Genesis 3–4; Moises 4–5: Leksiyon 11

Moises 4:5–32; 5:1–15, Bahin 1

“Ang Ilang mga Mata Nabuka”

Nakaamgo man kita o wala, ang Pagkapukan ni Adan ug Eva direkta nga nakaapekto sa kanatong tanan matag adlaw. Sa pagkatinuod, kon wala ang Pagkapukan, dili gani unta kita mangatawo. Gituyo kini nga leksiyon aron tabangan ang mga estudyante nga masabtan ang mga epekto sa Pagkapukan diha sa plano sa Langitnong Amahan ug sa ilang kaugalingong mga kinabuhi.

Pagpangandam sa estudyante: Dapita ang mga estudyante sa pagsag-ulo sa tudling sa doktrinal nga kahanas sa 2 Nephi 2:25 ug ipangutana sa ginikanan o lider sa Simbahan kon unsay kahulogan niini para nila.

Mga Posibleng Kalihokan sa Pagkat-on

Maayo o daotan?

Sa pagsugod sa leksiyon, tabangi ang mga estudyante nga mahunahunaan kon sa unsang paagi anglisod nga mga butang pwedeng mahimong panalangin sa plano sa Dios. Ang usa ka paagi paghimo niini mao ang paggamit sa mosunod nga sukdanan. Pwede kang magpakitag mga litrato nga anaa ang mga pulong nga ihan-ay sa mga estudyante.

• Sa sukod nga 1–10 (1 = dili maayo, 10 = maayo), unsa kaha ang grado sa kadaghanang tawo sa mosunod?

Pagkakugihan

Mga Pagsulay

Kagul-anan

Kamatayon

• Kon tan-awon kini sa mahangtoron nga panglantaw sa plano sa Langitnong Amahan, lahi ba kaha ang imong grado sa bisan asa niini? Kon mao, ngano man?

Ikonsiderar ang pagpakita og imahe ni Adan ug Eva sama sa anaa sa sinugdanan niini nga leksiyon. Pwede nimo ning ipabilin hangtod matapos ang leksiyon.

Daghan sa mga kalisdanan nga atong giatubang sa kinabuhi mao ang resulta sa desisyon nga gihimo sa atong unang mga ginikanan, si Adan ug Eva.

• Sa imong hunahuna, unsa kaha ang igrado sa daghang tawo sa Pagkapukan ni Adan ug Eva sa sukod nga 1–10? Ngano man?

Pamalandongi kon unsa ka lawom ang imong pagsabot sa Pagkapukan ni Adan ug Eva ug ang kaimportante niini sa imong kinabuhi. Tubaga ang mosunod nga mga pangutana diha sa imong journal sa pagtuon:

• Nabati ba nimo nga ang Pagkapukan maayo o dili maayo?

• Sa unsang paagi ang imong pagsabot sa Pag-ula ni Jesukristo makaapektar sa imong tubag?

Samtang imong tun-an ang Moises 4–5 karon, tinguha ang inspirasyon gikan sa Espiritu Santo aron mas masabtan nimo ang Pagkapukan ni Adan ug Eva. Ang Espiritu Santo makatabang nimong makita nga ang Pagkapukan mao ang bahin sa plano sa Langitnong Amahan aron tabangan kitang mouswag ug mas mahisama Kaniya.

Ang mga epekto sa Pagkapukan

Dapita ang mga estudyante sa pagpamubo unsay ilang nahibaloan bahin sa Tanaman sa Eden ug sa Pagkapukan ni Adan ug Eva. Kon kinahanglan nilag tabang, dapita sila nga mangita sa 2 Nephi 2:22–23; Moises 3:16–17; 4:6–12, nga mangita sa mga detalye. Pwede usab nga ikaw ang mopamubo pinaagi sa pagpasalida sa bidyo sa Mga Istorya sa Daang Tugon nga Kasulatan nga “Adam and Eve” (1:53), nga anaa sa ChurchofJesusChrist.org.

