“Ang Pagpalabay,” Mga Istorya sa Daang Tugon (2022)
“Ang Pagpalabay,” Mga Istorya sa Daang Tugon
Ang Pagpalabay
Gipanalipdan sa Ginoo
Ang Paraon dili motugot nga buhian ang mga Israelita, mao nga ang Ginoo miingon kang Moises nga magpadala Siya og usa ka kataposan nga silot. Ang kamagulangan nga anak sa matag pamilya sa yuta sa Ehipto mamatay, bisan ang panganay sa ilang mga hayop.
Ang Ginoo misaad nga kon ang mga Israelita mosunod sa Iyang mga pahimangno, ang silot molabay kanila ug dili mosakit kanila.
Giingnan sa Ginoo ang matag pamilya nga Israelita sa pagsakripisyo og walay tatsa nga laki nga karnero ug ipintal ang dugo sa karnero dapit sa mga haligi sa pultahan sa ilang mga balay.
Giingnan sa Ginoo ang mga Israelita nga lutoon ug dalion sa pagkaon ang karnero. Samtang nangaon sila, kinahanglan nga nakailis na sila og sinina ug andam nga mobiya sa ilang mga balay. Ang Ginoo miingon nga kon ang mga Israelita mihimo niining mga butanga, ang ilang kamagulangan nga anak luwas gikan sa silot.
Sama sa gipasidaan sa Ginoo, ang silot miabot. Tanan nga kamagulangan nga anak sa Ehipto nangamatay, lakip ang kamagulangang anak nga lalaki sa Paraon. Apan ang silot milabay ra adtong matag balay nga dunay dugo sa karnero sa ilang mga haligi sa pultahan. Ang kamagulangang anak sa mga Israelita naluwas tungod kay gisunod nila ang Ginoo.
Dihang nakita sa Paraon nga namatay ang iyang kaugalingong anak nga lalaki tungod niini nga silot, giingnan niya si Moises ug Aaron nga dad-on ang tanang Israelita ug mobiya sa Ehipto.
Namiya ang mga Israelita, apan nasuko ang Paraon. Gipundok niya ang iyang kasundalohan ug mga karwahe ug gigukod ang mga Israelita.
Ang mga Israelita nagkampo duol sa Pulang Dagat. Wala madugay nagukdan sila sa Paraon ug sa iyang kasundalohan. Dihang nakita sa mga Israelita ang mga Ehiptohanon nga nangabot, nangahadlok sila. Apan giingnan ni Moises ang mga Israelita nga ang Ginoo manalipod kanila.
Dihang nagkaduol ang mga Ehiptohanon, giingnan sa Ginoo si Moises sa pagpataas sa iyang sungkod. Gihimo ni Moises, ug ang Ginoo mibahin sa dagat. Ang mga Israelita milabang sa dagat sa uga nga yuta. Nanagan sila palayo sa Paraon ug sa iyang kasundalohan.
Ang kasundalohang Ehiptohanon migukod sa mga Israelita. Dihang luwas na ang mga Israelita sa pikas bahin sa dagat, gipabalik sa Ginoo og tikyop ang tubig. Ang kasundalohang Ehiptohanon nangalumos sa dagat.
Ang mga Israelita gawasnon na sa kataposan. Nanganta sila, nanagsayaw, ug nagpasalamat sa Ginoo. Kanunay nilang gihinumdoman ang Pagpalabay isip panahon nga ang Ginoo miluwas sa ilang kinabuhi ug migiya kanila pagawas sa Ehipto.