“Jose ug ang Gutom,” Mga Istorya sa Daang Tugon (2022)
“Jose ug ang Gutom,” Mga Istorya sa Daang Tugon
Jose ug ang Gutom
Usa ka kahigayonan sa usa ka igsoong lalaki nga mahiusa ang iyang pamilya
Ang pamilya ni Jacob gigutom tungod sa gutom. Mao nga gipadala ni Jacob ang iyang mga anak nga lalaki ngadto sa Ehipto sa pagpalit og pagkaon. Gipabilin niya ang iyang kamanghoran nga anak nga lalaki, si Benjamin, sa balay. Nahadlok siya nga mawala kaniya si Benjamin sama sa pagkawala sa iyang anak nga si Jose daghang tuig na ang milabay. Wala siya masayod nga ang mas magulang niyang mga anak nga lalaki mibaligya kang Jose isip usa ka ulipon.
Niini nga higayon, si Jose maoy bantogan nga lider sa Ehipto. Siya ang nagdumala sa pagbaligya og pagkaon panahon sa gutom. Ang mga igsoong lalaki ni Jose nakigkita ni Jose ug mihangyo kaniya og pagkaon. Wala sila makaila kaniya.
Si Jose nakaila kanila, apan nagpakaaron-ingnon siya nga wala makaila kanila. Nangutana siya bahin sa ilang pamilya aron masuta kon ang iyang amahan ug ang iyang igsoong si Benjamin buhi pa.
Dayon gihatagan ni Jose ang iyang mga igsoong lalaki og pagkaon. Giingnan niya sila nga dili mobalik alang sa dugang pa nga pagkaon gawas kon ilang madala uban nila ang ilang kinamanghoran nga igsoon, si Benjamin.
Dihang ang pamilya nahutdan na usab og pagkaon, nasayod si Jacob nga kinahanglan niyang ipadala si Benjamin kuyog sa iyang ubang mga anak nga lalaki balik sa Ehipto. Si Jacob nahadlok pa gihapon bahin sa pagpakuyog ni Benjamin. Apan si Juda, usa sa mga igsoong lalaki, misaad nga iyang ampingan nga luwas si Benjamin.
Dihang ang mga igsoong lalaki namalik sa Ehipto, gihimo ni Jose nga daw si Benjamin mikawat sa kupa nga plata. Gusto niyang makita kon ang iyang mga magulang nga mga igsoong lalaki nag-usab na. Si Juda nangaliyupo kang Jose sa dili pagsilot ni Benjamin apan si Juda na lang ang silotan.
Nalipay si Jose sa pagkakita nga ang iyang mga igsoong lalaki nausab na. Gihigugma nila si Benjamin pinaagi sa pagpanalipod kaniya. Mao nga, sa kataposan, gitug-anan sila ni Jose kon si kinsa siya.
Gipasaylo ni Jose ang iyang mga igsoong lalaki sa pagbaligya kaniya aron mahimong usa ka ulipon. Miingon si Jose nga mao kadto ang paagi sa Ginoo nga matabangan ang ilang pamilya nga makasugakod sa gutom.
Ang mga igsoong lalaki ni Jose namalik ngadto sa ilang amahan, si Jacob, ug giingnan siya sa tanan nga nahitabo. Si Jacob mipabalhin sa iyang tibuok pamilya ngadto sa Ehipto.
Ang Paraon miabi-abi sa pamilya ni Jacob. Gihatagan niya sila og yuta ug mga hayop aron duna silay daghan nga pagkaon. Ang pamilya ni Jacob nagpuyo nga malinawon sulod sa taas nga panahon.