Pasiuna sa Manwal sa Magtutudlo sa Seminary sa Daang Tugon

Ang Tumong sa Seminaries and Institutes of Religion mao ang “pagtabang sa kabatan-onan ug mga young adult nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo, mahimong sarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (“Ang Tumong sa Seminaries and Institutes of Religion” [2022], Librarya sa Ebanghelyo).

Aron matabangan nga makab-ot kini nga tumong, kini nga manwal naghatag sa mga estudyante og lain-laing mga kasinatian sa pagkat-on pinaagi sa duha ka lain-laing matang sa mga leksiyon: Mga leksiyon sa Daang Tugon ug mga leksiyon sa Pagpangandam sa Kinabuhi. Ang mga leksiyon sa Daang Tugon mohaom sa mga hut-ong sa kasulatan nga naghatag og gibug-aton sa kada semana sa Dali, Sunod Kanako—Alang sa Panimalay ug sa Simbahan. Ang mga leksiyon sa Pagpangandam sa Kinabuhi makatabang sa mga estudyante nga makat-on sa pagkuha og kalig-on gikan ni Jesukristo ug paggamit sa Iyang mga pagtulun-an sa pag-andam alang sa mga hagit sa kinabuhi.

Pinaagi sa paggamit sa mga sugyot sa pagtudlo nga makita sa mga leksiyon ug sa pagsunod sa direksyon sa Espiritu, makatabang ka sa mga estudyante nga makagamit sa gahom ni Jesukristo sa daghang aspeto sa ilang kinabuhi. Makatabang usab ka nila sa pag-andam para sa ilang kaugmaon uban ang hugot nga pagtuo diha ni Jesukristo.

Kini nga manwal sa magtutudlo anaa sa online nga Librarya sa Ebanghelyo sa ChurchofJesusChrist.org nga naay ma-download nga PDF. Pwedeng mohangyo og nakaprinta nga bersiyon sa manwal gikan sa imong lokal nga koordinitor o tigdumala sa programa.

Mga Himan nga Makatabang Nimo sa Pag-andam sa Pagtudlo

Para sa mga leksiyon sa Daang Tugon ug Pagpangandam Alang sa Kinabuhi, ang mosunod nga mga himan motabang nimo nga mangandam sa pagtudlo.

Ang mga Kasulatan

Ang pagtuon uban sa Dali, Sunod Kanako nga hut-ong sa kasulatan mao ang usa ka importanteng paagi sa pagpangandam sa pagtudlo sa mga estudyante. Ang mga leksiyon nga nalangkob niini nga manwal nagkinahanglan og magtutudlo nga kanunayng nagtuon sa mga kasulatan ug nagtinguha sa pagpakig-uban sa Espiritu Santo. Samtang himoon nimo ni, makasalig ka nga pinaagi sa Iyang Espirutu, dasigon ka sa Langitnong Amahan kon unsaon paggamit kini nga mga materyal aron mahatag ang panginahanglan sa mga estudyante.

Mga Kinatibuk-ang Pagpasabot

Ihatag ang kinatibuk-ang pagpasabot sa sinugdanan sa kada semana sa mga leksiyon sa Daang Tugon ug kada kategorya sa mga leksiyon sa Pagpangandam sa Kinabuhi. Kini nga mga kinatibuk-an pagpasabot maghatag og impormasyon sa pihong leksiyon aron tabangan kang maandam daan ang mga materyal sa pagtudlo, apil ang mosunod:

• Mga katuyoan sa leksiyon (naa usab kini sa kataposang kapahayag sa pasiuna sa kada leksiyon)

• Mga ideya sa pagpangandam sa estudyante

• Usa ka lista sa mga leksiyon nga maggamit og butang, mga handout, mga hulagway, mga bidyo, o uban pang materyal nga mahimong kinahanglanon nga andamon daan

Pangitaa ang sinemanang kinatibuk-ang pagpasabot alang sa sunod semana nga mga leksiyon nga imong itudlo.

• Unsa nga mga impormasyon ang imong nakita dinhi nga makatabang kanimo nga makahibalo daan?

• Sa unsang paagi kaha nimo magamit kini nga impormasyon samtang ikaw mangandam sa pagtudlo?

