Welcome sa Daang Tugon: Leksiyon 2

Ang Plano sa Kaluwasan

Ang Manluluwas Mao ang Sentro sa Plano sa Amahan

Sa wala pa kita matawo dinhi sa yuta, kita “[nag]singgit sa kalipay” (Job 38:7) dihang atong nahibaloan ang plano sa Langitnong Amahan para sa atong mahangtoron nga pag-uswag. Gipili si Jehova isip atong Manluluwas ug Manunubos, nga naghatag nato og paagi aron makabalik sa Amahan ug mahisama Kaniya. Kini nga leksiyon makatabang sa mga estudyante nga masabtan ang plano sa kaluwasan sa Langitnong Amahan ug ang mahinungdanong tahas ni Jesukristo.

Pagpangandam sa estudyante: Dapita ang mga estudyante sa pagpamalandong sa unsay ilang nahibaloan bahin sa plano sa kaluwasan sa Langitnong Amahan ug sa mahinungdanong tahas sa Manluluwas sa atong mahangtoron nga pag-uswag. Pwedeng isulat sa mga estudyante ang mga elemento sa plano sa kaluwasan nga pamilyar nila ug praktisan ang pagpatin-aw niini ngadto sa usa ka sakop sa pamilya o sa higala.

Mga Posibleng Kalihokan sa Pagkat-on

Pagtubag sa mga pangutana sa kinabuhi

Sa pagsugod sa klase, ikonsiderar ang pagpakita ug pagpakigbahin sa mosunod.

Giduol ka sa imong higala nga si Jonathan ug nangutana:

• Asa man kita gikan?

• Unsay katuyoan sa kinabuhi?

• Unsay mahitabo human ta mamatay?

Dapita ang mga estudyante sa pagpamalandong unsay ilang nahibaloan bahin sa plano sa kalipay sa Langitnong Amahan. Ang mosunod nga kalihokan diha sa journal sa pagtuon mao ang usa ka paagi nga mahimo nimo kini. Seguradohang nasabtan sa mga estudyante nga naa silay kahigayonan nga magpraktis og tubag sa mga pangutana ni Jonathan sa ulahing bahin sa leksiyon.

Sa imong journal sa pagtuon, tubaga ang mosunod nga mga pangutana aron mapamalandongan nimo ang imong nang nasabtan bahin sa plano sa kaluwasan sa Langitnong Amahan.

• Unsa ka ka-segurado nga matubag nimo ang mga pangutana ni Jonathan?

• Unsang mga pangutana ang aduna ka bahin sa plano sa Langitnong Amahan?

Samtang magtuon ka karon, pangayo og giya sa Espiritu Santo aron molambo ang inyong pagsabot sa plano sa Langitnong Amahan ug ang Mahinungdanong tahas sa Manluluwas.

Si Jesukristo mao ang sentro sa plano sa kalipay sa Amahan

Ang pagtabang sa mga estudyante nga mailhan ang lainlaing mga titulo, mga tahas, ug mga hiyas ni Jesukristo makapalambo sa ilang koneksyon Kaniya. Aron matabangan ang mga estudyante nga masabtan ang mahinungdanong tahas ni Jesukristo sa matag elemento sa plano sa kaluwasan sa Amahan, pwede nimong ipakita ang mosunod nga imahe. Ikonsiderar ang pagdapit sa mga estudyante nga ipakigbahin ang ilang hunahuna kabahin niini nga paghulagway nga nagtudlo bahin sa Manluluwas.

(Para sa dugang pagbansay sa magtutudlo sa pag-ila sa mga titulo, mga tahas, ug mga hiyas ni Jesukristo, tan-awa ang: “Ipasiugda ang ehemplo ni Jesukristo” sa Pagpalambo sa mga Kahanas sa Magtutudlo.)

Human ang igong panahon para hisgotan sa mga estudyante kon unsay gitudlo sa imahe, pwede nimong ipakita ang pamahayag gikan ni Presidente Dallin H. Oaks.

Gipasabot ni Presidente Dallin H. Oaks sa Unang Kapangulohan ang tahas sa Manluluwas diha sa plano sa Langitnong Amahan:

Unsa ang nabuhat ni Jesukristo alang sa matag usa kanato? Nabuhat Niya ang tanan nga mahinungdanon alang sa atong panaw sa mortalidad ngadto sa padulngan nga gilatid diha sa plano sa atong Langitnong Amahan. … Ang Iyang Bugtong Anak, si Jesukristo, mao ang sentro. (“Unsa ang Nabuhat sa Atong Manluluwas alang Kanato?,” Liahona, Mayo 2021, 75)

• Unsaon nimo pagpamubo ang pagtulun-an ni Presidente Oaks isip pamahayag sa kamatuoran?