Dayon tabangi ang mga estudyante nga makat-onan ang mga epekto sa Pagkapukan ni Adan, Eva, ug sa ilang kaliwatan. Aron matabangan ang mga estudyante nga maorganisar unsa ilang nakat-onan, hatagi silag papel ug ipakita ang mosunod nga mga instruksiyon. Pwede nimong dapiton ang mga estudyante nga magpares-pares para humanon ni nga kalihokan. (Timan-i: Ang Leksiyon 21: “Sukda ang Imong Nakat-onan 1” misugyot nga tan-awon sa mga estudyante ang mga pamphlet nga ilang gihimo niini nga kalihokan aron matabangan sila sa pagpasabot sa mga epekto sa Pagkapukan.)

Ikonsiderar ang pagbutang og limitasyon sa gitas-on sa panahon nga naghimo og pamphlet ang mga estudyante aron naa pa silay panahon nga humanon ang leksiyon.

Aron tabangan ka nga maorganisar ang imong nakat-onan bahin sa Pagkapukan, paghimog pamphlet gamit ang mosunod nga mga instruksiyon. Ihanduraw nga gamiton nimo kini nga pamphlet aron tudloan ang uban bahin sa Pagkapukan ug nganong importante kini diha sa plano sa Langitnong Amahan. Gamita ang imong pagkamamugnaon sa paghimo sa imong pamphlet.

1. Pil-a og katunga ang papel. Paghimog hapin nga pahina nga naay ulohan nga sama sa “Ang Pagkapukan Diha sa Plano sa Langitnong Amahan.” Pagbutang og drowing o litrato nga magpahinumdom nimo sa Pagkapukan, sama sa kahoy nga naay bunga o usa ka prutas.

2. Sulod sa pamphlet, butangig ulohan ang walang pahina nga “Mga Epekto sa Pagkapukan.”

3. Tun-i ang Moises 4:13–16, 22–25, 28–29; 5:1–4. Paglista o pagdrowing og mga litrato sa mga epekto sa Pagkapukan diha sa mga anak sa Dios. Iapil sa imong pamphlet ang mga bersikulo diin nimo nakat-onan ang matag epekto.

Human sa igong panahon, dapita ang pipila ka estudyante nga ipakigbahin ang ilang pamphlet sa klase. Dapita ang mga estudyante sa pagdugang ngadto sa ilang mga pamphlet sa bisan unsa nga ilang nataligam-an.

Seguraduha nga nalista sa mga estudyante nga si Adan ug Eva ug ang ilang mga kaliwat karon:

1. Mobati nga dili andam nga maanaa sa presensiya sa Dios (Moises 4:13–16).

2. Makabaton og mga anak (Moises 4:22; 5:2–3).

3. Makasinati og kagul-anan, kasakit, ug kalisdanan (Moises 4:22–24).

4. Kinahanglan nga maningkamot aron mabuhi (Moises 4:25; 5:1–3).

5. Mahibalo sa kalainan sa maayo gikan sa daotan (Moises 4:28).

6. Pisikal nga mamatay (Moises 4:25).

7. Mahimulag sa presensiya sa Dios (espirituwal nga kamatayon) (Moises 5:4).

Ipasabot nga ang pagkanahimulag sa Dios gitawag og “espirituwal nga kamatayon”—usa ka butang nga masinati natong tanan.

Pamalandongi sa unsang paagi ang pihong mga epekto sa Pagkapukan makatabang nato sa pag-uswag ngadto sa “pagka-imortal ug sa kinabuhi nga dayon.” (Moises 1:39).

• Sa unsang paagi ang pagtugot sa Dios nga mapukan si Adan ug Eva nagpakita sa Iyang kaalam ug gugma para sa Iyang mga anak?

Pamalandongi hain sa mga epekto sa Pagkapukan ang nakita nimong labing lisod sa imong kinabuhi.

