Welcome sa Daang Tugon: Leksiyon 1

Pasiuna sa Daang Tugon

Ang Daang Tugon Nagpamatuod sa Maamumahon nga Langitnong Amahan ug ni Jesukristo

Ang Daang Tugon gilangkuban sa mga pagtulun-an ug mga simbolo mahitungod ni Ginoong Jesukristo ug sa Iyang tahas isip Manluluwas sa kalibotan. Ang mga istorya sa Daang Tugon makatabang sa mga estudyante nga makakat-on bahin Kaniya ug makita sa unsang paagi Siya naapil sa atong mga kinabuhi. Kini nga leksiyon gituyo aron tabangan ang mga estudyante nga molambo ang ilang tinguha nga mapaduol sa Langitnong Amahan ug ni Jesukristo pinaagi sa ilang pagtuon sa Daang Tugon.

Pagpangandam sa estudyante: Ikonsiderar ang pagdapit sa mga estudyante sa pagrebyo sa ilang paboritong istorya gikan sa Daang Tugon ug pamalandongan kon unsay gitudlo sa maong istorya bahin sa Langitnong Amahan o ni Jesukristo.

Mga Posibleng Kalihokan sa Pagkat-on

Ang atong tutokan

Sa pagsugod sa leksiyon, hunahunaa kon unsaon nimo pagtabang sa mga estudyante nga mas tutokan pa ang Manluluwas diha sa Daang Tugon. Ang usa ka paagi sa paghimo niini mao ang pagbitay og pipila ka litrato sa Manluluwas sulod sa lawak sa dili pa magsugod ang klase. Human magsugod ang klase, pwede nimong pangutan-on ang mga estudyante kon pila ka litrato sa Manluluwas ang ilang nabantayan ug hisgoti kon nganong nabantayan o wala nila nabantayan ang mga litrato.

Ang lain nga paagi sa paghimo niini mao ang pagpasabot sa mga estudyante nga manan-aw sila og bidyo nga nagpakitag duha ka team: ang usa nakaputi ug ang lain nakaitom. Ang duha ka team magpasa-pasa og bola. Dapita ang mga estudyante nga saktong pagkaihap kon kapila nagpasahanay ang team nga nakaputi.

Ipasalida ang bidyo nga “Focus Test,” nga anaa sa ChurchofJesusChrist.org, gikan sa time code 0:00 hangtod 0:22. Dayon ihunong ang bidyo.

• Pila ka pasa ang imong naihap?

• Nakabantay ba ka kon unsay laing nahitabo diha sa bidyo? Kon oo, unsa?

  Ipasalida ang nahibiling bahin sa bidyo (gibalik niini ang samang pagpasahanay) ug dapita ang mga estudyante nga matikdan ang tanan nga morag wala nila makita sa una nilang pagtan-aw.

• Unsay imong nabantayan nga wala nimo nakita sa unang pagtan-aw?

  Kon kinahanglan, pwede nimong isulti nga naay mitabok sa salog nga tigulang nga babaye, gipulihan sa manggugubat nga ninja nga nagsul-ob og itom ang usa sa mga magdudula, nagkalo ang pipila ka lalaki, ug ang uban gipasa ang bola sa football imbes bola sa basketball.

• Nganong wala nimo makita kining mga butanga sa una nimong pagtan-aw?

• Sa unsang paagi tingali kini nga kasinatian susama sa usa ka tawo dihang magbasa sa mga istorya sa Daang Tugon?

Bisan hain niini nga pamaagi ang imong gamiton sa pagsugod sa leksiyon, seguradoa nga klarong masabtan sa mga estudyante nga, kon dili ta mag-amping, basin atong tutokan ang ubang butang ug malabyan ang unsay ikatudlo kanato sa Daang Tugon bahin sa Langitnong Amahan ug ni Jesukristo.

