Genesis 3–4; Moises 4–5: Leksiyon 10

Moises 4:1–4

“Ang Imong Pagbuot Mao ang Matuman, ug ang Himaya Imo sa Kahangtoran”

Sa kinabuhi sa wala pa dinhi sa yuta, gipili sa Langitnong Amahan si Jesukristo nga mahimong Manluluwas sa Iyang plano. Kanunayng gituman ni Jesukristo ang kabubut-on sa Langitnong Amahan, bisan kon kini lisod. Kini nga leksiyon makatabang sa mga estudyante nga tinguhaon ang pagsunod sa ehemplo ni Jesukristo sa pagsunod sa Langitnong Amahan.

Pagpangandam sa estudyante: Dapita ang mga estudyante nga hunahunaon ang ilang mga kaila kansang mga panig-ingnan nakadasig nila sa pagsunod sa Langitnong Amahan. Dapita sila sa pagtambong nga andam nga mopakigbahin.

Mga Posibleng Kalihokan sa Pagkat-on

Pagbuhat sa Kabubut-on sa Langitnong Amahan

Sa pagsugod sa klase, ikonsiderar ang pagpakigbahin sa panahon dihang usa ka tin-edyer ang gihangyo sa Langitnong Amahan nga himoon ang usa ka lisod nga butang. Pwede kini nga personal nga kasinatian o butang nga nadungog lang nimo. Ang mosunod nga istorya maoy usa ka ehemplo nga pwede nimong gamiton. Dasiga ang mga estudyante nga hunahunaon ang panahon dihang ingon niana ang ilang gibati.

Si Brother M. Joseph Brough, kanhi Kinatibuk-ang Kapangulohan sa Young Men, mipakigbahin sa mosunod nga istorya bahin sa iyang anak nga babaye:

Mga batan-on, ang Dios nagkinahanglan og lisud nga mga butang diha kaninyo. Usa ka 14 anyos nga batan-ong babaye ang miapil sa basketball. Damgo niya nga magdula og high school basketball sama sa iyang magulang nga babaye. Nahibaloan dayon niya nga ang iyang mga ginikanan gitawag nga mangulo sa usa ka misyon sa Guatemala.

Sa pag-abot, iyang nadiskobrihan nga duha sa iyang mga klase kay Spanish, usa ka pinulongan nga wala pa niya malitok. Walay bisan usa ka sports team sa mga babaye sa iyang eskwelahan. Nagpuyo siya sa ika-14 nga andana sa usa ka gambalay [building] nga grabe og seguridad. Sa pagdugang niining tanan, dili siya makagawas nga mag-inusara tungod sa mga rason kalabot sa seguridad.

Ang iyang mga ginikanan naminaw sa iyang hilak hangtod makatulog kada gabii sulod sa mga bulan. (“Ihangad ang Imong Ulo ug Paglipay,” Liahona, Nob. 2018, 14)

• Kon ikaw pa ang anaa sa kahimtang sa maong batan-ong babaye, unsa kaha ang labing lisod para nimo?

Pamalandongi ang mosunod nga mga pangutana:

• Unsa ang lisod nga butang nga gipangayo o posibleng pangayoon sa Dios kanimo?

• Unsa ka kaandam sa paghimo niining lisod nga butang? Ngano man?

• Unsay gusto nimong makat-onan o bation niini nga leksiyon mga makatabang nimong mas mahimong andam sa paghimo sa gipangayo sa Dios?

Samtang tun-an sa mga estudyante ang Moises 4:1–4, makakat-on sila bahin ni Jesukristo ug sa Iyang kaandam sa paghimo sa lisod nga mga butang nga gipangayo sa Langitnong Amahan. Dasiga ang mga estudyante nga tinguhaon ang tabang sa Espiritu Santo aron mahibaloan kon sa unsang paagi makatabang nila ang ehemplo sa Manluluwas sa paghimo sa lisod nga mga butang nga pwedeng pangayoon sa Dios kanila.

Ang kinaiya ni Kristo

Pwede nimong ipasabot ang impormasyon sa mosunod nga parapo aron makatabang sa mga estudyante nga masabtan ang konteksto sa tudling nga ilang tun-an karon.