Ipasabot sa mga estudyante nga tiwason nila ang ilang mga pamphlet atol sa sunod nga leksiyon samtang ilang tun-an ang bahin sa papel sa Manluluwas sa pagbuntog sa negatibong mga epekto sa Pagkapukan.

Ang importanteng papel sa Pagkapukan

Gipasabot ni propeta Lehi sa Basahon ni Mormon ang kaimportante sa Pagkapukan.

Tun-i ang 2 Nephi 2:22–25, nga mangita nganong maayo nga nahitabo ang Pagkapukan.

• Unsay imong nakat-onan bahin sa Pagkapukan?

Pwedeng isulti sa mga estudyante ang pipila ka kamatuoran, pero seguraduhang nasabtan nila nga importante ang Pagkapukan sa atong pag-uswag diha sa plano sa Langitnong Amahan.

Pwede usab nimong tabangan ang imong mga estudyante nga makita nga gitugotan sa Langitnong Amahan si Adan ug Eva ug ang ilang mga kaliwat nga makasinati og kalipay pinaagi sa Pagkapukan. Dapita sila nga isulat ang “kalipay” sa ilang pamphlet ubos sa “Mga Epekto sa Pagkapukan.” Ikonsiderar ang pagpangutana ni bisan kinsa sa imong mga estudyante kon kaya ba nilang isulti ang 2 Nephi 2:25 nga dili magtan-aw sa kasulatan.

Gipasabot ni Presidente Jeffrey R. Holland sa Korum sa Napulog Duha ka Apostoles kon nganong importante ang Pagkapukan sa atong kinabuhi:

Ang Pagkapukan usa ka importanteng bahin sa balaan nga plano sa Langitnong Amahan. Kon wala kini walay mortal nga mga anak nga matawo unta ngadto ni Adan ug ni Eva, ug unta walay tawhanong pamilya nga makasinati og oposisyon ug pagtubo, moral nga kabubut-on, ug ang hingpit nga kalipay sa pagkabanhaw, katubsanan, ug kinabuhing dayon. (Ang Pag-ula ni Jesukristo Elder Jeffrey R.Holland [Liahona Marso 2008], 34-35)

Tan-awag balik ang pahina nga “Mga Epekto sa Pagkapukan” diha sa imong pamphlet.

• Sa unsang paagi naimpluwensiyahan sa maayong paagi ang imong mahangtoron nga pag-uswag tungod sa Pagkapukan?

• Asa sa mga epekto sa Pagkapukan nga nanginahanglan kita nga luwason?

Gawas pa sa ubang butang, tabangi ang mga estudyante nga masabtan nga, dili nato maluwas ang atong kaugalingon gikan sa pisikal o espirituwal nga kamatayon.

Basaha ang unang kapahayag sa 2 Nephi 2:26, nga mangita sa maayong balita para sa tanang anak sa Dios.

• Unsay imong nakaplagan?

Pahibaloa ang mga estudyante nga nakatutok ang sunod nga leksiyon sa papel sa Mesiyas sa pagtubos nato gikan sa negatibong mga epekto sa Pagkapukan.

Dapita ang mga estudyante nga hinumdoman ang paggrado nga kalihokan sa sinugdanan sa leksiyon. Pangutan-a sila kon unsaon na nila karon paggrado ang Pagkapukan ni Adan ug Eva sa sukod nga 1–10. Pwedeng ipasabot dayon sa mga estudyante ngadto sa ilang mga silingan nganong maayo nga nahitabo ang Pagkapukan ug sa unsang paagi moepekto kini sa ilang mga kinabuhi ug sa ilang pag-uswag diha sa plano sa Langitnong Amahan.

Ikonsiderar ang pagtapos sa imong pagpamatuod sa kaalam ug gugma sa Langitnong Amahan para kanato, nga Iyang gipaktia pinaagi sa pagpadala sa Iyang Anak aron tubson ta gikan sa Pagkapukan.