Mga Sugyot sa Pagtudlo

Ang matag kinatibuk-ang pagpasabot nga nag-una sa mga leksiyon sa Daang Tugon naglangkob og sugyot sa pagtudlo nga nagpasabot sa girekomendar nga mga buhat o mga baroganan gikan sa Pagtudlo sumala sa Pamaagi sa Manluluwas: Alang sa Tanan Kinsa Nagtudlo diha sa Panimalay ug diha sa Simbahan. Kini nga mga sugyot mailhan niini nga icon: . Kon mobati ka og kaandam, sulayi ang pagpatuman niining mga buhat ug mga baroganan samtang nagtudlo. Imong mamatikdan nga ang paglakip niining mga sugyot makatabang sa pagpalambo sa imong mga abilidad sa pagtudlo.

Kadaghanan sa sugyot sa pagtudlo nagtumong sa usa ka leksiyon nga nagpakita sa girekomendar nga buhat o baroganan. Ang icon sa pagbansay diha sa leksiyon nagpasiugda sa usa ka ehemplo kon unsaon paggamit ang sugyot. Kini nga mga sugyot sa pagbansay nagpasiugda sa Pagpalambo sa mga Kahanas sa Magtutudlo nga motabang nimo nga makakat-on og dugang bahin sa girekomendar nga buhat o baroganan nga gihatagan og gibug-aton. Ang paggamit niini nga mga buhat ug mga baroganan motabang nimo nga mapauswag ang imong kahanas sa pagtudlo.

Rebyoha ang sugyot sa pagtudlo diha sa kinatibuk-ang pagpasabot para sa umaabot nga semana sa mga leksiyon nga imong itudlo.

• Unsaon nimo paghimo niini nga sugyot sa pagtudlo?

Sugyot sa Gipaspason

Kadaghanan sa mga kinatibuk-ang pagpasabot para sa mga kategorya sa mga leksiyon sa Pagpangandam sa Kinabuhi naay mga sugyot sa gipaspason. Kini nga mga sugyot naghatag og mga ideya kon asa pwedeng iapil kini nga mga leksiyon diha sa giya sa gipaspason. Pwedeng gamiton sa mga koordinitor ug mga tigdumala sa programa kini nga mga sugyot samtang himoon nila ang ilang giya sa gipaspason.

Pananglitan, tan-awa ang sugyot sa gipaspason diha sa Kinatibuk-ang Pagpasabot para sa Pag-ugmad sa Pagbarog Pinaagi sa Kinaugalingong Paningkamot.

Pagpangandam sa Estudyante

Ang kada kinatibuk-ang pagpasabot adunay mga sugyot sa pagdapit sa mga estudyante nga andamon ang ilang mga hunahuna ug mga kasingkasing para sa kada leksiyon. Pwede nimong rebyohon kini nga mga ideya sa sinugdanan sa semana ug mainampoong pilion ang labing makatabang sa imong mga estudyante. Dili nimo kinahanglan gamiton ang matag sugyot sa pagpangandam sa estudyante. Mahimo nimo kining ipahiangay o pagmugna og imong kaugalingong mga ideya. Kining gisugyot nga mga pagdapit gidisenyo aron ihatag sa mga estudyante labing minos usa ka adlaw sa dili pa ang kasinatian sa pagkat-on.

Rebyoha ang mga ideya sa pagpangandam sa estudyante diha sa kinatibuk-ang pagpasabot alang sa umaabot nga semana sa mga leksiyon nga imong itudlo. Ikonsiderar kon unsang mga ideya ang imong gamiton, ipahiangay, o dili gamiton. Kon makadesisyon ka nga dapiton ang imong mga estudyante sa pagpangandam, unsaon nimo sa pagpakigbahin ang ideya sa pagpangandam ngadto kanila? Pananglitan, pwede nimo ning ipakigbahin pinaagi sa pagsulti o ipakita kini sa kataposan sa nag-unang klase. Kon angay, pwede nimo kining ipadala pinaagi sa Wise o sa messaging app.