Sa kinabuhi sa wala pa dinhi sa yuta kita nagpuyo uban sa atong Langitnong Amahan. Samtang naa didto, gitudloan kita bahin sa Iyang plano aron makatabang nga mahisama Kaniya. Ang Moises 4:1–4 adunay asoy sa Konseho sa Langit dihang gipili si Jesukristo nga mahimo natong Manluluwas. Niini nga mga bersikulo, makita nato ang kinaiya ni Jesukristo ug ni Satanas samtang mitubag sila sa kabubut-on sa Langitnong Amahan sa lainlaing paagi.

Pwede nimong ikonsiderar ang paghimog simpleng tsart parehas sa mosunod diha sa pisara aron makatabang sa mga estudyante nga klarong makita ang kalainan ni Jesukristo ug ni Satanas.

Jesukristo	Satanas

Basaha ang Moises 4:1–4, nga mangita kon unsay imong makat-onan bahin sa mga motibo ug kinaiya ni Jesukristo ug ni Satanas.

Dapita ang mga estudyante nga isulat ang ilang mga panabot sa pisara ug hisgotan kon unsay ilang nakat-onan. (Isulti tingali sa mga estudyante kon pila ka higayon gigamit ni Satanas ang pulong “ako” ug ang iyang tinguha nga makadawat sa dungog. Pero sa sukwahi, mamatikdan tingali nila ang paggamit sa Manluluwas sa pulong nga “imo” ug ang Iyang tinguha nga maanaa sa Amahan ang himaya. Mamatikdan tingali sa mga estudyante kon sa unsang paagi si Satanas “misukol batok” sa Amahan ug “nagtinguha sa paglaglag sa kabubut-on sa tawo.” Pero sa sukwahi, tingali hatagan nila og punto ang tinguha sa Manluluwas nga tumanon ang kabubut-on sa Amahan ug dawaton ang plano sa Amahan.)

• Unsay gitudlo niini nga mga bersikulo kanimo bahin sa relasyon tali ni Jesukristo ug sa Iyang Amahan?

Usa sa mga kamatuoran nga maila tingali sa mga estudyante panahon sa panaghisgot mao nga mapaubsanong gituman ni Jesukristo ang atong Amahan sa Langit.

Ang mosunod nga mga asoy bahin sa Manluluwas makatabang sa mga estudyante nga makakat-on gikan sa Iyang ehemplo. Tabangi ang mga estudyante nga makasabot nga ang pagkakat-on og dugang sa pagkamasulundon sa Manluluwas ngadto sa Amahan, bisan og lisod, makadugang sa atong tinguha nga sundon ang Iyang ehemplo.

Basaha ang mosunod nga mga asoy, nga mangita sa padayong tinguha ni Jesukristo sa pagtuman sa Langitnong Amahan, bisan og lisod kadto.

1. Lucas 2:49 (isip 12 anyos)

2. Juan 8:28–29 (isip hamtong)

3. Mateo 26:36–39 (diha sa Tanaman sa Getsemane)

4. 3 Nephi 11:10–11 (isip nabanhaw nga nilalang)

   Hisgoti uban sa mga estudyante kon unsay ilang nakat-onan bahin ni Jesukristo gikan niini nga mga ehemplo. Dayon dapita silang ipakigbahin ang ubang mga ehemplo gikan sa kinabuhi sa Manluluwas dihang mapaubsanon Niyang gituman ang kabubut-on sa Amahan.

   Dapita ang mga estudyante nga hinumdoman ang lisod nga butang sa ilang kinabuhi nga ilang nahunahunaan sa pagsugod sa klase. Aron matabangan silang ikonektar sa ilang mga kinabuhi ang ilang nakat-onan bahin ni Jesukristo, pagsukna og mga pangutana sama sa mosunod:

• Unsay giingon o gibuhat ni Jesukristo nga makadasig sa usa ka tawo nga piliong motuman sa Langitnong Amahan, bisan og lisod kini?