(Pahinumdomi ang mga estudyante nga itago ang ilang mga pamphlet—o ihatag kini kanimo—aron mahuman nila kini sa sunod nga leksiyon.)

Dugang nga mga Kapanguhaan

Nakasala ba si Adan ug Eva dihang gikaon nila ang bunga sa kahoy sa kahibalo sa maayo ug daotan?

Si Presidente Joseph Fielding Smith (1876–1972) mitudlo:

Unsay gihimo ni Adan? Ang butang nga gusto gyod sa Ginoo nga himoon niya. … Nakasala ba si Adan dihang gikaon niya ang gidili nga bunga? … Wala gyod!

… Karon mao ni ang akong pagsabot [Moises 3:16–17]: Giingnan sa Ginoo si Adan, mao kini ang kahoy sa kahibalo sa maayo ug daotan. Kon gusto nimong magpabilin dinhi, nan dili nimo pwedeng kaonon ang bunga. Kon gusto nimong magpabilin dinhi, did-an ka Nako sa pagkaon niini. Apan pwede kang molihok sa imong kaugalingon, ug pwede nimong kaonon kon gusto nimo. Ug kon mokaon ka, mamatay ka.

Akong nakita ang dakog kalainan tali sa paglapas sa balaod ug pagpakasala. (“Fall—Atonement—Resurrection—Sacrament,” in Charge to Religious Educators, 3rd ed. [1994], 124)

Si Presidente Dallin H. Oaks sa Unang Kapangulohan mipasabot:

Si Eva ang unang nakalapas sa mga gidili sa Eden aron mapasiugdahan ang mga kahimtang sa pagkamortal. Ang iyang gihimo, bisan unsa man nga matang kini, lahi nga pamaagi sa paglapas apan alang sa mahangtorong paagi usa ka mahimayaong panginahanglan aron maabli ang ganghaan sa kinabuhing dayon. Gipakita ni Adan ang iyang kaalam pinaagi sa paghimo sa samang butang. Ug busa si Eva ug “Adan napukan aron ang mga tawo mahimo” (2 Nephi 2:25).

Ang ubang mga Kristiyanos mihimaraot ni Eva sa iyang gihimo, mihukom nga siya ug ang iyang mga anak nga babaye sa bisan unsa pa man mahuyang bahin niini. Apan dili ang mga Santos sa Ulahing mga Adlaw! Napahibalo pinaagi sa pagpadayag, atong gikalipay ang gihimo ni Eva ug gitahod ang iyang kaalam ug kaisog nianang talagsaong yugto nga gitawag og Pagkapukan. (“The Great Plan of Happiness,” Ensign, Nov. 1993, 73)

Nganong dili man makaanak si Adan ug Eva samtang naa sa Tanaman sa Eden?

Si Presidente Dallin H. Oaks sa Unang Kapangulohan miingon:

Sa dihang si Adan ug si Eva nakadawat sa unang sugo, anaa sila sa usa ka transisyonal nga kahimtang, wala na sa kalibutan sa mga espiritu apan adunay pisikal nga mga lawas nga wala pa mapaubos sa kamatayon ug dili pa makahimo sa pagsanay. Dili nila matuman ang unang sugo sa Amahan [nga magpadaghan ug pun-on ang yuta] nga dili molapas sa babag tali sa kalipay didto sa Tanaman sa Eden ug sa grabe kaayo nga mga pagsulay ug talagsaong mga oportunidad sa mortal nga kinabuhi. (“The Great Plan of Happiness,” Ensign, Nov. 1993, 72–73)

Moises 4:22. Unsay ipasabot sa giingon nga si Adan “magbuot” kang Eva?

