Genesis 3–4; Moises 4–5: Leksiyon 12

Moises 4:5–32; 5:1–15, Bahin 2

“Kay Ikaw Napukan Ikaw Mahimo nga Pagatubson”

Ang Pagkapukan ni Adan ug Eva nakahatag og mga hagit nga dili unta nila masinati sa Tanaman sa Eden. Nabulag sila gikan sa presensiya sa Dios ug karon makasinati na og sala, pisikal nga kamatayon, ug uban pang mortal nga mga kalisdanan. Apan, ang atong mahigugmaong Langitnong Amahan mihatag og Manluluwas aron mabuntog ang tanang epekto sa Pagkapukan. Kini nga leksiyon makatabang sa mga estudyante nga mabati ang hingpit nga kalipay sa katubsanan gikan sa Pagkapukan pinaagi sa Pag-ula ni Jesukristo.

Pagpangandam sa estudyante: Dapita ang mga estudyante nga mangita sa mga epekto sa Pagkapukan ni Adan ug Eva sa ilang palibot. Kini maglakip sa pagkatawo, kamatayon, pisikal nga mga lawas, sala, gutom, sakit, ug uban pa. Hangyoa ang mga estudyante sa pagpamalandong sa unsang paagi makatabang si Jesukristo sa matag epekto nga ilang nailhan.

Mga Posibleng Kalihokan sa Pagkat-on

Atong panginahanglan sa usa ka Manunubos

Sugdi ang klase pinaagi sa pagtabang sa mga estudyante nga masabtan ang atong panginahanglan para sa Pag-ula ni Jesukristo. Ang usa ka paagi nga mahimo nimo kini mao ang paggamit sa mosunod nga ideya, nga gikan sa pakigpulong nga “Ang Pag-ula ni Jesukristo” (Tad R. Callister, Liahona, Mayo 2019, 85). Pagpakita og litrato sa usa ka tawo nga nahulog sa eroplano, ug dapita ang mga estudyante nga hisgotan ang mosunod:

Handurawa nga nahulog ka sa eroplano, mga linibo ka pye gikan sa yuta, nga walay parachute o uban pang ekipo.

• Unsa tingali imong himoon aron hinay ang imong pagkahulog?

• Unsay imong paglaom nga maluwas pa ka?

Sa kasukwahi, handurawa nga una ka mahagbong sa eroplano, napasul-ob ka og parachute sa imong higala.

• Unsay imong lahi nga pagbati niini nga imong pagkahagbong?

• Unsay imong bation bahin sa imong higala?

  Aron tabangan ang mga estudyante nga makonektar ang miaging panaghisgot bahin sa atong panginahanglan para sa Pag-ula ni Jesukristo, pwede nilang hisgotan ang mosunod nga mga pangutana uban ang ilang kapares. Kon naghimo og mga pamphlet ang mga estudyante bahin sa mga epekto sa Pagkapukan sa nangaging leksiyon, pwede nimo silang dapiton una aron rebyohon kadali ang maong mga pamphlet. Kon wala maghimog pamphlet ang mga estudyante, pwede nimong usbon ang mga kalihokan nga magtumong niini.

• Unsaon nato kini pagtandi nga analohiya sa Pagkapukan ni Adan ug Eva ug ang papel sa Pag-ula ni Jesukristo diha sa plano sa Langitnong Amahan?

• Unsa ang pipila sa mga epekto sa Pagkapukan diin nanginahanglan kita og tabang ni Jesukristo aron mabuntog?

  Kon kinahanglan, pahinumdomi ang mga estudyante nga tungod sa Pagkapukan, makasinati kita og espirituwal nga kamatayon. Nagpasabot kini nga natawo kita sa kalibotan nga bulag sa presensiya sa Dios ug nga makasala kita, nga mao usab ang espirituwal nga makapabulag nato gikan Kaniya. Tungod sa Pagkapukan, makaatubang usab kita sa mga kalisdanan, sakit, kahuyangan, ug sa kataposan pisikal nga kamatayon.

  Dapita ang mga estudyante sa pagpamalandong sa mosunod:

• Hain sa mosunod nga mga pamahayag ang tinuod kanimo?

  1. Wala ko mahibalo kon nganong nanginahanglan kog Manluluwas.

  2. Nakasabot ko kon nganong nanginahanglan ko og Manluluwas, pero dili nako kini mapasabot sa uban.

  3. Makapasabot ako sa uban sa atong panginahanglan para sa Manluluwas.

  4. Mibati kog gugma ug pasalamat para ni Jesukristo ug kon unsay Iyang gibuhat para nako.

Dasiga ang mga estudyante nga dapiton ang impluwensiya sa Espiritu Santo pinaagi sa aktibong pag-apil sa tibuok leksiyon.

Ang Pag-ula ni Jesukristo

Isip bahin sa Pagkapukan, kinahanglang mobiya si Adan ug Eva sa Tanaman sa Eden. Padayon silang gipanalanginan sa Ginoo pinaagi sa paghatag nila og sinina (tan-awa ang Moises 4:27) ug paghatag nila og mga sugo nga makatabang nilang mabuntog ang Pagkapukan.