• Kinsa ang imong nailhan nga maayog ehemplo sa pagtuman sa kabubut-on sa Langitnong Amahan? Unsay imong nakat-onan gikan sa ilang ehemplo?

• Unsay nakadasig nimo nga tumanon ang kabubut-on sa Langitnong Amahan, bisan kon kini lisod?

Pagsunod sa ehemplo ni Kristo

Ang batan-ong babaye sa istorya sa sinugdanan sa leksiyon mao ang anak nga babaye ni Brother Brough. Kon ipakigbahin nimo ang istorya sa iyang anak, sultihi ang mga estudyante nga maisogon niyang giatubang ang tulo ka tuig nga ang iyang mga ginikanan nagserbisyo isip mga lider sa misyon sa Guatemala.

Ipakigbahin ang mosunod nga sumpay sa iyang istorya, nga dapiton ang mga estudyante nga mangita sa Kristohanong nga mga hiyas nga ilang makita sa iyang ehemplo. Kon laing istorya ang imong ipakigbahin sa sinugdanan sa klase, ikonsiderar ang pagpakigbahin og follow-up, sama sa kataposan sa istorya o lain pang kasinatian sa kinabuhi sa mao rang tawo. Dapita ang mga estudyante nga mangita og Kritohanon nga mga hiyas sa maong tawo.

Si Brother Brough mipadayon:

Atol sa pagtapos sa among misyon, akong gipangutana ang among anak kon moserbisyo ba siya og full-time nga misyon. Ang iyang tubag mao ang “Dili, Pa, nakaserbisyo na ko.”

Ok ra ko niana! Pero mga unom ka bulan human niana, ang Espiritu mipukaw kanako sa gabii uban niini nga hunahuna: “Akong gitawag ang imong anak nga moserbisyo og misyon.”

Ang akong reaksyon mao ang “Langitnong Amahan, daghan na kaayo siyag nahatag.” Dali kong gikorihian sa Espiritu ug nakasabot nga ang iyang misyonaryo nga pagserbisyo gikinahanglan sa Ginoo.

Wala madugay akong gidala og paniudto ang akong anak. Sa atbang sa lamesa, miingon ko, “Ganzie, kahibalo ka ba nganong nia kita dinhi?”

Miingon siya, “Oo, Pa. Nasayod ka nga kinahanglan kong moserbisyo og misyon. Dili ko gusto nga moadto, pero moadto ko.”

Tungod kay gihatag niya ang iyang kabubut-on ngadto sa Langitnong Amahan, siya miserbisyo Kaniya sa tibuok niyang kasingkasing, gahom, hunahuna, ug kusog. Iyang gitudloan ang iyang amahan kon unsaon pagbuhat og lisud nga butang. (“Ihangad ang Imong Ulo ug Paglipay,” Liahona, Nob. 2018, 14)

• Hunahunaa ang imong gibasa nga mga bersikulo bahin ni Jesukristo karon. Giunsa pagsunod niining batan-ong babaye ang Iyang ehemplo?

Makatabang sa imong mga estudyante ang pagsuknag mga pangutana nga adunay daghang posibleng tubag ug magamit sa imong mga estudyante ang mga kamatuoran sa ebanghelyo sa ilang personal nga mga kahimtang. Ikonsiderar ang paggamit sa mga pangutanang sama sa mosunod aron matabangan ang mga estudyante nga ipahayag ang unsay ilang nakat-onan ug kon unsaon nila ni paggamit sa ilang mga kinabuhi. (Alang sa dugang pagbansay niini, tan-awa sa “Pagkat-on sa doktrina ni Jesukristo sa imong kaugalingon” sa Pagpalambo sa mga Kahanas sa Magtutudlo.)

Sa imong journal sa pagtuon, isulat ang tubag sa mosunod nga duha ka pangutana, bantayi ang mga hunahuna o impresyon gikan sa Espiritu:

• Unsay imong nakat-onan karon bahin ni Jesukristo nga makatabang nimong sundon ang Langitnong Amahan, bisan kon lisod ang Iyang ipahimo nga mga butang?