Basaha ang mosunod nga pamahayag ni Elder Michael T. Ringwood sa Seventy, nga mangita kon unsay mahimo natong makat-onan bahin sa Langitnong Amahan ug ni Jesukristo samtang atong basahon ang Daang Tugon.

Kita mao ang gitutokan sa plano sa Langitnong Amahan ug ang rason alang sa misyon sa atong Manluluwas.

Kapitulo human sa kapitulo [sa Daang Tugon] kita makadiskobre og mga ehemplo kon sa unsang paagi nga ang Langitnong Amahan ug si [Jesukristo] suod nga nalambigitsa atong kinabuhi. (“Kay Kita Gihigugma Pag-ayo sa Dios,” Liahona, Mayo 2022, 88)

• Matod pa ni Elder Ringwood, unsay gipakita kanato sa Daang Tugon bahin sa Langitnong Amahan ug ni Jesukristo?

Mahimong mahunahunaan sa mga estudyante ang mga kamatuoran nga parehas sa:

Kita mao ang gitutokan sa plano sa Langitnong Amahan ug ang rason alang sa misyon sa atong Manluluwas.

Ang Langitnong Amahan ug si Jesukristo suod nga nalambigit sa atong kinabuhi.

Hangyoa ang mga estudyante sa pagpakigbahin sa ilang gihunahuna ug gibati bahin niini nga mga kamatuoran ug nganong makahuloganon kini kanila. Dapita ang mga estudyante nga kompletohon ang mosunod nga pagsukod sa kaugalingon nga nakat-onan nga sila ra. Pwede nilang irekord ang ilang mga tubag sa journal sa pagtuon.

Hunahunaa ang imong mga kasinatian sa Daang Tugon.

• Sama sa unsa ang imong nasinati sa Daang Tugon?

• Kon aduna kay mga kasinatian sa Daang Tugon, nakatabang ba kini nga mobati kang mas napaduol sa Langitnong Amahan ug ni Jesukristo?

Samtang nagtuon ka niini nga leksiyon, pangayo og tabang pinaagi sa Espiritu Santo aron masayod unsay himoon aron mas mapaduol sa Langitnong Amahan ug ni Jesukristo pinaagi sa imong pagtuon sa Daang Tugon.

Ang Langitnong Amahan ug si Jesukristo sa Daang Tugon

Ikonsiderar ang paghangyo sa mga estudyante nga ipakigbahin ang ilang nahibaloan bahin sa Daang Tugon. Kon kinahanglan, pwede nimong ipakigbahin nga ang Daang Tugon nagsugod sa asoy sa Paglalang sa kalibotan ug kang Adan ug Eva. Giasoy niini ang mga istorya sa daghang propeta ug katawhan nga sagad nagpuyo sa Israel ug sa palibot niini ug natapos sa mga 400 BC. Dayon, ipasabot ang mosunod sa kaugalingon nimong mga pulong.

Samtang magtuon ka sa Daang Tugon, nagpasabot ni sa Ginoo o kang Jehova. Makatabang ang pagkahibalo nga si Jehova mao si Jesukristo. Kanunayng gituman ni Jehova ang kabubut-on sa Langitnong Amahan. Samtang magtuon ka bahin kang Jehova, makakat-on usab ka sa Langitnong Amahan, kinsa migiya ug mihatag Niya og gahom.

Patuyok nga ipakita ang pipila ka litrato nga nagpakita sa mga istorya sa Daang Tugon. (Makatabang tingali nga mangandam ka sa imong kaugalingon sa dili pa ang klase pinaagi sa mubong pagrebyo sa mga gipresentar nga istorya.) Sa tunga niini nga mga litrato, ibutang ang imahe ni Jesukristo. Pwede nimong gamiton ang mga imahe nga parehas sa mosunod.

Isip alternatibo, pwede nimong ipakita ang imahe ni Jesukristo ug dapiton ang mga estudyante nga maghunahuna og mga istorya sa ilang kaugalingon nga nagpakita sa Iyang kalambigitan ug gugma diha sa Daang Tugon. Pwedeng isulat sa mga estudyante ang yanong mga ulohan para sa maong mga istorya palibot sa imahe sa Manluluwas.