Ikonsiderar ang pagpakita sa imahe nga anaa sa sinugdanan niini nga leksiyon ug sa pagbasa sa mosunod nga mga bersikulo isip usa ka klase. Hunong usahay aron dapiton ang mga estudyante nga ipakigbahin ang ilang nakat-onan. Pananglitan, human mabasa ang mga bersikulo 5–7, hisgotan tingali nila kon sa unsang paagi ang pagtanyag sa panganay sa ilang mga karnero nagsimbolo sa sakripisyo ni Jesukristo. O pwede nimong pangutan-on ang mga estudyante kon unsay ilang nakat-onan gikan sa ehemplo ni Adan sa pagkamasulundon ug kon unsaon nila kini paggamit sa ilang mga kinabuhi.

Basaha ang Moises 5:5–9, nga mangita kon unsay gisugo sa Dios.

• Unsay nakat-onan ni Adan ug Eva gikan sa anghel ug sa Espiritu Santo?

  Pwedeng ilhon sa mga estudyante nga pinaagi sa Pag-ula ni Jesukristo, pwede kitang matubos gikan sa Pagkapukan. Ikonsiderar ang pagdapit sa mga estudyante nga markahan ang mga pulong o hugpong sa mga pulong sa mga bersikulo 7 ug 9 nga nagtudlo niini nga kamatuoran. Pwede nimong ipasabot nga ang pagkanatubos nagpasabot nga maluwas o mabuhian.

  Aron tabangan ang mga estudyante nga mapalawom ang ilang pagsabot niini nga kamatuoran, ipakita ang mosunod nga mga instruksiyon ug hatagi ang mga estudyante sa handout sa ubos. Pwede nimong grupohon og tinagtulo ang mga estudyante ug dapita ang kada estudyante sa grupo nga tun-an ang managlahi nga seksiyon sa handout. Dayon pwedeng ipakigbahin sa mga estudyante unsa ang ilang nakat-onan ngadto sa ilang grupo ug dungan nga himoon ang sunod nga pahina sa ilang mga pamphlet. (Timan-i: Ang Leksiyon 21: “Pagsukod sa Imong Nakat-onan 1” misugyot nga tan-awon sa mga estudyante ang mga pamphlet nga ilang gihimo niini nga kalihokan aron matabangan sila sa pagpasabot sa papel ni Jesukristo isip atong Manunubos.)

1. Sulod sa imong pamphlet, butangin og marka ang tuo nga (blanko) nga pahina og “Ang Pag-ula ni Jesukristo.”

2. Tun-i ang materyal sa handout aron makat-onan kon sa unsang paagi ang Pag-ula ni Jesukristo motubos kanato gikan sa mga epekto sa Pagkapukan. Gilista tingali nimo ang mga epekto sa Pagkapukan sa nag-unang pahina sa imong pamphlet.

3. Sa bag-ong pahina sa imong pamphlet, pagsulat og usa o duha ka kapahayag nga nag-summarize sa imong nakat-onan gikan sa matag seksiyon sa handout. Tinguhaa ang tabang gikan sa Espiritu Santo aron imong mailhan kon sa unsang paagi kini nga mga pagtulun-an nalambigit kanimo.

Ikonsiderar ang pagdapit sa pipila ka estudyante nga ipakigbahin ang unsay ilang gisulat diha sa ilang mga pamphlet. Pwedeng idugang sa ubang mga estudyante diha sa ilang mga pamphlet ang ilang mga nakat-onan gikan sa ilang mga klasmeyt.

Ang hingpit nga kalipay sa katubsanan

Dapita ang mga estudyante nga sulatan ang likod nga hapin sa ilang mga pamphlet og “Ang Hingpit nga Kalipay sa Akong Katubsanan.” Dasiga silang kopyahon ang mosunod nga pamahayag sa maong pahina, nga magbilin og masulatan ilawom niini.

Si Presidente Russell M. Nelson mitudlo:

Kon atong mabati ang Pag-ula ni Jesukristo nga miepekto sa atong kinabuhi, mapuno kita sa kalipay. (“Hingpit nga Kalipay ug Espirituhanon nga Pagsugakod,” Liahona, Nob. 2016, 84)

Basaha ang Moises 5:10–11, nga mangita kon unsay naobserbahan bahin sa mga resulta sa Pagkapukan ug sa Pag-ula sa Manluluwas.

• Unsa ang nagpatigbabaw kanimo gikan sa ilang mga pulong?

Hatagig panahon ang mga estudyante nga kompletohon ang kataposang pahina sa ilang mga pamphlet, nga pwede nilang himoon pinaagi sa pagsulat og gipersonal nga bersiyon sa Moises 5:10–11. Sama kang Adan ug Eva, pwede silang magsulat og mga rason kon nganong mibati sila og hingpit nga kalipay tungod sa ilang Manunubos.