• Unsa ang gusto nimong himoon tungod sa imong nakat-onan o gibati karon?

Pamatud-i ang ehemplo ni Jesukristo ug ang Iyang katakos nga tabangan kitang himoon ang gipangayo sa Dios.

Dugang nga mga Kapanguhaan

Sa unsang paagi ang tanyag ni Satanas lahi kay sa plano sa Langitnong Amahan?

Si Elder D. Todd Christofferson sa Korum sa Napulog Duha ka Apostoles mitudlo:

Kini dili lang usa ka sitwasyon diin gisuportahan ni Jesus ang plano sa Amahan ug si Lucifer mitanyag og gamay nga pag-usab. Ang tanyag ni Lucifer nakaguba unta sa plano pinaagi sa pagwagtang sa atong oportunidad sa kinaugalingong paglihok. Ang plano ni Lucifer gipasiugdahan og pagpamugos, sa paghimo sa tanang mga anak nga lalaki ug mga anak nga babaye sa Dios—kitang tanan—nga iyang mga tawo-tawo. …

Ug atong hinumdoman, wala miboluntaryo si Satanas aron mahimo nga atong manluluwas. Dili siya interesado nga mag-antos ug mamatay alang ni bisan kinsa. Dili siya mopaagas sa bisan unsa sa iyang dugo. Gusto niya ang himaya, dungog, ug gahum sa Dios nga walay bayaran nga bisan unsa nga bugti. (“Mensahe sa Pasko” [debosyonal sa Brigham Young University, Dis. 12, 2017], 3, 4, speeches.byu.edu)

Unsay kalainan tali sa mga motibo ug mga tinguha ni Satanas ug ni Jersus?

Gipakigbahin ni Elder Dale G. Renlund sa Kurom sa Napulog Duha ka Apostoles ang mosunod diha sa iyang pakigpulong nga “Magpili Kamo Niining Adlawa” ( Liahona, Nob. 2018, 104–105):

Nganong importante kaayo ang kabubut-on diha sa plano sa Dios?

Si Elder Robert D. Hales (1932–2017) sa Korum sa Napulog Duha ka Apostoles miingon:

Ang atong kabubut-on—ang atong abilidad ug pagbuhat alang sa atong kaugalingon—maoy usa ka mahinungdanon nga elemento niining plano. Kon wala ang kabubut-on kita dili makahimo og saktong mga pagpili ug mouswag. Apan tungod sa kabubut-on makahimo kita og sayop nga mga pagpili, makasala, ug mawad-an sa kahigayunan nga makauban og usab ang Langitnong Amahan. Tungod niini nga rason ang Manluluwas gihatag aron mag-antus alang sa atong mga sala ug motubos kanato kon kita maghinulsol. Pinaagi sa Iyang walay kinutuban nga Pag-ula, napahinabo Niya ang “plano sa kaluoy, sa pagtagbaw sa mga gipangayo sa kaangayan” [Alma 42:15]. …

Bisan tuod nga Siya “sa tanang paagi gitintal ingon kanato sa atong mga kaluyahon” [Mga Hebreohanon 4:15], sa matag pagpili ug sa matag aksyon Siya migamit sa kabubut-on nga mahimo natong Manluluwas—aron sa pagbugto sa mga kadena sa sala ug sa kamatayon alang kanato. Ug pinaagi sa Iyang hingpit nga kinabuhi, Siya mitudlo kanato nga sa higayon nga kita mopili sa pagbuhat sa kabubut-on sa atong Langitnong Amahan, ang atong kabubut-on mapreserbar, ang atong mga oportunidad managhan, ug kita mouswag. (“Kabubut-on: Mahinungdanon sa Plano sa Kinabuhi,” Liahona, Nob. 2010, 24, 25)

Dugang nga mga Kalihokan sa Pagkat-on

Ang Konseho sa Langit

Aron matabangan ang mga estudyante nga masabtan ang ilang papel sa Konseho ug Gubat sa Langit, ipakigbahin kini nga pamahayag gikan kang Presidente Dallin H. Oaks sa Unang Kapangulohan.

