“Adan ug Eva,” Mga Istorya sa Daang Tugon (2022)
“Adan ug Eva,” Mga Istorya sa Daang Tugon
Genesis 2–3; Moises 3–5; Abraham 5
Adan ug Eva
Pagbaton og mga kasinatian pinaagi sa paghimo og mga pagpili
Si Adan ug si Eva mao ang unang mga anak sa Langitnong Amahan nga nagpuyo dinhi sa yuta. Mipuyo sila sa matahum nga Tanaman sa Eden, gilibutan sa tanang nagkalain-laing mga tanom ug mga kahoy. Ang Dios nga atong Langitnong Amahan miduaw kanila ug nakigsulti kanila.
Genesis 2:8–9; 3:8; Moises 3:8–9; Abraham 5:8, 14–19
Ang Dios mitugot kanila sa pagkaon sa bunga sa matag kahoy gawas sa usa. Kon sila mikaon gikan sa kahoy sa kahibalo sa maayo ug sa dautan, sila kinahanglan nga mopahawa sa tanaman ug sa kadugayan mamatay. Namakak si Satanas ngadto ni Adan ug ni Eva. Miingon si Satanas nga kon sila mokaon sa bunga, mahibalo sila sa maayo ug sa dautan apan dili sila mamatay.
Genesis 2:16–17; 3:1–5; Moises 3:9; 4:6–11; Abraham 5:9, 12–13
Mipili si Eva sa pagkaon sa bunga.
Si Eva mihatag ni Adan og pipila sa bunga. Mipili usab siya sa pagkaon niini.
Miduaw ang Dios ug ang Ginoo kanila, apan si Adan ug si Eva nahadlok ug mitago. Ang Dios nangutana kon sila mikaon ba sa bunga sa kahoy sa kahibalo sa maayo ug sa dautan.
Genesis 3:8–13; Moises 4:13–14
Misulti si Adan ug si Eva sa Dios nga sila mipili sa pagkaon sa bunga. Tungod sa ilang pagpili, kinahanglang mobiya sila sa Tanaman sa Eden. Nahimulag sila gikan sa Dios, apan Siya adunay plano alang kanila. Karon sila nahibalo na sa maayo gikan sa dautan ug makabaton og mga anak.
Genesis 3:16–24; Moises 4:15–31
Misaad si Adan ug si Eva sa pagsunod sa tanang mga sugo sa Dios. Gitudloan sila sa paghimo og mga sakripisyo sa hayop. Sa panahon nga sila misunod, mas nakat-unan nila ang mahitungod sa Anak sa Dios nga si Jesukristo. Silang duha mibati og dako nga kalipay tungod kay Siya motabang sa ilang pamilya sa pagbalik ngadto sa Dios.