Tabangi ang mga estudyante nga mailhan ang mga kamatuoran nga sama sa si Jesukristo ang sentro sa plano sa kaluwasan sa Langitnong Amahan ug sa atong mahangtorong pag-uswag. Makatabang tingali ang pagsulat niini nga kamatuoran diha sa pisara.

Ang plano sa Langitnong Amahan ug ang mahinungdanong tahas sa Manluluwas

Ang mosunod nga kalihokan gituyo aron mas mapalawman ang pagsabot sa mga estudyante sa plano sa kaluwasan sa Langitnong Amahan ug ang tahas sa Manluluwas niini. Ang mga estudyante nga pamilyar kaayo sa plano sa kaluwasan pwedeng dapiton nga gamiton ang ilang mga himan [tool] sa pagtuon sa kasulatan aron pangitaon ang mga tudling sa kasulatan ug pamahayag sa mga lider sa Simbahan aron tubagon ang tulo ka pangutana ni Jonathan nga anaa sa pisara.

Kon nagkinahanglan og dugang giya ang mga estudyante, ikonsiderar ang paghatag nila og kopya sa handout nga nag-ulohang “Plano sa Kaluwasan sa Langitnong Amahan.” Pwede silang dapiton nga indibiduwal nga tun-an ang handout o uban ang gagmayng grupo. Ang usa ka paagi sa paghimo niini mao ang pagbahin sa handout sa tulo sa seksiyon ug ibulag-bulag ang matag seksiyon sa tibuok lawak. Pwedeng usa-usahon og tan-aw sa mga estudyante ang kada seksiyon sa tibuok lawak isip indibiduwal o uban sa ilang grupo samtang tun-an nila ang plano sa kaluwasan.

Ipakita ang mosunod nga mga instruksiyon aron tabangan nga magiyahan ang mga estudyante samtang nagtuon.

Samtang tun-an nimo ang plano sa kaluwasan sa Langitnong Amahan, pangitaa ang mosunod:

1. Kon sa unsang paagi adunay mahinungdanong tahas si Jesukristo sa plano sa kaluwasan sa Langitnong Amahan.

2. Mga kamatuoran nga pwede nimong ipakigbahin kang Jonathan aron matubag ang iyang mga pangutana.

Irekord ang imong mga panabot diha sa imong journal sa pagtuon.

Human makatuon ang mga estudyante, hatagi silag higayon nga ipakighain ang ilang mga panabot ug pagsabot. Ang mga estudyante mahimong makapraktis sa pagpakigbahin sa unsay ilang nakat-onan pinaagi sa pagdrama-drama s unsaon nila pagtubag ang tulo ka pangutana ni Jonathan. Pwede pod nimo silang dapiton nga hisgotan ang mosunod nga mga pangutana uban ang ilang pares o sa klase.

• Unsay imong nakat-onan bahin sa mahinungdanong tahas ni Jesukristo sa plano sa kaluwasan sa Langitnong Amahan?

• Unsang mga kamatuoran o pagtulun-an ang pwede nimong ipakigbahin kang Jonathan aron matubag ang iyang mga pangutana?

Paghunahuna kabahin sa unsay imong nakat-onan

Ikonsiderar ang pagtapos sa leksiyon pinaagi sa pagdapit sa mga estudyante nga mamalandong sa hilom kon unsay ilang gibati bahin sa Langitnong Amahan, ni Jesukristo, ug sa plano sa kaluwasan. Dapita sila sa pagkosiderar sa bisan unsang aksiyon nga nadasig silang himoon. Pwede nilang irekord ang ilang panabot ug espirituwal nga mga impresyon diha sa ilang mga journal sa pagtuon.

Dugang nga mga Kapanguhaan

Giunsa nako pagpakita ang akong hugot nga pagtuo ni Jesukristo sa wala pa ko matawo?