Gilista sa ubos ang mga istorya, nga magsugod sa ibabaw ug maglibot sa imahe patuo.

• Si Jose sa Ehipto (Genesis 37:23–28; 39:1–5). Human gipakigbahin ni Jose sa iyang pamilya ang damgo niya, giplanohan siyag daotan sa iyang mga igsoon.

• Gitunga ni Moises ang Pulang Dagat (Exodo 14:10, 13–16, 21–22). Miikyas gikan sa Ehipto ang mga anak sa Israel dihang gigukod sila sa kasundalohan ni Paraon aron himoon silang ulipon pag-usab.

• Bitin diha sa poste (Numeros 21:4–9). Human giluwas sa Ginoo ang mga Israelita gikan sa Ehipto ug milagrosong gihatagan og tinapay gikan sa langit, mibagolbol ang mga Israelita batok sa Dios.

• David ug Goliath (1 Samuel 17:43–49). Gihagit sa Filistihanong sundalo nga si Goliath ang Israel nga ipadala ang ilang kinamaayohang sundalo aron makig-away niya. Miboluntaryo si David nga atubangon siya.

• Nagdilaab nga hudno (Daniel 3:4–6, 12–13, 16–25). Si Hari Nabucodonosor nagpahimo og bulawang imahe ug gipatawag ang tanang magmamando sa iyang yuta aron ipahinongod ang kini.

• Langob sa leyon (Daniel 6:7, 10, 16–23). Gihimong magmamando ni Dario si Daniel sa Babelonya. Giplanohan siya og daotan sa ubang mga magmamando aron mawad-an siyag bili sa hari.

Ikonsiderar ang pagpares-pares sa mga estudyante o paghimo og ginagmayng grupo. Pwedeng mopili ang mga estudyante og usa o daghan pang mga istorya, basahon ang konektadong mga bersikulo, ug hisgotan ang mosunod nga mga pangutana.

• Sa unsang paagi kini nga istorya nagpakita sa gugma o kalambigitan sa Langitnong Amahan ug ni Jesukristo?

• Sa unsang paagi makatabang kanimo ang pagsabot sa istorya sa ingon niini nga paagi?

Pwede nimong dapiton ang mga estudyante nga ipakigbahin sa klase ang mga panabot nga nakuha gikan sa ilang panaghisgot.

Kon wala kini mahisgoti sa mga estudyante, ipasabot nga ang pagtuon kon sa unsang paagi ang pagpanginlabot sa Ginoo sa mga kinabuhi sa mga indibiduwal diha sa Daang Tugon makatabang nato sa pagpamalandong kon sa unsang paagi Siya nanginlabot sa atong mga kinabuhi. Dapita ang mga estudyante nga mamalandong kon giunsa sila pagpanalangin ug pagtabang sa Ginoo. Hangyoa ang pipila ka estudyante nga ipakigbahin ang ilang mga hunahuna ug kasinatian kon dili kini sobra ka personal.

Pagtuon sa Daang Tugon

Maayong kahigayonan kini nga pahinumdoman ang mga estudyante sa ilang mga tumong sa pagtuon sa kasulatan kada adlaw. Pwede nimong dapiton ang mga estudyante nga tinguhaon ang giya sa Espiritu Santo samtang ilang rebiyohon, usabon, o maghimo sa ilang mga tumong sa pagtuon sa kasulatan. Pwede nimong pangutan-on ang mga estudyante kon aduna ba kanila ang gustong mopakigbahin sa ilang mga tumong diha sa klase aron makakuha og ideya ang uban.

Ikonsiderar ang pagdapit sa mga estudyante nga hisgotan isip usa ka klase o isulat sa ilang mga journal sa pagtuon ang ilang mga tubag sa mosunod nga mga pangutana.