Ikonsiderar ang pagtapos pinaagi sa pag-imbitar sa pipila ka estudyante nga ipakigbahin ang ilang gisulat.

Dugang nga mga Kapanguhaan

Unsaon nato pagbuntog sa espirituwal nga kamatayon?

Si Elder D. Todd Christofferson sa Korum sa Napulog Duha ka Apostoles mitudlo:

Ang tanan makabuntog sa espirituhanong kamatayon pinaagi sa pagdala og balik ngadto sa presensya sa Dios aron hukman. Miingon si Jesus, “Nga ingon nga Ako gituboy [diha sa krus] sa mga tawo mao usab ang mga tawo ituboy pinaagi sa amahan, sa pagbarug sa akong atubangan, aron pagahukman sa ilang mga buhat” (3 Nephi 27:14). Kadtong nalimpyohan sa sala magpabilin uban sa Dios sa langitnong gingharian, apan kadtong wala maghinulsol ug dili limpyo dili makapuyo uban sa balaan nga Dios, ug human sa Paghukom kinahanglang mobiya sila ug sa ingon mag-antos pag-usab sa espirituhanong kamatayon. Usahay kini gipasabut nga ikaduhang kamatayon o pag-antuos sa espirituhanong kamatayon sa ikaduhang higayon. (Tan-awa sa Helaman 14:15–18.) (“Katubsanan,” Liahona, Mayo 2013, 112, endnote 3)

Moises 4:27. Unsay relasyon tali sa “kupo nga mga panit” ug sa Pag-ula ni Jesukristo?

Gihulagway sa mga kasulatan ang mga tawo nga nagtindog sa presensiya sa Dios uban sa wala masulbad nga mga sala atubangan Niya sa ilang “pagkahubo” (2 Nephi 9:14; Mormon 9:5).

Gipakigbahin ni Presidente Russell M. Nelson sa unsang paagi ang Pag-ula ni Jesukristo “nagtabon” nato:

Sa Hebreohanon, ang nag-unang pulong alang sa pag-ula mao ang kaphar,, usa ka berbo nga nagpasabot og “pagtabon” o “pagpasaylo.” Duol og kahulogan sa Aramaic ug Arabic nga pulong kafat, nagpasabot nga “hugot nga paggakos.” …

Nakahilak ko sa kalipay sa dihang namalandong ko sa kaimportante niining tanan. Ang pagkatubos mao ang pag-ula—nadawat sa hugot nga paggakos sa Dios uban sa usa ka pagpahayag dili lamang sa Iyang pagpasaylo, apan sa atong panaghiusa sa kasingkasing ug hunahuna. (“Ang Pag-ula,” Ensign, Nob. 1996, 34)

Dugang nga mga Kalihokan sa Pagkat-on

Pagkasama ni Jesukristo

Aron tabangan ang mga estudyante nga masabtan ang Moises 5:5–7, dapita sila sa pag-ila sa kalainan tali sa sakripisyo ni Adan ug Eva sa mga panganay sa ilang mga karnero ug sa sakripisyo ni Jesukristo. Pwede nilang tan-awon ang “Kordero sa Dios” sa Giya ngadto sa mga Kasulatan o “Jesus Christ, Lamb of God” diha sa Topical Guide. O pwede nimo silang dapiton nga pangitaon ang mosunod nga mga tudling:

Isaias 53:7

Juan 1:36

Mga Taga-Colosas 1:13–18

1 Pedro 1:18–20

Si Cain ug si Abel

Kon para nimo makabenepisyo ang mga estudyante gikan sa pagtuon sa asoy ni Cain ug Abel, ikonsiderar ang pagpakita sa mosunod nga imahe. Ipatin-aw nga si Cain ug Abel maoy mga anak ni Adan ug Eva (tan-awa ang Moises 5:16–17). Nasuko pag-ayo si Cain sa iyang igsoon nga si Abel ug gipatay siya.

Dapita ang mga estudyante nga pangitaon ang Moises 5:18–33 uban sa ilang mga partner. Ang usa ka estudyante mangita sa mga pagpili ni Cain nga migiya sa iyang pagpatay sa iyang igsoon. Ang laing estudyante pwedeng mangita sa ebidensya nga si Cain gimahal sa iyang mga ginikanan ug sa Ginoo.

• Unsay imong nakat-onan gikan sa kaluoy sa Ginoo?

• Unsay imong nakat-onan bahin sa mga sangputanan sa pagsalikway sa imbitasyon sa Ginoo nga maghinulsol?

(Timan-i: Pwede nimong ipasabot nga tungod sa pagkadaotan ni Cain, nakadawat siyag tunglo diin siya “gipahilayo gikan sa atubangan sa Ginoo” [Moises 5:41]. Usa usab ka marka ang gibutang diha ni Cain [tan-awa sa Moises 5:39–40]. Dili kita angayng mangagpas bahin sa mga detalye sa iyang marka o mangagpas nga magamit sa uban ang tunglo gawas kang Cain.)