Si Presidente Dallin H. Oaks sa Unang Kapangulohan mitudlo:

Sa Konseho sa Langit, tanang espiritu nga mga anak sa Dios gipaila sa plano sa Amahan, lakip na sa mortal nga mga sangputanan ug pagsulay, langitnong tabang, ug sa mahimayaong padulngan niini. Kita nakakita sa kataposan gikan sa sinugdanan. Ang dili maihap nga mga tawo kinsa natawo dinhi sa yuta mipili sa plano sa Amahan ug nakig-away alang niini sa langitnong sangka nga misunod. Daghan usab ang mihimo og mga pakigsaad sa Amahan kalabut sa unsay ilang buhaton sa mortalidad. (“Ang Dako nga Laraw,” Liahona, Mayo 2020, 93)

Unsay kahimtang sa kalibutan sa espiritu?

Si Presidente Dallin H. Oaks mipasabot:

Dayag lang, kita nasayod gikan sa mga kasulatan nga human mamatay ang atong mga lawas magpadayon kitang magpuyo isip mga espiritu didto sa kalibotan sa espiritu. Ang kasulatan nagtudlo usab nga kining kalibotan sa espiritu gibahin tali sa mga “matarong” o “makiangayon” samtang buhi pa ug niadtong mga nagpakadaotan. Naghulagway usab kini giunsa sa ubang matinud-anong mga espiritu pagtudlo sa ebanghelyo ngadto sa mga daotan o masinupakon (tan-awa sa 1 Pedro 3:19; Doktrina ug mga Pakigsaad 138:19–20, 29, 32, 37). Labing importante, ang bag-ong pagpadayag nagpahibalo nga ang buhat sa kaluwasan magpadayon didto sa kalibotan sa espiritu (tan-awa sa Doktrina ug mga Pakigsaad 138:30–34, 58), ug bisan kon giawhag kita sa dili paglangan sa atong paghinulsol dinhi sa mortalidad (tan-awa sa Alma 13:27), gitudloan kita nga ang ubang paghinulsol posible didto (tan-awa sa Doktrina ug mga Pakigsaad 138:58). (“Salig sa Ginoo,” Liahona, Nob. 2019, 26)

Posible kahang makadawat ko og mga panalangin sa kahimayaan?

Si Elder J. Devn Cornish sa Seventy mipamatuod:

Mosaksi ko kaninyo nga kon kamo tinud-anay nga maningkamot ug dili mangatarongan o mosukol—kanunay nga maghinulsol ug mangamuyo alang sa grasya, o sa tabang ni Kristo—positibo nga mahimo kamong “igo nga kamaayo,” buot ipasabut, madawat sa atubangan sa Ginoo; makasulod kamo sa celestial nga gingharian, nga mahimong hingpit diha kang Kristo; ug inyong madawat ang mga panalangin ug himaya ug hingpit nga kalipay nga gitinguha sa Dios alang sa matag usa sa Iyang bililhong mga anak—lakip na gayud kaninyo ug kanako. (“Igo Ba Ang Akong Kamaayo? Makasulod Ba Ko Didto?,” Liahona, Nob. 2016, 32)

Asa pa ko dugang makakat-on kabahin sa plano sa kaluwasan?

Aron makakat-on og dugang bahin sa plano sa kaluwasan, ikonsiderar ang pagtuon sa “Kapitulo 3: Leksiyon 2—Ang Plano sa Langitnong Amahan sa Kaluwasan” gikan sa Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023).

Dugang nga mga Kalihokan sa Pagkat-on

Laing paagi sa pagsugod sa leksiyon

Aron tabangan ang mga estudyante nga makita kon sa unsang paagi ang plano sa kaluwasan sa Langitnong Amahan mohatag og direksiyon sa atong kinabuhi, pwede kang magpakita og imahe sa usa ka dalan o kalsada nga naay blangko nga karatula nga nagtudlo sa lainlaing direksiyon.

Dapita ang mga estudyante nga maghanduraw nga nagbiyahe sila ug nakaabot sa blangko nga karatula nga nagtudlo sa lainlaing direksiyon. Pwedeng hisgotan sa mga estudyante unsay nakahimong lisod sa sitwasyon ug kon unsang impormasyon ang makapahimong sayon sa biyahe. Pwede kang mangutana sama sa:

• Sa unsang paagi kini nga sitwasyon nahimog susama niadtong wala mahibalo sa plano sa Langitnong Amahan sa kalipay? Unsang mga pangutana ang pwedeng ipangutana sa maong tawo?