• Unsay imong nakat-onan karon nga para nimo makatabang sa imong pagtuon sa Daang Tugon?

• Nganong panalangin para nimo ang pagsinati ug pag-ila sa gugma ug paglambigit sa Langitnong Amahan ug ni Jesukristo sa imong kinabuhi?

Aron tabangan ang mga estudyante sa ilang pagtuon sa Daang Tugon karong tuiga, pwede nimo silang dapiton nga markahan ang ilang mga kasulatan o butangan og mubong sulat ang ilang mga journal sa pagtuon sa matag higayon nga makakita sila og ebidensya sa gugma o paglambigit sa Dios sa kinabuhi sa Iyang mga anak. Ikonsiderar ang pagtapos pinaagi sa imong pagpamatuod kon sa unsang paagi makatabang ang pagtuon sa Daang Tugon aron mas mapaduol kita sa Langitnong Amahan ug ni Jesukristo ug makabaton og hugot nga pagtuo nga nalambigit Sila sa atong mga kinabuhi.

Pwede nimong dapiton ang mga estudyante nga ipakigbahin sa ilang mga pamilya ang ilang nakat-onan karon. Makatabang kini sa ilang mga pamilya samtang nagtuon sila sa Daang Tugon.

Dugang nga mga Kapanguhaan

Unsay atong nahibaloan bahin kang Jehova?

Si Jehova mao si Jesukristo sa wala pa dinhi sa yuta ug mianhi sa yuta ingon nga anak ni Maria (Mosiah 3:8; 15:1; 3 Nephi 15:1–5). Kasagaran, kon makita sa Daang Tugon ang pulong nga Ginoo, nagpsabot kini kang “Jehova.”

Si Jehova mao si Kristo: Si Jehova nailhan sa karaang mga propeta (Exodo 6:3; Abraham 1:16). Si Apostol Pablo nagtudlo nga si Kristo mao si Jehova sa Daang Tugon (Exodo 17:6; 1 Mga Taga-Corinto 10:1–4). Ang igsoon ni Jared diha sa Basahon ni Mormon nakakita kang Kristo sa wala pa dinhi sa yuta ug misimba Kaniya (Ether 3:13–15). Si Moroni mitawag usab kang Kristo og “Jehova” (Moroni 10:34). Sa Templo sa Kirtland, nakita ni Joseph Smith ug Oliver Cowdery ang nabanhaw nga Jehova (Doktrina ug mga Pakigsaad 110:3–4). (Giya ngadto sa mga Kasulatan, “Jehova,” scriptures.ChurchofJesusChrist.org)

Si Presidente Dallin H. Oaks sa Unang Kapangulohan mitudlo:

Sa wala pa ang Pagkapukan, ang atong Langitnong Amahan direktang nakig-istorya nila ni Adan ug ni Eva. Pagkahuman niana, ang Amahan mipaila sa Iyang Bugtong Anak, si Jesukristo, isip atong Manluluwas ug Manunubos ug mimando kanato nga “maminaw Kaniya.” Gikan niini nga mando kita makaingon nga ang mga rekord sa kasulatan bahin sa mga pulong nga gisulti sa “Dios” o sa “Ginoo” hapit sa kanunay mga pulong ni Jehova, ang atong nabanhaw nga Ginoo, si Jesukristo. (“Ang mga Pagtulon-an ni Jesukristo,” Liahona, Mayo 2023, 102)

Nganong importanteng tun-an ang Biblia?

Si Elder D. Todd Christofferson sa Korum sa Napulog Duha ka Apostoles mitabang sa pagtubag niining pangutanaha sa bidyo nga “The Blessings of Scripture.”

Dugang nga mga Kalihokan sa Pagkat-on

Unsay imong nahibaloan bahin sa Daang Tugon?

Aron tabangan ang mga estudyante nga mapamilyar sa ilang kaugalingon ang pipila sa dagkong mga detalye sa Daang Tugon, ikonsiderar ang pagpakita sa mosunod nga pasulit. Dapita ang mga estudyante sa pagtubag sa matag pangutana diha sa ilang mga journal.