Posibleng mga Kalihokan sa Pagkat-on

Ang matag leksiyon naglangkob og posibleng mga paagi nga imong magamit sa kasinatian sa pagkat-on. Aron makabaton ang imong mga estudyante sa labing maayong kasinatian, gamita ang sulod niini nga seksiyon ingon nga giya imbes usa ka script. Kon bag-o lang ka nga nagsugod isip magtutudlo sa seminary, mahimong labing maayo nga magsugod pinaagi sa pagsunod sa gisugyot nga mga kalihokan sa pagkat-on. Uban sa dugang nga kasinatian, mouswag ang imong abilidad sa pagpahiangay sa sulod niini nga manwal aron mas labing matubag nimo ang panginahanglan sa imong mga estudyante.

Daghang gisugyot nga mga kalihokan sa pagkat-on ang modapit sa mga estudyante nga gamiton ang ilang journal sa pagtuon. Usa ka PDF sa journal sa pagtuon anaa diha sa ChurchofJesusChrist.org/si/seminary/manuals. Kon anaa, pwede usab gamiton sa mga estudyante ang notebook nga feature diha sa Librarya sa Ebanghelyo nga app aron tubagon ang mga pag-aghat sa journal diha sa mga leksiyon.

Mga Instruksiyon sa Pagtudlo

Sa mga leksiyon, mabantayan nimo ang mga kahon nga naay mga instruksiyon sa pagtudlo para sa mga magtutudlo. Gidisenyo kini nga mga instruksiyon nga tabangan kang mangandam ug gamiton ang mga kalihokan sa pagkat-on nga gisugyot sa leksiyon. Ipasabot tingali niini ang katuyoan sa mga kalihokan sa leksiyon o maghatag og mga sugyot kon unsaon pagpahiuyon ang sulod sa leksiyon aron mas mapahiuyon ang mga panginahanglan sa mga estudyante. Kini nga mga sugyot mahimong maglakip og alternatibong mga paagi, mga pangutana, o mga kalihokan nga makatabang kanimo nga mopahiangay sa sulod ug mga kalihokan kon gikinahanglan.

Irebyo ang pipila sa mga instruksiyon sa pagtudlo sa usa ka leksiyon nga imong itudlo puhon.

• Sa imong nabantayan unsay matabang niini nga mga instruksiyon sa pagtudlo aron makapangandam ka sa pagtudlo?

Dugang nga mga Kapanguhaan

Kadaghanan sa mga leksiyon naglangkob og “Dugang nga mga Kapanguhaan” nga seksiyon sa kataposan sa leksiyon. Kini nga seksiyon naglakip og impormasyon nga mahimong makatabang sa pagpalawom sa pagkat-on. Makita nimo ang posibleng mga pangutana sa mga estudyante ug ang mga pamahayag sa mga lider sa Simbahan nga motubag sa maong mga pangutana. Kini nga mga pamahayag gikan sa mga lider sa Simbahan posibleng giapil diha sa leksiyon. Kini nga seksiyon anaa lamang diha sa Gospel Library app o sa online nga Librarya sa Ebanghelyo sa ChurchofJesusChrist.org. Ang “Dugang nga mga Kapanguhaan” nga seksiyon wala gilakip sa PDF nga bersiyon sa manwal sa magtutudlo.

Tan-awa kon ang leksiyon nga imong sunod nga itudlo naglakip ba og “Dugang nga mga Kapanguhaan.”

• Aduna bay mga kapanguhaan niini nga seksiyon nga makatabang tingali kon ipakigbahin ngadto sa mga estudyante?

Dugang nga mga Kalihokan sa Pagkat-on

Kini nga bahin, nalakip usab sa kataposan sa leksiyon, adunay dugang nga mga ideya sa pagkab-ot sa kasinatian sa pagkat-on. Kini nga mga kalihokan sa pagkat-on naglakip og mga paagi sa pagpahiuyon sa kasamtangan nga mga kalihokan diha sa leksiyon o mga paagi sa pagtudlo og materyal nga wala maapil sa leksiyon. Ang dugang nga mga kalihokan sa pagkat-on nalakip lamang sa manwal sa magtutudlo kon ikaw nag-akses niini pinaagi sa Librarya sa Ebanghelyo nga app o sa Librarya sa Ebanghelyo sa online diha sa ChurchofJesusChrist.org. Kini nga seksiyon wala malakip sa PDF nga bersiyon sa manwal sa magtutudlo.

Kon ang imong umaabot nga leksiyon naglakip og usa ka “Dugang nga mga Kalihokan sa Pagkat-on” nga bahin, irebyo kini nga mga kalihokan.

