“Maluʻi 2,” Maluʻi ki hono Fakaʻaongaʻi ʻo e Tekinolosiá (2015)
“Maluʻi 2,” Maluʻi ki hono Fakaʻaongaʻi ʻo e Tekinolosiá
Maluʻi 2
Tukutaha Hoʻo Tokangá ki he Taumuʻa Hoʻo Ngāue Fakafaifekaú
Kuo folofola ʻa e ʻEikí, “Pea kapau ʻe hanga taha ʻa homou matá ki hoku nāunaú, ʻe fakafonu ʻa homou sinó kotoa ʻaki ʻa e maama, pea ʻe ʻikai ke ʻiate kimoutolu ha fakapoʻuli; pea ko e sino ko ia ʻa ia ʻoku fonu ʻi he māmá ʻoku ʻiloʻi ʻe ia ʻa e ngaahi meʻa kotoa pē” (Tokāteline mo e Ngaahi Fuakava 88:67). ʻOku ʻuhinga ʻa e maʻu ha mata ʻoku hanga taha pē ki he nāunau ʻo e ʻOtuá ke tau tokanga taha pē ki he taumuʻa ʻa e ʻOtuá—ʻa ia ko hoʻo taumuʻa fakafaifekau foki ia ʻoʻoú.
Ko e meʻa kotoa pē ʻokú ke faí—kau ai e founga ʻokú ke ngāue ʻaki ʻa e tekinolosiá—ʻoku totonu ke fakatefito ia ʻi hoʻo taumuʻá, ʻa ia ko hono “fakaafeʻi ha niʻihi kehe ke nau haʻu kia Kalaisi ʻaki hono tokoniʻi kinautolu ke nau tali ʻa e ongoongolelei kuo fakafoki maí, ʻo fakafou ʻi he tui kia Sīsū Kalaisi mo ʻEne Fakaleleí, fakatomalá, papitaisó, maʻu ʻa e foaki ʻo e Laumālie Māʻoniʻoní, pea kātaki ʻo aʻu ki he ngataʻangá” (Preach My Gospel, 1). ʻE tokoni hoʻo holi ke vahevahe ʻa e ongoongoleleí ke ke hanganoa ai pea ʻikai tohoakiʻi hoʻo tokangá ʻe he ʻahiʻahí.
Toki fakamoʻui pē hoʻo meʻangāue fakaʻilekitulōniká ʻi hoʻo ʻiloʻi fakapapau ʻa e founga te ke fakaʻaongaʻi ai iá. Tomuʻa fakapapauʻi mo ho hoá hoʻomo meʻa ʻe faí kimuʻa pea fakamoʻui hoʻomo meʻangāue fakaʻilekitulōniká (mobile device) pe komipiutá pe hū ki ha polokalama. Fakakaukau ki he lahi ʻo e taimi te ke fakamolekí mo e founga ʻe tokoni ai ʻa e ngaahi ʻekitivitī ko ʻení ki he niʻihi kehé ke fakamālohia ʻenau tui kia Sīsū Kalaisí, fakatomalá, fakahoko mo tauhi e ngaahi fuakavá, ongoʻi mo muimui ki he Laumālie Māʻoniʻoní, pea kātaki ki he ngataʻangá. Muimui ki he fakahinohino ʻa hoʻo palesiteni fakamisioná fekauʻaki mo e ngaahi ʻekitivitī fakaʻilekitulōnika ʻoku tāú. Kuo fakamoʻoniʻi ʻe he ngaahi aʻusiá ʻoku meimei fehangahangai ʻa e kakaí mo e ngaahi ʻata taʻetāú ʻi he ʻinitanetí ʻi he taimi ʻoku nau hū noaʻia ai ki he ʻinitanetí taʻe ʻi ai ha taumuʻa paú.