Si Elder Bruce C. Hafen ug Sister Marie K. Hafen mipsabot:

Ang konsepto sa nagsalig sa usag usa, patas nga magkauban naay maayong pasukaranan diha sa doktrina sa napasig-uling ebanghelyo. …

Ang Genesis 3:16 miingon nga si Adan “magbuot” kang Eva, pero wala ni magpasabot nga diktador si Adan. … Usab, ang magbuot naggamit sa Hebreohanong bet, nga nagpasabot og pagmando uban, dili pagmando ibabaw. Kon ang usa ka lalaki makahimo sa paggamit sa “kamandoan … sa bisan unsa nga matang sa pagkadili matarong” (Doktrina ug mga Pakigsaad 121:37), tangtangon sa Dios ang awtoridad sa maong tawo. (“Crossing Thresholds and Becoming Equal Partners,” Ensign, Aug. 2007, 26, 27)

Si Elder Dale G. Renlund sa Korum sa Napulog Duha ka Apostoles ug si Sister Ruth Lybbert Renlund mipasabot:

[Ang usa ka matarong nga bana] maningkamot sa pagpangalagad; siya moangkon og kasaypanan ug maninguha og kapasayloan; dali siya nga mohatag og pagdayeg; siya mahunahunaon sa mga gusto sa sakop sa pamilya; mobati siya sa dakong gibug-aton sa responsibilidad sa paghatag “sa mga kinahanglanon sa kinabuhi ug sa pagpanalipod” alang sa iyang pamilya; motagad siya sa iyang asawa uban sa labing dakong pagtahod ug pagtagad. … Panalanginan niya ang iyang pamilya. (The Melchizedek Priesthood: Understanding the Doctrine, Living the Principles [2018], 23)

Dugang nga mga Kalihokan sa Pagkat-on

Ang plano sa kaluwasan

Makatabang tingali sa mga estudyante nga makita ang Pagkapukan sa konteksto sa plano sa Langitnong Amahan sa kaluwasan. Ikonsiderar ang pagpakita sa mosunod nga graphic, nga gigamit tingali nimo sa Leksiyon 2: “Ang Plano sa Kaluwasan,” samtang hisgotan sa mga estudyante ang mosunod nga mga pangutana isip klase o sa ginagmayng mga grupo.

Ipangutana sa mga estudyante ang mosunod:

• Unsay imong nahibaloan sa matag bahin sa plano sa Langitnong Amahan sama sa gipakita niini nga diagram?

• Unsay papel sa Manluluwas sa matag bahin?

• Asa nimo ibutang ang Pagkapukan ni Adan ug Eva niini nga diagram?

Basaha ang Moises 4:6, nga mangita sa mga intensyon ni Satanas sa pagtental kang Eva nga kaonon ang bunga.

• Unsay mga intensyon ni Satanas? Unsay wala niya bug-os masabti?

• Sa unsang paagi mitabang ang Langitnong Amahan sa Iyang mga anak nga mouswag pinaagi sa pagtugot kang Adan ug Eva nga kaonon ang bunga?

Laing paagi sa pagpamubo sa asoy sa Pagkapukan

Gituyo kini nga kalihokan aron tabangan ang mga estudyante sa paghatag og mubong summary sa mga hitabo nga magdala ngadto sa pagkapukan. Isulat ang mosunod nga mga pulong sa pisara: Misugo, Kahoy, Mipili, Satanas, Bunga, Mamatay, Kaon, Maalamon, Dahon sa Igos.

Dapita ang mga estudyante nga ipasabot ang asoy sa Pagkapukan ngadto sa ilang mga klasmeyt gamit ang pipila o ang tanang pulong sa pisara. Human ipasabot sa mga estudyante ang Pagkapukan, dapita silang rebyohon kadali ang Moises 3:16–17 ug 4:6–12, nga mangita sa bisan unsang dugang detalye nga pwede nilang idugang o kadtong mokorehir sa ilang pagsabot. Dapita sila nga ipakigbahin sa usag usa ang mga detalye nga ilang nakat-onan gikan sa mga bersikulo.