• Aduna bay bisan unsa nga sa imong hunahuna nga mahimong mapuslanon nga gamiton sa imong mga estudyante agig dugang o puli sa mga kalihokan sa pagkat-on nga gilakip sa nag-unang seksiyon sa leksiyon?

Mga Leksiyon sa Daang Tugon ug mga Leksiyon sa Pagpangandam sa Kinabuhi

Ang mga estudyante kinahanglang tudloan sa mga leksiyon sa Daang Tugon ug mga leksiyon sa Pagpangandam sa Kinabuhi sa tibuok tuig. Ang mosunod nga impormasyon motabang nimo nga masabtan ang katuyoan sa lainlaing leksiyon diha sa manwal sa magtutudlo.

Mga Leksiyon sa Daang Tugon

Ang mga leksiyon sa Daang Tugon mohaom sa mga hut-ong sa kasulatan nga gihatagan og gibug-aton ang kada semana sa Dali, Sunod Kanako. Kini nga mga leksiyon mohatag og higayon sa mga estudyante nga makabaton og lawom nga kasinatian sa pagtuon sa pulong sa Dios diha sa Daang Tugon. Adunay mga leksiyon sa Pagbansay sa Doktrinal nga Kahanas ug mga leksiyon sa Sukda ang Imong Nakat-onan diha sa leksiyon sa Daang Tugon nga seksiyon sa manwal.

Mga Leksiyon sa Pagbansay sa Doktrinal nga Kahanas

Ang mga leksiyon sa Pagbansay sa Doktrinal nga Kahanas gituyo aron matabangan ang mga estudyante nga maningkamot sa pagkab-ot sa mga resulta sa doktrinal nga kahanas. Apil niini nga mga resulta ang pagtabang sa mga estudyante nga himoon ang mosunod:

Makakat-on ug mogamit sa balaanong mga baroganan alang sa pag-angkon og espirituhanong kahibalo.

Makabansay sa mga tudling sa kasulatan sa doktrinal nga kahanas ug sa doktrina sa ebanghelyo ni Jesukristo nga ilang itudlo.

Ang pagbansay sa pinili nga mga tudling ug sa doktrina sa ebanghelyo ni Jesukristo nga gitudlo niini nga mga tudling nagpasabot nga mahimo sa mga estudyante ang mosunod:

Makahibalo ug makasabot sa doktrina nga gitudlo diha sa mga tudling sa kasulatan sa doktrinal nga kahanas.

Makapasabot sa doktrina sa klaro nga paagi gamit ang may kalabotan nga mga tudling sa kasulatan sa doktrinal nga kahanas.

Makagamit sa doktrina sa ebanghelyo ni Jesukristo ug sa mga baroganan sa pag-angkon og espirituhanon nga kahibalo sa ilang inadlaw-adlaw nga mga pagpili ug sa ilang mga tubag sa doktrinal, personal, sosyal, ug makasaysayanon nga mga isyu ug mga pangutana.

Makahinumdom ug makapangita sa mga tudling sa doktrinal nga kahanas ug makasag-ulo sa importanteng hugpong sa mga pulong sa kasulatan.

Ang Doktrinal nga Kahanas nga App makatabang sa mga estudyante nga matuman ang pipila ka resulta sa kahanas sa doktrina. Gidisenyo kini aron matabangan ang mga estudyante nga magpraktis sa pagsag-ulo sa mga pakisayran ug importante nga mga hugpong sa mga pulong sa kasulatan alang sa matag usa sa mga tudling sa doktrinal nga kahanas. Mahimo nimong gamiton ang app sa klase ug awhaga ang mga estudyante sa pag-download niini sa ilang kaugalingong mga device, kon mahimo. Anaa kini sa iOS ug Android nga mga device.

Alang sa dugang nga impormasyon mahitungod sa mga katuyoan sa doktrinal nga kahanas, tan-awa ang “What Is Doctrinal Mastery?” (3:56), nga anaa sa ChurchofJesusChrist.org.

Para sa dugang impormasyon kon unsaon pagtabang ang mga estudyante nga makab-ot ang mga resulta sa doktrinal nga kahanas, tan-awa ang “Pagbansay sa Doktrinal nga Kahanas” diha sa Pagbansay alang sa Kurikulum sa Seminary.