Sa Konseho sa Langit, … [t]anang tawo kinsa natawo dinhi sa yuta mipili sa plano sa Amahan ug nakig-away alang niini sa langitnong sangka nga misunod. (“Ang Dako nga Laraw,” Liahona, Mayo 2020, 93)

• Sa unsang paagi ang pagsabot sa atong pagpili sa wala pa dinihi yuta nga tumanon ang plano sa Langitnong Amahan makahatag nato og mas dakong kompiyansa sa pagpili nga tumanon Siya karon? Sa unsang paagi kini makaapektar sa atong pagtan-aw sa uban sa atong palibot?

Pwede usab nimong dapiton ang mga estudyante nga basahon ang Pinadayag 12:7–11, nga mangita kon unsaon nato pagbuntog si Satanas ug sa iyang mga sumusunod sa Gubat sa Langit. Dapita ang mga estudyante nga hisgotan kon unsaon nato sa pagpadayon sa pagbuntog kang Satanas “pinaagi sa dugo sa Nating Karnero” (Pinadayag 12:11).

Ang papel sa kabubut-on sa plano sa Dios

Sa sinugdanan niini nga leksiyon, tabangi ang mga estudyante nga hisgotan ang mga sitwasyon diin ang tataw nga mga pagpili maghimo og limitasyon sa umaabot nga mga kapilian, sama sa pagbalewala sa mga karatula nga “Walay Maligo” ug pagkaanod sa delikadong sulog.

Samtang tun-an sa mga estudyante ang Moises 4:1–4, dasiga sila nga mangita sa kalainan sa mga tinguha ni Jesukristo ug ni Satanas. Hatagi og punto ang hugpong sa mga pulong nga “nagtinguha sa paglaglag sa kabubut-on sa tawo” (bersikulo 3). Aron ihulagway ang papel sa kabubut-on diha sa plano sa Dios, gamita ang pamahayag gikan kang Elder Robert D. Hales sa seksiyon nga Dugang nga mga Kapanguhaan. Tabangi ang mga estudyante nga mailhan ang mga kamatuoran nga sama sa importante ang kabubut-on diha sa plano sa Langitnong Amahan.

Hangyoa ang mga estudyante nga mopakigbahin og mga paagi nga padayong nagtinguha si Satanas sa paglaglag sa atong kabubut-on pinaagi sa pagtental nato nga mohimog mga pagpili nga modala kanato sa pagkabihag. Hangyoa silang ipakigbahin ang mga paagi nga gidasig kita sa Manluluwas nga mohimog mga pagpili nga padulong sa kagawasan (tan-awa ang 2 Nephi 2:27). Pwedeng tun-an pa og dugang sa mga estudyante ang bahin sa kabubut-on pinaagi sa pagsusi sa mga kapanguhaan nga anaa sa “Kabubut-on ug Tulubagon” ilawom sa Mga Hilisgotan ug mga Pangutana sa Librarya sa Ebanghelyo.

Nadasig sa ehemplo sa Manluluwas

Makatabang tingali sa mga estudyante nga tun-an ang usa ka ehemplo diin ang kamatuoran diha sa leksiyon nakatabang sa usa ka tawo nga atubangon ang gipabuhat sa Dios nga lisod himoon. Pwede nimong ipasabot nga gisugo si Martin Harris nga bayran ang pag-printa sa Basahon ni Mormon pinaagi sa pagprenda sa dakong bahin sa iyang uma, apil ang iyang balay (tan-awa ang Doktrina ug mga Pakigsaad 19:32–35). Naglisod siya og himo niini. Basaha kon unsay gitudlo sa Manluluwas kaniya sa Doktrina ug mga Pakigsaad 19:16–19, 23–24, 26.

• Sa unsang paagi ang pagkat-on sa sakripisyo sa Manluluwas ug pagkamasulundon ngadto sa Amahan makatabang kanato sa pagtuman sa Dios, bisan og lisod kini?

Ipasabot nga gisunod ni Martin Harris ang ehemplo sa Manluluwas ug gibayran ang Basahon ni Mormon uban ang dakong sakripisyo.