Si Elder David A. Bednar sa Napulog Duha ka Apostoles mipasabot:

Ang plano sa Amahan sa kalipay gidesinyo sa paggiya sa Iyang mga anak, sa pagtabang nila nga makasinati og malungtaron nga kalipay, ug sa pagpabalik nila nga luwas ngadto Kaniya uban sa nabanhaw, nahimayang mga lawas. (“Magmabinantayon ngadto sa Pag-ampo Kanunay,” Liahona, Nob. 2019, 33–34)

Pwedeng praktisan sa mga estudyante ang pagpasabot kon sa unsang paagi ang plano sa Langitnong Amahan sa kaluwasan makahatag og direksiyon ug katuyoan sa atong kinabuhi.

Ang papel ni Jesukristo sa plano sa Langitnong Amahan

Aron tabangan ang mga estudyante nga masabtan ang papel ni Jesukristo sa matag bahin sa plano sa kaluwasan sa Amahan, pwede nimo silang dapiton nga kopyahon sa mosunod nga tsart diha sa ilang journal sa pagtuon. Pwedeng tun-an sa mga estudyante ang mga kasulatan sa matag seksiyon, nga mangita sa mga kamatuoran bahin sa papel sa atong Manluluwas sa matag bahin sa plano. Pwede nimong dapiton ang mga estudyante sa pagsulat og pamahayag sa kamatuoran ubos sa matag ulohan sa tsart.

Ang plano sa Langitnong Amahan ug ang tahas ni Jesukristo
Ang plano sa Langitnong Amahan ug ang tahas ni Jesukristo Tahas ni Kristo sa Kinabuhi nga Wala pa Dinhi sa Yuta	Juan 1:3; Moises 4:1–2; Abraham 3:24-27
Ang plano sa Langitnong Amahan ug ang tahas ni Jesukristo Tahas ni Kristo sa Mortalidad	Isaias 53:3–5; Juan 13:15; Alma 7:11–13
Ang plano sa Langitnong Amahan ug ang tahas ni Jesukristo Papel ni Kristo sa Kalibotan sa Espiritu ug Mahangturong Kahimayaan	1 Mga Taga-Corinto 15:22; Mormon 3:20; Doktrina ug mga Pakigsaad 138:57–58

Pwedeng ilhon sa mga estudyante ang mga kamatuoran nga sama sa si Jesukristo ang Tiglalang. Si Jesukristo nagpakita sa hingpit nga ehemplo para nato. Si Jesukristo mitubos sa atong mga sala. Gibuntog ni Jesukristo ang kamatayon para sa tanang tawo pinaagi sa pagkabanhaw.

Dapita ang mga estudyante nga mopili og usa sa mga kamatuoran nga ilang nadiskobrehan ug ipakigbahin sa ilang pares o sa klase kon sa unsang paagi ang maong kamatuoran makatabang sa usa ka young adult sa mga hagit sa kinabuhi.

Mga kapiliang bidyo para sa plano sa kaluwasan

Alang sa Kanatibuk-ang Pagpasabot, pwede nimong dapiton ang mga estudyante nga ihulagway o isulat ang mga elemento nga ilang nahinumdoman bahin sa plano sa Langitnong Amahan sa kaluwasan. Mahimo dayon nga tan-awon sa mga estudyante ang bidyo nga, “What is the Purpose and Meaning of Life? Now You Know” (7:43). Pwede nimong dapiton ang mga estudyante nga ipakigbahin ang ilang namatikdan nga wala nila mabantayi samtang gisulat o gihulagway nila ang mga elemento sa plano.

Aron tun-an ang matag elemento sa plano sa kaluwasan, pwede nimong ipakigbahin ang mosunod nga mga bidyo.

Kinabuhi sa Wala pa Dinhi sa Yuta: Aron tabangan ang mga estudyante nga masabtan ang plano sa Langitnong Amahan sa kaluwasan ug mahanduraw ang tahas sa Manluluwas diha sa plano sa wala pa dinhi sa yuta, ikonsiderar ang pagpasalida sa mosunod nga bidyo “Introduction: Our Heavenly Father’s Plan” gikan sa time code 0:00 hangtod 2:16.

Kinabuhi Dinhi sa Yuta: Aron tabangan ang mga estudyante nga masabtan nga makatabang nato si Jesukristo sa bisan unsang kahimtang sa atong kinabuhi, ikonsiderar ang pagpasalida sa bidyo nga “Why We Need a Savior” (2:15).

Kinabuhi Human Dinhi sa Yuta: Aron tabangan ang mga estudyante nga masabtan kon unsay mahitabo dihang mamatay kita ug sa unsang paagi kita tabangan sa Manluluwas sa pagbuntog sa kamatayon, ikonsiderar ang pagpasalida sa bidyo nga “What Happens After We Die?” (1:40).