Mga Leksiyon sa Sukda ang Imong Nakat-onan

Ang pagsukod sa kahibalo usa ka importante nga bahin sa pagkat-on. Ang kahigayonan nga mohunong kadiyot ug mamalandong sa nakat-onan makahatag og positibong kasinatian para sa mga estudyante. Ang regular nga pagsusi moawhag sa mga estudyante diha sa ilang padayong pag-uswag ug paglambo aron mas mahisama sa Langitnong Amahan ug kang Jesukristo. Pinaagi sa pagsukod sa ilang nakat-onan, ang mga estudyante mahimong aktibong mga sumasalmot sa proseso sa pagkat-on ug mahimong mas responsable sa ilang pagkat-on.

Ang mga leksiyon nga Sukda ang Imong Nakat-onan mohatag og higayon sa mga estudyante nga ipasabot ang mahinungdanong mga doktrina gikan sa Daang Tugon, pamalandongon ang ilang mga pagbati, mga kinaiya, ug mga tinguha nga may kalabotan sa plano sa Langitnong Amahan ug sa ebanghelyo ni Jesukristo, ug rebyohon ang mga plano o mga tumong nga ilang gipaningkamotan aron gamiton ang ilang nakat-onan ug palawomon ang ilang pagkadisipulo ngadto kang Jesukristo. Kini nga mga leksiyon makatabang sa mga estudyante nga mailhan ang ilang pagtubo ug ang pag-ila sa umaabot nga mga bahin diin nagkinahanglan pa silang mouswag. Makadawat ang mga estudyante og kredito sa kurso pinaagi sa pag-apil sa bisag usa sa Sukda ang Imong Nakat-onan nga leksiyon sa kada katunga sa kurso.

Para sa dugang nga impormasyon mahitungod kon unsaon sa pag-implementar sa mga leksiyon sa Sukda ang Imong Nakat-onan, tan-awa ang “Pagbansay alang sa Pagsukod sa Kahibalo” sa Pagbansay alang sa Kurikulum sa Seminary.

Mga Leksiyon sa Pagpangandam sa Kinabuhi

Ang mga leksiyon sa Pagpangandam sa Kinabuhi naghatag sa mga estudyante og mga oportunidad sa paggamit sa mga pagtulun-an sa Manluluwas sa mosunod:

• Pagdumala sa lisod nga mga pangutana ug sa mahagiton nga mga kahimtang sa kinabuhi

• Paghimo og makadasig nga mga pagpili gamit ang mga pagtulun-an ni Jesukristo ug sa Iyang mga propeta.

• Pagbarog pinaagi sa kinaugalingong paningkamot para sa ilang kaugalingon ug sa ilang pamilya.

• Mahimong mas himsog sa pisikal ug sa emosyonal nga paagi.

• Paghimo og mga plano aron sa pagpangandam alang sa umaabot nga edukasyon ug pagpanarbaho.

• Pagpalambo og mga kahanas aron magmalamposon sa pag-eskwela.

• Pagpangandam alang sa pagserbisyo sa misyonaryo ug sa simbahan.

• Pagpangandam sa paghimo ug sa pagtuman sa mga pakigsaad sa templo.

Paningkamoti ang pagtudlo og duha ka leksiyon sa Pagpangandam sa Kinabuhi kada semana. Pipila ka semana tingali kang magtudlo og labaw pa niini ug sa ubang semana mahimo ka nga motudlo og mas diyutay, apan sa kasagaran kinahanglan nimong paningkamotan nga itudlo ang duha ka leksiyon kada semana kutob sa mahimo. Maghatag kini og oportunidad sa mga estudyante nga matudloan sa tanang leksiyon panahon sa tuig ting-eskwela.

Seguroa nga makakuha kag kopya sa usa ka giya sa gipaspason nga gihatag kanimo sa imong koordinitor o tigdumala sa programa.

Para sa dugang nga impormasyon bahin sa mga leksiyon sa Pagpangandam sa Kinabuhi tan-awa ang “Pagbansay alang sa mga Leksiyon sa Pagpangandam sa Kinabuhi” sa Pagbansay alang sa Kurikulum sa Seminary.