1. Kanus-a nahitabo ang Daang Tugon?

   1. Human sa pagkatawo ni Jesukristo hangtod sa pipila ka gatosan ka tuig sa wala pa si Joseph Smith.

   2. Sukad sa panahon ni Adan ug Eva hangtod sa pipila ka gatosan ka tuig sa wala pa matawo si Jesukristo.

   3. Sukad sa panahon ni Moises hangtod nga mibiya sa Jerusalem si Lehi uban sa iyang pamilya.

   4. Sukad 200 ka tuig sa wala pa si Kristo hangtod 200 ka tuig human ni Kristo.

2. Asa nahitabo ang Daang Tugon?

   1. Sa usa ka dapit sa Amerika.

   2. Kadagdahan sa kontinente sa Africa.

   3. Kadaghanan sulod ug palibot sa yuta sa Israel.

   4. Wala mahibaloi.

3. Hain sa mosunod ang pipila sa dagkong mga tema o mga hilisgotan sa Daang Tugon? Pilia ang tanang haom nga tubag.

   1. Ang pagpundok ug pagkatibulaag sa Israel.

   2. Ang pagtawag ug pag-ordin sa mga Apostol.

   3. Paghimo ug pagtuman sa mga pakigsaad uban sa Ginoo.

   4. Ang tahas sa mga propeta sa plano sa Langitnong Amahan.

Saktong mga tubag: 1-B, 2-C, 3-A, C, D

Pwede usab nimong ipasalida ang bidyo nga About the Old Testament, nga anaa sa ChurchofJesusChrist.org.

Mga Basahon diha sa Daang Tugon

Mahimong makatabang sa mga estudyante ang pagkahibalo kon giunsa pag-organisar ang Daang Tugon. Kasagaran gihan-ay ang mga basahon sa Biblia sa mga Kristohanon ngadto sa upat ka kategorya: “Ang balaod” (Genesis–Deuteronomio), “Kasaysayan” (Joshua–Ester), “Balaknong mga basahon” (Job–Awit ni Solomon), ug “Ang mga propeta” (Isaias–Malaquias). Pwede nimong dapiton ang mga estudyante nga ilatid o ilista kini nga mga kategorya diha sa ilang mga kasulatan.

Ang Hubad ni Joseph Smith sa Biblia

Makabenepisyo ang mga estudyante sa pagsabot kon unsa ang Hubad ni Joseph Smith sa Biblia ug kon giunsa kini paggamit. Ikonsiderar ang pagpangutana kon unsay ilang nahibaloan na bahin niini.

Seguradohang klaro nga gisugo sa Ginoo si Joseph Smith, isip kabahin sa iyang propetikanhong misyon, nga susihon ang matag teksto sa Biblia ug hubaron, ipahiuli, ug usbon kini ubos sa inspirasyon. Kini nga koleksyon sa mga kausaban gitawag nga Hubad ni Joseph Smith sa Biblia. Daghan niini nga mga kausaban makita diha sa mga footnote o sa apendiks sa edisyon sa mga Santos sa Ulahing mga Adlaw sa Biblia. Ang basahon ni Moises diha sa Perlas nga Labing Bililhon gipadayag usab isip bahin niana nga hubad.

Pwede nimong dapiton ang mga estudyante nga tan-awon ang usa o kapin pang mga ehemplo gikan sa mosunod nga tsart sa dinasig nga mga rebisyon ni Joseph Smith.

Orihinal nga Tudling	Giusab nga Tudling
Genesis 6:5-6	Moises 8:22–25
Exodo 7:3, 13	HJS Exodo 7:3 footnote a, HJS Exodo 7:13 footnote a
Exodo 33:20	HJS Exodo 33:20 (makita sa apendiks sa Santos sa Ulahing mga Adlaw nga edisyon sa Biblia)