá mo e kau mēmipa hoʻo ʻēliá pea ʻokú ne fakaʻatā foki ai ke ke fokotuʻu ha ʻulungaanga ‘oku angatonu mo ʻuhingamālié.
ʻI hoʻo fili ke palani maʻu pē ha ngaahi ʻekitivitī ʻoku ʻuhingamālié, ʻe siʻisiʻi leva ke tohoakiʻi ho fakakaukaú ki hoʻo meʻangāue fakaʻilekitulōniká.